Polokalame Fou o le Fonotaga Matagaluega
O ā ni aogā tāua ua e maua i le taimi nei mai le savavali ma Ieova? E mafai faapefea ona e teena le faaosoosoga o le faatagaina o faanaunauga lē faatiokarate e tineia ai le tuuina atu o le faamuamua i manaoga o le Malo i lou olaga? (Mata. 6:33) Po o faafaigata ia te oe ona iloa le saʻo mai le sese i se lalolagi o loo faafoliga mai ai e saʻo mea sese? (Epe. 5:14) O nei mataupu o le a fofogaina atu i le fonotaga matagaluega, “Ia Maua Nei Aogā i le Savavali i Ala o le Atua,” e amata ia Setema 1999.—Sala. 128:1.
O se vala fou o lenei fonotaga matagaluega o le a faia i le Aso Toonai, o le faataitai mai lea o se Sauniga o le Auaunaga. O le a faailoa atu e la outou ovasia matagaluega i faapotopotoga le mea ua fuafuaina ina ia mafai ai ona ō mai tagata uma ua saunia lelei e olioli atoatoa i le polokalame.
O le vaega ua faamatuaina faapea, “Paeonia—Ia Vaavaai Totoʻa i le Auala o Tou Savavali Ai” o le a faailoa mai ai ia i tatou le auala e faatino ai le atamai ma le magafagafa ina ia mafai ona faaaogā tatau le taimi mo le faiva faapaeonia. (Efe. 5:15-17) O le mataupu “Ia Faaeteete i Auala e na Ona Faafoliga Mai e Saʻo,” o le a aʻoaʻoina ai i tatou pe faapefea ona faamautinoa po o ā mea e fiafia i ai le Atua i vala uma o le olaga. O le lauga, “Le Auala ua Taaʻina ai i Tatou e Valoaga ua Faataunuuina,” o le a fesoasoani e faatumuina ai o tatou mafaufau ma loto e naunau i le Afioga a le Atua. O le lauga lautele, “O Ala a le Atua—Maeu le Aogā!” o le a faamatilatila mai ai aogā tāua o loo maua i le taimi nei mai le faaauau pea ona savavali e ogatusa ma mea tonu e manaomia e Ieova.
Po o lou faanaunauga ea ina ia faailoa atu i luma o le lautele e ala i le papatisoina i le vai e faapea, ua e manao e te savali i ala o le Atua i le avea o se tasi o ana auauna tuuina atu? Afai o lea, ia talanoa atu i le ovasia taimua ina ia mafai ai ona faia fuafuaga manaomia.
Ia fai ma ou sini le aua neʻi misia lenei fonotaga talafeagai. Ia auai i le polokalame atoa mo aso uma e lua, auā ‘e fiafia i latou uma o ē matataʻu ia Ieova, o ē savavali i ona ala.’—Sala. 128:1.