O Ai ua Agavaa e Talaʻi?
1 E tusa ai ma le faiva, pe na oo ia te oe se lagona e pei o Mose? Na ia faapea atu: “A ē alofa, le Alii e, o aʻu o le tagata e le iloa fai lauga, talu anamua, ma ona po nei ua e fetalai mai ai i lau auauna.” (Eso. 4:10) Afai e oo ia te oe lena lagona, atonu o le a e faatalatu. Peitai, o Iesu “na poloai mai foi ia te i matou e talaʻi atu i le nuu, ma molitino atu.” (Galu. 10:42) O lea, e faapefea ona avea i tatou ma tagata talaʻi agavaa o le tala lelei?
2 E lē o le maualuga o a tatou aʻoaʻoga masani e tauagavaaina ai i tatou mo le faiva. Na faapea mai Paulo, ‘e le toatele o e popoto i le tulaga faalelalolagi na valaauina’ ma faapea “o le poto o lenei lalolagi o le valea lea i luma o le Atua.” (1 Kori. 1:26; 3:19) Na filifilia e Iesu ona aposetolo mai se vasega o tagata faigaluega—a itiiti mai e toʻafā, o a latou galuega o ni tagata faifaiva. Sa vaai ma le ʻinoʻino na taʻitaʻi lotu faasausili ia i latou e faapea “o tagata e lei aʻoaʻoina . . . ma le valelea.” Pe a fua i ai e tusa ai ma tulaga faalelalolagi, sa lē agavaa le ʻau aposetolo e talaʻi. Ae peitai, o le lauga matuā malosi a Peteru na fofogaina atu i lena aso o le Penetekoso, na uunaia ai le 3,000 ina ia papatisoina!—Galu. 2:14, 37-41; 4:13.
3 Ua Faaagavaaina i Tatou e Ieova e Talaʻi: Na folafola atu e Paulo e faapea: “O le faaagavaaina atoatoa o i matou, e mai le Atua.” (2 Kori. 3:5, NW) O Ieova, o le Puna o le atamai, ua ia aʻoaʻoina le faitau miliona o tagata e talaʻi le upu moni o le Malo i isi. (Isa. 54:13) O le uigā ma le fuatele o lenei galuega e mafai ona vaaia i le toʻa 338,491 o ē na papatisoina i le tausaga ua mavae e avea o “ni tusi e taʻulelei ai.” (2 Kori. 3:1-3) Ua ia i tatou mafuaaga uma e talaʻi ai ma le loto tetele ma le mautinoa e uiga i mea ua tatou aʻoaʻoina mai ia Ieova.
4 Ua faavaeina e le faalapotopotoga a le Atua se polokalame faavaomalo e toleni ai faifeau. E ala i le Tusi Paia ma le anoanoai o fesoasoani eseese mo suesuega faale-Tusi Paia, ua aʻoaʻoina ma toleni ai i tatou ‘ina ia atoatoa ona lelei ai, ma agavaa atoatoa ai’ e talaʻi. (2 Timo. 3:16, 17) Ua matuā maofa lava le toatele i le poto o loo maua i lomiga a le Sosaiete. Mo se faaaoaoga, na taʻua e se tagata suesue mai Suetena e faapea: “I tua o le faatuatuaga lea o loo talaʻia e Molimau a Ieova, o loo iai se aʻoaʻoga ofoofogia e sili ona maualuga o le poto faasaienisi a le Tusi Paia, e fetaui lelei i tagata uma i so o se nofoaga.”
5 I faatonuga o loo tuuina mai i a tatou sauniga e lima faalevaiaso, o la tatou polokalame mo le faitauina ma le suesueina o le Tusi Paia, o fautuaga i le Aʻoga o le Faiva Faatiokarate, o fesoasoani totino e tuuina mai e i latou ua avea ma faifeau ua maua le poto masani, ma e sili i na mea uma, o le lagolagosua a le agaga paia o Ieova, ua mafai ai ona tatou mautinoa e silasila Ieova ia i tatou e faapea ua agavaa atoatoa e talaʻi. “Ioe, i le auina mai e le Atua, i le finagalo o le Atua, i le aufaatasi ma Keriso, ua matou tautalatala atu ai.”—2 Kori. 2:17, NW.
6 Afai tatou te faaaogā atoatoa le toleniga faatiokarate ua saunia e le Atua e ala mai i lana faalapotopotoga, e leai se mafuaaga tatou te faatalatu ai pe fefefe. E mafai ona tatou talaʻi atu ma le olioli i isi, i le mautinoa o le a faamanuia e Ieova a tatou taumafaiga.—1 Kori. 3:6.