O le ā o le a E Fai Atu ai i se Tagata Lotu Puta?
1 I nisi o atunuu, e sili atu i le ʻafa o i latou na papatisoina, na ola aʻe i le Lotu Puta. O le ā ua tosina atu ai nei tagata i le upu moni? E mafai faapefea ona e faailoa atu le tala lelei i se tagata Lotu Puta?
2 Ia Faaalia le Manatu Mamafa Moni: O le toatele o tagata na lolotu muamua i le Lotu Puta ua faapea mai, e lē o se fetufaaiga faigata ma le lavelave na tosina atu ai i latou i le upu moni. Na i lo lea, na ootia i latou ona o le naunau totino moni na faaalia ia i latou. O se fafine mai Asia e nofo i le Iunaite Setete sa matuā faafiafiaina ona o le faaleuo o le tuafafine lea na asiasi atu ia te ia, na malie ai o ia e suesue. E lē lelei sana tautala faa-Peretania, ae sa onosai pea le tuafafine. Pe a vāivai le fafine po ua lē mafai foi ona suesue, sa na ona asiasi faaleuo atu lava i ai le tuafafine ma fuafua mo le isi suesuega. Mulimuli ane, na iu ina papatisoina le fafine, lana fanau tama e toalua, ma lona tinā ua matua. Na toe foi atu o ia i lona nuu moni ma fesoasoani atu i le toatele o isi tagata e aʻoaʻoina le upu moni. O se tasi o lana fanau tama o loo auauna nei i le ofisa o le lālā. Maeu ni faamanuiaga na iu i ai mai le faaatagia atu o le ‘agalelei ma le alofa o Ieova i tagata’!—Tito 3:4.
3 Manatu Faa-Puta: O tagata Lotu Puta, e masani lava ona talia isi manatu, ae latou te lē manatu e faapea e tatau ona taofimau i se aʻoaʻoga patino. O lea, e eseese lava talitonuga o tagata taitoatasi. O se aʻoaʻoga e taatele i le tasi vaega o tagata Lotu Puta e faapea, ua tumu le olaga i mafatiaga, ae ala i le faamalamalamaina, e mafai ai e se tasi ona taofia le faataamilosaga faifai pea o le toe fanau mai i ni olaga lē manuia. Ua faapea se faamatalaga, ina ia faasaolotoina mai lenei faataamilosaga, e tatau ona maua e se tasi Nirvana, o se tulaga e lē mafai ona faamatalaina talu ai e lē o se nofoaga po o se mea na tupu, ae o se avanoa lea e lē o iai se tiga ma ni mea leaga. (Tagai i le polosiua What Happens to Us When We Die?, itulau 9-10.) O le ā o taʻu mai e lenei mea ia i tatou? E lē aogā le faia o ni felafolafoaiga ma tagata i filosofia faa-Puta. Na i lo lea, ia talanoa i faafitauli masani o loo faapopoleina ai tagata uma.
4 Ia Faamamafa Mea o Loo Tutusa ai Faanaunauga: Talu ai e masani ona faafesootai e tagata Puta le olaga i le lalolagi ma mafatiaga, o le aʻoaʻoga la i le ola e faavavau i le lalolagi e ono faateʻia ai i latou. Ae o loo iai ia i tatou uma lava le faanaunauga ina ia olioli i se olaga fiafia faaleaiga, le vaai atu ua soloiesea mafatiaga, ma iloa ai le uiga o le olaga. Ia mātau le auala e mafai ona faamatilatila ai na manaoga o loo tatou tau fai mananao uma i ai.
5 E mafai ona e faataʻitaʻia lenei faatomuaga:
◼ “I aso nei, o loo tatou ola i se lalolagi ua puapuagatia ai le toatele o tagata e lē sala. O le ā se mea e te talitonu e manaomia ina ia faaiuina ai tiga ma mea leaga mo tagata uma? [Faatali mo se tali.] E iai se folafolaga mai anamua e matuā faamafanafana loto lava ia te au. [Faitau le Faaaliga 21:4.] O le mea moni, e lei oo mai lena taimi, ae a oo mai, tatou te mananao e vaai i ai, a ea?” Ona ofo lea o se lomiga o loo faamatala maia le auala o le a faaiuina ai puapuaga.
6 Pe afai o se tagata matua, e mafai ona e faapea atu:
◼ “Atonu o loo e popole e pei foi o aʻu e uiga i le anoanoai o manatu matagā ua taatele i aso nei faapea ma āuga ua aafia ai a tatou fanau. Aisea ua faateleina ai ia amioga lē mamā i tagata talavou? [Faatali mo se tali.] Pe na e iloa na valoia mai lenei mea i se tusi na amata ona tusia i tuā lava a o lei faavaeina le Lotu Musalimi, le Faa-Kerisiano, ma le Lotu Hinitu? [Faitau le 2 Timoteo 3:1-3.] Ia mātau, ua matuā salalau atu nei tulaga e ui lava i le faaauau pea ona aʻoaʻoina. [Faitau le fuaiupu 7.] O lenei lomiga na fesoasoani ia te au e malamalama ai i le upu moni lea e lē o mafai e le toatele o tagata ona aʻoaʻoina. E te fia faitau i ai?” Ofo se tusi talafeagai po o se polosiua.
7 E masani lava ona faaaloalo tagata Lotu Puta i le Tusi Paia e faapea o se tusitusiga paia. O lea ia faitau saʻo mai ai. (Epe. 4:12) Afai e lē o mautonu le tagata e uiga i taaʻiga a aganuu i Sisifo, ia taʻu atu ia te ia faapea, o tusitala uma o le Tusi Paia o ni tagata mai Asia.
8 O Lē Fea Lomiga e Sili Ona Aogā? Ua lomia faapitoa lava mo tagata Lotu Puta le sāvali, Will Suffering Ever End? i le gagana Iapani, Saina, Sinhalese, ma le gagana Taialani. E lē gata i lea, e toatele tagata talaʻi ua taulau manuia i le faaaogaina o lomiga nei: o tusi Mankind’s Search for God, Le Ala e Maua ai le Fiafia i le Aiga, ma le Questions Young People Ask—Answers That Work; o polosiua “Faauta! Ou te Faia ia Fou Mea Uma Lava,” ma le What is the Purpose of Life—How Can You Find It?; ma le Tala o le Malo Nu. 35 pe afai o iai pea, Pe e Iai ea se Taimi o le a Fealofani ai Tagata Uma? O le toatele o tagata Lotu Puta o ē ua aʻoaʻoina nei le upu moni, sa suesue muamua i le polosiua o le Manaomia ona sosoo ai lea ma le tusi o Le Poto.
9 E ui lava ina faapea mai na taunuu atu misionare a Puta i Atenai i le toetoe lava 400 tausaga ua mavae a o lei oo atu i ai le talaʻiga a Paulo iina, ae lē o mautinoa pe sa ia feiloai atu i se tagata na taaʻina i talitonuga faa-Puta. Ae peitai, ua tatou iloa le lagona na ia Paulo e uiga i le molimau atu i ituaiga o tagata uma lava. Sa avea o ia ma ‘pologa a tagata uma’ ina ia “iu lava ina ola nisi” ia te ia. (1 Kori. 9:19-23) E mafai foi ona tatou faia lena mea e ala i le faaalia o le naunau totino i tagata ma e ala i le faamautinoaina o le faamoemoe ua tatou tau fai taofimau i ai a o tatou molimau atu i tagata uma e tatou te feiloai i ai.