Po o le a E Iai Iinā?
1 Na faapea mai i se tasi taimi se tagata ua loa tausaga talu ona avea ma Molimau: “Afai e te misia le uluaʻi aso o le tauaofiaga, o le mea moni, e matuā tele lava mea na ua e misia!” Aiseā na ia lagona ai faapena? Auā o le aso muamua o le amataga lena o se faigaʻai susua faaleagaga ua saunia e le faalapotopotoga a Ieova mo i tatou. (Isa. 25:6) O lo tatou iai iinā mai lava i le amataga ua faaalia ai tatou te ioe faatasi ma le faisalamo i ana saafiafiga e faapea: “Na ou fiafia ina ua latou fai mai ia te au, Tatou te o i le fale o Ieova.”—Sala. 122:1.
2 Ae peitaʻi, i nisi o Tauaofiaga Itumalo o “Afioga Faavaloaga a le Atua” i le tausaga ua mavae, sa matuā toʻaitiiti lava i latou na auai i le Aso Faraile na i lo o ē na auai i le Aso Toonai ma le Aso Sa. O le uiga o lenei mea, sa matuā toʻatele lava se aofaʻiga o ō tatou uso sa leʻi mafai ona faalogologo i vaega o le tauaofiaga na aumaia ai faamatalaga matuā tāua e uiga i afioga faavaloaga. Na latou melea foʻi le aufaatasiga fiafia ma isi uso talitonu.
3 Aua Neʻi Faatagaina Galuega Totogi e Fai ma Faalavelave: Ona o le popole ina neʻi āfaina le galuega a se tasi, atonu o le māfuaaga lena na lē auai ai nisi i le Aso Faraile. Ae peitaʻi, e toʻatele Molimau na latou iloa e faapea, e loto malilie o latou pule i galuega e felagolagomaʻi ma i latou i lenei mataupu pe afai latou te talosaga mamao atu mo ni o latou aso mālōlō. Na matuā māofa lava se tasi pule ona o le maumauaʻi o se tuafafine paeonia e auai i sauniga uma a le faapotopotoga ma fonotaga, o lea na ia faaalu ai se aso atoa e tasi i le tauaofiaga na auai atu i ai le tuafafine!
4 E lē tatau ona e manatu faapea e lē malie lou pule e faataga atu ni ou aso mālōlō, ma e lē tatau foʻi ona e faia se faaiʻuga e faapea, o le a lē āfaina pe a misia se aso se tasi o le tauaofiaga. Ia mautinoa ma le loto atoa, ia nofo sauni e faaali atu i lou pule i se auala faautauta mai le Tusi Paia, le māfuaaga e avea ai le auai i le tauaofiaga o se vaega tāua o lau tapuaʻiga. (Epe. 10:24, 25) Ona tuu atu lea o lou faatuatuaga atoatoa i folafolaga a Ieova, i le iloa e faapea o so o se mea lava e te manaʻomia i le itu faaletino, o le a saunia lava pe afai e tumau pea ona e faamuamua mea faaleagaga i lou olaga.—Mata. 6:33; Epe. 13:5, 6.
5 O le vala autū lava, o le talisapaia lea o “mea e sili ona tāua.” (Fili. 1:10, 11, NW; Sala. 27:4) E uunaʻia i tatou e lenei mea e faia ni fuafuaga ina ia maua atoatoa ai aogā mai lenei sauniuniga matuā tāua mai ia Ieova. Ia amata nei loa ona fai au fuafuaga maʻoti, ma ia maumauaʻi ina ia e auai iinā mo aso uma e tolu!