Le Fesoasoani i Isi Ina ia Iloa Mea o Loo Manaomia Mai e le Atua

“Ua leai saʻu faitalia i lea mea. Oi talofa foi ia te au, pe a ou le folafolaina le tala lelei!”—1 KORINITO 9:16.

1, 2. (a) O le ā le galuega valalua e finagalo Ieova ina ia faia i ai so tatou sao? (e) O le ā e tatau i tagata loto faamaoni ona aʻoaʻoina ina ia avea ai i latou ma tagatanuu o le Malo o le Atua?

UA IAI ia Ieova le tala lelei mo tagata. E iai lona Malo, ma e finagalo o ia ina ia faalogo i ai tagata i so o se vaipanoa! O le taimi lava tatou te iloaina ai lenei tala lelei, e manaomia e le Atua ona tatou tufaina atu i isi. O se galuega e valalua lenei. Muamua, e ao ona tatou folafola atu le tala lelei o le Malo o le Atua. I lana valoaga e faatatau i “le vaitaimi faaiuiu o le faiga o mea,” na fetalai ai Iesu: “E talaʻiina atu foi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.”—Mataio 24:3, 14.

² O le vala lona lua o lenei galuega e aofia ai le aʻoaʻo atu o i latou o ē talia lelei mai le faalauiloaina o le Malo. Ina ua mavae lona toetu mai, na taʻu atu ai e Iesu i se vaega toatele o ona soo e faapea: “O lenei, ia outou o atu e fai nuu uma lava ma soo, ma papatiso atu ia te i latou i le suafa o le Tamā, ma le Atalii, ma le Agaga Paia; ia outou aʻoaʻo atu ia te i latou ia tausi i mea uma ua ou fai atu ai ia te outou; faauta foi, ou te ia te outou i aso uma lava, e oo lava i le gataaga o le lalolagi [“le vaitaimi faaiuiu o le faiga o mea,” NW].” (Mataio 28:19, 20) O ‘mea na poloai mai ai Keriso’ sa lei faapogai mai ia te ia lava; na ia aʻoaʻo atu isi ina ia tausia poloaiga a le Atua, po o mea o loo ia manaomia mai. (Ioane 14:23, 24; 15:10) O le aʻoaʻoina o isi ina ia ‘tausia mea ua poloaia e Keriso’ ua aofia ai le fesoasoani atu ia i latou ina ia iloa mea o loo manaomia mai e le Atua. E tatau i tagata loto faamaoni ona ausia mea e manaomia mai e le Atua ina ia avea ai i latou ma tagatanuu o lona Malo.

3. O le ā le Malo o le Atua, ma o le ā o le a ia faataunuuina ua avea ai le feau o le Malo o se tala lelei?

³ O le ā le Malo o le Atua? Ma o le ā o le a ia faataunuuina ua avea ai le feau o le Malo o se tala lelei? O le Malo o le Atua o se pulega faalelagi. E matuā tāua lava i le finagalo o Ieova, auā o le auala lea o le a ia faapaiaina ai lona suafa, i le faamamāina mai tuuaʻiga uma. O le Malo o le sauniuniga lea o le a faaaogā e Ieova ina ia faia ai lona finagalo i le lalolagi e pei ona faia i le lagi. O le mafuaaga lena na aʻoaʻo mai ai e Iesu i tatou ina ia tatalo mo le Malo o le Atua ia oo mai ma sa ia uunaia i tatou ina ia faamuamua i o tatou olaga. (Mataio 6:9, 10, 33) Pe ua e iloa le mafuaaga e tāua tele ai ia Ieova lo tatou aʻoaʻoina o isi e uiga i lona Malo?

O se Luʻi ae Lē o se Avega Mamafa

4. E mafai faapefea ona faataitaia le lē avea o la tatou tiute tauave ia talaʻi atu le tala lelei o se avega mamafa?

⁴ Pe o se avega mamafa ea le talaʻia atu o lenei tala lelei? E matuā leai lava! Seʻi faataitai: Ua iai i se tamā se tiute tauave e tausia ai i le itu faaletino lona aiga. O le lē taulau i le faia faapea ua tutusa lava ma le teena o le faatuatuaga Kerisiano. Na tusi mai le aposetolo o Paulo: “A e afai e le tausi e se tasi i lona aiga, afai foi e le sili ona tausi i e mau ma ia, ua faafitia e ia le faatuatua, e sili foi lona leaga i le ua le faatuatua.” (1 Timoteo 5:8) Ae pe o se avega mamafa ea lena tiute tauave mo se tane Kerisiano? E leai pe afai e alofa o ia i lona aiga, auā pe afai o le tulaga lena, e manao la o ia e tausia i latou.

5. E ui lava o se tiute tauave le galuega talaʻi ma le faia o soo, ae aisea e tatau ai ona tatou fiafia i le faia ai o se sao?

⁵ Ua faapena foi ona avea le galuega o le talaʻi atu ma le faia o soo o se tiute tauave, o se mea manaomia, lea e faalagolago atu i ai o tatou ola. Na faamatalaina faapenei e Paulo: “Ua leai saʻu faitalia i lea mea. Oi talofa foi ia te au, pe a ou le folafolaina le tala lelei!” (1 Korinito 9:16; faatusatusa i le Esekielu 33:7-9.) Peitai ane, o le alofa ua uunaia ai i tatou e talaʻi, ae ua lē na o se tiute e faatino. E muamua lava lo tatou alofa i le Atua, ae tatou te alolofa foi i o tatou tuaoi, ma ua tatou iloa le tāua tele mo i latou ona faalogo i le tala lelei. (Mataio 22:37-39) Ua avatu ai ia i latou se faamoemoe mo le lumanai. Ua lē o toe mamao ona faasaʻoina lea e le Malo o le Atua faiga lē faamasinotonu, aveesea omiga uma, ma toe faafoisia le filemu ma le autasi—o na mea uma e mo le manuia e faavavau o i latou o ē gauai atu i lana pulega amiotonu. Pe ua tatou lē fiafia ea, ioe ua faagaeetia, e tufa atu lena tala lelei i isi?—Salamo 110:3.

6. Aisea ua aumaia ai e le galuega talaʻi ma le faia o soo se luʻi moni?

⁶ I le taimi lava e tasi, ua aumaia ai e lenei galuega o le talaʻi atu ma le faia o soo se luʻi moni. E eseese tagata. O tagata uma lava e lē tutusa mea e naunau i ai po o mea e tomai ai. O nisi e lelei a latou aʻoaʻoga, a o isi e lei lava ni aʻoaʻoga. O le faitau tusi—lea sa manatu muamua i ai o se mea manaia e faaaogā i ai le taimi—ua vaai nei i ai o se tiute e faigata ona faataunuuina. O le lē fia faitau, lea ua faamatalaina faapea o “le tomai po o le tulaga o le iloa faitau ae lē fiafia tele e faia faapea,” o se faafitauli ua faatuputupulaia, e oo lava i atunuu o loo mitai mai le maualuga o o latou tulaga tau aʻoaʻoga. E mafai la faapefea ona tatou fesoasoani i tagata e ese o latou talaaga ma mea e naunau i ai ina ia latou iloa mea o loo manaomia mai e le Atua?—Faatusatusa i le 1 Korinito 9:20-23.

Ua Lelei Ona Faaauupegaina e Fesoasoani Atu i Isi

7. Ua faapefea ona faaauupegaina i tatou e “le auauna faamaoni ma le mafaufau” ina ia fesoasoani atu i isi ia iloa mea e manaomia mai e le Atua?

⁷ E sili ona faigofie le faatinoina o se galuega faigata pe afai o loo ia te oe meafaigaluega po o auupega talafeagai. O se meafaigaluega e fetaui mo se galuega patino i le asō, atonu e oo atu taeao ua toe iai ni suiga e ao ona fai i ai pe matuā suia foi ona o manaoga ua suia. E faapena foi i lo tatou tofiga e folafola atu le feau e uiga i le Malo o le Atua. I le gasologa o tausaga, ua saunia ai e “le auauna faamaoni ma le mafaufau” mo i tatou meafaigaluega ua fetaui tonu lava, o lomiga ua fuafuaina faapitoa e faaaogā i le faia o suesuega faale-Tusi Paia i aiga. (Mataio 24:45) O lea ua faaauupegaina ai i tatou e fesoasoani atu i tagata o “nuu uma, ma aiga, . . . ma gagana eseese” ina ia iloa mea o loo manaomia mai e le Atua. (Faaaliga 7:9) Mai lea taimi i lea taimi, ua saunia ai nisi meafaigaluega fou ina ia talafeagai ma manaoga fesuisuiai o loo iai i le fanua o le lalolagi. Seʻi o tatou iloiloina ni nai faaaoaoga.

8. (a) O le ā le vaega na iai a le tusi “Let God Be True” i le faalauteleina atu o aʻoaʻoga faale-Tusi Paia? (e) O le ā le meafaigaluega mo le faia o suesuega faale-Tusi Paia na saunia i le 1968, ma na faapefea ona fuafuaina faapitoa? (i) Na faapefea ona fesoasoani le tusi o le Upu Moni i le galuega o le faia o soo?

⁸ Mai le 1946 e oo atu i le 1968, sa faaaogā ai le tusi “Let God Be True” e avea o se meafaigaluega e sili ona aogā mo aʻoaʻoga faale-Tusi Paia, ma e 19,250,000 kopi na faasalalauina i gagana e 54. I le 1968, na tatala mai ai le tusi O Le Upu Moni E Taʻitaʻi Ai I Le Ola Faavavau i le gagana Peretania, ma e tele tausaga na faaaogaina ai ma le uigā lea tusi i le suesueina o le Tusi Paia ma ē naunau fiafia. Muamua atu, sa masani ona suesue nisi ma Molimau a Ieova mo le tele o tausaga ae lē papatisoina lava. Ae o lena meafaigaluega sa fuafuaina ina ia faaaafia ai le tagata aʻoga, ma uunaia ai o ia e faatatauina mea ua ia aʻoaʻoina. O le iuga? Ua faapea mai le tusi Jehovah’s Witnesses—Proclaimers of God’s Kingdom: “Mo tausaga faaleauaunaga e tolu e amata mai ia Setema 1, 1968, e gata mai ia Aokuso 31, 1971, sa iai se aofaiga e 434,906 tagata na papatisoina—ua sili atu ona toatele nai lo le faaluaina o le aofai o ē na papatisoina a o faagasolo tausaga faaleauaunaga e tolu na faatoʻā mavae atu!” Talu mai ona tatalaina le tusi o le Upu Moni ua ausia ai e lea tusi se tufatufaga e sili ona mataina—e silia i le 107,000,000 i gagana e 117.

9. O le ā le vala faapitoa ua iai i le tusi o le Ola e Faavavau, ma o le ā lona aafiaga na faia ai i aofaiga o tagata talaʻi o le Malo?

⁹ I le 1982 na avea ai le tusi E Mafai ona E Ola e Faavavau i Parataiso i Le Lalolagi ma tusi autū e faaaogā i le faia o suesuega faale-Tusi Paia. O loo iai i lenei meafaigaluega le silia i le 150 ata, e tofu le ata ma le faamatalaga aogā ua faamatilatila ai ma le saʻo le manatu tau aʻoaʻoga o loo iai i le ata. Na taʻua i le lomiga o La Tatou Faiva o le Malo o Oketopa 1982 e faapea: “I le tusa ma le 20 tausaga lea na avea ai le ‘Let God Be True’ ma a tatou tusi autū mo suesuega (mai le 1946 e oo atu i tausaga ogatotonu o vaitausaga talu mai le 1960) e silia i le 1,000,000 tagata talaʻi fou o le Malo sa faaopoopo mai i la tatou faalapotopotoga. Ona toe faaopoopo mai lea ma isi tagata talaʻi e 1,000,000 ina ua avea le tusi O Le Upu Moni E Taʻitaʻi Ai I Le Ola Faavavau ma a tatou tusi autū mo suesuega ina ua tatalaina i le 1968. I le faaaogaina o la tatou tusi fou mo suesuega, E Mafai ona E Ola e Faavavau i Parataiso i Le Lalolagi, pe o le a tatou vaaia ea se faatelega faapena i aofaiga o tagata talaʻi o le Malo? O le mea mautinoa lena, pe afai o le finagalo lea o Ieova!” Sa faamaonia lava o le finagalo lea o Ieova, auā i le amata mai le 1982 e oo atu i le 1995, e silia i le 2,700,000 na faaopoopo atu i aofaiga o tagata talaʻi o le Malo!

10. O le ā le meafaigaluega fou na saunia i le 1995, ma aisea e tatau ai ona mafai e lea tusi ona faia se agaigai vave i luma faaleagaga o tagata aʻoga o le Tusi Paia?

¹⁰ Na fetalai Iesu: “E tele le saito e seleseleina, a o le au fai galuega e toaitiiti ia.” (Mataio 9:37) Ua matuā telē lava le seleselega. O loo iai pea isi mea e tele e ao ona fai. I nisi atunuu e tatau ai ona tusi igoa o tagata i le lisi faatalitali mo ni suesuega faale-Tusi Paia. Ona o le faanaunauga la ia atili vave ona salalau atu le poto e uiga i le Atua, na saunia ai i le 1995 e “le auauna faamaoni ma le mafaufau” se meafaigaluega fou, o le tusi e 192 ona itulau ua faaulutalaina Le Poto e Taʻitaʻia ai i le Ola e Faavavau. O lenei meafaigaluega tāua e lē o taulaʻi atu i aʻoaʻoga sese. O loo faamatala mai ai upu moni o le Tusi Paia i se tulaga mautinoa. E iai le faamoemoe o le a fesoasoani i tagata aʻoga o le Tusi Paia ina ia faia ai se agaigai vave i luma faaleagaga. Ua uma ona faia e le tusi o Le Poto se aafiaga tele i le fanua o le lalolagi i kopi e 45,500,000 ua lolomia i gagana e 125 ma ua faaliliuina foi i nisi gagana faaopoopo e 21 i le taimi nei.

11. O le ā le meafaigaluega aogā na saunia e fesoasoani ina ia aʻoaʻo ai i latou o ē e lē iloa faitau po o ē e faalēlelei le faitau, ma ua faapefea ona faia ai se laasaga uigā i la tatou polokalame tau aʻoaʻoga i le lalolagi aoao?

¹¹ Mai lea taimi i lea taimi, ua saunia ai e ‘le vasega o le auauna’ ni meafaigaluega ua fuafuaina mo ni tagata patino, po o ē gata mai o latou tomai. Mo se faaaoaoga, e faapefea tagata o ē atonu latou te manaomia se fesoasoani faapitoa ona o a latou agaifanua po o o latou talaaga faalelotu? E mafai faapefea ona tatou fesoasoani ia i latou ina ia aʻoaʻoina mea o loo manaomia mai e le Atua? I le 1982 na tatou mauaina ai le mea tonu lava sa tatou manaomia—o le polosiua e 32 ona itulau o le Olioli i Le Ola i Le Lalolagi e Faavavau! Ua avea lenei lomiga ua matuā lelei ona faamatalatala mai i ata, o se meafaigaluega aogā i le aʻoaʻoina o i latou o ē e lē iloa faitau po o ē e leaga a latou faitau. O loo iai ni faamatalaga faigofie ma le malamalama gofie o aʻoaʻoga autū a le Tusi Paia. Talu mai le taimi na tatalaina ai, ua faia e le polosiua o le Ola i le Lalolagi se sao tele i la tatou polokalame tau aʻoaʻoga i le lalolagi aoao. E silia i le 105,100,000 kopi ua lolomia i gagana e 239, ua avea ai ma lomiga a le Sosaiete o le Olo Matamata ua sili atu ona tele gagana ua faaliliuina i ai e oo mai i le taimi nei!

12, 13. (a) Talu mai le 1990, o le ā le ala fou ua saunia e ‘le vasega o le auauna’ ina ia pāʻia ai loto o tagata i le lalolagi aoao? (e) E mafai faapefea ona tatou faaaogā vitiō a le Sosaiete i la tatou faiva i le fanua? (i) O le ā le meafaigaluega fou na saunia talu ai nei e fesoasoani i la tatou galuega o le faia o soo?

¹² E lē gata i lomiga ua lolomia, ae na amata mai i le 1990 ona faia e ‘le vasega o le auauna’ ni sauniuniga mo i tatou, e ala i aʻoaʻoga ua ofoina mai ai se ala fou ina ia pāʻia ai se aofia toatele o tagata—o kaseti vitiō. Ia Oketopa o lena lava tausaga, na tatalaina ai le vitiō e 55 minute o le Jehovah’s Witnesses—The Organization Behind the Name—o le vitiō muamua lava lea ua saunia e le Sosaiete o le Olo Matamata. O ona ata matagofie, o loo aumaia ai faamatalaga aogā, ua mauaina nei i gagana e 35, o loo faaalia mai ai le faalapotopotoga i le lalolagi aoao o tagata tuutoina atu ia Ieova, i le faataunuuina o le poloaiga a Iesu ina ia folafola le tala lelei i le lalolagi uma. Ua fuafuaina faapitoa le vitiō ina ia fesoasoani ai i la tatou galuega o le faia o soo. Sa lei faamaimauina e tagata talaʻi o le Malo se taimi i le faaaogaina loa o lenei meafaigaluega fou i le faiva i le fanua. O nisi latou te aveina i a latou ato, e sauniuni ai i taimi uma e faaali atu pe tuuina atu i tagata naunau fiafia. E lei umi lava talu ona tatalaina, ae tusi mai se tasi ovasia femalagaai: “Ua avea vitiō ma auala o le 21 senituri e pāʻia ai mafaufau ma loto o le faitau miliona o tagata, o loo iai la lo tatou faamoemoe o le vitiō muamua lenei mai le tele o nisi vitiō o le a faaaogā e le Sosaiete ina ia faalautele atu ai le galuega o le Malo i le lalolagi aoao.” Ioe, ua tele isi vitiō ua saunia, e aofia ai le vitiō e tolu ona vaega The Bible—A Book of Fact and Prophecy ma le Jehovah’s Witnesses Stand Firm Against Nazi Assault. Pe afai o loo maua i lau gagana vitiō a le Sosaiete, pe ua e faaaogaina ea i lau faiva i le fanua?a

¹³ Talu ai nei lava, na saunia ai se meafaigaluega fou, o le polosiua O le ā e Manaomia e le Atua Mai ia i Tatou?, ina ia fesoasoani i la tatou galuega o le faia o soo. Aisea na lomia ai? E mafai faapefea ona faaaogaina?

Le Iloiloina o se Meafaigaluega Fou

14, 15. Mo ai ua fuafuaina i ai le polosiua o le Manaomia, ma o ā mea o iai?

¹⁴ O le lomiga fou O le ā e Manaomia e le Atua Mai ia i Tatou? ua fuafuaina mo tagata o ē ua uma ona talitonu i le Atua ma faaaloalo i le Tusi Paia. O ovasia femalagaai faapea ma misionare na aʻoaʻoina i Kiliata ma ua tele tausaga o lo latou poto masani i atunuu tau atiae, sa fesoasoani uma i le sauniunia o lenei polosiua. O loo iai se sauniuniga ua lelei ona faatulagaina mo le faia o suesuega, o loo aofia ai aʻoaʻoga autū o le Tusi Paia. E logoleleia faaupuga, e faigofie, ma tuusaʻo. I le taimi lava e tasi, e lē faapea ua matuā faigofie naua le mataupu. O loo aumaia ai e lē na o “suāsusu” ae faapea foi “mea aano” mai le Afioga a le Atua, i se auala e tatau ona mafai e le toatele o tagata ona malamalama i ai.—Eperu 5:12-14.

¹⁵ I ni tausaga talu ai nei, sa manaomia ai e tagata talaʻi o le Malo i nisi o atunuu se lomiga tonu lava faapena. Mo se faaaoaoga, na tusi mai le lālā o le Sosaiete o le Olo Matamata i Papua Niu Kini e faapea: “O loo fenumiai mafaufau o tagata ona o feteenaiga i aʻoaʻoga faalotu. Ua latou manaomia ni faamatalaga tuusaʻo o le upu moni, e lagolagoina e ni mau se tele o le Tusi Paia e mafai ona latou suʻe atu i ai i a latou lava Tusi Paia. E latou te manaomia se faamatalaga manino ma le patino e uiga i mea o loo manaomia e le Atua mai Kerisiano moni ma po o ā tū ma faiga masani e lē taliaina e ia.” O le polosiua o le Manaomia o le mea tonu lava lea tatou te mananao i ai ina ia fesoasoani ai i na tagata ia latou iloa mea o loo manaomia mai e le Atua.

16. (a) O ai patino lava e mafai ona aogā i ai ni faamalamalamaga faigofie o loo iai i le polosiua fou? (e) E mafai faapefea e i latou o loo i lau oganuu ona maua aogā mai le polosiua o le Manaomia?

¹⁶ E mafai faapefea ona e faaaogaina lenei meafaigaluega fou? Muamua lava, e mafai ona faaaogā e suesue ai ma tagata o ē e faafaigata ona latou faitau po o ē atonu e lē naunau tele e faitau.b O na tagata e mafai ona aogā i ai faamalamalamaga faigofie o loo i le polosiua. Ina ua uma ona autaluina e lālā o le Sosaiete o le Olo Matamata se kopi o lenei lomiga na muai auina i ai, ona latou tusi mai lea o faamatalaga nei: “O le a matuā aogā le polosiua i le tele o vaega o le atunuu i vaipanoa o loo iai tagata e lē naunau tele e faitau.” (Pasili) “O loo iai se aofaiga tele o tagata e faimalaga mai i le atunuu o ē e lē mafai ona faitau i a latou lava gagana ma o loo faafaigata pea ona latou faitau i le gagana Falani. Atonu o le a faaaogā lenei polosiua e fai ma fesoasoani i ni suesuega ma i latou na.” (Falani) Pe mafai ona e mafaufau i ni tagata i lau oganuu o ē atonu e maua ni aogā mai le polosiua o le Manaomia?

17. I le ā le auala e mafai ai ona aogā le polosiua fou i le tele o atunuu, ma aisea?

¹⁷ Lona lua, i le tele o atunuu e mafai ona aogā le polosiua i le amataina o suesuega faale-Tusi Paia ma tagata o ē matataʻu i le Atua e tusa lava po o ā ni a latou aʻoaʻoga na iai. O le mea moni, e tatau ona faia ni taumafaiga ina ia amata ai se suesuega i le tusi o Le Poto e Taʻitaʻia ai i le Ola e Faavavau. Ae i nisi tulaga atonu e sili atu ona faigofie le amata o se suesuega i le polosiua. Pe a oo loa i le taimi talafeagai, ua tatau ona sii atu le suesuega i le tusi o Le Poto, o la tatou fesoasoani autū ma le talafeagai lea mo suesuega. E tusa ai ma lenei faaaogaina o le polosiua o le Manaomia, na tusi mai lālā o le Sosaiete o le Olo Matamata: “E faigata le amataina o suesuega faale-Tusi Paia, ma e foliga mai e sili atu ona lelei le amataina o se suesuega pe afai e amata i se polosiua.” (Siamani) “O se ituaiga o polosiua faapenei o le a sili atu ona uigā i le amataina o suesuega fou faale-Tusi Paia, lea e mafai ona faaauauina atu i le tusi o Le Poto.” (Italia) “E ui ina maualuluga tulaga tau aʻoaʻoga o tagata Iapani, ae o le toatele lava e matuā itiiti so latou iloa i le Tusi Paia ma ana aʻoaʻoga faavae. E ao ona avea le polosiua o se sitepu talafeagai lea e laa atu ai i le tusi o Le Poto.”—Iapani.

18. O le ā e tatau ona tatou manatua e uiga i le faataunuuina o mea o loo manaomia mai e le Atua?

¹⁸ Na talosagaina mai e lālā a le Sosaiete i le lalolagi aoao lenei polosiua, ona avatu ai lea o le faatagaga ina ia faaliliu i gagana e 221. Tau ina ia aogā lenei lomiga fou e fesoasoani mai ia i tatou, ina ia mafai ai ona tatou fesoasoani atu i isi e iloa po o ā mea o loo manaomia e Ieova le Atua mai ia i latou. Mo i tatou, seʻi o tatou manatua o le faataunuuina o mea o loo manaomia mai e le Atua, lea e aofia ai le poloaiga ina ia talaʻi atu ma faia soo, e aumaia ai ia i tatou se avanoa tāua e faaali atu ai ia Ieova le tele o lo tatou alofa ia te ia. Ioe, e lē o se avega mamafa mea o loo manaomia e le Atua mai ia i tatou. O le auala e sili ona lelei lea e ola ai!—Salamo 19:7-11.

[Faaopoopoga i lalo]

Pe Mafai Ona E Faamatala?

◻ O le ā le galuega valalua e finagalo Ieova ina ia faia i ai se sao o ana auauna?

◻ Aisea ua lē o se avega mamafa ai mo i tatou lo tatou tiute tauave o le talaʻi atu ma le faia o soo?

◻ O ā meafaigaluega ua saunia e “le auauna faamaoni ma le mafaufau” mo le faaaogaina i la tatou galuega talaʻi ma le faia o soo?

◻ Mo ai ua fuafuaina i ai le polosiua o le Manaomia, ma e mafai faapefea ona tatou faaaogaina i la tatou faiva?

[Ata i le itulau 24]

E lē o se avega mamafa la tatou galuega talaʻi ma le faia o soo

[Ata i le itulau 26]

“Let God Be True” (1946, toe teuteu 1952): 19,250,000 i gagana e 54 (tusi faa-Peretania)

“O Le Upu Moni E Taʻitaʻi Ai I Le Ola Faavavau” (1968): 107,000,000 i gagana e 117 (tusi faa-Falani)

“E Mafai ona E Ola e Faavavau i Parataiso i Le Lalolagi” (1982): 80,900,000 i gagana e 130 (tusi faa-Rusia)

“Le Poto e Taʻitaʻia ai i le Ola e Faavavau” (1995): 45,500,000 i gagana e 125 (tusi faa-Siamani)