Aisea Tatou te Sāga Ō Atu Pea i Ai?
1 Pe na iai ea se taimi na e fesili ifo ai ia te oe lava i lena fesili atonu a o e sauniuni atu mo se aso i le auaunaga? I nisi o vaipanoa e galueaiina soo ai a tatou oganuu, atonu ua mātaulia ai e ē ona fale po o ai i tatou ma vave lava ona tutuli ese i tatou. E na o le toaitiiti lava atonu e tali lelei mai. Ae peitai, e tele ni mafuaaga malolosi e pogai ai ona tatou sāga ō atu pea i ai.
2 Muamua lava, ua poloaiina i tatou ina ia faaauau pea ona tatou talaʻi atu le feau o le Malo seia oo mai le iuga. (Mata. 24:14; 28:19, 20) Na fesili le perofeta o Isaia, po o le ā le umi o le a faia ai pea lana galuega talaʻi. O le tali na ia maua, o loo faamauina i le Isaia 6:11. E manino lava le tali—na taʻu atu ia te ia ina ia sāga alu atu pea e taʻu atu le feau a le Atua i tagata. E faapena foi i aso nei, e ui lava atonu latou te tutuliesea i tatou, ae o loo faatalitalia i tatou e Ieova ina ia faaauau pea ona tatou asiasi atu i tagata o loo nonofo i la tatou oganuu. (Eseki. 3:10, 11) O se tiute tauave paia lenei ua tuuina mai ia i tatou.—1 Kori. 9:17.
3 O le isi mafuaaga mo i tatou e tatau ai ona tatou sāga ō atu pea, auā o le faia faapea ua tatou maua ai se avanoa e faaalia ai le loloto o lo tatou tuutoina atu ia Ieova. (1 Ioa. 5:3) E lē gata i lea, pe a tatou mafaufau atu i le mea o taofia e le lumanai lata mai mo tagata, e mafai faapefea ona tatou faatalatu mai le taumafai ma le alofa e lapataia o tatou tuaoi? (2 Timo. 4:2; Iako. 2:8) O lo tatou faamaoni i le tauaveina o lo tatou tofiga, ua maua ai avanoa faifai pea mo i latou e tali mai ai i le feau a le Atua o le faaolataga, ina ia lē mafai ai ona latou faapea mai, e lei oo atu lava se lapataiga ia i latou.—Eseki. 5:13.
4 E lē gata i lea, e tatou te lē mailoa lava pe e iai ni tagata o le a suia uiga o o latou loto. E mafai ona uunaia i ni suiga i o latou tulaga totino, se mala na oo i lo latou aiga, po o tulaga o le lalolagi ua uunaia ai i latou e mafaufau loloto e uiga i lo latou lumanai. I le isi itu, pe atonu foi o se mea e tatou te fai atu ai i o latou aiga, o le a mafai ona uunaia ai se tali fiafia mai. (Fai. 9:11; 1 Kori. 7:31) E lē gata i lea, e faimalaga solo foi tagata. Atonu e tatou te maua ai ni tagata fou i la tatou oganuu o ē o le a tali lelei mai i le tala lelei—pe atonu foi o ni talavou matutua o ē ua nonofo na o i latou lava ma mafaufau loloto e uiga i se fuafuaga i o latou olaga.
5 Po o le a tatou sāga ō atu pea i ai? Ioe! Ua tuuina mai e le Tusi Paia ni mafuaaga e lava ma totoe e uunaia ai i tatou e faaauau ai pea ona tatou toe foi atu i tagata. I le iuga, pe a faamutaina le galuega talaʻi, o le a faamanuia i tatou e Ieova i la tatou taumafaiga faifai pea i le faiva, ma o le a ia faamanuiaina foi i latou o ē ua tali mai ma le loto faafetai i le tala lelei o le Malo.—1 Timo. 4:16.