Tatalo mo le Fesoasoani a Ieova
1 Sa faamamafa atu e Iesu i ona soo le manaomia o le faamanuiaga a Ieova i la latou faiva. (Mata. 9:37, 38) O a tatou tatalo mai o tatou loto o viiga ma faafetai faatasi ma olega ma faatoga faatauanau e faaalia ai lo tatou faalagolago atoatoa atu ia Ieova mo lana fesoasoani. (Fili. 4:6, 7) Ua uunaia i tatou e le Tusi Paia ina ia faaauau ona tatalo i aso uma lava “i talotaloga ma faatoga uma,” ma e faatatau foi lenei mea i a tatou tatalo e tusa ai ma le faiva.—Efe. 6:18.
2 Tatou te vivii atu ia Ieova i le tatalo mo ona uiga lē mafaatusalia ma mea ua ia faataunuuina. Tatou te vivii atu foi ia te ia o Lē Foai mai le tala lelei lea tatou te talaʻia. Ua tatau ia te ia la tatou viiga auā e na o ia lava ua taulau manuia ai la tatou faiva.—Sala. 127:1.
3 O a tatou tatalo o le faafetai ua faaalia ai lo tatou talisapaia o le malamalama lea ua foaiina mai e Ieova ia i tatou e uiga i lona finagalo ma ana fuafuaga. Pe lē o se faaeaga ea le tufa atu o upu moni o le Malo i isi? Tatou te faafetai ia Ieova mo mea uma ua tatou faataunuuina i le faiva.—Sala. 107:8; Efe. 5:20.
4 E matuā talafeagai lava la lo tatou talosaga atu ia Ieova mo se fesoasoani i le sailia o tagata o ē o le a talia la tatou ofo mo se suesuega faale-Tusi Paia, ma ia tatou talosaga atu mo se fesoasoani ina ia pāʻia ai o latou loto i le upu moni. O le faia o na talosaga, ua tatou faailoa atu ai e na o le Atua lava e mafai ona fua mai ai la tatou galuega i le faiva.—1 Kori. 3:5-7.
5 Na manatu se tuafafine e faapea, e lē o faitauina e se fafine i lana alā mekasini Le Olomatamata ma le Ala Mai! Ona o lona lē manao e maimau nei mekasini tāua, na ia ole atu ai ia Ieova e faapea, afai e lē o faitauina e le fafine mekasini, talosia o le a ia teena mai nisi mekasini e toe avatu i ai. Ina ua asiasi atu i ai le tuafafine i le isi taimi na sosoo ai, na faapea mai le tane a le fafine: “Faafetai mo le aumaia e lē aunoa o nei mekasini. O lea ou te faitauina ma ou te fiafia tele i ai.”
6 I le talosaga atu ma le loto maulalo faatasi ma le aioi atu ma le faatauanau, e mafai ai ona tatou faatoga atu ia Ieova ina ia fesoasoani ia i tatou i le fesagaia o uiga faalēano ma le tauemu mai o tagata, ma ia manumalo mai so o se fefe i tagata ma mafai ai ona molimau atu pea ma le lototele i isi. (Galu. 4:31) Afai e faaauau pea ona tatou tatalo “i talotaloga ma faatoga uma” a o tatou faaauau ma le usiusitai i la tatou auaunaga paia, ona mafai lea ona tatou mautinoa i le fesoasoani a Ieova.—1 Ioa. 3:22.