UA FESILI MAI TALAVOU
O le ā Ou te Faia pe a Tuu e Nisi Ata ma Faamatalaga i le Initaneti e Faaleaga ai Aʻu?
Mea e tatau ona e iloa
O le Initaneti ua faigofie ai ona faia e isi faamatalaga ma gaoioiga e faaleaga ai isi. Ua faapea mai le tusi CyberSafe: “E oo lava i tamaiti lelei ua avea le Initaneti ma mea e latou te faia ai tala taufaaleaga i isi ona e lē iloa atu o latou foliga.”
O nisi tagata e faigofie ona avea ma taulaʻiga o nei faiga. E aofia ai i latou e matamumuli ma ese mai i le toʻatele o tagata po o le leai o ni uiga mautinoa iā i latou lava.
E matuiā aafiaga o le faasalalauina o ata ma faamatalaga taufaaleaga i le Initaneti. E faatupu ai lagona o le tuua toʻatasi ma le lotomafatia ma o nisi ua aafia i nei faiga, ua pule i o latou ola.
Mea e mafai ona e faia
Muamua ia fesili ifo, ʻPo o taumafai moni lava e faaleaga aʻu?’ O nisi taimi e fai ai e tagata tala faatigā ae latou te lē o mafaufau e faaleaga ai se isi. Pe afai e tupu lenā mea, ia mulimuli i le fautuaga atamai a le Tusi Paia:
“Aua neʻi vave ona tigā lou loto, auā o ē e vālea o i latou ia e tigā o latou loto.”—Failauga 7:9.
Ae pe a fai ma le iloa e se tasi tala ma gaoioiga i le Initaneti e faaita, faamā pe faafefe ai se tasi, o le taufaaleaga la le mea lenā.
Pe afai o loo e aafia i nei faiga, ia manatua le mea lenei: O le auala e te tali atu ai, e mafai ona faaleleia ai pe matuā faaleagaina ai le tulaga o mea. Ia taumafai e faatatau se fautuaga se tasi pe sili atu o loo mulimuli mai.
Aua e te tali atu i ai. Ua faapea mai le Tusi Paia: “O lē ua pulea ana upu ua iā te ia le poto, a o le tagata ua iai le faautaga loloto ua toʻafilemu lona loto.”—Faataoto 17:27.
O se tasi o māfuaaga e aogā ai lenā fautuaga ona o loo faapea mai Nancy Willard i lana tusi Cyberbullying ma le Cyberthreats: “O le sini autū o le ʻau taufaaleaga i luga o le Initaneti o le faaita o tagata o loo uaʻi i ai a latou faiga taufaaleaga. Pe a feita tagata, ua latou faamalosia le ʻau taufaaleaga e faaauau ona fai a latou faiga taufaaleaga.”
O le manatu tāua: O le aua le tali i ai.
Ia toʻafilemu pea. Ua faapea mai le Tusi Paia: “Aua le taui atu le leaga i le leaga, po o le upuleaga atu i ē e upuleaga mai.”—1 Peteru 3:9.
O se tasi o māfuaaga e aogā ai lenā fautuaga ona ua faapea mai le tusi Cyber-Safe Kids, Cyber-Savvy Teens: “O le ita e faaalia ai le lotovaivai ma e uunaʻia ai le ʻau taufaaleaga e atili ona fai a latou faiga.” O lou toe tali i ai o le a pei ai oe o le ʻau taufaaleaga.
O le manatu tāua: Aua le toe tuua fafie i le afi e atili mumū ai.
Ia tausolomua. Ua faapea mai le Tusi Paia: “Aua le faatoʻilaloina oe i le leaga.” (Roma 12:21) E iai mea e mafai ona e faia e taofia ai gaoioiga taufaaleaga i le Initaneti, e aunoa ma le faateteleina ai o le faafitauli.
O se faataʻitaʻiga:
Poloka le tagata o loo lafoina atu feʻau tusitusia. Ua faapea mai le tusi Mean Behind the Screen, “E lē mafai ona tigā lou loto i mea e te lē faitau i ai.”
Sefe uma faamaoniga e tusa lava pe e te lē faitau i ai. E aofia ai so o se feʻau tusitusia, imeli, faamatalaga ma ata e tuu i luga o le Initaneti, leo e lafo atu (voice messages) ma so o se fesootaʻiga.
Taʻu i le tagata lea e na te faaleagaina oe i le Initaneti e taofi lana mea lenā. Lafo i ai se feʻau e lē faaalia ai lou ita ae faaalia atu ai lou maumauaʻi e pei o nei:
“Aua e te toe lafoina mai ni feʻau tusitusia.”
“Aveese le mea lenā na e tuua i luga o le Initaneti.”
“A lē tuua lau amio lea, o le a ou uia se isi laasaga e faamautinoa ai ua tuu lau mea lea e fai.”
Ia atiaʻe lou uiga mautinoa. Taulaʻi i mea e mafai ona e faia nai lo o le taumafai e fai se mea e lē mafai ona e faia. (2 Korinito 11:6) E pei lava le ʻau taufaaleaga i le Initaneti o le ʻau fia malolosi, e fiafia e fai a latou faiga taufaaleaga i tagata e faigofie ona sao ai a latou faiga.
Taʻu i se tagata matua. Ia taʻu muamua i ou mātua. E mafai foʻi ona e lipotiina le faafitauli i le Upega tafaʻilagi lea e faaaogā e le tagata taufaaleaga. Pe a matuiā le faafitauli, e tatau ona tou ō ma ou mātua e lipoti i lau aʻoga, lipoti i leoleo po o le saʻili o se fesoasoani mai i se lōia.
O le manatu tāua: E iai mea e mafai ona e faia e taofia ai faiga taufaaleaga i le Initaneti pe faaitiitia ai aafiaga o nei faiga iā te oe.