O le Sauniuni Mamao e Maua ai le Olioli
1 O le faia o se sao i le faiva i le fanua o se mea tatou te olioli tele ai. (Sala. 89:15, 16) O le mea moni, o le sauniuni, o le ki autū lava lena i le mafai ona mauaina atoatoa o lena olioli. O le lelei ona tatou sauniuni, o le tele foi lena o mea e mafai ona tatou faataunuuina, ma o le sili atu foi lena ona tatou olioli.
2 Ia Faaaogā Mea Faigaluega ua Saunia: Ia amata lau sauniuniga i le faitauina ma le iloiloina o le mataupu i La Tatou Faiva o le Malo. E masani lava ona saunia mai ai ni taulimaga saunia lelei ua fuafuaina e fesoasoani ia te oe i le taulimaina o le feau o le Malo i se auala faigofie ma uigā. O le a e maua ai faaaoaoga i le auala e faafetaiaia ai teteega e masani ona tulai mai. Ua ofoina mai ai foi ni manatu patino i le auala e faia ai se toe asiga uigā, ma le sini e amataina se suesuega faale-Tusi Paia. O loo ia te oe lava le faitalia e fetuunai ai nei fautuaga i le tulaga e te lagona o le a lelei ai ona e taulimaina. E faaopoopo i lenei mea, ua ia te oe le tamai tusi Le Auala e Amata ma Faaauau ai Talanoaga Faale-Tusi Paia, lea o loo aumaia ai le anoanoai o upu tomua eseese faapea ma tali e te tali atu ai i manatu e ono taofia ai talanoaga, lea ua fesoasoani ai ia te oe ia sili atu ona taulau manuia i le tele o tulaga e te lua fetaiai.
3 Vaavaai i le lomiga lea o le a e ofoina, ma fili se manatu tāua se tasi pe lua e te fiafia i ai e mafai ona e faaali atu i lē ona le fale. O se tala faatupu manatu atonu na e faalogo i ai pe faitau foi i ai, e mafai ona e maua ai se avanoa e amata ai se talanoaga. Ia nofouta mo ni teteega masani e ono fetaiai ma oe, ma ia teu i le mafaufau ni nai manatu i le auala e ono mafai ona e tali atu ai. Ona faaalu lea o ni nai minute e faataitai ai upu o le a e fai atu ai i le fale.
4 Auai i Sauniga Uma Lava o le Auaunaga: Ia faalogologo lelei a o faia le Sauniga o le Auaunaga pe a talanoaina, autaluina, ma faataitai fautuaga o loo aumaia i La Tatou Faiva o le Malo. Ia mātau manatu e te lagona e mafai ona faafesootai atu i lau taulimaga. Ia manatua nisi o tulaga masani na fetaiai ma oe i le faiva, ma mafaufau i ni auala e mafai ai ona atili uigā lau molimau atu. Talanoa e uiga i nei mea ma isi tagata talaʻi a o lei amataina ma pe a uma foi le sauniga.
5 E mafai ona e mautinoa, afai e te “saunia mo galuega lelei uma,” o le a tauia oe i le olioli e sili atu ma taulau manuia ai i le fesoasoani i isi e sailia le ala i le ola.—2 Timo. 2:21.