Faaalia le Naunau Totino i Isi
1 Ua fau ma soloi faamaoniga o le naunau o Ieova i isi. Pe ua ia lē saunia ea ma le agaalofa mea faaletino e manaomia e lana foafoaga? (Kene. 1:29,30; 2:16,17; Mata. 5:45; faatusatusa Luka 6:35.) Ae sili atu ona tāua, pe ua ia lē faaalia ea le naunau totino ia i tatou e ala i le saunia o so tatou faaolataga mai le agasala ma le oti?—Ioane 3:16.
2 A o iai Iesu i le lalolagi, sa ia faataʻitaʻia ai le faaaʻoaʻoga lelei atoatoa a lona Tamā i le faaalia o le naunau totino i isi. (Mata. 11:28-30; 1 Pete. 2:21) Ina ua augani atu se tamaloa lepela ia Iesu, “Le Alii e, a ē finagalo i ai e te mafaia lava ona faamamā mai ia te au,” na tali atu Iesu, “Ou te loto i ai,” ma faamalōlōina ai le tamaloa. (Mata. 8:2,3) Ina ua latalata atu i le aai o Naina, na fetaiai ai Iesu ma le solo o se tanuga o loo aumai ai se taulealea talavou, le tama e toatasi a se fafine ua oti lana tane, ma ina ua ootia i le alofa mutimutivale, na toe faafoisia ai o ia e Iesu i le ola. (Luka 7:11-15) E aunoa ma le tau talosagaina, sa faaalia e Iesu le naunau totino i isi. E oo lava foi i tamaiti, sa ia manatu e aogā ona ia uaʻi atu i ai ma faaaluina ai lona taimi, ma sa ia lē pisi nauā e taofia ai lona faamafanafana ma faalaeiau atu i isi.—Mata. 20:31-34; Mare. 10:13-16.
AIGA MA UO
3 E ao ona tatou taumafai ia pei o Ieova ma Iesu Keriso i le vaavaaia lea o auala e faaalia ai le naunau totino i isi. O le mea lea, seʻi o tatou iloiloina ai nisi o avanoa e faia ai lena mea.
4 O se tasi o mea e sili ona manaomia, o le faaalia lea e uso o se naunau totino faamaoni i sui o o latou lava aiga ae aua le lafoaia le tulaga faaleagaga o le aiga. E aofia ai i lenei mea le suesue faatasi ma le aiga e lē aunoa. I la outou suesuega faaleaiga, pe tou te iloiloina ea mataupu i se auala e faagaee fiafia ma maua ai aogā faatino? Pe mulimuli ane tou faatinoina e ala i le galulue e lē aunoa i le auaunaga i le fanua ma sui taitoatasi o le tou aiga? A tou faia, pe o se taimi fiafia ea lena? O e atiina aʻe ea i lau fanau le faanaunauga e fesoasoani atu i isi tagata, i le faaalia o le alofa faa-Kerisiano i tuaoi? Afai ua e faaipoipo ae leai sau fanau, pe faia lava la sau suesuega faaleaiga?
5 Tatou te mananao e avatu se fesoasoani faaleagaga i tagata uma lava tatou te mafaia. Ae ona o le gaogaosa o lo tatou olaga, pe galo ai ea ia i tatou ona faaalia le naunau totino i sui o le faapotopotoga o ē e iai manaoga faapitoa? (Faata. 3:27; Kala. 6:10) I le faapotopotoga Kerisiano, o loo iai tamaiti e leai ni tamā, o ē matutua, fafine ua oti a latou tane, o ē vaivai, o ē loto momomō, o ē lē atoatoa, ma isi o ē e iai manaoga faapitoa. I le faataʻitaʻi ia Ieova ma lona Alo, o Iesu Keriso, e lē tatau la ona tatou faatamala i le faaalia o le naunau totino i o tatou uso ma tuafafine uma lava.—1 Kori. 10:24; Fili. 2:4; Epe. 13:16.
O Ē PEI NI MAMOE I LE FANUA
6 E mafai faapefea ona tatou faaalia le naunau totino i tagata o ē o loo faia a latou suesuega faale-Tusi Paia i aiga? Ua iloa e le toatele o i latou ia le manaoga ia motusia ese le auaumea ma ē sa latou masani i le lalolagi. E ui lava la ina tatou pisi, ae o tatou faaalia ea le naunau totino i na tagata aʻoga ma tausia i latou o ē ua faia ni suiga ina ia saʻoloto e avea o ni a tatou uo fou? O avea ea i tatou o se puna o faalaeiauga ia i latou e ui ina tatou te lē o suesue ma i latou?—Faatusatusa Mareko 10:28-30.
7 E mafai ea ona faateleina sou sao i le faaalia o le naunau totino faamaoni i tagata o ē ua loto malilie e faalogologo i le tala lelei? Faamata e te taumafai e fesoasoani ia i latou ina ia ausia o latou manaoga faaleagaga? I se tulaga totino, o le ā e mafai ona e faia ina ia faateleina ai sou sao i le faiva i le fanua? Aua e te toe faatali pe afai o lena ua e iai nei i se tulaga e te saosaolaumea atoatoa ai.—Luka 9:60-62.
8 E tatau lava ona tatou faaaʻoaʻo ia Ieova ma Iesu i le faaalia o le naunau totino i isi. E manaomia ona tatou tigā alofa ma aapa atu e avatu le fesoasoani, e pei ona sa faia e Iesu i le tulaga o le tamaloa foi lea na maua i le lepela. Ioe, e tatau ona tatou mataala pea i auala e mafai ai ona tatou faaalia le naunau totino i isi.