UA FESILI MAI TALAVOU

Pe e Tāua le Taʻutaʻua i le Initaneti?

Ua faapea mai se talavou e igoa iā Elaine: “Ina ua ou vaai i le toʻatele o tagata e faauō i le Initaneti ma tamaiti e matou te aʻoʻoga, na ou manatu, ʻTaʻi tele a latou uō!’ O le mea moni, na tau tigā ai loʻu loto.”

Pe na iai se taimi na e manatu ai faapena? Afai o lea, o le a fesoasoani lenei mataupu iā te oe ina ia ʻalofia ai le fia taʻutaʻua i luga o le Initaneti.

O ā lamatiaga?

Ua faapea mai le Tusi Paia i le Faataoto 22:1, “e sili le manaʻo i le igoa lelei nai lo o le tele o le tamaoaiga.” O lea, e leai se afāina o le manaʻo i se talaaga lelei, pe manaʻo e fiafia mai isi iā te oe.

Ae o nisi taimi, o le faanaunauga ina ia fiafia mai isi iā te oe, e iʻu atu ai i le fia taʻutaʻua. Pe e iai se lamatiaga o lenā mea? O le manatu lenā o Onya e 16 tausaga. Na ia faapea mai:

“E iai tagata ua ou vaai o faia gaoioiga lē atamai, e pei o le puna ese mai i le fogāfale lua o se faleaʻoga ina ia taʻutaʻua ai.”

E iai nisi e latou te puʻeina ni vitiō a o latou faia gaoioiga e lamatia ai, ma tuu i luga o le Initaneti ina ia faauaʻi mai ai isi iā i latou. O se faataʻitaʻiga, e iai talavou ua latou tuuina i luga o le Initaneti ni vitiō o loo faaalia ai o loo latou ʻaia pauta tā mea, o se mea e lē tatau ona faia e se tasi!

Ua faapea mai le Tusi Paia: “Ia aua lava neʻi faia se mea . . . ma le faasausili.”—Filipi 2:3.

Ia mafaufau i ai:

Pe e matuā tāua iā te oe le taʻutaʻua i luga o le Initaneti?
Po o le a e tuu lou ola i se tulaga lamatia ina ia fiafia mai ai tagata iā te oe?

Tala a isi talavou

“E lē lelei le fia taʻutaʻua o se tasi, pe a amata ona iai le manatu e faapea, ia fai so o se mea ina ia taʻutaʻua ai, e aofia ai le auala e tautatala, laʻei, pe gaoioi ai. E leai se uiga e te taʻutaʻua ai, pe afai o loo e faia mea e te manatu e lē saʻo.”—Leianna.

“Faafoliga atu e taʻutaʻua”

E lē o taimi uma e faia ai e tagata gaoioiga e lamatia ai, ina ia taʻutaʻua ai. Ua taʻua e Erica e 22 tausaga se isi auala ua faaaogā e isi tagata:

“E tuu e tagata le tele o o latou ata i luga o le Initaneti, ma pei ai e tele a latou uō mamae o loo latou faifaimea faatasi, ma foliga atu ai o i latou o ni tagata taʻutaʻua.”

Ua faapea mai Cara e 15 tausaga, e faaaogā e nisi tagata faiga taufaasesē ina ia faafoliga atu ai e taʻutaʻua. Na ia faapea mai:

“E iai tagata e latou te puʻeina ata e foliga atu ai e pei o loo iai i se patī, ae o le mea moni o la sa iai i le fale.”

Na taʻutino mai e Matthew e 22 tausaga, lona faia o se mea faapena:

“Na ou tuuina se ata i luga o le Initaneti ma tuu i ai le faaupuga Mount Everest, e ui ou te leʻi oo lava i Asia!”

Ua faapea mai le Tusi Paia: “Matou te mananaʻo ina ia faia mea uma ma le faamaoni.”—Eperu 13:18.

Ia mafaufau i ai:

Pe e te tuuina i luga o le Initaneti ni mea e lē moni, ina ia e taʻutaʻua ai?
Pe e atagia mai i ata ma faamatalaga e te tuuina i luga o le Initaneti, le ituaiga tagata e iai oe ma mea e te talitonu i ai?

Tala a isi talavou

“E fai e tagata so o se mea ina ia fiafia ai le toʻatele i mea e latou te tuuina i le Initaneti. Ae o ā ni mea e te manaʻo e iloa ai oe e tagata? Pe e te manaʻo e iloa oe o se tasi e tautala lē mafaufau, lē talafeagai le auala e laʻei ai, pe mimita foʻi ona o le tele o ana mea? Pe e te manaʻo e iloa oe o se tasi e iai ni ona uiga lelei, ma o sē e naunau moni i isi? O se mea lelei pe a fiafia tagata iā te oe, ae ia faamautinoa e saʻo le māfuaaga e fiafia atu ai tagata.”—Hannah.

Pe e tāua pe a toʻatele tagata e matou te faauō ma fiafia i oʻu ata?

O le manatu o le toʻatele, o le tele lava o tagata e tou te faauō i le Initaneti ma fiafia i mea e te tuuina i ai, o lou taʻutaʻua foʻi lenā. O faalogona foʻi na sa iai iā Matthew, lea na taʻua muamua. Na ia taʻutino mai:

“Ou te fesili i tagata, ʻE fia ni tagata ua tou faauō i luga o le Initaneti?’ pe ʻO le ā se toʻatele na oo i ai le fuainumera o tagata na fiafia i se mea na e tuuina i le Initaneti?’ Ina ia toʻatele aʻu uō i luga o le Initaneti, ou te faauō i so o se tagata ma le faamoemoe e latou te toe faauō mai. Na amata ona iā te aʻu se uiga o le fia taʻutaʻua, ma ua atili ai ona o fesootaʻiga i le Initaneti.”

Tuufaatasiga o Ata: 1. O se teine talavou o loo vaai pe toʻafia nisi o fiafia i se mea na ia tuuina i le Initaneti, ma o loo ʻataʻata i lana telefoni. 2. O loo ʻai e lenā teine talavou se sukalati mai i se ipu. 3. O loo tuu e le teine lona lima i lona manava e pei ua tigā. — O le fia taʻutaʻua i le Initaneti, e tai pei lava o meaʻai ia e leai se malosi e maua ai. E na o sina taimi lava e manaia ai, ae uma ane e maʻi ai

Na mātauina e Maria e 25 tausaga, o nisi tagata e fua le latou vaaiga e faatatau iā i latou lava, i le tele o tagata e latou te faauō i le Initaneti, ma le tele e fiafia ai tagata i mea e latou te tuuina i le Initaneti. Ua ia faapea mai:

“Pe a tuu e se teine sona ata i luga o le Initaneti ae e lē toʻatele ni tagata e fiafia i ai, o le a manatu lea teine, o ia e auleaga. E ui e lē saʻo lenā manatu, ae o le ituaiga mafaufauga lenā e oo i le toʻatele o tagata. E tusa o lenā ua latou toe faatigā iā i latou lava.”

Ua faapea mai le Tusi Paia: “Aua neʻi o tatou mimitavale, pe faatautavā i isi, ma matauʻa i mea a isi.”—Kalatia 5:26.

Ia mafaufau i ai:

Pe a e faaaogāina le Initaneti, pe e iā te oe se agaga e faatautavā ai i isi?
Pe e sili atu ona tāua iā te oe pe a toʻatele tagata e tou te faauō i le Initaneti, nai lo o le atiaʻe o ni faauōga moni ma tagata e alolofa iā te oe?

Tala a isi talavou

“Ina ia taʻutaʻua i le Initaneti, e ao ona avea oe ma ituaiga o tagata lea e mananaʻo ai isi iā te oe, ma e uma ane ua pei ai oe o i latou na. O le a iʻu ai ina e popole tele i le vaaiga a tagata iā te oe, ma mea e fai ina ia faafiafia ai i latou. E lē leaga pe a e manaʻo e fiafia mai tagata iā te oe, ae pe a e fia taʻutaʻua loa, e na o le pau lava lenā o le mea o le a alu i ai lou mafaufau.”—Joshua.

Faaeteete i le “faatagā lotomaulalo ae gugutu”

Pe na e mātauina nisi tagata e faatagā faitio, ae o le mea moni o loo gugutu i mea ua latou faataunuuina?

“Talu ona maua laʻu taavale fou, e lē uma lava le fai mai o tagata e fia tiʻetiʻe ai!”
“O loʻu ita ia ae fai mai soo tagata ua manaia loʻu lusi!”

E mai i na faamatalaga, o loo faatagā faitio le tagata ina ia faafoliga atu ai e lotomaulalo, ae o le mea moni o loo gugutu.

Lapataʻiga: O le faia o ni faamatalaga gugutu faapena, e masani lava e lē iʻu i se lelei, auā e iloa lelei e tagata le māfuaaga ua e fai ai na faamatalaga. O le iʻuga, o le a sili atu ona lē fiafia tagata i lou taumafai e faafoliga atu e te lē o gugutu, nai lo o le faaali saʻo atu lava o loo e gugutu.

O le isi taimi e te toe tuuina ai i le Initaneti se faamatalaga po o se ata, ia faaeteete i le faatagā lotomaulalo ae e gugutu. Ia usitaʻia le fautuaga atamai lenei a le Tusi Paia: “Ia viia oe e se tagata e te lē masani ai ae e lē o lou lava gutu.”—Faataoto 27:2.