Ua E Sauni e Faafetaiaʻia se Aiaiga Faafomaʻi e Luʻia le Faatuatua?
1 E leai se tasi e manatu tele e uiga i le ono iai i le falemaʻi i le asō po o ā taeao. Peitai, o le ‘taimi ma le mea e tupu ai e oo ia i tatou uma.’ (Fai. 9:11) Tusa lava pe e te lē talia se togafitiga faafomaʻi o se tausiga faale-soifua maloloina e sili ona lelei mo oe, o le ā o le a e faia e puipuia ai oe mai se tuigā toto e lē manaomia pe a teʻi ua e matapogia i se faalavelave faafuasei ma faatopetope atu ai oe i le falemaʻi? Ioe, o se faalavelave faafuasei po o le faaleagaina o le tulaga faale-soifua maloloina e pei o le emo o le mata e mafai ona lua fesagaʻi faanatinati ai ma se luʻi i lou faatuatua.
2 Afai e teʻi ua e taoto i le falemaʻi mo so o se mafuaaga, o le ā o le a e faia e tausisia ai le faamaoni pe afai e taʻu atu e se tasi ia te oe i inā o le a e oti e aunoa ma se tuiga toto? Pe o le a vave loa ona e talia faapea o le mea moni lea o loo i ai lou tulaga? Ua e talitonu atoatoa ea e te lē manao i le toto? Ua e sauni e faafetaiaʻia lenei luʻi i lou faatuatua ma ‘taumamao mai le toto’?—Galu. 15:28, 29.
3 O le taulau i le teena o le pisipisia faaleagaga i se tuiga toto lē manaomia, e amata i se talitonuga maumaututū. O sea talitonuga e tatau ona faavae i se malamalamaga manino i le mea ua fai mai ai le Tusi Paia e uiga i le toto. I se isi itu, i sina taimi puupuu lava, e mafai ona faigofie ona faamataʻuina oe e se tasi o lē finau mai e sili atu lona silafia o le tulaga na i lo o oe. Pe o le a taʻitaʻi seseina oe e manatu faapea atonu e sili atu le iloa o fomaʻi e uiga i le toto na i lo o le Atua? E mautinoa, i aiaiga faapea o le a e manao ai e “tonu maumaututū” e faia le “mea saʻo” i fofoga o Ieova, tusa lava po o ā tala a tagata atonu e fai mai. (Teu. 12:23-25; Ae pe ao ea ona e faafetaiaʻia lenei luʻi e tau o oe lava?—Fai. 4:9-12.
AUAUNAGA O FAAMATALAGA FAAFALEMAʻI MA KOMITI O UPUFAI FAAFALEMAʻI
4 Ina ia fesoasoani ia i latou o ē manaomia le fesoasoani pe a fesagaʻi ma se faafitauli i le tuiga toto, ua faatūina ai e le Sosaiete le Auaunaga o Faamatalaga Faafalemaʻi i Purukulini. Ua faavaeina foi Komiti o Upufai Faafalemaʻi e 100 i aai tetele o le Iunaite Setete. O loo faia aʻe nei komiti i le silia i le 600 toeaina ua faapitoa ona aʻoaʻoina mo lenei galuega. Ua faapena foi faatulagaga ua faia i le tele o lala tetele, e pei o Ausetalia, Hawaii ma Niu Sila.
5 Ua mafai e le Auaunaga o Faamatalaga Faafalemaʻi ona faia sailiiliga i le silia i le 3,600 mekasini faafomaʻi i le lalolagi aoao ina ia maua ai faamatalaga i le iai ma le aogā o le tele o ituaiga o taotoga e aunoa ma le toto ma togafitiga. Ona ia auina atu lea i Komiti o Upufai Faafalemaʻi, ofisa o le soifua maloloina, ma nisi fomai, faamatalaga i ia faiga faafomaʻi auiluma. (I nisi taimi e auina atu ai e le Auaunaga o Faamatalaga Faafalemaʻi mataupu faafomaʻi o loo faaalia ai le mea e mafai ona faia e aunoa ma le toto ma alofia ai ma le manuia se fefinauaiga i le falemaʻi.) Na te lagolagoina pea komiti i faaiʻuga logoleleia faafaamasinoga o le a fesoasoani i faamasino i le tilofaia o la tatou mataupu faatasi ma se malamalamaga faaopoopo. Na te tausia foi faamaumauga i fomaʻi faivailaau felagolagomai e sili atu i le 7,000 ina ia maua ai e komiti ni faamaumauga e ōgatasi ma mea tutupu i aso nei e faaaogā pe a mapuna aʻe ni faafitauli tau tuiga toto.
6 E faatonutonuina foi e le Auaunaga o Faamatalaga Faafalemaʻi le toleniina ma le galuega a Komiti o Upufai Faafalemaʻi. I aai o loo latou i ai, ua lē aunoa ona faia ai e Komiti o Upufai Faafalemaʻi taulimaga aogā i tagata faigaluega o le falemaʻi ina ia faaleleia ai a latou faiā ma i latou. Latou te fesiligia foi nei tagata faigaluega e saili ai nisi fomaʻi faaopoopo o ē o le a latou togafitia i tatou e aunoa ma le toto. Ua lava ta oso nei uso e fesoasoani ia te oe, peitai e iai laasaga tāua auiluma e tatau ona e uia ina ia faataatia ai le faavae mo i latou ia faia faapea i se auala e sili ona aogā.
LAASAGA TAUA AUILUMA—UA E UʻIA EA I LATOU?
7 Muamua, ia faamatuinoa ua faatumu atoatoa e tagata uma o le aiga a latou pepa totino o faasinoga faafomaʻi—ua tusia ai le aso, sainia, ma ua iai molimau. Ua oo atu nisi uso i le falemaʻi ma se pepa e leai se aso ma/pe leai foi se molimau ua luʻia ai lona tāua. Ma pe ua faatumuina ea e a tatou fanau uma e leʻi papatiso a latou pepa faailoga? Afai e leai, e faapefea la ia i latou o ē pule i le falemaʻi ona iloa lou tulaga i le toto ma i latou e logo iai, pe a tupu se faalavelave faafuasei e aafia ai lau tama?
8 Ona tagaʻi lea i ai ua latou ō uma ma ave nei pepa ma i latou I TAIMI UMA. Siaki lenei mea ma lau fanau ae latou te leʻi ō i le aʻoga i aso taitasi, ioe, e faapena foi a o leʻi ō atu i le malae taalo po o nofoaga o evaevaga. E ao ia i tatou uma ona mautinoa ua ia i tatou nei pepa a o iai i le galuega, i malologa, pe i se tauaofiaga faa-Kerisiano. Aua lava neʻi aunoa ma i latou!
9 Manatu i le mea e mafai ona tupu ia te oe pe afai e teʻi ua e oo i se tulaga matautia i le potu taofia o le falemaʻi, matapogia ma/pe ua lē mafai ona e tautala mo oe lava. Afai e lē o ia te oe le pepa, ma e leai se tasi o le aiga pe leʻi taunuu atu foi se toeaina i le falemaʻi e tautala mo oe, ma ua iʻu faapea e te ‘manaomia le toto,’ e tauau la ina tui lava ia te oe le toto. E faanoanoa lava, ua tupu lenei mea i nisi. Ae a ia i tatou le pepa, o le a ia tautala mo i tatou, e faamatalaina le mea tatou te loto e fai.
10 O le pogai lena e sili atu ai le pepa faafomaʻi na i lo se taulima po o se filifili faafomaʻi. E lē mafai e se taulima po o se filifili faafomaʻi ona faamatala a tatou mafuaaga ua faavae i le Tusi Paia mo lo tatou tulaga ma e lē o iai ni saini e faamaonia ai le mea ua tusia ai. Na faapea se faaiʻuga a se faamasinoga i Kanata e uiga i le pepa a se tuafafine: “Na pau a lea o le auala ua filifilia e [le gasegase] e mafai ai ona faailoa atu i fomaʻi ma isi e saunia le tausiga o le soifua maloloina, a oo ina matapogia pe i se isi itu ua lē mafai ona faailoa atu ona manaoga, e faapea e lē ioe o ia i se tuiga toto.” O lea ia aua lava neʻi aunoa ma ia!
11 Ona sa fuafuaina faapitoa a tatou faasinoga faafomaʻi mo le feagai ai ma tulaga faafuaseʻi, o lea i taotoga faatulagaina o le a atamai mo oe ona tusia sau lava faasinoga totino, tuu atoa uma ai faasinoga auiluma (ua faavae i la tatou faasinoga faafomaʻi) ina ia mafai ona e faaaofia ai itu iloga, e pei o le ituaiga o taotoga ma suafa o fomaʻi ma le falemaʻi. Ua ia te oe le aiā e faia ai lenei mea ma faamautinoa ai le togafitiga ua e filifilia. E ui ina atonu lua te lē o faatalitalia ma le fomaʻi ni faafitauli tugā, faamatala i ai faapea e ao ona mulimuli i lenei faasinoga neʻi teʻi ua tupu aʻe se mea e leʻi faatalitalia.—Faata. 22:3.
12 O le laasaga tāua e sosoo ai o le talanoa i le pule faafomaʻi e manaomia, lea o le a lua faafeagai a lē o se taotoga faatulagaina po o se togafitiga faafuaseʻi. O ai e ao ona e talanoa faapitoa lava i ai?
TALANOA I LE PULE FAAFOMAʻI
13 LE VASEGA FAAFOMAʻI: E lē o se taimi lenei e manumalo ai le palaai loto i tagata. (Faata. 29:25) Afai e aliali atu lou lē mautonu, atonu o le a manatu ai nisi e te lē o faamaoni. Afai e manaomia se taotoga, e faatulagaina pe faafuaseʻi, e tatau ia te oe po o se sui e lata ane o le aiga ona fesiligia ni fesili tuusaʻo i lē o faauluulu i le vasega suesue. O se tasi o fesili tāua o le, Pe o le a faaaloalogia e le vasega suesue le manaoga o le gasegase ma i aiaiga uma lava ina ia togafitia e aunoa ma le toto? A aunoa ma lenei faamautinoaga o le a lē lelei la ona puipuia oe.
14 Taʻu manino i ai ma se talitonuga faaaloalo mea o e manao ai. Faamanino i ai e te manao e tauaaoina lou faafitauli i faiga faafomaʻi e leai se toto e suia ai. Ia faatoʻatoʻa ma mautinoa ona talatalanoa i lau lava faasinoga faafomaʻi auiluma atoa foi ma le faatagana a le falemaʻi mai faiga ua faamoemoeina. Afai e lē loto malie le fomaʻi suesue e galue faatasi ma ou manaoga, o le a e faasaoina la le taimi pe a e fesiligia ē pulea le falemaʻi e sue mai se isi fomaʻi mo oe. O le vaega lena o lana galuega.
15 FOMAʻI O VAI FAAGASE: I tagata uma lava o loo iai i le vasega faafomaʻi e manaomia ona e talanoa i ai a o leʻi faia le taotoga, E LĒ TATAU ONA E MISIA LE TALANOA MA LENEI FOMAʻI. I le vaavaaia pe o e ola pea a o faagaoioi le taotoga, o le fomaʻi o vai faagase o ia lea na te faia faaiʻuga e uiga i mataupu na e pei o le faaaogāina o le toto. O lea e lē atoatoa ona puipuia oe i le tau o le talanoa i le fomaʻi tipitipi. Peitai, e tatau ona lua talanoa ma faatalitonuina le fomaʻi o vai faagase i lou tulaga, ma faamautinoa ai pe o le a faaaloalogia pe leai.—Faatusatusa Luka 18:3-5.
16 E foliga mai o se gaoioiga masani, le asiasi puupuu o le fomaʻi o vai faagase i le gasegase pe a leva le po a o leʻi faia le taotoga—ae afai na te teena lou tulaga i le toto, o le tulua o po ma ao. Augani pea ia muamua ona filifilia e le fomaʻi tipitipi se fomaʻi o vai faagase felagolagomai e mafai ona e talanoa lelei i ai a o mamao se taotoga faatulagaina. Manū o iai le taimi e sue ai se isi fomaʻi pe afai e lē loto malie e uluai fomaʻi e ōgatasi ma ou manaoga. Aua neʻi faatagaina se tasi e upu eseina oe i lenei aiā ia faamalieina i le fomaʻi o vai faagase mo lou taotoga.
17 I nei mea uma, e tatau ona e faamanino atu lou tulaga lē feoeoeai: LEAI SE TOTO. Talosaga mo faiga faafomaʻi e leai se toto e suia ai i lou taotoga. Taʻu atu so o se vailaau ua lauiloa e suia ai le toto mo lou tulaga. Afai e manatu le vasega faafomaʻi e lē aogā ia vailaau i lou taotoga, aioi atu ia i latou e saili mai isi vailaau i lomiga faafomaʻi. Faamautinoa ia i latou e mafai ona e taea mo i latou nisi o faamatalaga pe afai latou te finagalo iai e ala i lou fesili i tou toeaina e faafesootai le Komiti o Upufai Faafalemaʻi.
FAATINOINA O AU AIĀ
18 Iloilo faaeteete le faatagana mai le pepa ua faamoemoeina ma le pepa o le maliliega mai le falemaʻi o loo fesiligia ai oe e sainia pe faaoo atu. I nisi taimi e faatoa uma lava ona faapea mai latou te faaaloalogia ou manaoga, e faailoa mai ai e le palakalafa e sosoo ai faapea e ioe lē ua sainia e mafai e le falemaʻi ona faaaogāina se togafitiga “faasao ola” pe afai latou te fesagaʻi ma faafitauli. E mafai ona aofia ai i lena le toto. E ia te oe le aiā e toesea ai so o se faamatalaga faapena e taofia ai le toto po o le kolosi ese atoatoa. Atonu o le a taumafai teine tausi maʻi e taʻu atu ia te oe faapea e lē mafai ona faia faapea, peitai e mafai ona e faia! Faamatala i ai faapea o le pepa lena o se feagaiga ma i latou ma e lē mafai ona e sainia se feagaiga e te lē ioe iai. Afai e taumafai so o se tasi e faamalosia oe e sainia se mea e teena e lou finagalo, talosaga iai e te fia talanoa i le pule ma/po o le sui o gasegase mo lena ofisa o le soifua maloloina.
19 Pe mafai ona e faia na mea? Ioe, e te mafaia. O lea ia mataalia i ou aiā o se gasegase. E lē faapipiia na aiā faaletagata i le faitotoa i luma pe a e ulufale atu i le falemaʻi. E lē manaomia ona e faamaamulu ai ina ia togafitiga oe. Aua lava neʻi taʻu atua e se isi ia te oe.
20 O se tasi o na aiā ua taʻua o le aiā se ioega ua faailoa, o lona uiga e aunoa ma so o se ituaiga o togafitiga e mafai ona avatu ia te oe e aunoa ma lau faatagana. E mafai foi ona e teena togafitiga uma pe afai e te manao ai. Ae o lau ioega i se togafitiga e tatau ona sosoo ma se faamalamalamaga manino o le mea e finagalo le vasega o fomaʻi e fai, e aofia ai mea uma lava e lē mautinoa. O le mea e soso ai, e tatau ona latou logo atu oe e uiga i so o se vailaau e suia ai le toto o loo maua. A maeʻa ona faailoa atu ia te oe, ona e filifilia loa lea o le togafitiga e te manao ai.
21 Ina ia mautinoa le mea ua e ioe iai, e TATAU ona e fesiligia ni fesili lelei e uiga i so o se mea e te lē malamalama ai, ae maise lava pe a faaaogāina upu faigata po o faaupuga faafomaʻi e i latou e vaaia le falemaʻi. Mo se faaaʻoaʻoga, afai e faapea mai se fomaʻi na te fia faaaogāina le “plasma [le suavai faasamasama o le toto],” atonu o le a e faaiʻua ma le loto mamā faapea o loo ia faasino i le “plasma volume expander [le suavai faasamasama e suia ai le toto],” ae lē faapena. Ae e te leʻi ioe atu, fesili i ai: “O se vaega lena o le toto?” E faatatau i so o sana feuiuiaiga, fesili i ai: “Pe aofia ai le faaaogāina o sina iota o le toto i lena togafitiga?” Afai na te faamatalaina mai nisi o faiga na te fia faatinoina, fesili i ai: “Pe faaputuina loʻu toto i se taimi a o faagasolo le faaaogāina o lenei faiga?”
22 Ae o le ā le mea e ao ona e faia pe afai ua e faatinoina mea uma ua taʻua i luga ae tumau pea le lē felagolagomai pe iai foi nisi teteega i lou tulaga. Aua le nofoaʻi ae talosaga mo se fesoasoani. Na umī nauā se taimi sa faatalitali ai nisi ina ia maua le fesoasoani ma tuua ai o latou lava ola i se tulaga matautia.
FESOASOANI AOGĀ I LE TAIMI MANAOMIA
23 Matau feuiuiaiga o loo mulimuli mai mo le mauaina o le fesoasoani manaomia: (1) O le taimi lava e fesagaʻi ai oe po o sē pele ma se taotoga faatulagaina pe faafuaseʻi e fefinauai ai ona e manao le falemaʻi e faaaogā le toto; pe (2) afai e faasolo ina tugā tulaga o lou maʻi po o sē pele; pe (3) afai i le tulaga o se tamaitiiti (po o se tagata matua), ua faapea mai le fomaʻi, se teine tausi maʻi, po o ē pule o le a latou tapā se faatonuga mai le faamasinoga, ona:
24 TELEFONI TOEAINA O LE TOU FAAPOTOPOTOGA pe afai e leʻi maeʻa ona e faia faapea. (O le mea moni, ona o lo tatou tulaga i le toto, o se ala atamai le logoina o a tatou toeaina i so o se taimi tatou te ō ai i se ofisa o le soifua maloloina.) O le mea e sosoo ai, pe afai e foliga mai e manaomia O LE A TELEFONI E TOEAINA LE KOMITI O UPUFAI FAAFALEMAʻI E TAULATA ANE. Afai e te manao ai, e mafai ona ō mai nisi o le Komiti o Upufai Faafalemaʻi i lena taimi e fesoasoani ia te oe.—Isaia 32:1, 2.
25 Ua silafia e toeaina o ia Komiti o Upufai Faafalemaʻi fomaʻi felagolagomai i lou vaipanoa ma e mafai ona faafesootai i latou ma amata ai ona faatulaga isi fomaʻi po o ofisa o le soifua maloloina e fesoasoani ane. Afai e leai se komiti e iai i lou vaipanoa, o le a siaki e toeaina le isi komiti e latalata ane. Ma afai e lē taulau lena, o le a latou telefoni atu loa i le Auaunaga o Faamatalaga i Purukulini. Atonu foi e mafai ona latou fuafuaina se fesanoaiga ma se fomaʻi o sē e mafai ona ia faamatala i lau vasega faafomaʻi o loo iai le mea e mafai ona faia e aunoa ma le faaaogāina o le toto. Ua aʻoaʻoina uso i le Komiti o Upufai Faafalemaʻi e tauaaoina tulaga faapena.
26 E loto malilie foi sui o Komiti o Upufai Faafalemai e fesoasoani atu ia te oe po o se tauaiga e talanoa i se fomaʻi po o se pule, ae e tatau ona e talosagaina lena fesoasoani. O le mea moni, e lē mafai ona faia e ia uso ni faaiʻuga mo oe, peitai e masani ona mafai ona latou fesoasoani ia te oe i le iloiloina o le manatu o le Sosaiete i mataupu ma lapataia ai oe i au filifiliga faafomaʻi ma itu tau tulafono.
27 Afai e lē malolo atu lava le vasega faafomaʻi e felagolagomai, talanoa i le pule o le falemaʻi e uiga i le suia o i latou i isi o lana au faigaluega o ē o le a faaaloalogia ou manaoga. Afai e faatalatū le pule e faia faapea ma NA O LEA LAVA pe afai ua e maumauai ua iai se isi fomaʻi tipitipi ua faatulaga i se isi mea ma e mafai ona e seʻe i ai, ona ia te oe lea o le filifiliga e avatu ai i le pule se faamatalaga tusia ua i ai le aso ma ua sainia e faaalia ai igoa o fomaʻi lē felagolagomaʻi ma taʻua ai e solofua i latou mai lou taotoga.
28 E mafai ona e faia lena mea? Ioe, o loo ia te oe lena aiā. Ma pe afai e mulimuli ane oo atu le mataupu i luma o se faamasino, e mafai ona oo atu ai lau faamatalaga tusia i lona amanaia o ou manaoga. Atonu e mafai ai foi ona tatalaina le auala faaleatunuu mo isi fomaʻi tipitipi e o ane ma ofo atu a latou auaunaga ia te oe. Ma o le mea e sili ona tāua, e mafai ai ona avatu ia te oe le vaaiga faafomaʻi e manaomia a o leʻi matuia le faaleagaina o lou tulaga. Aua le faatali umi nauā!
29 Ona e lē mafai ona matou taʻuina atu i se tasi e fai se inisiua o lona ola, e tatau ona matou faailoa atu ia te outou e masani a ona matou fesagaʻi ma faafitauli matuia i le tau sueina o fomaʻi felagolagomaʻi e togafitia i latou o ē lē lava pe leai foi se iloa faafomaʻi.
UTA MAMAO I FESILI TAU LUʻILUʻI
30 E ao ona e iloa e iai nisi o fesili e faatutu ane e fomaʻi ma isi e lē faapea e ala ona fesiligia soo ona o se mafuaaga lelei. O se tasi o fesili e masani ona fesiligia e fomaʻi (ma e nisi o faamasino) o le:
• “E sili ia te oe le oti (tuua lau tama e oti) na i lo o le taliaina o se ‘tuiga toto faasao ola’?”
31 Afai e te faapea atu ioe, o le a saʻo lena i se uiga faaletapuaiga. Ae o lena tali e masani ona faauiga sese ma i se taimi e oo ina aumaia ai ni faaiʻuga faamasinoga e lē saʻo. E tatau ona e manatua e te lē o auai i le faiva i lenei tulaga. Na i lo lea, o loo e talanoa e uiga i se togafitiga faafomaʻi e manaomia. O lea, e tatau ona e fetuutuunai i lau aofia, faafomaʻi pe faale-tulafono.—Sala. 39:1; Kolo. 4:5, 6.
32 I se fomaʻi, se faamasino, po o se pule o le falemaʻi, o le “ioe” e mafai ona uiga faapea e te manao e avea o se maturo pe e te manao e faataulaga lau tama mo lou faatuatua. E masani foi ona maimau le faailoa atu fua ia i latou o lou faatuatua malosi i le toetu i lenei tulaga. O le a latou faailogaina ai oe o se failotu tuutoina, e lē mafai ona faia ni faaiʻuga fetuutuunai pe a lamatia le ola. I le tulaga o le fanau, o le a latou tagaʻi ia te oe o se matua tuulafoai o sē teena le mea ua taʻua o le togafitiga faafomaʻi “faasao ola.”
33 Petai e te LE faafitia le faaaogāina o na togafitiga faafomaʻi. Na pau a le mea lua te feeseai ai ma le fomaʻi o le ITUAIGA o togafitiga. O lenei tulaga e masani a ona suia ai le ata atoa mo i latou atoa ma oe. I le isi itu, o se tau faasese mo i latou le faia ia foliga atu faapea e saogalemu le faaaogāina o le toto ma e NA O LEA le togafitia “faasao ola.” (Vaai How Can Blood Save Your Life?, itulau 7-22.) O lea e ao ona e matuā faamanino atu lena manatu. E mafai faapefea ona e faia? E mafai ona e tali atu:
• “Ou te lē manao (Ou te lē manao i laʻu tama) e oti. Ana fai oʻu te manao (manao i laʻu tama) e oti, semanū ou te nofo i le fale. Ae ua oʻu oo mai i inei e fia maua se togafitiga faafomaʻi ina ia ola ai (laʻu tama). O le mea ou te manao ai o le faafoeina o loʻu (laʻu tama) taotoga i faiga faafomaʻi e leai se toto e suia ai. E i ai vailaau e suia ai le toto o loo maua.”
34 O nisi o fesili e masani ona fesiligia e fomaʻi po o faamasino o:
• “O le ā e tupu ia te oe pe afai e faamalosia se tuiga toto i le faatonuga a le faamasinoga? Pe o le a paʻū ia te oe lena avega tauave?”
• “Faamata o lou taliaina po o le faamalosia o se tuiga toto ia te oe o le a mafua ai ona tuu esea oe mai lau tapuaiga pe faafitia ai le ola e faavavau? O le a faapefea ona tagaʻi laʻu faapotopotoga ia te oe?”
35 Na tali atu se tasi o tuafafine i se faamasino e faapea i sea tulaga o le a lē paʻū ia te ia le mea ua filifilia e le faamasino. E saʻo i se tasi itu, ae o le a faauigaina e le faamasino faapea talu ai la e lē paʻū i le tuafafine le avega tauave, o lea o le a paʻū ai i le faamasino le avega tauave mo le tuafafine. Sa ia faatonuina se tuiga toto.
36 E tatau ona e malamalama faapea o le fesiligaina o ia fesili, e masani a ona saili ai nisi mo se auala e mimilo ai lou teena e talia le toto. Aua e te avatua ia i latou e aunoa ma le mafaufauina! O lea e faapefea ona tatou alofia lena lē malamalama? E mafai ona e tali atu:
• “Afai e faamalosia le toto ia te aʻu i so o se auala, o le a tutusa lava lena ia te aʻu ma le toso teine. O le a iʻu ai i loʻu mafatia tau faalogona ootia ma le faaleagaga ona o lena osofaiga lē manaomia ia te au mo le isi vaega o totoe o loʻu olaga. O le a ou teena ma loʻu malosi atoa sea faaleagaina o lou tino e aunoa ma loʻu ioega. O le a ou faia taumafaiga uma e faasalaina ai ē latou te osofaia aʻu e peiseai o loo oʻu faia i se tulaga o le toso teine.”
37 E tatau ona avatu se faamatalaga malosi, manino auiliili faapea o se tuiga toto faamalosi e tusa ia i tatou ma le faaleagina faasagatau i o tatou tino. E lē o se mataupu e soona fai. O lea taofi mau i lou tulaga. Ia faamanino atu e te manao ia faafoeina i faiga faafomaʻi e leai se toto e suia ai.
O LE Ā O LE A E FAIA E SAUNIUNI AI?
38 Ua uma ona tatou autaluina nisi o mea e manaomia ona e faia e puipuia ai oe ma lou aiga mai se tuiga toto lē manaomia. (Mulimuli ane, matou te faamoemoe e saunia atili ni auiliiliga i le taulimaina o faafitauli e mapuna aʻe pe a faamataʻuina pepe ma fanau i tuiga toto.) Ua tatou tilofaia foi le mea ua saunia ma le alofa e le Sosaiete e fesoasoani ai i se taimi e manaomia ai. O le ā e tatau ona e faia i lenei faamatalaga ina ia mautinoa ai ua e sauni e faafetaiaʻia se aiaiga e luʻia le faatuatua?
Muamua: Fai se talanoaga faaleaiga e faataʻitaʻi ai ia mataupu ma galueaina le mea o le a e tautalagia ma faia, ae maise lava i se tulaga faafuaseʻi.
Sosoo ai: Tagaʻi pe ua iai uma pepa faamaumau e te manaomia.
Ona: Avea lea ma mataupu o tatalo uigā ia Ieova e lagolagoina oe i lau faaiʻuga mausali e ‘taumamao mai le toto.’ O le usiusitai i lana tulafono i le toto e faamautinoa ai ia i tatou lona finagalo malie mo le ola e lē uma.—Galu. 15:29; Faata. 27:11, 12.
[Pusa i le itulau 3]
O le faamatalaga i lenei sulu ua faamatala ai sauniuniga ua faia i le Iunaite Setete ma i le tele o lala tetele e pei o Ausetalia, Hawaii ma Niu Sila. Talu ai o le tele o uso e i lalo o le Lala a Samoa i Sisifo e faimalaga atu i nei atunuu mo taotoga po o isi togafitiga faafomaʻi, o lea ua matou sauniunia ai se faamatalaga ina ia e silafia ai faatulagaga ua faia ai i inā auā sou lelei. Afai e te manaomia le malaga atu i se isi atunuu mo se togafitiga faafomaʻi, faamolemole ia faailoa atu i le Ofisa o le Lala i Apia auiliiliga, ina ia tuuina atu ai nei faamatalaga i le Ofisa o le Lala mo lena atunuu. E leai ni a tatou Komiti o Upufai Faafalemaʻi i Samoa, Toga po o Tuvalu, ae mafai e uso i na atunuu o loo manaomia se fesoasoani e tusa ai o togafitiga faafomaʻi, ona faatalosaga atu i a latou toeaina ina ia faafesootai le Ofisa o le Lala a le Sosaiete i Apia.
Teu lenei faamatalaga i se mea e mafai ona e vave tapā ai pe a manaomia
[Pusa i le itulau 5]
Afai e iai so o se tulaga faafomaʻi e faasolo ina tugā ma iʻu ina faamataʻuina i se tuiga toto, siaki lenei pusa i le mea e ao ona fai:
1. Telefoni toeaina o lau faapotopotoga e fesoasoani atu ia te oe.
2. Ia telefoni e toeaina le Komiti o Upufai Faafalemaʻi e latalata ane pe afai e manaomia.
3. E mafai e le Komiti o Upufai Faafalemaʻi ona fesoasoani ia te oe i le talanoa i fomaʻi ma isi.
4. E mafai e le Komiti o Upufai Faafalemaʻi ona fesoasoani ia te oe e faafesootai isi fomaʻi mo fesanoaiga ma fomaʻi tipitipi o loo iai i vailaau e suia ai le toto.
5. E mafai e le Komiti o Upufai Faafalemaʻi ona fesoasoani foi ia te oe ia sifi i se isi falemaʻi e sili ona faaaloalogia mo togafitiga manaomia.