Ia Avea ma Faaaʻoaʻo i Upu ma le Amio
1 Na apoapoai atu le aposetolo o Paulo ia Timoteo ina ia avea o se faaaʻoaʻo i upu ma le amio. (1 Timo. 4:12) E ao foi ona tatou avea ma faaaʻoaʻo i upu ma amioga lelei, ae maise lava pe a auai i le faiva, auā o le faia faapea e mafai ona iloa ai po o tatou pāʻia pe leai loto o i latou o tatou feiloai atu i ai.
2 E manaomia ona tatou faaalia vala uma o amioga lelei, e aofia ai le amio faaaloalo, magafagafa, agalelei, migao, ma le uta mamao. O le faaalia atu o nei uiga, e tatou te faailoa atu ai o loo tatou iloa lelei le auala o aafia ai faalogona o isi i a tatou amio. O le amio lelei i le faiva e mafai ona faatusaina i mea faamanogi ia o loo faaaogā e faamanogi ai meaʻai. A aunoa ma na mea, o le a leai se tofo lelei i meaʻai ma lē fiafia ai i meaʻai mananaia. O le lē taulau ona faaalia o amioga lelei i lo tatou vafealoai ma isi tagata, e mafai ona iai se aafiaga faapena.—Kolo. 4:6.
3 Ia Avea ma Faaaʻoaʻo i Upu: O se ʻataʻata faaleuo ma se faafeiloaiga māfana, o mea na e matuā tāua i lo tatou taulimaina o le tala lelei. Pe a faamanogi a tatou upu tomua i le māfana ma le faamaoni, ua tatou faailoa atu ai i lē ona le fale tatou te naunau moni lava ia te ia. Pe a tautala o ia, ia faalogologo lelei ma faaalia le faaaloalo e tusa ai ma lona manatu. A e tautala, ia faia ma le uta mamao ma le logoleleia.—Faatusatusa i le Galuega 6:8.
4 I nisi taimi tatou te fetaiai ai ma se tagata e lē faaleuo, ma oo lava ina fia faamisa. O ā o tatou uiga faaalia? Ua uunaia i tatou e Peteru ina ia tautala i se auala e faaalia ai “le agamalu ma le ava.” (1 Pete. 3:15; Roma 12:17, 18) Na fetalai Iesu, afai e teena ma le lē faaaloalo e se tagata o le aiga le feau o le Malo, e tau lava ina ‘tūtū atu i ai eleele mai o tatou vae.’ (Mata. 10:14) O lo tatou faaalia o amioga lelei i tulaga faapena, e mafai ona faatoʻamālie ai mulimuli ane le loto o lē tetee.
5 Ia Avea ma Faaaʻoaʻo i le Amio: O le talaʻiina o le tala lelei i auala pisi ma nofoaga faitele e manaomia ai ona tatou magafagafa, aua le soona leoleoā pe finau mauai, ma aua neʻi o tatou faalavelave i le auala e fegasoloai ai tagata. A tatou iai i fale o tagata loto fiafia, e tatau ona tatou tausisia le faaaloalo tatau ma ia avea i tatou o ni mālō tausaafia ma amio pulea, i le faaalia o le talisapaia mo lo latou agaga talimalo. So o se tamaitiiti e tatou te ō faatasi, e tatau ona faaalia le faaaloalo mo lē ona le fale ma ana mea totino, ma e ao foi ona amio lelei ma faalogo lelei a o tatou talanoa. Afai e lē pulea tamaiti, o le a tuua ai se faalogona lē fiafia.—Faata. 29:15.
6 O o tatou foliga totino e tatau ona faailoa atu ai i isi o i tatou o faifeau o le Afioga a le Atua. I o tatou laei ma teuga, e lē tatau ona tatou tu palapalā ma faatamala i o tatou foliga atu, e lē tatau foi ona soona teuanoai. E tatau pea lava i o tatou foliga atu ia tusa ma le tala lelei. (Faatusatusa i le Filipi 1:27.) O le vaaia lelei o o tatou foliga atu ma mea o faaaogaina i le talaʻiga, o le a tatou lē faatausuaiina ai isi pe vaavaai masei ai i la tatou faiva. (2 Kori. 6:3, 4) O a tatou upu ma amioga lelei, o le a atili ai ona lelei le uigā o le feau o le Malo, ma faamamaluina ai Ieova.—1 Pete. 2:12.