Ia “Maelega i Galuega Lelei” ia Aperila!

¹ Ia Aperila o le tausaga ua mavae, na tuuina atu ai se molimau e lei faapea ona iai muamua ina ua faasalalauina i le lalolagi aoao le faitau miliona o kopi o le Tala o le Malo Nu. 34. Na taufai auai ma le maelega tagata talaʻi o le faapotopotoga faapea ma paeonia i lenei galuega faatupu fiafia. Pe sa e iai ia i latou na? Afai na e iai, e mautinoa la sa e matuā olioli e faia se vaega i lena tauiviga mataina. Ae atonu o e tau mānatu nei, Po o le ā se ‘galuega lelei’ o taatia mai mo i tatou i lenei tausaga?—Tito 2:14.

² Ia Aperila ma le amataga o Me, o le a ia i tatou ai le fiafiaga o le tufatufaina atu o lomiga faapitoa o mekasini o Le Olomatamata ma le Ala Mai! e aofia ai le mataupu o le Ala Mai! faa-Peretania o Aperila 22, 1996, o loo faatomua mai e faapea “When Wars Will Be No More” [Pe a Lē Toe Iai ni Taua]. Talu ai o lenei mataupu o le a fiafia i ai le toatele o tagata i aiga, o le a tatou tauivi ai la e avatu nei mekasini i sona tulaga e matuā tufatufaina ai i le tele e mafai ai. I le tagai i ai i le tāua o faamatalaga o loo i nei lomiga, e tatau ai ona faatomua atu ia Aperila ma oo atu ai ia Me, seia oo ina uma lomiga e maua mai.

³ Lo Tatou Sini—Ia Auai Tagata Talaʻi Uma Lava: O le a avea o se faalaeiauga moni lava pe afai e mafai ona fai ai se sao o tagata talaʻi uma o loo i lenei atunuu i le galuega talaʻi ia Aperila. Ona o lea faatoʻā mavae le Faamanatuga o le maliu o Keriso, o le a mautinoa ai lo tatou mananao e faaalia lo tatou sapaitalia o le agalelei o le Atua e ala i le ofo atu o se “taulaga o le viiga” i le faiva i le fanua.—Epe. 13:15.

⁴ E tatau ona faia se taumafaiga vilivilitai ia amanaia ai manaoga o tagata uma o le faapotopotoga ina ia mafai ai e i latou uma ona fai se sao maelega i le faiva ia Aperila. (Roma 15:1) E tatau i ē o faia suesuega tautusi ona manino atoatoa i tulaga o i latou o loo i a latou vaega ma ofo atu i ai se fesoasoani aogā pe a tatau ai. Pe manaomia e se tasi se auala? O ai e mafai ona ia saunia lea auala? Pe e iai nisi e matafefefe pe matamuli? Pe mafai e tagata talaʻi ua tele atu le poto masani ona galulue faatasi ma i latou? Ae faapefea i latou ua faataotolia i aiga po o ē o mamaʻi? Pe mafai ona latou auai i le molimau atu i telefoni, i le tusia o tusi, po o nisi lava gaoioiga e fua mai?

⁵ O nisi ua lē toe talaʻi ua latou mauaina pea faalaeiauga faaleagaga, ma atonu e mafai ona uunaia i latou e toe auai i le galuega talaʻi. O lea tauiviga faatasi ma le Ala Mai! faapitoa o le a maua ai e i latou se avanoa pito sili ona lelei e toe galulue ai i le galuega talaʻi.

⁶ Toleni Ē Iti ia Fai se Sao: E toatele fanau a Molimau a Ieova ua ō atu faatasi ma o latou mātua mo le tele o tausaga mai lea fale i lea fale, e ui lava latou te lei auauna o ni tagata talaʻi e lei papatisoina. Pe o le taimi ea lenei mo i latou e amata ai? Pe ua uunaia ea i latou mai o latou loto ma ua sauni e fai se sao uigā i le galuega mai lea fale i lea fale? E tatau i ulu o aiga ona faaaogā le taimi o suesuega faale-Tusi Paia a le aiga e fesoasoani ai i a latou fanau ua agavaa, i le sauniunia o se taulimaga e talafeagai i le matua o le tagata ma lona tomai. O tamaiti matutua e mafai ona filifilia se fesili faatupu manatu e faaosofia ai le naunau o le tagata e ona le fale ma faasino atu i ai le tali o loo i totonu o le mekasini. E mafai e tamaiti laiti ona aumaia se molimau uigā i ni nai upu. Mo se faaaoaoga, e mafai ona latou faalaeiau le tagata e ona le fale ina ia “faitau i se mekasini faapitoa ua ofoina i tagata i le lalolagi aoao i lenei masina.” I sauniuniga a lou aiga, ia faamautinoa o loo faaaofia ai ni manatu mo le foiaina o ni teteega e masani ai. O le a e mauaina le tele o manatu lelei i le tamai tusi o Le Auala e Amata ma Faaauau ai Talanoaga Faale-Tusi Paia. I taimi o meaʻai ma isi faatasiga talafeagai, ia faalaeiau nisi o le aiga ina ia taʻu mai ni mea na tutupu ia i latou i le auaunaga i le fanua.

⁷ Ua Faia e Tagata Aʻoga o le Tusi Paia ua Agavaa le Galuega na Faia e Iesu: Sa lei gata ai le aʻoaʻo atu a Iesu i le avatua o faatonuga i mataupu tau talitonuga. Na ia auai faatasi ma ana tagata aʻoga i le faiva ma aʻoaʻo i latou i le auala e talaʻi ai. (Luka 8:1; 10:1-11) O le ā le tulaga o iai i aso nei? E sili atu ma le fitu selau suesuega faale-Tusi Paia ua faia i atunuu o loo i lalo o le vaaiga a le lālā a Samoa i Sisifo. O le mea moni, faatasi ai ma faalaeiauga talafeagai, ua mafai ai e le toatele o nei tagata aʻoga ona laasia le laasaga e sosoo ai i la latou toleniga ma agavaa ai e auauna o ni tagata talaʻi e lei papatisoina ia Aperila.

⁸ Afai o e faia se suesuega faale-Tusi Paia, ia iloilo fesili nei: Pe o agaigai i luma le tagata aʻoga, i le tulaga o lona matua ma lona tomai? Pe ua amata ea ona ia fetufaai faatasi ma isi i lona faatuatua i se tulaga lē fuafuaina? Pe ua ia ofuina “le tagata fou”? (Kolo. 3:10) Pe ua ia ausia agavaa mo tagata talaʻi e lei papatisoina, o loo faatulaga mai i le itulau e 97 e oo i le 99 o le tusi Our Ministry? Afai e te talitonu ua agavaa o ia, aisea la e lē fetalanoaai ai ma ia i le mataupu? O nisi tagata aʻoga e manaomia lava na o se valaaulia saʻo atu o i latou e auai i le galuega. O le mea moni, afai ua lotomalie le tagata aʻoga, e muamua la ona tatau i le ovasia taʻimua ona fuafua le auala masani o se talanoaga ma toeaina e toalua. A leai, atonu e iai se mea o loo taofia ai le tagata aʻoga. Atonu la e mafai e se tasi o le au toeaina ona lua ō faatasi i lau suesuega faale-Tusi Paia ma taumafai ia tatala mai manatu o le tagata aʻoga i ona faalogona e faatatau i le upu moni. Pe a maeʻa ona faalogologo i mea e fai mai ai le tagata aʻoga, atonu e mafai ai e le toeaina ona avatua fautuaga aogā, faatasi ma le fesoasoani faale-Tusi Paia.

⁹ ‘Faaaogā le Taimi’ e Paeonia Lagolago Ai: I tausaga taitasi i le vaitaimi o le Faamanatuga, o le agaga faafetai mo le taulaga togiola ua uunaia ai le toatele o tagata talaʻi e ‘faaaogā’ le taimi e avea ai ma paeonia lagolago. (Efe. 5:15-17) E ui lava ina manaomia ai nisi faataulagaina, ae tele le taui e maua ai. E faamālō ai i se aofaiga tele o le au talavou ua faaaogaina mālōlōga mai le aʻoga e paeonia lagolago ai. O tagata matutua e faigaluega faasoloatoa, ua faaaogaina afiafi ma faaiuga o vaiaso e matuā galulue ai i le galuega lava lea e tasi. Ua faapea foi ona faaaogā e aiga atoa avanoa e paeonia lagolago faatasi ai! I nisi faapotopotoga, o le toatele o toeaina ma auauna o le faiva ma a latou avā ua auai ai foi o ni paeonia lagolago. I le uunaia i a latou faaaoaoga maelega, ua mulimuli ai i ai isi, ma faapea ona telē ai se pasene o le faapotopotoga ua auauna o ni paeonia lagolago ia Aperila.

¹⁰ Pe mafai ona e paeonia lagolago pe leai, a ia vaai i auala e faateleina ai lau auaunaga i le fanua ia Aperila. Ia faatū se sini totino mo oe lava, se sini o le a faapea ona manaomia ai ni taumafaiga e fai, ae mafai ona ausia. O lou faanaunauga e ‘faaalu ma matuā faaalu au mea’ i le auaunaga ia Ieova, e tusa ai o ou tulaga totino, o le a e maua ai lana faamanuiaga.—2 Kori. 12:15.

¹¹ Feiloaiga mo le Auaunaga i le Fanua: O feiloaiga mo le auaunaga i le fanua e tatau ona faatulagaina i aso uma o le tauiviga o le Ala Mai! i se taimi o le a faatagaina ina ia vave amata ai i le faiva. E tatau foi ona faia sauniuniga mo le molimau atu i le afiafi. O le toatele o tagata talaʻi o le a auai i le auaunaga i le fanua i faaiuga o vaiaso, o lea e tatau ai i faapotopotoga ona faatulagaina feiloaiga mo le auaunaga i le fanua i Aso Toonai, i le taeao ma le aoauli, a o faaauau pea le tufatufaina o le Ala Mai! faapitoa.

¹² O i latou e taʻimuaina feiloaiga mo le auaunaga i le fanua e tatau ona faamautinoa po o lava oganuu o iai. O oganuu e lei galueaiina talu ai nei e tatau ona galueaiina muamua. E ui i lea, o oganuu e lei tofiaina i se faapotopotoga o loo i le vaaiga a le Sosaiete e lē tatau ona galueaiina e aunoa ma se faatagaga a le Sosaiete. Pe o iai ea sau oganuu se tasi pe sili atu e lei galueaiina talu ai nei? Afai e te manaomia se fesoasoani i le galueaiina o ia oganuu i le taimi o le tauiviga, ia talanoa atu i le ovasia o le auaunaga po o le uso na te vaavaaia faafanua o le oganuu ma o le a latou fiafia ai e fai se fuafuaga mo oe ina ia iai ni fesoasoani.

¹³ E Fia ni Mekasini o le a E Tufaina? O lena fesili e tali lava e le tagata ia. Ina ia faamautūina le tele o mekasini e mafai ona e tufaina atu i le taimi o le tauiviga, ia manatu i le ituaiga o oganuu o le a e galue ai, lou matua, lou malosi, le taimi e mafai ona e tuuina atu i le galuega, ma isi vala. Ae peitai, ia mātau, o le faamanatu sa aumai i le mataupu o Le Olomatamata o Ianuari 1, 1994, e faapea: “I le avea o se fautuaga, atonu e faataatia e tagata talaʻi se sini, mo se faaaoaoga, e faapea, ua faataatia se sini e ofoina atu mekasini e 10 i le masina, e faalagolago lava i o latou tulaga; o paeonia atonu e taumafai mo le 90.” Pe o le a moni ea se sini faapena i lou tulaga?

¹⁴ Toeaina—E Manaomia Fuafuaga e Fuafuaina Lelei: E tatau ona faamautinoa pe a mafai, o le a tufaina le lomiga faapitoa o le Ala Mai! i le oganuu atoa a le faapotopotoga. E tatau ona uaʻi faapitoa atu i le galueaiina o so o se oganuu o pisinisi ua tofiaina i le faapotopotoga. O i latou e galueaiina ia oganuu e tatau ona sauniuni lelei ma laei lelei. E lē manaomia se taulimaga e tele ni faamatalaga. Pe a faafeiloai atu i se tagata faipisinisi, e mafai ona e fai atu e lē masani ona e feiloai ma tagata faipisinisi i aiga, o lea ua e asiasi atu ai i lana pisinisi ina ia avatu se mataupu e mautinoa o le a ia fiafia i ai. Ona mafai lea ona e talanoa puupuu atu i se manatu patino i le mekasini. O le molimau i auala ma mekasini e tatau foi ona faamaopoopoina lelei i oganuu a le faapotopotoga. O le auala e sili ona uigā e auai ai i le galuega i auala, o le tausolomua lea ona faalatalata atu i ē fegasoloai ane, nai lo le faatali seʻi ō mai i latou ia te oe. Talu ai o lea o le a mataʻiina oe e le lautele, e tatau la ona e faamamalu i ou foliga atu. Atonu e iai isi nofoaga i lau oganuu e mafai ona galueaiina i le taimi o le tauiviga, e pei o malae vaalele, falemaʻi, paka o taavale, malae tafafao, ma maketi. E tatau ona faamautūina e le tino o le au toeaina po o ā fuafuaga talafeagai e mafai ona faia mo le molimau atu i ia nofoaga o le oganuu a lau faapotopotoga.

¹⁵ E galue pea lava Ieova e lē mālōlō. (Ioa. 5:17) Na ia foafoaina le lagi ma le lalolagi faapena foi laau ma manu; ae na faaauau pea ona ia galue seia oo ina ia foafoaina le palealii o ana galuega uma i le lalolagi—le tagata. O le mea moni o lo tatou mauaina o le ola o se iuga tuusaʻo lea o le finagalo malie o le Atua e galue. I le avea ma “faaaʻoaʻo . . . i le Atua,” e tatau ai ona uunaia i tatou e lo tatou alofa mo ia ina ia “maelega i galuega lelei.” (Efe. 5:1; Tito 2:14) Talu ai e tatau ona fai ia Ieova a tatou taumafaiga e sili ona lelei ma ona o le faanaunauga ina ia maua ni iuga, o uiga ia o se tagata e maelega, e tatau ai ona tatou naunau i le faatinoina o galuega lelei i le faiva. O le mea moni, e talisapaia e Ieova so o se faataulagaina tatou te faia mo ia, ma e lē se mea faaleaogā a tatou galuega. (1 Kori. 15:58) O lea la, faatasi ai ma o tatou loto ua tumu i le faafetai, seʻi o tatou gaoioi loa ma le maelega ia Aperila, ma mautinoa o le a iai le finagalo malie o Ieova ma ana faamanuiaga faaoaina!