O E Iloa Atu se Manaoga?

¹ Ua faamatalaina Ieova e faapea, o se Fesoasoani ma o se Sulufaiga. Ua tatou iloa e mafai ona tatou ō atu ia te ia i le taimi lava tatou te manaomia ai se fesoasoani, ma o le a ia fesoasoani mai ia i tatou. (Sala. 18:2; 46:1) E mafai ona tatou faataʻitaʻi i lenei uiga tiga alofa e ala lea i le ofoina atu o le fesoasoani i isi pe afai tatou te iloa se manaoga.

² O le ā e uunaia ai se tagata e faia se taumafaiga faapitoa e fesoasoani ai i se isi tagata? E toatele tagata latou te vaai i lenei mea o se uiga alofa ma o se mea e tatau mo le tagata. E mautinoa o loo faalaeiauina e le Afioga a le Atua lea tulaga. (Roma 15:1) Ua uunaia i tatou e Paulo ina ia ‘vaavaai, e lē tau o a tatou lava mea, a e ia naunau totino foi i mea a isi.’—Fili. 2:4.

³ O le mea lenei e mafai e i tatou uma ona maua ai le olioli pe a faia. (Galu. 20:35) Na faaesea mai e Paulo le talavou o Timoteo e fai ma faaaʻoaʻoga o se tasi o lē “na te tausia faamaoni mea e manuia ai” ona uso. (Fili. 2:20) O se mea lelei ona e toatele tagata talavou o loo faatasi ma i tatou i faapotopotoga i aso nei e talitutusa manatu. A e pe tatou te talavou pe matutua, o loo i ai mea e mafai ona tatou faia pe afai tatou te iloa se manaoga.

⁴ Pe sa e lagona ea e i ai nisi o loo i ai le manaoga e tatau ona uai totoʻa atu i ai? Atonu o se uso po o se tuafafine sa faataotolia i le falemai, ma e toaitiiti nisi na asiasi atu i ai; po o se tasi ua oo ina lē atoatoa lona malosi, a e e leai se tasi e fesoasoani atu i ai pe fesoasoani foi i le faia o galuega i le fale. Sa silasila Iesu ia i latou o loo auauna ia Ieova e faapea, o ni sui o se aiga o ē o loo fetausiai moni. (Mare. 3:33-35) I le faataoto i mamoe ma ʻoti, na ia faaalia ai e faapea, o i latou o loo olioli i le itu taumatau o le Tupu, ua latou faia faapea ona o lo latou loto fesoasoani i uso o le Tupu.—Mata. 25:40.

⁵ E Mafai Faapefea ona Ou Fesoasoani? O le ā e mafai ona faia ina ia saunia atu ai le fesoasoani pe afai e i ai se manaoga manino? Pe tatou te tausolomua ea i le fesoasoani atu i se auala? Atonu o loo i ai ni tagata matutua o ē latou te manaomia ni faalaeiauga, peitai e leai ni a latou aumea vavalalata o loo fesoasoani atu ia i latou. Atonu o loo i ai ni talavou o ē o loo manaomia se fesoasoani. Atonu e taunuu atu i le Maota o le Malo se aiga fiafia fou e toatele sa la fanau, a e e lē o i ai le tagata talaʻi lea o loo suesue ma i latou. Atonu la o le a latou talisapaia le i ai o se tasi e tauofo atu ina ia fesoasoani atu ia i laua i le vaavaaia o tamaiti.

⁶ A o tatou tutupu aʻe i le alofa mo le upu moni ma le faalapotopotoga a Ieova, e tupu aʻe foi lo tatou talisapaia ma le manatu mamafa mo isi i le faapotopotoga. Ua faamalosiau mai Paulo ia i tatou ina ia tatala atu i avanoa faapea. (2 Kori. 6:11-13) Na faamamafa mai e Iesu e faapea, o lo tatou faaalia o le alofa o le tasi i le isi, o le auala sili lea e faaalia ai o i tatou moni o ona soo.—Ioa. 13:35.

⁷ O lea la, pe afai tatou te iloa se mea o i ai se manaoga, o le alofa moni mo o tatou uso e tatau ona uunaia ai i tatou e tausolomua ma ia fesoasoani atu i so o se auala tatou te mafaia. (Kala. 6:9, 10) O le manatu mamafa mo isi, e fusia faatasi ai i tatou i le fusi o le alofa ma le autasi. (1 Kori. 10:24) O le auala lenei e faia ai sa tatou vaega ina ia fesoasoani atu ai i le faamalieina o se manaoga e tulai mai i totonu o le faapotopotoga.