Molimau Atu e Ala i Amioga Lelei
1 I le sosaiete tuufau i aso nei, e toatele tagata talavou ua soona faaaafia ma le valea o latou olaga i le tagofia o fualaau faasaina, faia amioga lē mamā, fouvale, ma faiga sauā. Ae i se faaeseesega, o amioga lelei e fai ma faaaoaoga a talavou amio lelei i le faapotopotoga Kerisiano, ua avea o se mea e faafouina ai i le vaai atu i ai, ma e mautinoa o se mea e matagofie i le silafaga a Ieova. Ua avea o se molimau malosi e mafai ona tosina mai ai isi i le upu moni.—1 Pete. 2:12.
2 Ua faaalia i le tele o mea tutupu e faapea, o amioga lelei a talavou Kerisiano ua avea ma taaʻiga malosi i ē o mātau mai. I le talanoa e uiga i se Molimau talavou o lē sa aʻoga ia te ia, na taʻu atu ai e le faiaʻoga o se vasega i le vasega atoa e faapea, o le Atua o Ieova e tapuai i ai le teine lenei, o le Atua moni. Na ia faia lenei faamatalaga ona o le amio a le teine, e ese le faaaloalo. Na tusi atu se tasi faiaʻoga i le Sosaiete, i le faapea atu: “Ou te fia faamālō atu ia te outou ona o talavou amio lelei o loo iai i la outou lotu. . . . O o outou talavou, ua avea moni lava o ni faaaoaoga lelei. E latou te āva i o latou tagata matutua, e faaaloalo, ma e onomea lava o latou laei. Ma e maeu lo latou popoto i le Tusi Paia! O le mea moni lava lena e taʻu o le lotu!”
3 Sa faafiafiaina foi se tasi faiaʻoga ona o le amio lelei a se Molimau talavou e fitu tausaga i lana vasega. Sa taaʻina o ia i uiga tauagafau ma le filemu o le tama, ua matuā iloga ai lava o ia pe a faatusatusa atu i isi tama. Sa faafiafiaina lava o ia i uiga maumauai o le tama e faatatau i ona talitonuga faalotu—sa lē mā o ia e faaesea ona o mea e talitonu i ai. Sa mafai ona iloa ai e le faiaʻoga e faapea, o le loto fuatiaifo o lenei tama sa matuā aʻoaʻoina lelei ma sa mafai ona ia “iloa ai le lelei ma le leaga.” (Epe. 5:14) Mulimuli ane, na asiasi atu le tinā o le tama i le faiaʻoga, ma na amataina ai se suesuega faale-Tusi Paia. I le taimi nei, ua papatisoina ai le faiaʻoga ma avea ai mulimuli ane o se paeonia sauatoa!
4 Na taaʻina foi se tasi alii talavou ona o le amio lelei a se tamaitai Molimau i lana aʻoga. Sa matuā ese moni lava o ia—e matuā faaaloalo, e finafinau i le aʻoga, ma e onomea pea o ia i ona laei; e lē pei foi o ia o isi teine, e lē tāitai lava ona faateine o ia i tama. Sa iloa e le faiaʻoga sa ola le teine e tusa ma mataupu silisili o le Tusi Paia. Sa fesiligia o ia e le tama talavou e uiga i ona talitonuga faalotu, ma sa faafiafiaina lava le tama mai mea na ia iloaina. Sa amata ona ia suesueina le Tusi Paia, e lei pine ae papatiso, ma mulimuli ane, na auai o ia i le faiva faapaeonia ma iu atu ai i le auaunaga i Peteli.
5 Afai o oe o se Kerisiano talavou ma o loo faanaunau e avatu se molimau lelei i isi, ia faaeteete i lau amio i ala uma lava. Aua lava neʻi faavaivai i le leoleoina o oe faasaga i le oo ina e manaonao i uiga tuufau o le lalolagi, ona manatu, po o auala o le olaga. Ia faataatia se faaaoaoga maualuga i lau tautala, laei, ma teuga, e lē na o le taimi e auai i le faiva i le fanua ma i sauniga a le faapotopotoga, ae i le taimi foi e alu ai i le aʻoga ma i le taimi e auai i se tafaoga. (1 Timo. 4:12) O le a avea o se mea e te matuā olioli moni ai pe a faalogo se tasi i le upu moni ona ua e ‘faasusulu atu lou malamalama’ e ala i lau amio lelei.—Mata. 5:16.