Pe E te Talisapaia le Onosai o Ieova?
1 Pe ana lē onosai Ieova i le faitau 10, 20, ma le sili atu o tausaga ua mavae, ma ua mafai ai ona faasalafa atu se molimau i le lautele, pe faamata e mafai ona e aʻoaʻoina le upu moni? Maʻeu lo tatou lotofaafetai ona o lona faatagaina o le toʻatele atu o isi tagata “ia oo uma lava i le salamo.” Peitaʻi, o le aso tele o le faamasinoga a Ieova “e sau . . . pei o se gaoi.” (2 Pete. 3:9, 10) O lea, e lē tatau ona faauigasesēina le onosai o le Atua e faapea ua faatuai i le aumaia o le iʻuga i lenei faiga o mea.—Sapa. 2:3.
2 Ia Lagona le Tigāalofa i Tagata: O le onosai o Ieova e sili mamao atu na i lo le mea o tatou malamalama i ai. E lē tatau lava ona tatou faagaloina le fuafuaga o le onosai o Ieova. (Iona 4:1-4, 11) Ua silafia e Ieova le tulaga mafatia o le fanau a tagata ma ua ia tigāalofa ia i latou. E faapena foʻi lagona o Iesu. I le tigāalofa i le motu o tagata na ia talaʻi atu i ai, sa finagalo ai o ia ina ia faalautele atu le galuega faaevagelia ina ia maua ai e le toʻatele o tagata le avanoa e maua ai le ola e faavavau.—Mata. 9:35-38.
3 Pe a tutupu mai puapuaga ma mala, pe tatou te lē lagona ea le tigāalofa mo tagata o ē e lē iloa le upu moni? O tagata i aso nei ua faapei o “mamoe i latou e leai so latou leoleo” a o latou taumafai e faafetaiaʻia ma malamalama i tulaga fesouaʻiina i le lalolagi. (Mare. 6:34) E ala i le talaʻia ma le maelega o le tala lelei, tatou te faamāfanafana ai ia i latou o ē saʻo o latou loto ma faaalia lo tatou talisapaia mo le onosai o Ieova.—Galu. 13:48.
4 Ua Faanatinati la Tatou Galuega: I le tausaga ua mavae, e 323,439 i latou na papatisoina ma e sili atu i le 14,000,000 na auai i le Faamanatuga. Maʻeu se avanoa lelei ua iai mo le toʻatele o tagata ina ia sosola ese mai le faaumatiaga o lenei faiga o mea amioleaga! O le aofaʻiga o le a iai le “motu o tagata e toatele,” e tatou te lē iloa. (Faaa. 7:9) O le umi o le a faia ai lo tatou tofiga ia talaʻi, e tatou te lē iloa. Ae e silafia e Ieova. O le a talaʻia le tala lelei seʻia oo ina malie lona finagalo, “ona oo mai ai lea o le gataaga.”—Mata. 24:14.
5 Ua itiiti le taimi o totoe, ma ua lalata mai lava le aso o le Atua. (1 Kori. 7:29a; Epe. 10:37) E aunoa ma se masalosalo, “ua latalata nei ia te i tatou le ola, sa mamao ina o tatou uluai faatuatua.” (Roma 13:11) Seʻi aua neʻi o tatou faagaloina le fuafuaga o le onosai o le Atua. Na i lo lea, seʻi o tatou talaʻi ma le faanatinati ina ia mafai e le toʻatele o i latou o loo moomoo mo le amiotonu ona tofo i le tele o le alofa mutimutivale o Ieova.