Ia Molimau i le Upu Moni
1 Sa faamanino atu e Iesu faapea na maliu mai o ia i le lalolagi ina ia molimau i le upu moni. Na ia folafola: “O le mea lenei na fanau mai ai aʻu, o le mea foi lenei na ou sau ai i le lalolagi, ina ia ou molimau i le upu moni.”—Ioane 18:37.
2 I lana talaʻiga maelega, na faapaiaina ai e Iesu le suafa o Ieova. Sa ia faaalia foi le alofa moni mo tagata i le silafiaina o lo latou tulaga faanoanoa faaleagaga. Na tusia e Mataio e faatatau i lana gaoioiga: “Ua faataamilo Iesu i aai uma ma faoa aai, ua aʻoaʻo i o latou sunako, ma talaʻi i le tala lelei o le malo, . . . Ua silafia e ia le motu o tagata, ona mutimuti vale ai lea o lona alofa ia te i latou, ona ua lailoa i latou ma tuulafoaiina, e pei o mamoe e leai so latou leoleo.” (Mata. 9:35, 36) E pei o Iesu, e ao i lo tatou tuutoina ia Ieova faatasi ma lo tatou alofa mo isi ona uunaia ai i tatou e talaʻi.
LO TATOU TOFIGA MATUĀ TĀUA
3 O le alofa moni mo tagata ma Ieova ua faapogaia i tatou e faaaogā tatau avanoa uma e aʻoaʻo ai tagata i le upu moni e uiga ia Ieova ma ana galuega matagofie. (Sala. 96:2, 3; 145:10-13) Ae peitai, o omiga o le olaga i aso faisoo, popolega o le olaga, ma le anoanoai o faatosinaga e faigofie ona liliuina ese i tatou mai la tatou gaoioiga molimau. O le mea lea, e manaomia ai ona taofi i o tatou manatu le faanatinati o le avatuina o le molimau i le upu moni e uiga i le Atua ma lona Malo. E ao ona aua neʻi o tatou faatagaina i tatou lava e alo ese mai lenei galuega faasao ola e sili ona tāua ua faapea ona tofia ai i tatou e faatino. (Mata. 24:14; 28:19, 20) O le tiotio pea i le auaunaga a Ieova o se puipuiga mo i tatou, ma e mafai ona aumaia ai aogā tumau ia i latou o ē o loo manaomia ona faalogo i le feau o le upu moni.—1 Kori. 15:58.
4 Faamata e mafai ona ē auauna o se paeonia sauatoa pe lagolago? Aiseā e lē iloiloina ai ou aiaiga ma vaai pe mafai ona ē faalauteleina lau auaunaga i lenei auala. Ua ē litaea mai le galuega? Aiseā e lē faaaogāina atoatoa ai lou taimi i le talaʻiga? E toatele le au talavou o loo i ai pea i le aʻoga ua lē aunoa ona paeonia lagolago. Ua iloa e i latou ia le faafouina i le faaleagaga ma le faaletino, aumaia ai le olioli o le loto.
5 O le avatuina o se molimau uigā i le upu moni e manaomia ai ona faasoasoaina ma le faaeteete o lou taimi. (Efe. 5:15, 16) E manaomia e le paeonia lagolago se tuu faatatau e na o le lua itula i le aso mo le masina. Ua filifili nisi e ala usu i le taeao ina ia mafai ona latou ō i le auaunaga a o leʻi agai atu i le aʻoga po o le galuega. E tele faapotopotoga ua fesoasoani i paeonia lagolago i le fuafuaina e molimau atu i le afiafi. E mafai foi, ona faalaeiauina oe ma maua faufautuaga fesoasoani i le talanoa ma isi o ē na taulau i le faasoasoaina o lo latou taimi e paeonia lagolago ai.
6 Ua folasia pea e Ieova lona agalelei i ana auauna. O i latou o loo auauna ma le faamaoni ia te ia ua tauia i le tele anoanoai o faamanuiaga. O loo faaauau pea ona faatino le agalelei o Ieova agai ia i latou e alolofa ia te ia. E finagalo malie o ia e talia so o se mea e faatagaina e ō tatou aiaiga i tatou e fai a o tatou avatu le molimau i le upu moni.—Epe. 6:10.