Ia Taʻutino Atu i le Lautele Ina ia Faaolaina ai
“E faaolaina i latou uma o e valaau i le suafa o Ieova.”—ROMA 10:13, NW.
1. A o faasolo mai talafaasolopito, o ā lapataiga ua logoina mai?
UA FAAMATALAINA e talafaasolopito a le Tusi Paia nisi o ‘aso o Ieova.’ O le Lolo i aso o Noa, le faaumatiaga aʻiaʻi o Sotoma ma Komoro, ma le faaumatiaga o Ierusalema i le 607 T.L.M. ma i le 70 T.A., o nisi na o aso e sili ma le matautia o Ieova. O aso na sa faaoo atu ai le faamasinoga tonu i ē na fouvale ia Ieova. (Malaki 4:5; Luka 21:22) A o faagasolo na aso, e toatele na faaumatia ona o a latou amioga leaga. Peitai na faasaoina mai nisi. Sa finagalo Ieova ia talaʻi atu lapataiga, e lapatai atu ai i ē amioleaga e uiga i le mala o loo faaloloʻi mai ma avatu ai i ē saʻo o latou loto se avanoa e maua ai le faaolataga.
2, 3. (a) O le ā le lapataiga faavaloaga na siiina mai i le Penetekoso? (e) I le faasolo mai le Penetekoso o le 33 T.A., o le ā sa manaomia i le valaau atu i le suafa o Ieova?
2 O le faaumatiaga o Ierusalema i le 70 T.A. o se faaaoaoga mataina lena o lenei mea. I le muai valoia mai o lena mea i le toetoe 900 tausaga muamua atu a o lei tupu, na tusi ai le perofeta o Ioelu: “Ou te tuuina atu foi vavega i le lagi ma le lalolagi, o le toto, ma le afi, ma le asu faaniutu. E muamua ona liua le la i le pouliuli, ma le masina i le toto, i le oo ai i le aso tele ma le silisili o Ieova.” E mafai faapefea e se tasi ona sao mai se taimi matautia faapena? Na tusi mai Ioelu ina ua faagaeeina: “E iu foi ina faaolaina o i latou uma lava o e valaau atu i le suafa o Ieova; auā e i ai le faaolataga i le mauga o Siona ma Ierusalema, faapei ona fetalai mai ai o Ieova, e i ai foi i e ua totoe o i latou ia e valaauina e Ieova.”—Ioelu 2:30-32.
3 I le Penetekoso o le 33 T.A., na lauga atu ai le aposetolo o Peteru i Ierusalema i se motu o tagata Iutaia ma tagata ua liulotu, ma sa ia sii atu ai le valoaga a Ioelu, e faaali atu ai e mafai e lana au faalogologo ona latou faatalitalia se faataunuuga o lena valoaga i o latou aso: “Ou te faia foi vavega i le lagi i lugā, ma faailoga i le lalolagi i lalo, o le toto, ma le afi, ma le asuasu e faaniutu. E muamua ona liua o le la i le pouliuli, ma le masina i le toto, i le oo ai i le aso tele ma le silisili o le Alii [Ieova]. E iu foi ina faaolaina o i latou uma lava o e valaau atu i le suafa o le Alii [Ieova].” (Galuega 2:16-21) O tagata ia sa faalogologo atu ia Peteru sa tausia e i latou uma le Tulafono Faa-Mose, ma o lea na latou iloa ai le suafa o Ieova. Na faamatala atu e Peteru e faapea, o le valaau atu i le suafa o Ieova o le a tele atu nisi mea e aofia ai. I se tulaga mataina, e aofia ai i lenei mea le papatisoina i le suafa o Iesu, o lē na fasiotia ma toe faatuina aʻe i le olaga faalelagi e lē mafai ona oti.—Galuega 2:37, 38.
4. O le ā le feau na folafola mai e Kerisiano?
4 Mai le aso o le Penetekoso, na faasalalau atu ai e Kerisiano le upu e uiga ia Iesu o lē na toe faatuina mai. (1 Korinito 1:23) Na latou faailoa atu e faapea e mafai e tagata ona avea ma ataliifai faaleagaga o Ieova le Atua ma avea ai o se vaega o le ‘Isaraelu fou a le Atua,’ o se nuu faaleagaga o le a latou ‘taʻutaʻu atu le lelei silisili o Ieova.’ (Kalatia 6:16; 1 Peteru 2:9) O i latou na tumau i le faamaoni seia oo i le oti, na latou mauaina le ola faalelagi e lē mafai ona oti, i le avea ma suli faatasi ma Iesu i lona Malo faalelagi. (Mataio 24:13; Roma 8:15, 16; 1 Korinito 15:50-54) E lē gata i lea, sa tatau i nei Kerisiano ona latou folafola atu le oo mai o le aso tele ma le matautia o Ieova. Sa tatau ona latou lapataia tagata Iutaia e faapea, o le a latou fetaiai ma se puapuaga e matuā sili atu nai lo se isi lava mala na taia ai muamua Ierusalema ma tagata o ē sa na ona faapea mai o i latou o tagata o le Atua. Peitai, sa iai ē na faasaoina. O ai i latou? O ē na valaau i le suafa o Ieova.
“Ona Aso e Gata Ai”
5. O ā faataunuuga o valoaga ua faataunuuina i aso nei?
5 I le tele o itu, o tulaga na iai i tuā iina sa faaatagia mai ai mea o loo tatou vaaia i aso nei. Talu mai le 1914, ua ola ai tagata i se vaitaimi faapitoa lea o loo taʻua i le Tusi Paia o “ona po o le iuga,” “le vaitaimi faaiuiu o le faiga o mea,” ma “ona aso e gata ai.” (Tanielu 12:1, 4; Mataio 24:3-8, NW; 2 Timoteo 3:1-5, 13) I le senituri lenei o loo tatou ola ai, ua avea taua, faiga sauā lē taupulea, ma le faafanoina o le olaga masani ma le siosiomaga ma faataunuuga mataina o valoaga a le Tusi Paia. O vaega uma nei o le faailoga lea na valoia mai e Iesu, o loo faaalia ai faapea ua toe o se aga ona oo atu lea o tagata i le aso faaiu, le aso silisili ma le matautia o Ieova. E faauluulu lenei aso i le taua o Amaketo, le taualuga o le “puapuaga tele, e leai sona tusa talu le amataga o le lalolagi, ua oo lava i ona po nei; e le toe faapea foi amuli.”—Mataio 24:21; Faaaliga 16:16.
6. (a) Ua faapefea ona gaoioi Ieova e faaolaina o ē agamalu? (e) O fea tatou te maua i ai fautuaga a Paulo i le auala e faaolaina ai?
6 A o matuā lalata mai lava le aso o le faatamaiga, o loo gaoioi ai Ieova mo le faaolaina o ē agamalu. A o faagasolo lenei ‘taimi o le iuga,’ na ia aoaoina ai le vaega faaiu o le Isaraelu faaleagaga a le Atua, ma i tausaga na amata mai i le 1930 ma faasolo mai ai, na ia faauaʻi atu ai ana auauna i le lalolagi, ina ia aoaoina “le motu o tagata e toatele mai atu nuu uma, ma aiga, ma nuu, ma gagana eseese, e le ma faitaulia e se tasi.” I le avea o se vaega toatele, e faasaoina ai i latou nei “nai le puapuaga tele.” (Faaaliga 7:9, 14) Ae mafai faapefea e tagata taitoatasi ona faamautinoa o le a faaolaina o ia? Ua tali e le aposetolo o Paulo lena fesili. I le Roma mataupu e 10, ua ia aumaia ai se fautuaga matagofie mo le faaolaina—se fautuaga sa aogā i ona aso ma e aogā foi lena fautuaga i o tatou aso.
Le Tatalo mo le Faaolataga
7. (a) O le ā le faamoemoe o loo faailoa mai i le Roma 10:1, 2? (e) Aisea ua finagalo ai Ieova ina ia matuā faalautele atu i le taimi nei le folafolaina o le “tala lelei”?
7 E tusia e Paulo le tusi a Roma, ae ua leva ona lafoaia e Ieova le nuu o Isaraelu. Peitai, na faamautinoa atu pea e le aposetolo: “O le manao lava lenei o loʻu loto, ma laʻu tatalo i le Atua mo Isaraelu, ia faaolaina i latou.” Sa iai lona faamoemoe, atonu o le a maua e ni tagata Iutaia le poto saʻo e uiga i le finagalo o le Atua, ma taitaia atu ai i lo latou faasaoina. (Roma 10:1, 2) E lē gata i lea, o le finagalo o Ieova ina ia faaolaina i latou o loo i le lalolagi atoa, o ē faaalia le faatuatua, e pei ona faaalia mai i le Ioane 3:16: “Ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola faavavau.” O le taulaga togiola a Iesu na tatala ai le ala mo lea faaolataga matagofie. E pei ona iai i aso o Noa ma isi aso faamasino na mulimuli ane, ua finagalo Ieova ina ia folafolaina atu le “tala lelei,” o loo faasino mai ai le ala o le faaolataga.—Mareko 13:10, 19, 20.
8. I le faataitai atu i le faaaoaoga a Paulo, o ai o loo faaali atu i ai e Kerisiano moni le faanaunauga lelei i aso nei, ma e faapefea?
8 I le faaalia o lona lava faanaunauga lelei i tagata Iutaia faapea foi i tagata o Nuu Ese, na talaʻi atu ai Paulo i avanoa uma. Sa ia “pulunaunau atu ia Iutaia atoa ma Eleni.” Na ia taʻu atu i toeaina o Efeso: “[Ua ou] lei natia se mea aoga, ina neʻi le faailoa atu ma aʻoaʻo atu ia te outou i luma o le nuu, atoa foi ma lea fale ma lea fale, ua ou molitino ia Iutaia atoa ma Eleni le salamo i le Atua, ma le faatuatua i lo tatou Alii o Iesu Keriso.” (Galuega 18:4; 20:20, 21) Ua faapena foi ona faalauaitele atu e Molimau a Ieova i aso nei la latou talaʻiga, e lē gata i Kerisiano faatagafai, ae i tagata uma, e oo atu lava i “le tuluʻiga o le lalolagi.”—Galuega 1:8; 18:5.
O Loo Taʻutino Atu ‘le Upu o le Faatuatua’
9. (a) O le ā le ituaiga o faatuatua o loo faalaeiauina e le Roma 10:8, 9? (e) O afea ma e faapefea ona tatou faia atu se tautinoga o lo tatou faatuatua?
9 E manaomia mo le faaolataga se faatuatua e mausalī. I le siiina mai o le Teuteronome 30:14, na faalauiloa ai e Paulo: “Ua latalata ia te oe le upu, o i lou gutu ma lou loto; o le upu lea o le faatuatua o matou o talaʻi atu ai.” (Roma 10:8) A o tatou talaʻia atu lena ‘upu o le faatuatua,’ e faasolosolo ai lava ina matuā mauaa ifo i o tatou loto. O le tulaga lena na iai Paulo, ma o ana upu atili e mafai ona faamalosia ai la tatou filifiliga ina ia faapei o ia i le tufaina atu o lena faatuatua i isi: “Afai e te taʻutino atu i le lautele ‘lena upu i lou lava gutu,’ e faapea o Iesu o le Alii, ma faatuatua i lou loto ua toe faatuina mai o ia e le Atua nai ē ua oti, e faaolaina ai oe.” (Roma 10:9, NW) E lē gata ina fai atu lenei tautinoga i luma o isi i le taimi o le papatisoga, ae tatau foi ona avea o se tautinoga e faifai pea, o se taʻutino atu ma le maelega i le lautele e faatatau i vala matagofie uma o le upu moni. O lena upu moni o loo taulai atu i le suafa tautele o le Alii Silisili Ese o Ieova; i lo tatou Tupu faa-Mesia ma o Lē na Togisala, le Alii o Iesu Keriso lea; ma i folafolaga ofoofogia o le Malo.
10. E tusa ai ma le Roma 10:10, 11, e tatau faapefea ona tatou taulimaina lenei ʻ“upu” o le faatuatua’?
10 E leai se faaolataga mo so o se tasi e na te lē talia ma faatatauina lenei ‘upu o le faatuatua,’ e pei ona fai mai atili ai le aposetolo: “O le loto e faatuatua ai, e oo mai ai le amiotonu; a o le gutu e taʻutino ai, e oo mai ai le ola. Auā ua faapea mai le Tusi, E le mā se tasi e faatuatua ia te ia.” (Roma 10:10, 11) E tatau ona tatou maua le poto saʻo e faatatau i lenei ‘upu o le faatuatua’ ma faaauau pea ona teumaluina i o tatou loto ina ia uunaia ai i tatou e taʻu atu i isi. O Iesu lava na faamanatu maia ia i tatou: “Ai sē mā ia te au, ma aʻu upu i lenei tupulaga mulilulua ma le agasala, e mā foi le Atalii o le tagata ia te ia, pe a sau o ia faatasi ma ana agelu paia i le mamalu o lona Tamā.”—Mareko 8:38.
11. O le ā le tele e tatau ona oo atu i ai le folafolaina o le tala lelei, ma aisea?
11 E pei ona valoia mai e le perofeta o Tanielu, i lenei taimi o le iuga, “o e popoto” ua vaaia o loo susulu mai “faapei o le pupula o le lagi,” a o faalauteleina atu le molimau o le Malo i itu uma o le lalolagi. O loo latou “faaliliu [mai] tagata e toatele ia amiotonu,” ma ua matuā faateleina le poto moni, auā o loo faasusuluina mai atili e Ieova le malamalama ua sili atu, i valoaga e faatatau i lenei taimi o le iuga. (Tanielu 12:3, 4) O le feau lenei o le faaolataga e matuā tāua mo le faasaoina o i latou uma o ē alolofa i le upu moni ma le amiotonu.
12. E faapefea ona fesootai atu le Roma 10:12 i le tofiga o le agelu lea o loo faamatalaina i le Faaaliga 14:6?
12 Ua faapea mai atili le aposetolo o Paulo: “E le eseese le Iutaia ma le Eleni; auā o le Alii e toatasi o tagata uma, e faulai lona alofa ia te i latou uma lava o e valaau atu ia te ia.” (Roma 10:12) I aso nei, e tatau ona talaʻi atu le “tala lelei” i se tulaga e sili atu ona lautele i le lalolagi aoao—i tagata uma, i tulimanu uma o le lalolagi. O loo feleleai pea le agelu o le Faaaliga 14:6 i le taulotoaiga o le lagi, o loo ia tuuina mai ia i tatou le “tala lelei faavavau e folafola atu i e nonofo i le lalolagi, i atunuu uma, ma ituaiga, ma gagana eseese, ma nuu.” O le a faapefea ona aogā lenei mea ia i latou o ē o loo tali atu i ai?
O Loo Valaau Atu i le Suafa o Ieova
13. (a) O le ā la tatou mau o le tausaga i le 1998? (e) Aisea ua sili ai ona talafeagai i aso nei lenei mau o le tausaga?
13 I le siiina mai o le Ioelu 2:32, ua folafola ai e Paulo faapea: “E faaolaina i latou uma o e valaau i le suafa o le Alii [Ieova].” (Roma 10:13) Maeu le talafeagai o le avea o na upu ua filifilia e fai ma mau o le tausaga a Molimau a Ieova mo le 1998! Sa lei faapea lava muamua ona sili atu le tāua o le agaʻi i luma ma le faatuatua atu ia Ieova, i le faailoa atu o lona suafa ma fuafuaga matagofie o loo taulai atu i ai! E pei ona sa iai i le uluai senituri, ua faapena foi i aso e gata ai o lenei faiga iuvale o mea, ua toe alagaina atu pea le valaau: “Ia faaolaina outou ai lenei tupulaga faapiopio.” (Galuega 2:40) O se valaaulia e pei o le leo o le pu, mo tagata uma o le lalolagi aoao o ē matataʻu i le Atua, ina ia latou valaau ia Ieova mo le faasaoina o i latou, faapea ma ē o loo utagiaina la latou tautinoga i le lautele o le tala lelei.—1 Timoteo 4:16.
14. O ai le Papa e tatau ona valaau atu i ai mo le olataga?
14 O le ā o le a tupu pe a gāpā le aso tele o Ieova i luga o lenei lalolagi? O le toatele o tagata o le a latou lē sulu atu ia Ieova mo le faaolataga. O tagata lautele, o le a “latou fai atu foi i mauga ma papa, ‘Mafuli mai ia ia te i matou, ma tanumai i matou ai le silafaga a lē tietie i le nofoālii, ma le toasa o le Tamai Mamoe.’” (Faaaliga 6:15, 16) O le a latou faamoemoe atu i faalapotopotoga ma asosi ua pei o ni mauga a lenei faiga o mea. Ae maeu se lelei, pe ana latou faatuatua atu i le Papa e silisili i papa uma, o Ieova le Atua! (Teuteronome 32:3, 4) O ia lea, na taʻua e le tupu o Tavita: “O Ieova o loʻu papa ia, ma loʻu ʻolo, ma loʻu faaola.” O Ieova o “le papa o lo tatou olataga.” (Salamo 18:2; 95:1) O lona suafa o “le ʻolo malosi,” ua na o lea le “ʻolo” e lava lona malosi e puipuia i tatou mai le mala o loo fotuai mai. (Faataoto 18:10) O lea, e matuā tāua ai ona aʻoaʻoina se toatele e mafai ai, o le toetoe lava ono piliona o tagata o loo ola i aso nei, ina ia latou valaau atu i le suafa o Ieova i le faatuatua ma le faamaoni.
15. O le ā ua faaalia mai e le Roma 10:14 e tusa ai ma le faatuatua?
15 Ua matuā fetaui lava le fesili mai o le aposetolo o Paulo: “O lenei, pe faapefea ona latou valaau atu i le ua latou le faatuatua i ai?” (Roma 10:14) O loo iai le vao o tagata e toatele atonu e ono mafai ona latou maua se fesoasoani ia avea ai ‘le “upu” o le faatuatua’ ma a latou lava meatotino, ina ia mafai ona latou valaau atu ia Ieova mo le olataga. E matuā tāua lava le faatuatua. Ua taʻu mai e Paulo i le isi ana tusi: “A leai foi se faatuatua e le mafai ona fiafia mai [le Atua]; auā e tatau i lē alu atu i le Atua ona talitonu o loo soifua o ia, o ia foi na te tauia mai o e matuā saili ia te ia.” (Eperu 11:6) Ae o le a faapefea la, e le isi faitau miliona ona latou faatuatua atu i le Atua? I le tusi atu i uso i Roma, ua fesili ai Paulo: “Pe faapefea foi ona latou faatuatua i le ua latou le faalogo atu i ai?” (Roma 10:14) Pe saunia ea e Ieova le auala mo i latou ina ia faalogo ai? O le mea mautinoa na te saunia! Faafofoga atu i upu a Paulo o loo faaauau mai pea: “Pe faapefea foi ona latou faalogo atu, pe a leai se talaʻi atu?”
16. I le faatulagaga tauatua, aisea ua sili ai ona manaomia ni ē e talaʻi atu?
16 Ua matuā manino mai lava i le mataupu a Paulo le manaomia o ē e talaʻi atu. Na faaalia e Iesu o le tulaga lena o le a iai, seia “oo lava i le gataaga o le lalolagi.” (Mataio 24:14; 28:18-20) O le talaʻiga o se vaega e sili ona manaomia o le faatulagaga tauatua mo le fesoasoani atu i tagata ina ia latou valaau i le suafa o Ieova ma faasaoina ai. E oo lava i Kerisinetoma, o le toatele o tagata e augapiu ma sa latou gaoioiga e faamamaluina ai le suafa tautele o le Atua. O le toatele ua latou matuā faafenumiaia Ieova ma isi peresona e toalua, i le aʻoaʻoga nunumi o le Tolutasi. E lē gata i lea, e toatele ua aofia ai i le vasega o tagata lea e tautala i ai le Salamo 14:1 ma le 53:1 e faapea: “Ua fai ifo le tagata valea i lona loto, E leai se Atua [Ieova].” E manaomia ona latou iloa o Ieova o ia o le Atua soifua, ma e tatau ona latou malamalama i mea uma o loo faatatau i lona suafa, pe afai latou te fia faasaoina mai le puapuaga tele o loo faaloloʻi mai.
O ‘Vae Matagofie’ o Ē Talaʻi
17. (a) Aisea ua talafeagai ai mo Paulo ona sii mai le valoaga i le toe fuataiina? (e) O le ā e aofia ai i le iai o ni ‘vae matagofie’?
17 Toe tasi lava le isi fesili tāua a le aposetolo o Paulo: “Pe faapefea foi ona talaʻi atu, pe afai ua le aauina atu i latou? Pei ona tusia, E matagofie naua o latou vae o e au mai le tala lelei i le manuia!” (Roma 10:15) O iinei o loo sii mai ai e Paulo upu o le Isaia 52:7, o se vaega o le valoaga i le toe fuataiina, lea ua faatatauina talu mai le 1919. I aso nei, ua toe aauina mai ai foi e Ieova “o le ua fai mai le tala lelei, o lē logologo mai le manuia, ua tala mai le tala lelei; ua faailoa mai le olataga.” Ma ua usiusitai ai “tagata vaai” faauuina a le Atua, ma a latou aumea, i lo latou alalaga atu pea ma le olioli. (Isaia 52:7, 8) Atonu e oo ina vaivai vae o i latou o loo folafolaina atu le olataga i aso nei, e oo foi ina pefupefua, a o latou savavali mai lea fale i lea fale, ae maeu le olioli mai o o latou foliga! Ua latou iloa o loo faatonuina i latou e Ieova ina ia folafola le tala lelei o le filemu ma faamafanafana atu i ē lotomomomo, i le fesoasoani atu i nei tagata e valaau i le suafa o Ieova ma faatalitali i le olataga.
18. O le ā ua fai mai ai le Roma 10:16-18 e tusa ai o le iuga faaiu o le faaleoina atu o le tala lelei?
18 E tusa lava pe ‘talitonu tagata i upu ua faalogo i ai’ pe latou te filifili e lē usiusitai i ai, ae ua moni pea upu a Paulo: “Ua latou le faalogo mai ea? E moni, ua oo lo latou leo i le lalolagi uma lava, o a latou upu foi i tuluiga o le atu laulau.” (Roma 10:16-18) E pei lava ona “tala mai e le lagi le mamalu o le Atua,” e pei ona faaalia i ana galuega o le foafoaga, ua tatau foi ona faapena i ana Molimau i le lalolagi ona latou folafola atu “le tausaga e talileleia mai ai e Ieova, ma le aso e taui ai ma sui e lo tatou Atua; e faamatalaloto i e faanoanoa uma lava.”—Salamo 19:1-4; Isaia 61:2.
19. O le ā o le a iu ia i latou o loo ‘valaau atu i le suafa o Ieova’ i aso nei?
19 Ua matuā lalata mai lava le aso sili ma le matautia o Ieova. “Aue, le aso e! auā ua latalata mai le aso o Ieova, e oo mai e pei o se malaia ai Le e ona le malosi uma lava.” (Ioelu 1:15; 2:31) O a tatou talotaloga, ina ia iai nisi tagata e toatele o le a tali mai ma le faanatinati i le tala lelei, ia lolofi mai i le faalapotopotoga a Ieova. (Isaia 60:8; Sapakuka 2:3) Ia manatua, o isi aso o Ieova na aumaia ai le faafanoga i ē amioleaga—i aso o Noa, i aso o Lota, ma i aso o nuu aposetate o Isaraelu ma Iuta. Ua toe nei o se aga ona oo mai lea o le puapuaga e silisili atu ona matautia nai lo isi lava puapuaga uma, o le taimi o le a tafiesea ai e le afā mai ia Ieova, o mea leaga uma lava mai lenei lalolagi, ma avanoa ai le ala mo le parataiso o le filemu e faavavau. Po o le a avea ea oe ma se tasi e “valaau i le suafa o [Ieova]” ma le faatuatua? Afai o le tulaga lena, ia e olioli! Ua ia te oe le folafolaga a le Atua lava ia, o le a faasaoina oe.—Roma 10:13.
O le a Faapefea Ona E Tali?
◻ O ā mea fou na folafolaina atu ina ua mavae le Penetekoso o le 33 T.A.?
◻ E tatau faapefea ona uaʻi atu Kerisiano i ‘le “upu” o le faatuatua’?
◻ O le ā le uiga o le ‘valaau atu i le suafa o Ieova’?
◻ O le ā ua faauiga i ai le mauaina e avefeau o le Malo o ni ‘vae matagofie’?
[Ata i le itulau 18]
O loo faalauiloa atu e tagata o le Atua ona lelei silisili i Puerto Rico, Senegal, Peru, Papua Niu Kini—ioe, i le lalolagi atoa