Polokalame Fou o le Aso Faapitoa o Fonotaga
1 “Ia Avea o ni Tagata ua Aʻoaʻoina e Ieova” o le matua lena o le polokalame fou o le aso faapitoa o fonotaga e amata ia Setema. (Ioa. 6:45) O aʻoaʻoga tauatua mai ia Ieova ua fesoasoani moni ia i tatou e ola ai i ni olaga faamalieloto. Ua atiaʻe ai i totonu o i tatou se naunau e talisapaia lo tatou tofi tuufaasolo faaleagaga. O a tatou taumafaiga e fesoasoani atu i isi ia faalogo i le tala lelei, ua avea ai i tatou ma tagata aogā i le lautele. O lenei aso faapitoa o fonotaga, o le a faamatilatila ai faamanuiaga o loo olioli ai tagata ua aʻoaʻoina e Ieova.
2 O le a iloa ai i le polokalame le eseesega o aogā o aʻoaʻoga mai le Atua ma le matautia o aʻoaʻoga a le lalolagi. O le a tatou vaaia manino ai le auala ua saunia ai e Ieova le ituaiga o aʻoaʻoga e aupito sili ona maualuluga—aʻoaʻoga e faavae i lana Afioga, le Tusi Paia. O le a faamamafa ai vala e tolu o le tapuaiga lea tatou te maua ai le fiafia tele ona o le aʻoaʻoina e le Atua. E lē gata i lea, o le a faalaeiauina ai talavou e faataitai i faaaoaoga mataina a le Tusi Paia e pei o Tavita ma Timoteo, ma ia atiaʻe o latou olaga i galuega faaleagaga. O le a faamalosia ai lo tatou faatuatua e pei foi ona faamatilatila mai ai le alofa faamaoni o ē matutua. O tagata fou faatoʻā tuuina atu o ē ua agavaa, o le a mafai ona papatisoina. O lea, a o mamao le aso o le fonotaga, e tatau ona outou logo le ovasia taimua e uiga i lena faanaunauga.
3 O le matua o le lauga autū o le aso faapitoa o fonotaga e faapea, “Aʻoaʻoina e Ieova Ina ia Faia Lona Finagalo.” O le a faamamafa ai mafuaaga e manaomia ai e i tatou uma ona aʻoaʻoina pea, ia mausalī i le faatuatua, ma ia faaauau ona agaigai i luma. O le a uunaia ai i tatou ia faaaoao ia Ieova e ala i le aʻoaʻoina o isi i le upu moni e taitaia ai i le ola e faavavau. O le a faaaofia ai ma mea tutupu e atiaʻe ai e faaalia ai le auala ua fesoasoani ai lomiga a le Sosaiete i le toatele ina ia aʻoaʻoina e Ieova. O le a faamatilatila ai iuga aogā o le polokalame tau aʻoaʻoga a Ieova i le lalolagi aoao.
4 Ia fai ni fuafuaga maʻoti ina ia auai. Ia faamalosiau i ē loto fiafia ina ia auai. Ia vaavaai atu i luma i le aʻoaʻoina i le tele o mea lelei e lo tatou Aʻoaʻo Silisili.—Isa. 30:20.