Pe e Mafai e ni Faalapotopotoga Ona Tausia le Filemu i le Lalolagi?

O loo faaauau ona fetauaʻi ma vevesi atunuu o le lalolagi. O le iʻuga, ua faia e Malo Aufaatasi ma isi faalapotopotoga taumafaiga e maua le filemu, e ala i le tofia o ni o latou sui e galulue i vaipanoa o loo fetauaʻi. O lo latou faamoemoe e fesoasoani i tagata i nei atunuu vevesi ina ia maua ni olaga mautū ma saogalemu. Ua faapea mai António Guterres, o le Failautusi Aoao o Malo Aufaatasi: “E matuā tāua taumafaiga a Malo Aufaatasi e tausia le filemu i le mauaina o se lalolagi filemu.”

E iai itu ua taulau ai taumafaiga a Malo Aufaatasi i tausaga ua teʻa. O se faaaʻoaʻoga, ua latou puipuia tagata lautele, toe faafoʻi tagata sulufaʻi i o latou atunuu, faaoo atu meaʻai ma fesoasoani laveaʻi, ma toe faaleleia auaunaga mo le lautele. Peitaʻi, e tele faafitauli e faatapulaa ai a latou taumafaiga e tausia le filemu. Pe e iai se vaifofō moni i le mauaina o se lalolagi filemu? O le ā le tali a le Tusi Paia?

Faafitauli i le tausia o le filemu, ma vaifofō ua saunia e le Tusi Paia

Faafitauli o le faigatā ona galulue faatasi. E lē faigofie le galulue faatasi o ni faalapotopotoga faavaegaʻau ma ni faalapotopotoga e saunia auaunaga mo tagata lautele, aemaise pe afai e eseese o latou atunuu. E iai taimi e lē mafai ai ona latou galulue soosootauʻau, ona e feteenaʻi o latou manatu ma sini.

Le vaifofō ua saunia e le Tusi Paia: “O le a faatūina ai e le Atua o le lagi o le malo . . . o le a ia tuʻimomomoina ma faaumatia ia malo uma [faigāmalo a tagata], ae e tumau lea malo e faavavau.”—Tanielu 2:44.

Faafitauli o le lē lava o fesoasoani ma tomai. E faatapulaa taumafaiga a faalapotopotoga e tausia le filemu, ona o le lē lava o fesoasoani e pei o tagata galulue, o tupe, ma isi alagāʻoa. E lē gata i lea, ua tele ina lamatia ola o tagata e tausia le filemu, ona o fetauaʻiga i nofoaga e galulue ai.

Le vaifofō ua saunia e le Tusi Paia: ʻO le Atua o lo tatou Alii o Iesu Keriso, na ia faanofo Iesu i lona itu taumatau i mea o i le lagi, e sili ona maualuga nai lo o malo, o pule, o ē malolosi.’—Efeso 1:17, 20, 21.

Ua foaʻi atu e Ieovaa le Atua o Lē e ona le malosi uma lava, le tele o fesoasoani iā Iesu le Tupu ua tofia o le Malo le Atua. (Tanielu 7:13, 14b) Ua foaʻi atu foʻi e le Atua iā Iesu le tele o le mana, poto, atamai, ma le faautaga loloto e sili atu nai lo o faalapotopotoga a tagata. (Isaia 11:2) O loo taʻitaʻia foʻi e Iesu se ʻautau o agelu malolosi. (Faaaliga 19:14) E mautinoa e leai se faafitauli e faigatā ona taulima e Iesu.

Faafitauli o faasāsāaga faaletulafono. E faalavelavea i isi taimi galuega a faalapotopotoga e tausia le filemu ona o le lē manino o ni tulafono, pe faatapulaa ai foʻi a latou gaoioiga. O le iʻuga, e lē mafai ai ona latou puipuia tagata pe faataunuu atoatoa o latou sini.

Le vaifofō ua saunia e le Tusi Paia: “Ua tuuina mai iā [Iesu] le pule uma i le lagi ma le lalolagi.”—Mataio 28:18.

Ua tuuina atu e le Atua le poloaʻiga iā Iesu ina ia faavaeina le filemu i le lalolagi, ma le pule uma e faataunuu ai lana poloaʻiga. (Ioane 5:22) O le a gaoioi ma le amiotonu Iesu i taimi uma, ma e na te lē faia se mea faapiʻopiʻo. (Isaia 11:3-5) E lētioa a taʻua e le Tusi Paia Iesu o “le Perenise o le Filemu,” ma o le a faatumauina e lona Malo “le faamasinotonu ma le amiotonu.”—Isaia 9:6, 7.

O le a aumaia e le Malo o le Atua le filemu moni

E moni e mafai e faalapotopotoga a tagata ona taofia se taua i se vaipanoa ma aumai sina mapusaga. Peitaʻi, e lē mafai ona latou tafiesea faalogona ita i loto o tagata, o le pogai autū lea o faiga sauā.

Ua faapea mai Dennis Jett, o lē na avea ma amepasa a Amerika: “O le faafitauli, o le faalapotopotoga lea e taumafai e tausia le filemu, e lē mafai ona latou ausia le filemu.”

Peitaʻi, e mafai e le Malo o le Atua ona aumaia le filemu moni, ona e fesoasoani i tagata e aveesea faalogona ita mai i o latou loto. O se faaaʻoaʻoga, a o soifua Iesu i le lalolagi, na ia aʻoaʻoina ona soo i auala e faatupu ai le filemu ma faaalia le alofa i isi, e ala i ana upu ma gaoioiga. O nisi nei o ana fetalaiga:

Na fetalai foʻi Iesu o le faailoga e iloa ai tagatānuu o le Malo o le Atua, o lo latou alolofa i isi. Ua faailoa manino mai i le Tusi Paia, o tagata e ola i le pulega o le Malo o le Atua, e lē tatau ona ʻinoʻino i isi tagata. O se faaaʻoaʻoga:

Talu ai na foafoaina e Ieova le Atua tagata, e na te silafia le auala sili e aumaia ai le filemu i le lalolagi. E mafai e lona Malo ona faia mea e lē mafai e faalapotopotoga a tagata ona ausia, e aofia ai le tausia o le filemu.