“E Le se Mea Faaleaoga lo Outou Tautiga”
1 Maʻeu sea manatu faalaeiau! O lou tautigā i le auaunaga a Ieova e lē o faaalu lē aogā. (1 Kori. 15:58) I le faaeseesega, seʻi manatu i le auala o loo tauivi malosi ai tagata mo le tele o aso i le taumafai e faaleleia o latou tulaga i le soifuaga po o o latou tulaga tau tupe. Atonu e latou te tuliloa ni aʻoaʻoga maualuluga mo le tele o tausaga po o le galulue mamafa foʻi ina ia taulau manuia i le itu faaletino. Ae peitaʻi, ona “o le tausaga ma le mea e tupu ai,” atonu e lē mafai ai lava ona maua le mamalu o loo latou saʻilia, pe atonu foʻi e uunaʻia ai i latou ina talia nai mea e matuā itiiti lava na i lo o mea faitino na latou mananaʻo i ai. E pei o “le ʻai i le matagi,” ua matuā lē aogā ai lava a latou taumafaiga. (Fai. 1:14; 9:11) Maʻeu la le tāua o lo tatou faia o ni mea se tele i le galuega e tasi lea e lē faalēaogāina auā e iai sona tāua e faavavau!
2 Le Galuega e Matuā Tāua Moni: O le talaʻia o le tala lelei o le Malo o le Atua, o le galuega aupito sili lea ona tāua i le lalolagi. O le galuega lenei e tatau ona faia e tusa lava pe faalogo tagata pe leai. E tatou te mananaʻo ia mafai ona tatou fai atu e pei o le aposetolo o Paulo: “Ou te mamā aʻu i le toto o tagata uma. Auā ua ou le natia se mea, ina neʻi le faailoa atu ia te outou le finagalo uma o le Atua.”—Galu. 20:26, 27.
3 Maʻeu se olioli o le a iai pe a faalogo tagata ma tali mai i le feʻau o le Malo! Na maliu le uso o le tinā o se tasi tamaʻitaʻi talavou. Sa tau manatu o ia po o fea ua alu i ai le uso o lona tinā—po o le lagi po o hele? Sa tatalo o ia i le Atua mo se fesoasoani i le faaaogāina o le suafa o Ieova e pei ona aʻoaʻoina ai o ia e lona uso ina ia faia faapea. Sa leʻi pine ae faia sana suʻesuʻega faale-Tusi Paia ma auai i sauniga faa-Kerisiano. Na ia maua se vaaiga fou atoatoa i le olaga ma motusia loa ana fesootaʻiga ma kegi leaga e feoaʻi i le auala. Na taofia e lea tamaʻitaʻi talavou lana ulaula, le faaaogāina o vailaau faasāina, ma le gaoi. Ua ioe o ia e faapea: “E na o le alofa lava mo Ieova na mafai ai ona ou tuua na ala leaga o le olaga. E na o Ieova lava i lona alofa mutimutivale tele e mafai ona aumaia ia te aʻu le faamoemoe o le ola e faavavau.” Ua lē o toe faaaluvaleina e ia lona olaga i mea lē aogā.
4 E tusa lava pe lē fia faalogo mai tagata, ae ua e faataunuuina se mea aogā. Ua latou iloa na asiasi atu Molimau a Ieova ia i latou. Ua faamautinoa atu ai lou lava faamaoni, faatuatua, ma le alofa. O lea, po o faalēaogā ea lou tautigā i le galuega a le Alii? E matuā leai lava!