Le Olomatamata ma le Awake!—O Mekasini mo o Tatou Taimi Faanatinati!
1 I le faataunuuina o valoaga o le Tusi Paia, ua tutupu mea e gatete ai i le lalolagi! A o tatou vaavaai atu i mea o loo tutupu i le lalolagi o loo siomia ai i tatou faapea ma totonu o le faalapotopotoga faatiokarate, ua mafai ai ona tatou malamalama atoatoa i le matuā faanatinati e tatau ona tatou talaʻiina ai “le tala lelei” o le Malo. (Mare. 13:10) Ua aumaia e lenei tulaga ia i tatou ia mafuaaga e faaauau ai ona maelega i la tatou faiva a o faagasolo le masina o Aperila.
2 O le tāua o la tatou feau, ua faamamafaina i le galuega faapitoa lea o le a tatou tauavea i lenei masina. Ua tatou āloālo atu ai ma le naunau i le tatalaina o le Tala o le Malo lea o le a tatou tufatufaina atu ia Aperila ma Me. Ina ia atiina aʻe lo tatou aasa i lenei galuega ma atiina aʻe le naunau i la tatou oganuu, o le a lomia ai i Le Olomatamata ma le Awake! ni mataupu talafeagai e faamamafaina ai le uiga faavaloaga o mea mataʻutia o loo tutupu i le lalolagi. E mafai faapefea ona tatou saunia se taulimaga o le a faagaee ai le naunau i mekasini?
3 Atonu o le a mafai ona e fausia aʻe se taulimaga uigā e ala i lou mulimuli i nei laasaga faavae: (1) Fili se mataupu mai se tasi o mekasini e te manatu o le a tosina i ai tagata o lau oganuu. (2) Fili se faamatalaga po o se mau o loo sii mai i lenei mataupu e te talitonu o le a faagaee ai le naunau o lē ona le fale. (3) Sauniuni se taulimaga puupuu e faaaofia ai se faafeiloaiga faaleuo, se fesili po o se faamatalaga o faamatilatila ai se manatu faale-Tusi Paia, ma se valaaulia faamaoni ia talia mekasini. E pei ona e tagai mai i ai, o lenei auala e matuā faigofie ma e lē fenuminumiai. Atonu e mafai ona lua faatasitasi ma se isi tagata talaʻi sa lua galulue faatasi i le faiva ma saunia ai se taulimaga.
4 O loo lagā e “Le Olomatamata” o Aperila 1 se fesili: “Le Lotu—Po o se Mataupu e Matuā Tapu Lava?” A ofoina le mekasini, e mafai ona e faapea atu:
◼ “E masani lava ona faapea mai, o le lotu o se tasi lea o mataupu e lē tatau ona talanoaina ona o le tele nauā o feteenaiga. O le ā sou manatu i lena mea?” Ona faasino lea i se faamatalaga i le mataupu.
5 Atonu o loo e faaaogaina “Le Olomatamata” o Aperila 15 o loo i ai le mataupu, “Pe e Mafai ona Maua le Upu Moni Faalelotu?” Atonu o le a talileleia oe i le faaaogaina o lenei faatomuaga:
◼ “Ona o le tele naua o lotu i aso nei, ua tau manatu ai nisi tagata pe faamata e mafai ona maua le upu moni faalelotu. Ua faaalia i lenei mataupu le auala e mafai ai e oe ma aʻu ona maua se tali faamalieloto i lenei fesili. . . .”
6 A o e lei alu atu i le galuega talaʻi, aisea e lē faataʻitaʻi ai lau taulimaga ma se isi tagata talaʻi ina ia e masani i ai? E mautinoa o le a mafai ona lua fetufaʻi i ni fautuaga aogā e faateleina ai lou uigā ma atili mautinoa ai.
7 A o matuā lalata mai le iuga o lenei faiga o mea, seʻi o tatou faanatinati i a tatou taumafaiga e fesoasoani i tagata loto faamaoni ia sosola ese mai ia Papelonia le Aai Tele. (Faaa. 18:4) Ua faia e Le Olomatamata ma le Awake! se vaega tāua i lenei galuega e lē toe faia lava. Tatou te matuā faafetai ona ua saunia e Ieova nei mea faigaluega lelei tatou te faaaogaina!