1 | Tatalo—“Lafo Atu o Outou Popolega Uma iā te Ia”

LE MANATU O LE TUSI PAIA: “Lafo atu o outou popolega uma [i le Atua], auā o loo manatu mamafa mai o ia iā te outou.”—1 PETERU 5:7.

O le ā Lona Uiga?

Ua valaaulia i tatou e Ieova le Atua e talanoa atu iā te ia, i so o se popolega o loo mamafa i o tatou mafaufau ma loto. (Salamo 55:22) E mafai ona tatalo atu iā te ia i so o se faafitauli, e tusa pe telē pe laʻitiiti. Pe afai o se mea e tāua iā i tatou, e tāua foʻi iā Ieova. O le tatalo atu iā te ia o se laasaga tāua mo le mauaina o le filemu o le mafaufau.—Filipi 4:6, 7.

O Auala e Fesoasoani Mai Ai

Pe a tatou tauivi ma faafitauli o le mafaufau, e tatou te ono lagona le tuua toʻatasi. E iai taimi e lē malamalama atoatoa ai isi i o tatou tulaga. (Faataoto 14:10) Pe a taʻu atu i le Atua i le tatalo o tatou faalogona, o le a ia faafofoga mai ma le agalelei, ma e malamalama i o tatou faalogona. E silasila mai Ieova ma e na te silafia o tatou tigā ma faafitauli, ma e finagalo ia tatou tatalo atu iā te ia i so o se mea e tatou te popole ai.—2 Nofoaiga a Tupu 6:29, 30.

O le talanoa atu iā Ieova i le tatalo, e faamalosia ai lo tatou mautinoa e manatu mamafa mai o ia iā i tatou. O le a pei ai o tatou faalogona o le faisalamo o lē na tatalo: “Ua e silasila mai i loʻu puapuaga; ua e silafia foʻi loʻu matuā mafatia.” (Salamo 31:7) O le iloaina o loo silafia lelei e Ieova tulaga o loo tatou mafatia ai, e fesoasoani lea e tatou te onosaia ai tulaga faigatā. Peitaʻi, e lē na o o tatou mafatiaga e na te silafia. E sili atu ona malamalama atoatoa o ia i mea o loo tatou fesagaʻia nai lo o se isi lava, ma e fesoasoani mai ia tatou maua faamāfanafanaga, ma faalaeiauga mai i le Tusi Paia.

Auala o Loo Fesoasoani ai le Tusi Paia iā Julian

Aafiaga o Popolega iā te Aʻu

“O loo oʻu tauivi ma faalogona popole, ma le fenuminumiaʻi o oʻu mafaufauga (OCD). O nisi taimi, e faafuaseʻi lava ona ou aafia i popolega. O nisi taimi ua lelei, ae o isi taimi ua ou matuā popole lava e aunoa ma ni māfuaaga. Pe a matou faatasitasi ma isi tagata, o taimi na e sili ona ou popole ai, ona ou te popole i ni o latou manatu e faatatau iā te aʻu.

“E faia e aʻu uō e malamalama lelei i loʻu tulaga le mea sili e fesoasoani mai ai. O le mea moni, e iai taimi e latou te fai mai ai ni tala ou te lē fia faalogo i ai. Peitaʻi, ou te matuā talisapaia lava a latou taumafaiga e fesoasoani mai.

“E iai taimi e faigatā ai ona ou tatalo ona o oʻu popolega, ma le fenuminumiaʻi o loʻu mafaufau. E tele taumafaiga ou te faia ina ia uaʻi atu ai a o oʻu talanoa iā Ieova i le tatalo. O le tele o mea ou te mafaufau i ai, e iʻu ai ina ou lē mautonu. Pe a lē mafai ona pulea oʻu mafaufauga, e faigatā ona faamatala atu iā Ieova oʻu faalogona, ma mea o loo oʻu mafaufau i ai.”

Auala o Loo Fesoasoani Mai ai le Tusi Paia

“Ua ou iloa mai i le suʻesuʻeina o le Tusi Paia, e lē manaʻomia ona uumi pe tele upu o a tatou tatalo, ina ia faafofogaina ai e le Atua. I nisi taimi pe a faigatā ona faamatala atu oʻu faalogona, e pau lava upu o laʻu tatalo: ʻIeova, faamolemole ia e fesoasoani mai.’ O le taimi lava lenā ou te lagona ai, o loo malamalama Ieova i oʻu faalogona, ma tali mai i mea o loo oʻu manaʻomia. E lē gata i le tatalo, ae ou te saʻilia foʻi togafitiga faafomaʻi. Ou te matuā faafetaia nei fesoasoani e lua, ona ua telē ai le suiga o loʻu tulaga. E ui e tele taumafaiga e fai e tatalo ai i loʻu Tamā i le lagi mo le fesoasoani, ae ou te faia lava ona ou te mautinoa o loo silasila alofa mai, ma e finagalo e fesoasoani mai.”