Ia Tautala Pea i le Upu Moni
1 Na folafola atu e aposetolo e faapea: “Auā ma te lē mafaia ona le tautala i mea ua ma vaai i ai ma faalogo i ai.” (Galu. 4:20) I aso nei e tatau foi ona tatou tautala atu pea i le upu moni. E ui lava o le tufatufaina atu o Le Olomatamata ma le Ala Mai! o se auala lea e maua ai i latou o le a faalogo, ae tatau ona tatou toe foi atu pe afai tatou te mananao e aʻoaʻo atili i latou o ē naunau i le upu moni.
2 Pe afai e toe asia se tagata na tuu ai se lomiga o le “Ala Mai!” 2/1996, e mafai ona e faailoa atu le auala e faia ai se suesuega faale-Tusi Paia i lou fesili atu:
◼ “I le taimi ua teʻa, na ta talanoa ai e uiga i le auala ua faaleagaina ai e tagata le lalolagi. Pe sa e iloaina o na mea tutupu ua faamaonia manino ai o loo tatou ola i le vaitaimi ua taʻua e le Tusi Paia, o aso e gata ai? [Faaali le tusi o Le Poto. Faitau le palakalafa muamua o le mataupu e 11, ma faamatilatila le pusa i le itulau e 102.] Ua faamatalaina e lenei tusi lenei mataupu faatasi ma isi mataupu e 18 o loo lisiina iinei i le faasino mataupu. [Faaali le itulau e 3.] Pe a tusa ai ma lou finagalo, ou te fia faailoa puupuu atu le auala e mafai ona fesoasoani ai lenei tusi ia te oe ia malamalama ai e uiga i nei mataupu tāua faale-Tusi Paia.” Afai e faatagaina, amata loa se suesuega i le itulau e 6.
3 Afai sa e folafola i ai e te toe foi atu e talanoa i le auala e mafai ai ona olioli i se olaga saogalemu i le taimi nei, e mafai ona e faapea atu:
◼ “I la ta feiloaiga muamua, na ou talanoa atu ai ia te oe e uiga i se fuaitau mai le Tusi Paia, ua māfua ai ona tatou āloālo atu ma le mautinoa e uiga i le lumanai manuia o le tagata. I le aso la lenei, ou te fia faatepa ai oe i se mea o loo faailoa mai ai, po o ai e mafai ona aumaia ia i tatou se lagona saogalemu i le taimi nei lava.” Faitau le Salamo 4:8. Suʻe le tusi o Le Poto i le itulau e 168 ma faitau le palakalafa e 19. Ona e fesili atu lea: “Faamata e te fiafia e faia sau suesuega faale-Tusi Paia i lou aiga e aunoa ma se totogi, e faailoa manino atu ai pe faapefea ona e maua foi e oe lenei ituaiga o saogalemu i lou olaga?” Afai e tali mai ua lelei, ia suʻe loa i le mataupu 1.
4 Afai sa talanoa muamua i le manaomia ona iai se fuafuaga o le olaga, pe a e toe foi atu la, e mafai ona e faafeiloai atu e faapea:
◼ “Atonu o e manatua na ta talanoa e uiga i le tāua o le iai o se fuafuaga i o tatou olaga. O loo i le Tusi Paia le tele o fautuaga aogā mo tagata i aso nei, e aofia ai upu nei a Iesu o loo maua i le Mataio 4:4.” Faitau le fuaiupu. Faailoa atu le tāua o le suesueina e lē aunoa o le Tusi Paia ina ia maua ai se fuafuaga moni i le olaga. Ofo se suesuega faale-Tusi Paia e faia i le tusi o Le Poto.
5 Pe a e toe asiasi atu, e mafai ona e ofo tuusaʻo se suesuega i lou faapea atu:
◼ “O loo matou tufatufaina a matou mekasini i le lalolagi aoao e faailoa atu ai i tagata i so o se mea e uiga i mea o loo aʻoaʻoina i le Tusi Paia. Afai e tāua i tagata mea o latou aʻoaʻoina, matou te ofoina atu se suesuega faale-Tusi Paia e aunoa ma se totogi. [Faasino i le pusa i le pito i tua o le faavaa o Le Olomatamata, ‘Pe E te Talia se Asiasiga?’] O loo matou faaaogaina lenei tusi o Le Poto e Taʻitaʻia ai i le Ola e Faavavau, e fai ma taiala. Seʻi oʻu faasino puupuu atu ia te oe le auala e faia ai se suesuega.”
6 Afai tatou te tautala atu pea i le upu moni, ona mafai lea ona tatou mautinoa, o le a iai nisi o le a faalogo ma tali fiafia mai.—Mare. 4:20.