Fai se Sao i le Galuega o le a Lē Toe Faia Lava
1 I le tele o taimi i le faagasologa o le talafaasolopito o le tagata, sa tatau ai ia Ieova ona faasalaina ona fili. Ae peitai, ona o lona alofa mutimutivale, ua ia saunia ai se avanoa mo ē e saʻo o latou loto e maua ai le faaolataga. (Sala. 103:13) O la latou tali atu e fuafua i ai lo latou iuga.
2 Mo se faaaoaoga, a o lei oo mai le Lolo i le 2370 T.L.M., na avea ai Noa ma “lē talaʻi le amiotonu.” O i latou na faaumatia, o i latou ia na lē amanaiaina le lapataiga tauatua. (2 Pete. 2:5; Epe. 11:7) A o lei faaumatia Ierusalema i le 70 T.A., na otooto manino atu ai e Iesu gaoioiga sa manaomia ona fai e so o se tasi ina ia sao ai mai le faaumatiaga na oo i le aai. O i latou uma na teena lana feau lapatai, na matuā pagatia i le faaumatiaga. (Luka 21:20-24) O na lapataiga tauatua ma faamasinoga, na faia pea mo le tele o taimi i le faagasologa o le talafaasolopito.
3 Se Galuega Lapatai i Ona Po Nei: Ua leva lava ona faalauiloa mai e Ieova e faapea, o le a faaoo mai lona toasa mamafa faasaga i le faiga amioleaga o mea i aso nei ma e na o ē agamalu o le a faasaoina. (Sefa. 2:2, 3; 3:8) Ua toeitiiti lava ona faaiuina loa lea o le taimi mo le talaʻiina atu o lenei feau lapatai! Ua toe o se aga ona oo mai lea o le “puapuaga tele” ma ua aoaoina nei ē agamalu. E mautinoa, o le “fanua” ua ‘sinasina mo le seleselega.’ O lea, e leai lava se isi galuega e tutusa lona tāua ma le faanatinati e pei o lenei galuega.—Mata. 24:14, 21, 22; Ioa. 4:35.
4 E tatau ona faia so tatou sao i le alagaina atu o lenei lapataiga faaonaponei i isi, “pe latou te faalogo, pe leai.” O se tofiga lenei ua tuuina mai e le Atua, e lē tatau lava ona tatou faataliga tuli i ai. (Eseki. 2:4, 5; 3:17, 18) O le faia o so tatou sao atoatoa i lenei galuega, ua faaalia mautinoa ai lo tatou alofa loloto mo le Atua, lo tatou manatu mamafa moni i o tatou tuaoi, ma lo tatou faatuatua lē maluelue i lo tatou Faaola, o Iesu Keriso.
5 O le Taimi Lenei e Gaoioi Ai: Ina ua uma ona tuuina atu iuga faafaamasinoga a Ieova i aso ua mavae, sa mapuna aʻe pea nisi amioga leaga, ona sa galulue pea Satani ma ana temoni. Ae peitai, i le taimi lenei o le a ese le auala e aumaia ai e Ieova le faamasinoga. O le a soloiesea taaʻiga faa-Satani. O le a lē toe manaomia ai se lapataiga i le lalolagi aoao e faatatau i se “puapuaga tele” o loo faaloloʻi mai. (Faaa. 7:14; Roma 16:20) Ua tatou maua se faaeaga faapitoa o le faia o se vaega i lenei galuega e lē toe faia lava. O le taimi lenei mo i tatou e faaaogā atoatoa ai lenei avanoa.
6 Ma le matuā mautinoa lava, na taʻua ai e le aposetolo o Paulo e uiga i lana galuega talaʻi e faapea: “Ou te mamā aʻu i le toto o tagata uma.” (Galu. 20:26) Na te lei lagona lona nofosala i le toto ona o le lē taulau ona alagaina atu le lapataiga. Aisea ua lē nofosala ai? Auā sa mafai ona ia faapea mai e uiga i lana faiva: “O le mea lea ou te galue ai ma finafinau.” (Kolo. 1:29) Seʻi o tatou maua foi lea lava lotomalie i le faia atoatoa o se sao i le faalauteleina o le galuega o le a lē toe faia lava!—2 Timo. 2:15.