Faamanuiaga o le Faiva Faapaeonia
“O le faamanuia a Ieova, o lea e faatamaoaiga aʻi; na te le faaopoopo i ai se tiga.”—FAATAOTO 10:22.
1, 2. (a) Na faapefea ona faamatala mai e se tasi paeonia ona lagona e faatatau i le faiva faataimi atoa? (e) Aisea ua maua ai e paeonia se avanoa e atili tofo ai i le olioli o le faia o soo?
“PE MAFAI ea ona iai se isi olioli e sili atu nai lo le olioli i le vaai atu i se tasi na lua suesue ua avea o sē e vivii atu ma le maelega ia Ieova? O se fiafiaga ma e faamalosia ai le faatuatua le vaaia o le malosi o le Afioga a le Atua i le uunaia o tagata e faia ni suiga i o latou olaga ina ia faafiafia i le finagalo o Ieova.” O le tusi lena a se uso paeonia mai Kanata o lē ua silia i le 32 tausaga o iai i le faiva faataimi atoa. E tusa ai ma lana faiva faapaeonia, ua ia faapea mai: “E leai lava se isi mea ou te ono mafaufauina e mafai ona ou faia. E mautinoa le matuā lē mafai ona ou mafaufauina se isi mea e mafai ona aumaia ai se olioli e tutusa ma lenei olioli.”
2 Pe e te ioe e iai se olioli tele i le faia o se vaega i le fesoasoani atu i se tasi ina ia maua le ala i le ola? O le mea moni, e lē na o paeonia ua tofo i lena olioli. O auauna uma a Ieova ua tuuina mai i ai le tofiga ia “fai nuu uma lava ma soo,” ma o loo latou galulue malosi ina ia faia faapea. (Mataio 28:19) Peitai ane, talu ai o paeonia e mafai ona tele itula latou te faaaluina i le faiva i le fanua, o le pogai lena e masani ai ona sili atu le tele o lo latou tofo i le olioli o le faia o soo. Ae o loo iai foi nisi taui ua tauia ai paeonia. Talanoa atu i paeonia, ma o le a latou taʻu mai ia te oe e faapea, o le paeonia o le auala matagofie lea e tofo ai i ‘le faamanuia a Ieova lea e faatamaoaigaina aʻi.’—Faataoto 10:22.
3. O le ā atonu e uunaia ai lo tatou naunau a o tatou auauna atu pea ia Ieova?
3 Talu ai nei lava, na fesiligia ai paeonia mai atunuu eseese o le lalolagi ina ia latou faamatala mai faamanuiaga ua latou tofo i ai i le faiva faataimi atoa. Seʻi o tatou talanoaina mea na latou fai mai ai. Peitai, ia aua neʻi faavaivai, pe afai o loo gata mai se mea e te mafaia i lau auaunaga talu ai le lē lelei o le soifua maloloina, le soifuaga matua, po o isi lava tuatuagia. Ia manatua, o le mea tāua o le auauna atu lea ia Ieova ma le loto atoa i so o se tulaga. Ae o le faalogologo atu pea i faamatalaga a nisi paeonia, atonu e atili ai ona e naunau ina ia e faatinoina lenei galuega tauia pe afai e mafai.
Lagona Loloto o le Faamalieina ma le Olioli
4, 5. (a) Aisea ua avea ai o se mea e tauia le tufaina atu o le tala lelei i isi? (e) O ā faalogona o paeonia e faatatau i le faia o se sao i le faiva faataimi atoa?
4 Na fetalai Iesu: “E sili le manuia [“fiafia,” NW] o le na te foai atu, i lo le na te talia mai.” (Galuega 20:35) Ioe, e iai foi taui o le foai atu ma le lē manatu faapito. (Faataoto 11:25) Ua sili ona moni lenei mea pe a oo mai i le tufaina atu o le tala lelei i isi. O le mea moni lava, o le ā se isi meaalofa e sili atu le lelei e mafai ona tatou foai i se uso a tagata nai lo le fesoasoani i ai ina ia ona maua le poto e uiga i le Atua, lea e taitaia ai i le ola e faavavau?—Ioane 17:3.
5 E lē o se mea e ofo ai, o i latou o loo faia se sao i le faiva faataimi atoa e masani ona latou faamatala mai le olioli ma se loto matuā faamalieina latou te maua mai la latou faiva. Ua faapea mai se uso paeonia mai Peretania ua 64 ona tausaga: “Ou te iloa e leai lava se isi galuega e mafai ona aumaia ia te au le faamalieina lea e maua i le tufaina atu o le upu moni i isi.” Sa faamatala mai e se tuafafine mai Sāʻia ua oti lana tane, ona lagona e faatatau i le galuega faapaeonia: “Sa avea le auaunaga faapaeonia o se matuā faamafanafanaloto ia te au ina ua maliu si aʻu tane pele. O le tele o loʻu auai atu i le auaunaga, o le itiiti foi lena o loʻu lagonaina o le matuitui o lona toesea atu. Ou te faatuatua i folafolaga a Ieova ma faaalu le tele o loʻu mafaufau i le auala e mafai ona ou fesoasoani ai i ē o loo matou suesue ina ia faia ni suiga i o latou olaga. I le iuga o aso taitasi, e lelei laʻu moe, ma e faatumulia loʻu loto i le olioli.”
6. O le ā le olioli faapitoa ua tofo i ai nisi paeonia?
6 O nisi o ē ua autausagā o auauna faapaeonia ua ia i latou le olioli faapitoa o le auauna i oganuu mamao ese, i le faavaeina o faapotopotoga, lea ua iu ina faia aʻe ai ni matagaluega. Mo se faaaoaoga, i le aai o Abashiri, i Hokkaido (se motu i le itu i mātū o Iapani), o loo iai se tuafafine ua 33 tausaga talu ona avea ma paeonia. Na te manatua se fonotaga matagaluega na ia faatoʻā auai atu i ai—mo Hokkaido atoa lava—e na o le toʻa 70 le aofia na auai. E faapefea i aso nei? Ua iai matagaluega e 12 i lena motu, ma se aofaiga e silia i le 12,000 tagata talaʻi. Seʻi manatu i le matuā faatumulia o lona loto i le olioli ina ua auai atu i fonotaga ma tauaofiaga faatasi ma se vao o tagata talaʻi e toatele o le Malo i lena motu!
7, 8. O le ā le olioli ua tofo i ai le toatele o i latou ua leva ona o avea ma paeonia?
7 Ua maua foi e isi ua leva ona avea ma paeonia le olioli, a o vaavaai atu i a latou tagata suesue o le Tusi Paia ua papatiso ma aapa atu mo nisi faaeaga e tele o le auaunaga. I Iapani, e iai se tuafafine e iva ni tofiga faapaeonia ua ia auauna ai talu mai le 1957, ma na te manatua lona ofoina o se mekasini o le Awake! i se tamaitai talavou i totonu o se faletupe. E na o le iva masina na sosoo ai, ae papatisoina le tamaitai talavou. Mulimuli ane na faaipoipo le tamaitai, ma avea ai o ia ma lana tane o ni paeonia faapito. Maeu le olioli o le tuafafine paeonia auā, a o iai i lona tofiga lona tolu, na asiasia ai la latou faapotopotoga e se ovasia matagaluega fou ma lana avā—o lana tagata aʻoga lea o le Tusi Paia sa la suesue!
8 E lētioa lava o i latou o ē ua galulue i le faiva faapaeonia, ua latou vāai i ai e pei ona manatu i ai se tasi uso paeonia e 22 ona tausaga e faapea, “o se faaeaga e lē faatusalia lona tāua e ao ona faapelepeleina”!
Faamaoniga o le Tausiga a Ieova
9. I le avea o Ieova ma Lē Sili na te Foaiina Mea, o le ā ua ia folafola mai i ana auauna, ma o le ā le uiga o lenei mea mo i tatou?
9 O Ieova, o Lē Sili na te Foaiina Mea, ua ia folafola mai lona tausia o ana auauna, i le tausia o i latou i le itu faaleagaga ma le itu faaletino. Ua saʻo lelei le faapea mai o le tupu anamua o Tavita: “Ua ou toeaina aʻu nei, sa aʻu taulealea; a ou te lei iloa se tagata amiotonu na lafoaiina, po o ana fanau ua ʻaiisi i latou.” (Salamo 37:25) O le mea moni, o lenei faamautinoaga tauatua e lē o se faamolemolega lea tatou te ʻalo i ai mai le faia o le avega tauave ina ia tausia o tatou aiga i le itu faaletino, e lē aumaia ai foi ia i tatou se faatagaga ina ia ola faalagolago atu ai i le limafoai o o tatou uso Kerisiano. (1 Tesalonia 4:11, 12; 1 Timoteo 5:8) Peitai, pe a tatou faia ma le lotomalie ni faataulaga i o tatou olaga ina ia auauna atoatoa ai ia Ieova, o le a lē tāitai ona ia tuulafoaia i tatou.—Mataio 6:33.
10, 11. Mai mea o loo tutupu, o le ā ua iloa e le toatele o paeonia e faatatau i le tomai o Ieova e saunia ai mea?
10 Ua iloa e paeonia i le lalolagi atoa mai mea o loo tutupu ia i latou e faapea, e saunia e Ieova mea mo i latou o ē faalagolago atu i lana tausiga alofa. Seʻi manatu i le mea na oo i se ulugalii paeonia o ē na see atu e nonofo i se tamai aai sa iai se manaoga tele mo ni tagata talaʻi o le Malo. Ina ua mavae ni nai masina, na oo ina tau leai ni galuega totogi, ma ua uma foi le la seleni sa teu. Ona maua mai lea o se pili e totogi mo le inisiua o le taavale e tusa ma le $81 Amerika. Ua faamatala mai e le uso: “Sa matuā leai lava se mea e mafai ona ma totogia ai. I lena po, sa ma tatalo faatauanau ai lava.” I le aso na sosoo ai, na la mauaina se tusi mai se aiga o ē na faaletonu foi lo latou tulaga tau seleni. Na maua e lea aiga se vaega tupe na totoe mai la latou lafoga e masani ona tipi i le malo, e pei ona faamatalaina i le tusi, ma talu ai ua telē le tupe ua toe maua mai nai lo le aofaiga sa latou faatalitalia, na latou mananao ai loa e foai mai sina tupe mo le ulugalii paeonia. Sa fafao mai ai ma le siaki tupe e $81 Amerika! Ua faapea mai le uso paeonia: “E lē mafai ona galo ia te au lena aso—ua pei e mogea atoa loʻu tino i loʻu fiafia! Sa ma matuā talisapaia le limafoai o lenei aiga.” E talisapaia foi e Ieova lena agalelei, o le ituaiga moni lena o agaga foai o loo ia faalaeiauina i ana auauna.—Faataoto 19:17; Eperu 13:16.
11 E toatele paeonia e mafai ona latou faamatala mai foi ni mea faapena na tutupu ia i latou. Fesili i ai, ma o le a latou taʻu mai ia te oe e faapea, e lei iai lava se taimi na “lafoaiina” ai i latou. I le toe tepa atu i le silia ma le 55 tausaga i le faiva faataimi atoa, ua faapea mai ai se uso paeonia ua 72 tausaga o lona soifua, “e lei tuulafoaia lava aʻu e Ieova.”—Eperu 13:5, 6.
“O se Auala e Sili Ona Lelei Lea e Faalatalata Atu ai ia Ieova”
12. Aisea ua avea ai le galuega o le folafola atu o le tala lelei o se faaeaga mataina?
12 Ua tatou maua se faaeaga ona ua finagalo Ieova ina ia tatou folafola atu le tala lelei o lona Malo. E silasila o ia ia i tatou—e ui o i tatou o ni tagata lē lelei atoatoa—o se “au faigaluega” faatasi ma ia i lenei galuega faasaoola. (1 Korinito 3:9; 1 Timoteo 4:16) A o tatou talaʻi atu i isi e faatatau i le Malo o le Atua, a o tatou folafola atu le iuga o ē amioleaga, a o tatou faamatala atu i tagata le ofoofogia o lona alofa i le saunia o le togiola, a o tatou suʻe i lana Afioga ola ma aʻoaʻo atu manatu tautele o loo iai i tagata loto faamaoni, ua faapena foi ona tatou faalatalata atu ai i Lē na Foafoaina i tatou, o Ieova lea.—Salamo 145:11; Ioane 3:16; Eperu 4:12.
13. O le ā ua fai mai ai nisi e faatatau i aafiaga o la latou faiva faapaeonia i la latou faiā ma Ieova?
13 Ua mafai e paeonia ona faaaluina se taimi tele i masina taitasi i lo latou aʻoaʻoina o mea e faatatau ia Ieova ma latou toe aʻoaʻo atu ai foi i isi. O le ā so latou lagona i se aafiaga ua faia e lenei mea i la latou faiā ma le Atua? Ua tali mai se toeaina i Falani, o lē ua silia i le sefulu tausaga o avea ma paeonia: “O le paeonia o se auala e sili ona lelei lea e faalatalata atili atu ai ia Ieova.” O se isi foi uso paeonia i lena lava atunuu, o lē ua 18 tausaga talu ona iai i le faiva faataimi atoa, ua ia faapea mai: “O le auaunaga faapaeonia ua aumaia ai ia i tatou se avanoa e ‘tofo ai ma vaai i le lelei o Ieova,’ ma i lea aso ma lea aso, e faatuputupulaia ai pea se faiā e sili atu ona malosi ma Lē na Foafoaina i tatou.” (Salamo 34:8) E faapena foi lagona o se tuafafine i Peretania o lē ua 30 tausaga o avea ma paeonia. Fai mai a ia: “O le faalagolago atu i le agaga o Ieova mo le taitaiga i laʻu faiva, ua atili ai ona ou vavalalata atu ia te ia. Ou te matuā lagona lava i le tele o tulaga, o le agaga o Ieova lea na te taitaia aʻu i se aiga patino i se taimi talafeagai.”—Faatusatusa i le Galuega 16:6-10.
14. E faapefea ona maua e paeonia aogā mai le faaaogaina o le Tusi Paia ma lomiga faale-Tusi Paia mai lea aso i lea aso ina ia aʻoaʻo atu ai i isi?
14 E toatele paeonia ua latou iloa, o le faaaogaina o le Tusi Paia ma lomiga faale-Tusi Paia mai lea aso i lea aso ina ia faamalamalama ma aʻoaʻo atu ai upu moni o le Tusi Paia, ua fesoasoani lea ia i latou e tutupu aʻe ai i le poto e uiga i le Afioga a le Atua. O se uso mai Sepania ua 85 tausaga o lona soifua, ma ua 31 tausaga o avea ma paeonia, ua ia faamatala mai: “O le avea ma paeonia ua fesoasoani ia te au ina ia maua ai se malamalamaga loloto i le Tusi Paia, o le malamalamaga lea o loo oʻu faaaogā e fesoasoani atu ai i le toatele o tagata ina ia latou iloa Ieova ma ana fuafuaga.” Ua faapea mai se tuafafine Peretania o lē ua 23 tausaga o avea ma paeonia: “Ua fesoasoani ia te au le faiva faataimi atoa ina ia ou atiina ae se naunau moni mo meaʻai faaleagaga.” O le faamatala atu i isi o le “uiga o le faamoemoe” o loo ia te oe e mafai ona faamalosia ai lou lava maumauai e faatatau i talitonuga o loo e faapelepele i ai. (1 Peteru 3:15) Ua faapea mai se paeonia mai Ausetalia: “O le auaunaga faapaeonia ua faaleleia atili ai loʻu faatuatua a o oʻu faamatala atu oʻu talitonuga i isi.”
15. O le ā ua loto malilie le toatele e fai ina ia latou ulu atu ai i le faiva faapaeonia ma tumau ai, ma aisea?
15 E manino lava, ua talitonu maumauai nei paeonia, ua latou filifilia se ituaiga o auaunaga e aumaia ai le lē mafaitaulia o faamanuiaga mai ia Ieova. E lētioa lava ona toatele i latou ua loto malilie e faia ni fetuutuunaiga i o latou olaga, ua oo foi ina faataulagaina se galuega totogi sa iai ma ni oa faaletino, ina ia ulu atu ai i le faiva faapaeonia ma tumau ai!—Faataoto 28:20.
Po o Faanaunau ea Lou Loto mo le Faia o Nisi Mea se Tele?
16, 17. (a) Pe afai o loo e tau mānatu pe talafeagai mo oe le paeonia, o le ā e mafai ona e faia? (e) O ā lagona o nisi ina ua lē mafai ona avea o ni paeonia?
16 Ina ua maeʻa le iloiloina faamatalaga sa faia e paeonia e faatatau i faamanuiaga o le faiva faapaeonia, atonu e te tau mānatu pe faamata e talafeagai mo oe le auaunaga faapaeonia. Afai o lea, aisea e lē talanoa atu ai i se paeonia o lē o loo taulau manuia i le faiva faataimi atoa? Atonu e te maua foi se aogā o le talanoa atu i se tasi o toeaina i le faapotopotoga, o se tasi na te iloa oe—le tulaga o lou soifua maloloina, o mea e gata mai ai lou malosi, ma ou tiute tauave faaleaiga. (Faataoto 15:22) O faamatalaga moni a isi e mafai ona fesoasoani ia te oe ina ia e fuafuaina ai ma le faaeteete pe faamata e talafeagai mo oe le auaunaga faapaeonia. (Faatusatusa i le Luka 14:28.) Pe afai e mafai ona e paeonia, o le a matuā anoanoai ou faamanuiaga.—Malaki 3:10.
17 Ae faapefea le toatele o tagata talaʻi faamaoni o le Malo, o ē e lē o talafeagai ma o latou tulaga ona avea ma paeonia, e ui atonu latou te faanaunau ina ia tele ni mea latou te faia i le faiva? Mo se faaaoaoga, seʻi manatu i faalogona o se tasi tuafafine Kerisiano o lē o loo tauivi na o ia i le tausia aʻe o lana fanau e toafā. Ua faapea mai o ia: “E leaga lava oʻu faalogona, auā sa ou paeonia sauatoa muamua, ae o lenei ua lē o toe tele se taimi ou te alu atu ai i le auaunaga i le fanua e pei ona ou masani ai, talu ai oʻu tulaga ua iai nei.” E matuā pele i lenei tuafafine lana fanau, ma e manao ina ia tausia lelei i latou. Ae i le taimi e tasi, o loo faanaunau foi o ia ina ia tele sona sao i le galuega talaʻi. Ua ia faapea mai: “O loʻu agaga atoa o le faiva.” O lagona foi na o loo oo i isi Kerisiano faamaoni o ē ua uunaia e lo latou alofa mo le Atua ina ia latou auauna atu ia Ieova ‘ma o latou loto atoa.’—Salamo 86:12.
18. (a) O le ā o loo faatalitalia e Ieova mai ia i tatou? (e) Aisea e lē tatau ai ona tatou lotovaivai pe afai ua avea nisi o tuatuagia ma pogai e taofiofia ai i tatou mai ni mea e mafai ona tatou faia?
18 Ia manatua o le mea o loo faatalitalia e Ieova mai ia i tatou o le auaunaga e faia ma le loto atoa. O le tele o lenei auaunaga atonu e eseese lava mai le tasi tagata i le isi tagata. O nisi e mafai ona latou fetuutuunai a latou meafai ina ia avea o ni paeonia sauatoa. E toatele isi ua avea o ni paeonia lagolago a lē o le faia faavaitaimi, pe faia faalausosoo, o loo faaaluina ai le 60 itula i le faiva i masina taitasi. Peitai, o le vaega toatele o tagata o Ieova, i le avea o ni tagata talaʻi o le faapotopotoga, ua latou loto atoa ai e tuutoina atu i latou lava i le galuega talaʻi ma le aʻoaʻo atu. Pe afai la ua taofiofia moni oe ona o le faaletonu o lou soifua maloloina, le soifuaga matua, ni tiute tauave faaleaiga, po o isi tuatuagia, aua e te lotovaivai. Pe afai o loo e foai atu le mea sili e te mafaia, lona uiga la, o loo tāua i le silafaga a Ieova lau auaunaga, e pei foi ona tāua le auaunaga a i latou o loo iai i le faiva faataimi atoa!
E Mafai e Tagata Uma Ona Faaalia le Agaga Faapaeonia
19. O le ā le agaga faapaeonia?
19 E ui lava ua lē mafai ona avea oe o se paeonia, ae mafai ona e faaalia le agaga faapaeonia. O le ā le agaga faapaeonia? I le lomiga o La Tatou Faiva o le Malo o Iulai 1988, ua taʻua ai: “E mafai ona faauigaina o le maua o se uiga mautinoa e faatatau i le faatonuga e talaʻi ma fai ma soʻo, i le tuuina atu atoatoa i le faaalia o le alofa ma manatu mo tagata, ia faataulagaina oe lava, le iai o le olioli e mulimulitui ai i le Matai, ma fiafia i mea faaleagaga a e lē o mea faitino.” E mafai faapefea ona e faaalia le agaga faapaeonia?
20. E mafai faapefea e mātua ona faaalia le agaga faapaeonia?
20 Pe afai o oe o se matua e iai sau fanau, e mafai ona e fautuaina ma le loto atoa i latou ina ia mafaufau i se galuega o le avea o ni paeonia. O ou uiga mautinoa agaʻi i le faiva e ono faatāua ai ia i latou le manaoga ina ia avea le auaunaga ia Ieova o se mea e sili ona tāua i o latou olaga. Atonu e te valaaulia ni paeonia ma ni ovasia femalagaai ma a latou avā i lou aiga ina ia mafai e lau fanau ona maua aogā mai faaaoaoga a i latou o ē o loo mauaina le olioli i le faiva faataimi atoa. (Faatusatusa i le Eperu 13:7.) E oo lava i aiga e eseese tapuaiga, e mafai e mātua talitonu, i a latou upu ma faaaoaoga, ona fesoasoani i a latou fanau ina ia avea le faiva faataimi atoa ma sini i le olaga.—2 Timoteo 1:5; 3:15.
21. (a) E mafai faapefea e i tatou uma ona lagolagosua atu ia i latou o loo paeonia? (e) O le ā e mafai e toeaina ona fai ina ia faalaeiau atu ai i paeonia?
21 I totonu o le faapotopotoga, o tatou uma lava e mafai ona lagolagosua atu ma le loto atoa ia i latou o ē o loo mafai ona avea ma paeonia. Mo se faaaoaoga, pe mafai ona faia ni au taumafaiga faapitoa ina ia lua paga ma se paeonia i le faiva, ae maise i ni taimi e ono galue toatasi ai se paeonia? O le a mafai ona e iloaina ai le iai o ‘se fetufaaiga o faalaeiauga.’ (Roma 1:11, 12) Pe afai o oe o se toeaina, e sili atu nisi mea e mafai ona e faia ina ia faalaeiau atu ai i paeonia. Pe a faia fono a le au toeaina, e tatau ona latou iloiloina e lē aunoa manaoga o paeonia. Pe a faavaivai se paeonia po ua oo i ai ni tulaga faigata, aua le vave ona fautuaina e tuu loa lana paeonia. E ui e iai ni tulaga e ono talafeagai ai lena fautuaga, ae aua neʻi galo o le galuega paeonia o se faaeaga tautele atonu o loo matuā faapelepeleina e le auauna faataimi atoa. Atonu e na o le pau lava le mea o loo manaomia o sina faalaeiauga ma ni nai fautuaga aogā. Ua tusi mai faapea le ofisa o le lālā a le Sosaiete i Sepania: “Pe a faalaeiau atu e toeaina le auaunaga faapaeonia, lagolagoina paeonia i le faiva i le fanua, ma fesoasoani atu faaleoleo mamoe ia i latou e lē aunoa, ona atili maua lea e paeonia le olioli, latou te lagona o loo aogā i latou, ma mananao ai e faaauau pea i le paeonia e ui lava i toʻatugā e ono aliai mai.”
22. I lenei vaitaimi sili ona faigata i le talafaasolopito o le tagata, o le ā e tatau ona tatou maumauai e fai?
22 O loo tatou ola i se vaitaimi sili ona faigata i le talafaasolopito o le tagata. Ua foaiina mai e Ieova ia i tatou se galuega faasaoola e faataunuu. (Roma 10:13, 14) Pe mafai ona tatou auai i lenei galuega faataimi atoa i le avea o ni paeonia pe leai, ae ia tatou faaalia le agaga faapaeonia. Ia ia i tatou se uiga o le faanatinati ma le agaga o le faataulagaina totino. Ia tatou maumauai ina ia tuuina atu ia Ieova le mea o loo ia faafinagaloina mai ia i tatou—le auaunaga ma le loto atoa. Ma ia tatou manatua pe afai tatou te foai atu mea uma tatou te mafaia, po o mea e faaatagia ai tupe iti a le fafine ua oti lana tane, po o mea e faaatagia ai le uu taugata a Maria, o lena ua faia ma le loto atoa la tatou auaunaga, ma e faapelepeleina e Ieova la tatou auaunaga o loo faia ma le loto atoa!
E te Manatua?
◻ Aisea e aumaia ai e le faiva faataimi atoa lagona o le faamalieina ma le olioli?
◻ Mai mea o loo tutupu, o le ā ua iloa e le toatele o paeonia e faatatau i le tomai o Ieova e tausia ai ana auauna?
◻ O ā aafiaga ua lagona e paeonia o loo faapogai e la latou faiva i la latou faiā ma Ieova?
◻ E mafai faapefea ona e faaalia le agaga faapaeonia?
[Ata i le itulau 23]
E maua e paeonia le olioli sili mai le faia o soo
[Ata i le itulau 23]
E mafai e lau fanau ona maua aogā mai se auaufaatasiga ma tagata talaʻi faataimi atoa o le Malo
[Ata i le itulau 23]
E mafai e toeaina ona faalaeiau i paeonia i le faiva i le fanua