Saili mo Ē Loto Naunau
1 O se tasi o fuafuaga o le galuega talaʻi, o le sailia lea o i latou o ‘e loto naunau mo le ola e faavavau.’ (Galu. 13:48) O le tufatufaina atu o mekasini o Le Olomatamata ma le Ala Mai! ua faamaonia le avea o se auala aupito sili ona lelei e faataunuuina ai lenei mea, ona ua avea a tatou mekasini ma auala ua faailoa atu ai i tagata le faamoemoe o le Malo. O le a tatou faatomuaina la mekasini ia Aperila. E iai le faamoemoe, i so o se mea e maua ai ni tagata fiafia, e mafai ona tatou amataina ai ni suesuega fou faale-Tusi Paia i le tusi o Le Poto e Taʻitaʻia ai i le Ola e Faavavau. O nisi nei o fautuaga atonu e aogā mo oe:
2 Pe a faaaogaina “Le Olomatamata” o Aperila 1, e mafai ona e faatomua le mataupu, “Vivii Atu i le Tupu o le Vavau!,” lea o loo faaautū i le lauga lautele o le tauaofiaga itumalo i le tausaga ua mavae, ma e faapea atu:
◼ “O le toatele o tagata ua matou talanoa atu i ai, e faatuatua i le Atua. Ae ua faigata lava i nisi ona talitonu ia te ia. O le ā sou lagona? [Faatali mo se tali.] Ua siomia i tatou i mea moni e faamaonia ai, e tatau lava ona iai se Atua. [Faitau le Salamo 104:24.] Pe a tatou vaai i se mea puʻeata po o se komepiuta, ua tatou iloa lelei ai lava e faapea, na faia lea mea e se tufuga atamai. Po o se uiga magafagafa la le faapea atu, o mea e sili atu ona lavelave, e pei o le lalolagi ma i tatou o tagata, na teʻi lava ua iai?” Faaaogā se palakalafa mai le mataupu e faailoa atu ai se mafuaaga tatau e talitonu ai i le Atua. Afai e faaalia le naunau, ofo loa i ai mekasini.
3 O loo faatomua i “Le Olomatamata” o Aperila 15 le mataupu “Le Mafuaaga e Maua ai e le Tapuaiga Moni le Faamanuia a le Atua.” A o lei faia le mataupu, e mafai ona e fesili atu e faapea:
◼ “Faatasi ma le faitau selau o lotu o loo iai i le lalolagi, faamata e te manatu o le a talia e le Atua nei lotu uma? [Faatali mo se manatu faaalia.] Na valoia e Iesu e faapea, e ui lava i le faapea mai o le toatele o tagata lotu o i latou o tagata o le Atua, ae o ē e lē o faia le finagalo o le Atua, o le a teena. [Faitau le Mataio 7:21-23.] E tāua tele lo tatou mātaulia o le lotu moni lea na aʻoaʻoina e Iesu.” Suʻe i le ulutala, “O ā Fua e Ao Ona Fuaina Mai e le Tapuaiga Moni?,” e amata i le itulau e 16, ma talanoa se faaaoaoga se tasi e faataʻitaʻi ai le manatu.
4 Pe a faatomua le mataupu autū i le “Ala Mai!” o Aperila–Iuni e faapea, “Lo Tatou Paneta ua Faaleagaina—Pe e Mafai Ona Faasaoina?,” atonu e mafai ona e faapea atu:
◼ “E toatele tagata ua oo ina latou iloa le faaleagaina ua faia i lo tatou paneta. Pe e te manatu e iai se mea e mafai ona faia e fesoasoani ai i lo tatou paneta? [Faatali mo se tali.] O le ā sou lagona i se mea e manaomia ona faia ina ia tatou maua ai le filemu moni i le lalolagi?” Pe a uma ona tali mai lē ona le fale, ona suʻe lea i le itulau e 14 ma faitau mau e pei o le Faaaliga 11:18. A o faaaogaina mau o loo sii mai i le mataupu, ia faaalia le auala o le a aumaia ai e le Malo o le Atua i le lalolagi aoao le filemu lea e tumau e faavavau. Ona fesili lea pe manao lē ona le fale e faitau i le mekasini, ma fai se fuafuaga e te toe foi atu.
5 Afai e te tau atu i le toatele o tagata e faapea mai o i latou o loo pisi, e mafai ona e fai atu faapea:
◼ “Matou te naunau e fia fesoasoani i tagata o ē soifua i olaga pisi ma ē e itiiti lava se taimi e maua e manatunatu ai i vala faaleagaga o le olaga. Ua fuafuaina a matou mekasini, o Le Olomatamata ma le Ala Mai!, e aumaia ai ni faamatalaga pupuu e uiga i mataupu tāua o loo aafia ai oe ma lou aiga. Ou te fiafia e tuu nei kopi mo oe e te faitau ai.”
6 Ia manatua ona faailoa atu ia i latou o ē talia mekasini se avanoa e faia ai se meaalofa tauofo i la tatou galuega i le lalolagi aoao. O le mea moni lava o le a latou maua aogā mai le faitauina o Le Olomatamata ma le Ala Mai!, na o loo aumaia ai ‘le tala lelei i se mea e sili atu ona lelei.’—Isa. 52:7.