Tataʻi Ē Naunau i le Faalapotopotoga
1 E manaomia e tagata o loo suesue ona talisapaia faapea, e faavae i le Tusi Paia le faalapotopotoga a Ieova ma lona fausaga ma ana auala. Ina ia agaʻigaʻi i luma, e tatau ona latou iloa ua latou maua le malamalama i ala o Ieova, e pei ona atagia mai i lana faalapotopotoga, ae lē tau ina faamasani i ai e pei o se isi lotu. E mafai e la tatou polosiua o Molimau a Ieova—Autasi i le Faia o le Finagalo o le Atua i le Lalolagi Aoao ona fesoasoani atu ia te oe i lenei itu.
2 Le Aogā o le Polosiua: I le tau amataga lava o le suesuega, e ao ona maua e le tagata aʻoga se kopi o le polosiua Faia o le Finagalo o le Atua ma taʻu muamua i ai le vaega o le a autaluina e aofia ai i ana lesona faalevaiaso. E mafai ai i lea ona ia sauniuni mo le suesuega. A o e sauniuni, ia manatunatu i aafiaga o le lotu sa iai muamua po o loo iai pea le tagata aʻoga, ina ia e faailoa lelei atu ai le eseesega ma le faalapotopotoga a Ieova ua faavae i le Tusi Paia. E masani lava ona avea se lesona i le eseesega, ma fesoasoani e maʻoti ai i le mafaufau o le tagata aʻoga. Suʻe i mau autū o loo siiina mai, ma ia faaaogā fesili autalu ua aumaia i le faaiʻuga o le tele o vaega e 15 o le polosiua.
3 O se faaaʻoaʻoga, i le talanoaina o le vaega “Faapotopotoga mo le Atiina aʻe i le Alofa ma le Autasi,” e mafai ona e fesili i le tagata aʻoga pe faapefea ona tofia ma manatu i faifeau o lana lotu. Ona faaauau lea ona lua iloiloina i le Tusi Paia, le eseesega o lenei itu ma le mea o loo vaaia ma faia i le faalapotopotoga a Ieova. O le auala lava foi lena e tasi e mafai ona fai i le talanoaina o le vaega e uiga i le faatupeina o le galuega, o loo i le amataga o le itulau e 28. O le a fesoasoani lenei itu i le tagata aʻoga e talisapaia ai ala o Ieova ma uunaia ai o ia e talilelei atu i ai.
4 Ia teu foi i manatu, e lē manaomia ona lua talanoaina le mataupu atoa o loo iai i le vaega i se suesuega e tasi, peitai e mafai ona talanoa auauai i isi suesuega, e faalagolago i lona umi. E na o le lima po o le sefulu minute e manaomia ona faaalu ai pe a uma suesuega taitasi, ma faaaogāina ai fesili autalu e talafeagai ma le vaega o le mataupu o loo talanoaina.
5 Ia tataʻi atu manatu i ata ma faataʻitaʻiga e mafai ona faamamafa ai manatu o le mau, i le mafaufau o le tagata aʻoga. O le tele o ata o loo faaalia mai ai le faalapotopotoga a Ieova i le lalolagi aoao atoa ma le autasi o loo iai i tagata o le Atua, e aunoa ma le popole fua i lanu, talaaga faavafealoai, po o le loto atunuu. Ua na o lea lava le faalapotopotoga ua mafai ona faataunuuina moni le faatonuga na avatu e Iesu ia talaʻi le tala lelei i le lalolagi aoao.—Mata. 24:14.
6 E tatau lava i tagata ona filifili i le va o le faalapotopotoga a Ieova po o le faalapotopotoga a Satani. E mafai ona tatou fesoasoani ia te i latou ina ia faia le filifiliga saʻo e ala i le faaaogāina atoatoa o mea faigaluega lelei ua saunia e Ieova e tataʻi ai ē naunau i lana faalapotopotoga. E ao ona tatou fuafua e faia lenei mea i Suesuega faale-Tusi Paia taitasi.