“Ia Limafoaʻi, ia Nofosauni e Tufa Atu”
1 I senituri ua mavae, na faatonu ai e le aposetolo o Paulo ia Timoteo ina ia faalaeiau i uso talitonu ina ia “galue i le faia o mea lelei, ia tamaoaiga i galuega lelei, ia limafoaʻi, ia nofosauni e tufa atu.” (1 Timo. 6:18, NW) Sa faamanatu atu foʻi e Paulo i Kerisiano Eperu ina ia aua neʻi galo “ona agalelei ma alolofa atu.” (Epe. 13:16) Aiseā na ia tusia ai nei faatonuga? Auā sa ia iloa o le a iai “le viiga, ma le mamalu, ma le manuia ia te i latou uma o e fai amio [“galuega,” NW] lelei.”—Roma 2:10.
2 Ona o ia o Lē na Foafoaina Mea, o Ieova le Atua la o Lē e Ana mea uma. (Faaa. 4:11) E mautinoa lo tatou talisapaia o mea o loo ia aao i ai mo i tatou i le faaaogāina o ana sauniuniga eseese. E ui lava e iai le uiga lē lotofaafetai o le toʻatele o le fanau a tagata, ae o loo faaauau pea ona faatagaina e Lē Silisili ona Maualuga ia tagata uma ina ia maua aogā mai i ana sauniuniga agaalofa mo le faatumauina o le ola. (Mata. 5:45) Na oo lava ina ia tuuina mai lona Alo pele e fai ma taulaga ina ia mafai ona tatou maua le ola e faavavau. Pe e lē tatau ai ea i le alofa o loo faaalia ia te i tatou ona uunaʻia ai i tatou e faamaonia atu lo tatou lotofaafetai e ala i le limafoaʻi i uso a tagata?—2 Kori. 5:14, 15.
3 O le ā e Mafai Ona Tatou Tufa Atu? E matuā talafeagai mo i tatou le faaaogāina o so o se mea tāua o ia i tatou i se auala e faafiafia ai le silafaga a le Atua. Ma le mautinoa lava e tatou te mananaʻo e lagolagoina le galuega o le Malo i le lalolagi aoao i se auala faaletino ma le faaleagaga. O le mea moni, o le tala lelei o se oloa aupito sili lea ona tautele ua mafai ona maua e se tasi, auā “o le mana lava lea o le Atua e ola ai.” (Roma 1:16) O le faaaogā ma le limafoaʻi o lo tatou taimi ma alamanuia i masina uma e faia ai se sao i le galuega talaʻi ma le aʻoaʻo atu, o le a mafai ai ona tatou tufa atu lenei oloa faaleagaga i isi, ma iʻu ai i lo latou mauaina o le ola e faavavau.
4 E matuā fiafia lava Ieova pe a tatou fesoasoani atu ia i latou e faalētele ni a latou meafaitino. Ua ia folafolaina mai faamanuiaga, ma ua ia faamanatu mai foʻi ia i tatou e faapea: “E le aoga le oloa i le aso o le toasa; a o le amiotonu, e laveai lea nai le oti.” (Faata. 11:4; 19:17) O le lagolagoina o le galuega o le Malo i le itu faaletino ma le faia o se sao atoatoa i le talaʻiina o le tala lelei o ni auala matagofie ia e mafai ona tatou faailoa atu ai lo tatou limafoaʻi moni ma nofosauni e tufa atu.