Fesili Mai le Au Faitau

◼ Ona o le faamatalaga fou e uiga i le amata ona ō atu e tagata e leʻi papatisoina i le faiva i le fanua, faamata la e mafai ona valaaulia se tagata aʻoga o le Tusi Paia e ō faatasi ma ia mo sina taimi ina ia iloa ai pe o faapefea ona faia le galuega?

I le tulaga faavae, o tagata e leʻi papatisoina o ē o aufaatasi ma Molimau a Ieova i le faiva i le fanua o tagata ia ua uma ona agavaa e avea o ni tagata talaʻi o le tala lelei.

O le toatele o tagata lautele e faaaloalo i Molimau a Ieova ona o la latou galuega tutasi ma le lelei o le ‘faia o soʻo, ma le aʻoaʻo ia te i latou’ i lea fale ma lea fale ma e ala i suesuega faale-Tusi Paia i aiga. (Mataio 28:19, 20) O le ā la se faaiʻuga o le a faia e tagata lautele e uiga i se tagata e ō atu faatasi ma se Molimau i lenei faiva? O le a latou faaiʻua ma le tonu faapea o lenei aumea o se faifeau foi po o se tulaga e latalata ane i le avea ma faifeau.

E ioeina, atonu o le a oo mai i le mafaufau ni nai tulaga e ese ai.

I ni mea e seāseā lava ona tutupu ua faatagaina e toeaina talafeagai se tagata e lipotia mai tala fou, se polofesa o se kolisi, po o se tagata faapena e ō atu ma se Molimau i le faiva i lea fale ma lea fale ina ia iloa ai pe faapefea ona faia. O le mea moni, o foliga ma gaoioiga a le tagata i na tulaga e lē tatau ona feteenai ma a tatou ausiaga. Ma atonu e manao le Molimau e taʻua i ē ona fale faapea o le aumea o se tagata e lipotia tala fou po o se polofesa o lē o loo naunau e matauina pe faapefea ona tatou faia la tatou galuega tāua faale-Tusi Paia.

Ae lē gata i lea, e aumaia e mātua Kerisiano a latou fanau faatasi ma i latou i le faiva e tusa lava pe o laiti tele i latou pe e leʻi nofo sauni foi e avea ma tagata talaʻi e leʻi papatisoina. O lea e lē tuua ai e nei mātua a latou fanau e lē vaavaaia. O le aumaia o i latou i le auaunaga i le fanua ua faatagaina ai mātua e tautala atu i a latou fanau e uiga i le Afioga ma auala a le Atua a o latou ‘savavali i le ala.’ (Teuteronome 6:4-7) Ae o le vala lenei o le olaga faaleaiga Kerisiano, ae lē o se tulaga o le aumaia e se Molimau se isi tagata e na o se tagata e vaavaai. O le mea moni, o lena toleniga faamatua ua sauniunia ai le fanau mo le taimi o le a latou vivii ai ia Ieova e avea ma tagata talaʻi.—Mataio 21:15, 16; faatusatusa le Organized to Accomplish Our Ministry, itulau 99, 100.

Ae peitai, e faapefea se tagata o lē o loo suesueina le Tusi Paia ma se Molimau, o lē ua agaʻi atu e avea ma soʻo? Ua ia te ia mafuaaga lelei e taʻu atu ai i aiga, aumea i galuega, tuaoi, ma isi e uiga i “mea matagofie a le Atua” ua ia aʻoaʻoina mai i le Tusi Paia. (Galuega 2:11, NW) I le faamoemoe, o le a iai se taimi o le a ia iloa ai le manaomia ona auai faatasi ma Molimau a Ieova i ni faatulagaga maopoopo mo le “folafola ai lea o le afioga a le Atua.”—Galuega 13:5.

Na faaauivi mai e Le Olomatamata talu ai nei ni laasaga talafeagai e faia a o leʻi auai atu lena tagata aʻoga faatasi ma Molimau o lona pitonuu i le faiva, i le avea ma tagata talaʻi e leʻi papatisoina. Ua o se mea alagātatau lena faapea e tatau ona iai sona poto faavae i le Tusi Paia, e tatau ona malamalama ma ia ōgatasi ma ausiaga tau amio a le Atua, ma e tatau ona faanaunau totino ina ia auai i le faiva i le lautele faatasi ma Molimau a Ieova. O lea e mafai e ni toeaina se toalua o le faapotopotoga ona faia se talanoaga e fesoasoani ai ma faalaeiau ai faatatau i na manatu, faatasi ma ia ma le Molimau o lē o loo faia le suesuega faale-Tusi Paia ma ia.a E tatau ona faia lenei mea a o leʻi valaauliaina le tagata aʻoga o le Tusi Paia ina ia aufaatasi atu ma le tagata talaʻi i le faiva i le fanua ina ia maua se toleniga agaʻigaʻi i luma.

E mafai ona malamalama faapea, afai e agavaa se tagata aʻoga e alu atu i le faiva i le fanua ma i lea ua ia faia faapea muamua, atonu mo ni nai taimi o le a ia manao e ō atu faatasi ma le tagata talaʻi ina ia aʻoaʻoina pe faapefea ona faia moni le galuega talaʻi. O le faifeau o loo faatasi ma ia e mafai ona ia saunia ni toleniga auaumalie, e pei o le talosaga atu ia te ia ina ia fesoasoani mo sina taimi i le faitauina o mau, ona oo lea i se taimi tuu atu ia te ia e taʻimua i le molimau atu i lē ona le fale. O lea, e mafai ai ona ia tuuina atu lana uluai lipoti o le auaunaga i le fanua pe afai ua ia auai moni i le talaʻiga i le fanua. O lona agaʻigaʻi i luma i le faia o se sao faateleina i le galuega e ōgatasi ai ma fetalaiga a Iesu: “E lē sili le tagata aʻoga i lona faiaʻoga, ae so o se tasi ua atoatoa ona lelei ona aʻoaʻoina o le a pei o lona faiaʻoga.”—Luka 6:40, NW.

[Faaopoopoga i lalo]