Fesili Mai le Au Faitau

Sa pulunaunau mai Iesu e faapea: “Ia outou finafinau ina ia ulu atu i le faitotoa va apiapi; auā ou te fai atu ia te outou, e toatele latou te taumafai e ulu atu, a e le mafai lava.” (Luka 13:24) O le ā sa uiga i ai lana faamatalaga, ma e faapefea ona faatatauina i aso nei?

O le a sili ona lelei ona tatou malamalama i lenei faamatalaga pe afai tatou te iloiloina lona faatulagaga. Pe tusa o le ono tausaga a o lumanai lona maliu, sa iai Iesu i Ierusalema i le taimi o le faamanatuina o le toe tuuina atu o le malumalu. Sa ia fetalai ai i le avea ma leoleo mamoe mo mamoe a le Atua ae na ia faamanino mai o tagata Iutaia i lona tulaga lautele e lē aofia ai i nei mamoe ona o lo latou tetee e lē fia faalogo. Ina ua ia taʻua o ia ma lona Tamā e “tasi” sa fia fetogi tagata Iutaia ia te ia i maa. Na ia sola atu i Perea i le isi itu o le Ioritana.—Ioane 10:1-40.

O iina na fesili ai le tagata ia te ia: “Le Alii e, e toaitiiti ea e faaolaina?” (Luka 13:23) Sa talafeagai tele mo ia le fesiligia o lena fesili, auā sa manatu tagata Iutaia i lena taimi e na o se vaega faatapulaaina ua tatau i ai le faaolataga. A fua i o latou uiga faaalia sa iai, sa lē faigata ona iloa po o ai sa latou manatu e fai aʻe ai lena numera itiiti. Pagā lo latou faaseseina sa iai, e pei ona faaalia i le faagasologa o mea mulimuli ane ai!

Pe tusa e lua tausaga a o iai Iesu faatasi ma i latou, aʻoaʻo atu, fai vavega, ma tuuina atu le avanoa e mafai ai ona avea i latou ma suli o le Malo faalelagi. O le ā na iu i ai? O i latou, ae maise lava o latou taʻitaʻi, na latou faamaualuluga i le avea ma ē tupuga mai ia Aperaamo ma sa tuu atu i ai le Tulafono a le Atua. (Mataio 23:2; Ioane 8:31-44) Peitai latou te lei amanaia ma tali atu i le leo o le Leoleo Mamoe Lelei. E tusa o lea sa tatala atu se faitotoa i o latou luma, atoa ma le taui o le avea ma vaega o le Malo o le lagi pe afai latou te ui atu ai, peitai na latou teena. E na o sina vaega toaitiiti lava, ae maise lava mai tagata faatauvaa, sa faalogo i le feau a Iesu o le upu moni, ma tali mai, ma tumau ia te ia.—Luka 22:28-30; Ioane 7:47-49.

I le aso o le Penetekoso i le 33 T.A., o tagata lē taualoa ia na sauni atu e faauuina e le agaga. (Galuega 2:1-38) Sa lei aofia ai i latou i ē fai amioleaga e pei ona taʻua e Iesu o ē o le a taufaitagiaue ma lilivau nifo ona o le lē taulau ona faaaogā le avanoa e pei ona tatala atu ia i latou.—Luka 13:27, 28.

E aliali mai la, i le uluai senituri o le “toatele” e pei ona taʻua i le Luka 13:24, o tagata Iutaia i se tulaga lautele, ae maise lava taʻitaʻi lotu. O i latou nei sa faapea mai latou te mananao ia fiafia mai le Atua ia i latou—peitai e ala mai i a latou lava faatulagaga ma auala ae lē o ala a le Atua. I le tuufaafeagai, o se vaega “toaitiiti” o ē na tali atu i lo latou loto naunau moni e fia avea ma vaega o le Malo na iu ina avea ma sui faauuina o le faapotopotoga Kerisiano.

O lea la seʻi iloilo le faatatauina atili lea o loo tupu i o tatou aso. E lē mafaitaulia tagata o loo auai i lotu a Kerisinetoma lea ua uma ona aʻoaʻoina e faapea o le a latou ō i le lagi. Ae ui i lea, e lē saʻo lea faanaunauga, e lē faavaeina i aʻoaʻoga saʻo a le Tusi Paia. E pei lava o tagata Iutaia, o nei tagata latou te mananao i le finagalo malie o le Atua ae i a latou lava tuutuuga.

Peitai, ua uma ona iai se vaega toaitiiti i o tatou aso o ē ua tali atu ma le lotomaulalo i le feau o le Malo, ma tuuina atu i latou mo Ieova, ma gaoioi ai i le tulaga latou te maua ai lona finagalo malie. Ua taitaia atu ai i latou e lenei mea i le avea ma “atalii o le malo.” (Mataio 13:38) O nei “atalii” faauuina na amata ona valaauina i le Penetekoso i le 33 T.A. Ua leva ona talitonu Molimau a Ieova e faapea o faamaoniga o le feagai ai o Ieova ma ona tagata ua foliga mai ai i se tulaga talafeagai ua uma ona valaaulia le vasega mo le lagi. O le mea la lea, o i latou ua aʻoaʻoina upu moni o le Tusi Paia i tausaga mulimuli mai ai ua latou malamalama e faapea o le faamoemoe o le ola e faavavau i se lalolagi parataiso o lea ua tatala atu nei. Ua sili atu le fuainumera o i latou nei nai lo le vaega totoe ua faaitiitia o Kerisiano faauuina, i latou o loo iai le faamoemoe o le ō atu i le lagi. E lē o faatatauina patino le Luka 13:24 ia i latou e lē o faamoemoe e ō i le lagi, peitai o loo iai moni ni fautuaga atamai mo i latou.

Ina ua pulunaunauina i tatou ina ia tatou finafinau, e lei faapea mai Iesu a mea la o ia po o lona Tamā foi o la tuuina ni mea faigata e faalavelave mai ia i tatou. Peitai ua tatou malamalama mai le Luka 13:24 e faapea o mea e manaomia e le Atua e aofia ai ma le teena o i latou e lē tatau i ai. O le “ia outou finafinau” e manaomia ai le tauivi, le aapa atu. O lea e ao ona tatou fesili aʻe ia i tatou lava, ‘Po o oʻu aapa atu atu ea?’ E mafai ona toe faaupu le Luka 13:24 e faapea, ‘E manaomia ona ou tauivi ma finafinau ina ia ulu atu i le faitotoa va apiapi; auā e toatele latou te taumafai e ulu atu, ae le mafai lava. O lea la po o oʻu matuā tauivi ea ma finafinau? Po o pei ea aʻu o le tagata afeleti i malae i aso anamua o lē na te faia mea uma lava ina ia manumalo ai ma maua le taui? E leai se tagata afeleti faapena e alu faaʻafaʻafa ma faifai mālie. Po o oʻu faifai mālie pea?’

Ua faaalia i upu a Iesu e faapea e ono taumafai nisi e ‘ulu atu i le faitotoa’ pe a talafeagai ma a latou lava fuafuaga, i se tulaga taugamalie e tusa ma mea e loto atu i latou i ai. E ono aafia Molimau taitoatasi i le uiga lena. E ono finau mai nisi faapea, ‘Ou te iloa nisi o Kerisiano faamaoni o ē sa filigā mo le tele o tausaga, faia le tele o faataulagaga; peitai, e oo ane i le taimi ua latou maliliu ai, e lei oo mai lava le iuga o lenei faiga amioleaga o mea. O lea la atonu e lelei ona ou faatelegese laitiiti, ma ola i se olaga e masani ai.’

E faigofie tele ona mafaufau faapena, peitai pe e atamai moni le faia faapea? Mo se faataitaiga, pe sa manatu faapena le au aposetolo? Ma le mautinoa lava e leai. Sa latou galulue mamafa mo le latou tapuaiga seʻi oo lava i lo latou oti. Mo se faataitaiga, sa mafai ona faapea mai Paulo: “O ia [Keriso] lava matou te talaʻiina atu . . . O le mea lea ou te galue ai ma finafinau e tusa ma lana lava galuega, o loo galue lava i totonu ia te au ma le mana.” Mulimuli ane na ia tusia: “O le mea lava lea tatou te galulue ma finafinau ai, auā tatou te faamoemoe i le Atua soifua, o ia o le Faaola o tagata uma, aemaise lava o e ua faatuatua.”—Kolose 1:28, 29; 1 Timoteo 4:10.

Tatou te iloa sa matuā saʻo lelei le mea sa faia e Paulo i lona finafinau. Maeu le faamalieina o le a oo ia i tatou taitoatasi pe a mafai ona fai atu pei o Paulo: “Ua ou tau le taua lelei, ua iu ia te au le tausinioga, ua ou taofi i le faatuatua.” (2 Timoteo 4:7) O lea la i le ogatasi ma upu a Iesu o loo i le Luka 13:24, e mafai ona tatou fesili taitoatasi, ‘Po o oʻu faatatauina ia te au le finafinau ma le galue maelega? Ioe, po o lava ea ma faifai pea ona ou faaali atu faamaoniga e faapea o loo oʻu utagiaina le timaiga a Iesu: “Ia outou finafinau ina ia ulu atu i le faitotoa va apiapi”?’