Aperila—O le Taimi e ‘Tatou te Galulue Malolosi ma Finafinau Ai’
1 I le vaitaimi o le Faamanatuga, o taimi na e mafaufau loloto ai tagata o Ieova. O le taimi lea, e manatunatu ai i mea na faataunuuina i le maliu o Keriso ma mafaufau ai foʻi i lo tatou faamoemoe mai i le Atua ua mafaia ona o le toto ua faamaligiina o Iesu. A o e mafaufau i tuā ia Aperila 19 i le tausaga ua mavae, o le ā se mea na e manatuaina? Pe e mafai ona e manatua ni tagata na e vaai i ai i lena pō? le matuā faatāuaina o le siʻomaga faaleagaga o le Faamanatuga? le lauga uigā faale-Tusi Paia ma tatalo mai le loto? Atonu ua e faia se faaiʻuga ina ia faatino atoatoa ai le loloto o lou talisapaia ma le lotofaafetai i le alofa ua faaalia e Ieova ma Iesu mo oe. Ua faapefea ona aafia ai oe i na manatunatuga loloto i le taimi nei?
2 E manino lava le faaalia e tagata o Ieova o le lotofaafetai e sili atu na i lo o upu. (Kolo. 3:15, 17) Ia Aperila ua mavae, na tatou faaalia faapitoa ai lava lo tatou talisapaia o sauniuniga a Ieova mo le faaolataga e ala i le faateleina o o tatou taimi i le faiva faa-Kerisiano. E sili atu i le toʻaselau uso ma tuafāfine sa auai i le auaunaga o le paeonia lagolago. O a latou taumafaiga faapea ma taumafaiga a isi tagata uma o ē e folafola le Malo, na iʻu i ni tumutumuga fou i aofaʻiga atoa o paeonia ma mekasini na ofoina atu. Na faateleina lo tatou olioli i le vaai atu ua amataina le tele o suʻesuʻega fou faale-Tusi Paia, ma se aofaʻiga tele o ē na auai i le Faamanatuga!
3 O le mea moni, o le mautinoa o lo tatou faamoemoe ua faagaeeina ai i tatou. E pei lava ona tusi mai le aposetolo o Paulo e faapea: “O le mea lava lea tatou te galulue [“malolosi,” NW] ma finafinau ai, auā tatou te faamoemoe i le Atua soifua, o ia o le Faaola o tagata uma, aemaise lava o e ua faatuatua.”—1 Timo. 4:10, LF.
4 O le a faapefea ona e faaalia lou faatuatua i le sauniuniga a Ieova mo le ola i lenei vaitaimi o le Faamanatuga? Ia Oketopa talu ai na tatou vaaia ai i Samoa se fuainumera aupito sili ona toʻatele o ē e folafola le Malo, ma i le masina o Aokuso ua mavae atu i Toga, sa tatou toe ausia ai le tumutumuga sa iai muamua o le ʻautalaʻi. Pe mafai ona tatou ʻausilia lena aofaʻiga ia Aperila o lenei tausaga? E matuā mafai lava ona tatou ausia. Ae o tagata talaʻi uma ua papatiso ma ē e leʻi papatisoina, o le a manaʻomia ona auai. E toʻatele foʻi ē fou ua agavaa e faia so latou sao. I lea, a o e faia fuafuaga ina ia galue malosi ma faamalosia oe lava ia Aperila o lenei tausaga, ia manatunatu i ni auala e mafai ai ona e faagaeetia isi, e aofia ai ma ē fou ma ē e lē lava le poto masani, ina ia outou ō faatasi.
5 Fesoasoani i Nisi Ina ia Toe Amata Ona Galulue: Afai e te iloa nisi ua atoa se masina po o se lua foʻi e leʻi toe auai i le auaunaga i le fanua, atonu e mafai ona e faamalosiau ma valaaulia i latou e tou te ō faatasi i le auaunaga i le fanua. Afai e iai nisi i le faapotopotoga ua lē o toe talaʻi, o le a faia e toeaina se taumafaiga faapitoa e asia ma faalaeiau ai i latou ina ia toe amata ona talaʻi ia Aperila.
6 E tatau ia i tatou uma lava ona talosaga atu pea mo le agaga o Ieova ina ia faamalosia ai i tatou i lana auaunaga. (Luka 11:13) O le ā e tatau ona tatou faia ina ia maua ai lena agaga? Faitau le Afioga faagaeeina a le Atua. (2 Timo. 3:16, 17) E tatau foʻi ona tatou ‘faalogo i mea ua fetalai mai ai le Agaga i ekalesia’ e ala i le auai i sauniga faalevaiaso uma e lima. (Faaa. 3:6) O le taimi tatau lenei e fesoasoani atu ai i ē ua seāseā ma ē ua lē o toe talaʻi ina ia faaleleia a latou masaniga o le faia o suʻesuʻega totino ma ia maumauaʻi e faamaoni i lo latou auai pea i sauniga. (Sala. 50:23) E tatou te faia lenei mea a o vaavaai totoʻa foʻi mo lo tatou lava lelei faaleagaga. Ae peitaʻi, e iai foʻi se isi mea e manaʻomia.
7 Na faamatala mai e le aposetolo o Peteru e faapea, e foaʻi mai e le Atua lona agaga paia “i e anaana ia te ia.” (Galu. 5:32) O lena ʻanaʻana po o le usiusitai e aofia ai le utagiaina o le faatonuga “e talaʻi atu i le nuu, ma molitino atu.” (Galu. 1:8; 10:42) I lea, e ui lava e moni e tatou te manaʻomia le agaga o le Atua ina ia faamalosia ai i tatou e talaʻi, e faapena foʻi ona moni a o amata ona faatinoina lo tatou faanaunauga e faafiafia Ieova, ae e sili atu foʻi isi mea ua ia fesoasoani mai ai ia i tatou. Tau ina ia aua neʻi o tatou manatu faatauvaa i le tāua o le faia o na uluaʻi laasaga o le lotomalie e usiusitai!
8 Fesoasoani i Ē Iti: Mātua, po o tou vaaia ni faamaoniga e faapea o loo mananaʻo lau fanau e talanoa atu i isi e uiga i le upu moni? Po o tou ō faatasi ma i latou i le auaunaga i le fanua? Po o fai i latou ma faaaʻoaʻoga lelei i a latou amio? Afai o faapena, aiseā e te faatalatū ai? Ia talanoa atu i se sui o le Komiti o le Auaunaga a le Faapotopotoga ina ia iloa ai po ua agavaa lau tamaitiiti e avea ma tagata talaʻi e leʻi papatisoina ia Aperila o lenei tausaga. (Tagaʻi i le tusi Our Ministry, itulau e 99-100.) Ia e vaai ua mafai e lau fanau ona fai se sao i se auala malosi i le alagaina o viiga o Ieova i lenei vaitaimi o le Faamanatuga.—Mata. 21:15, 16.
9 E faalaeiauina pea e se tinā Kerisiano i Georgia, i le Iunaite Setete o Amerika lana tama teine talavou ina ia talanoa atu i isi e uiga ia Ieova. I le tausaga ua mavae a o auai le teine ma lona tinā i le faiva, na ia avatu ai se polosiua o le Manaomia i se tamāloa ma faamatala puupuu le faasologa o mataupu. Na fesili atu le tamāloa i le teineitiiti: “Ua fia ou tausaga?” Na faapea mai o ia: “Ua fitu.” Sa matuā ofo lava le tamāloa i le vaai atu i a te ia o faamatala mai sea taulimaga uigā. Sa masani o ia i le upu moni a o laʻitiiti, ae sa leʻi manatu mamafa i ai e faapea o se auala lea o le olaga. E leʻi pine, ae amataina loa se suʻesuʻega faale-Tusi Paia ma le tamāloa, lana avā ma lona afafine.
10 E toʻatele le ʻautalavou ua avea ma tagata talaʻi, ma e tatou te fiafia e ō faatasi ma i latou ma galulue faatasi ma i tatou i le auaunaga. E mafai e nei talavou ona uunaʻia ma faalaeiauina isi o la latou lava tupulaga. Ae o Aperila, o se taimi fetaui lelei foʻi lea mo aiga taʻitasi e faamalosia ai o latou noataga ma atiina aʻe ai le itu faaleagaga e ala i le galulue faatasi i le auaunaga paia. O ulu o aiga e tatau ona taʻimua i lenei tulaga.—Faata. 24:27.
11 Fesoasoani i Ē Fou: Ae faapefea i latou o ē fou o loo tou suʻesuʻeina faatasi le Tusi Paia? Faamata e mafai ona faia so latou sao i le tauiviga faapitoa lea e faia ia Aperila o lenei tausaga? Atonu e latou te faaalia le naunau e taʻu atu i isi mea na latou aʻoaʻoina a o lua talanoaina le mataupu e 2, palakalafa e 22, po o le mataupu e 11, palakalafa e 14, o le tusi o Le Poto. Afai ua tau lamalama faaiʻu le tusi, ia sauniuni lelei e talanoaina i se tulaga manino lenei mataupu a o lua suʻesuʻeina le mataupu e 18, palakalafa e 8, lea e faapea mai: “Atonu o loo e naunau e taʻu atu i ou aiga, o au uo ma isi tagata, mea o loo e aʻoaʻoina. Atonu ua uma ona e faia lenei mea, e oo foʻi ia Iesu, sa ia tufa atu le tala lelei i isi i ni tulaga sa leʻi fuafuaina. (Luka 10:38, 39; Ioa. 4:6-15) Atonu la o lea ua e manaʻo nei e faia atili nisi mea.” Po o faapena i latou o loo tou suʻesuʻe?
12 Pe e talitonu lau tagata suʻesuʻe i le Afioga a le Atua? Po ua ia faatatauina mataupu silisili o le Tusi Paia? Po ua ōgatusa lona olaga ma tapulaa tauatua? Po ua auai o ia i sauniga a le faapotopotoga? Pe e manaʻo o ia e auauna ia Ieova le Atua? Aiseā la e lē faalaeiau ai o ia e talanoa atu i toeaina ina ia mafai ai ona latou filifili po ua agavaa o ia e avea ma tagata talaʻi e leʻi papatisoina ma lua galulue faatasi ai ia Aperila? (Tagaʻi i le tusi Our Ministry, itulau e 97-99.) I lenei auala, o le a amata ai ona ia tofo totino po o le a faapefea ona lagolagoina o ia e le faalapotopotoga a Ieova i ana taumafaiga e auauna ia Ieova.
13 E moni, o nisi tagata suʻesuʻe e vave lava ona agaʻigaʻi i luma na i lo o isi. I lea, i le ōgatusa ma faasinoga o loo i La Tatou Faiva o le Malo o Iuni 2000, itulau e 4, palakalafa 5-6, o le toʻatele ua suʻesuʻeina se tusi lona lua ma tagata na muaʻi faaalia le fiafia ae o loo manaʻomia se isi fesoasoani ina ia auaufaatasi atu ai ma le tiotio. Aua lava neʻi faapea ua leai so tatou faamoemoe e mafai ai ona avea nei tagata lotofaamaoni ma soo moni o Keriso, “e tusa lava po o se taimi puupuu po o se taimi umi.” (Galu. 26:29, NW) Peitaʻi, afai o le tele o masina ia na tou suʻesuʻe ai ma na tagata ua mafai ona faamatalaina e faapea o se “taimi umi,” pe e lē faamata la o lenei vaitaimi o le Faamanatuga o se avanoa sili lea ona lelei mo lau tagata suʻesuʻe e amata ai ona faatinoina le loloto o lona talisapaia mo le togiola a Keriso?
14 Le Auala e Fesoasoani ai ia i Latou e Faia se Sao: E tele mea ua tatou aʻoaʻoina e faatatau i le fesoasoani atu i ē ua taʻuagavaaina ina ia amata i le faiva e ala i le iloiloina o le auala na toleni ai e Iesu isi. Sa leʻi na ona saʻilia e Iesu se motu o tagata ona ia fai atu lea i ona aposetolo e amata loa ona talanoa atu. Sa muamua ona ia faamamafa le manaʻomia o le galuega talaʻi, sa faalaeiauina se uiga e tatalo, ona ia tuuina atu loa lea ia i latou o sauniuniga autū e tolu: o se paga, se oganuu tofia, ma se feʻau. (Mata. 9:35-38; 10:5-7; Mare. 6:7; Luka 9:2, 6) E mafai foʻi ona e faia o lena mea. E tusa lava po o lou fesoasoani atu i lau lava tama, se tagata suʻesuʻe fou, po o se tasi ua fai si umi e leʻi toe tuuina mai sana lipoti o le galuega, o le a talafeagai la ona faia se taumafaiga faapitoa e tuliloa ai sini nei.
15 Faamatilatila le Manaʻoga: Ia faamamafa i le tagata le tāua o le galuega talaʻi. Ia mautinoa e uiga i lenei galuega. Faamatala mai ni mea na tutupu e faaalia ai po o ā mea o loo faataunuuina e le faapotopotoga i le faiva. Ia faaalia le agaga na faaalia e Iesu i le Mataio 9:36-38. Faalaeiau le tagata lea o le a faamoemoe e avea o se tagata talaʻi po o le tagata ua lē o toe talaʻi, ina ia tatalo e faatatau i lona auai totino i le faiva faapea foʻi ma le taulau manuia o le galuega i le lalolagi aoao.
16 Faalaeiau le Tagata ia Mafaufau e Uiga i le Tele o Avanoa o Loo i ai e Molimau Atu Ai: Ia faailoa mai le avanoa e feiloaʻi ai ma le vaega o suʻesuʻega tautusi mo le molimau atu i lea fale i lea fale. Talanoa e faatatau i le faia o ni talanoaga ma tauaiga ma ē masani, po o le talanoa atu foʻi i ē faigaluega faatasi pe aʻoʻoga faatasi i le taimi o mālōlōga mo taumafataga i le aoauli. Pe a faimalaga i pasi, nofoaafi, po o vaalele, e masani lava ona amataina e se tasi se talanoaga i le na o le faaalia o lou naunau totino i uso a pasese. Pe afai tatou te tausolomua i le amataina o talanoaga, e masani lava ona maua ai se avanoa e avatu ai se molimau lelei. E moni e tele lava taimi e mafai ona faailoa atu ai lo tatou faamoemoe “i lea aso ma lea aso” i isi.—Sala. 96:2, 3.
17 Ae peitaʻi, atonu e sili ona lelei ona vave ona lua galulue faatasi ma le tagata talaʻi fou mai i lea fale i lea fale. Afai ua uma ona e faataatia se sini e faateleina lau auaunaga ia Aperila, fesili atu i le auauna o le oganuu pe e mafai ona maua se oganuu talafeagai. Afai e i ai, o le a e maua ai la le tele o avanoa e galueaʻiina māeʻaeʻa ai. Mo se faaaʻoaʻoga, pe afai e uma le auaunaga pe e te malaga atu foʻi i sauniga po o nisi nofoaga, atonu o le a e mātauina ai ua iai se tasi i se fale e te leʻi maua muamua atu i ai se isi, pe na faaalia ai foʻi le fiafia. Afai e talafeagai, ia asiasi puupuu i ai i se taimi e sili atu ona tali lelei mai ai. I lenei mea, o le a maua ai se lagona olioli ma le faalogona ua mafai ona faataunuuina se mea i le faiva.
18 Sauniuni se Feʻau Faatupu Fiafia: E mafai ona manaʻo se tasi e tufa atu le feʻau o le Malo, peitaʻi i le isi itu, e mafai ona oo i a te ia le faalogona lē mautinoa e faatatau i le auala e talanoa atu ai, aemaise lava pe afai o ia e fou po ua leva foʻi ona lē o toe talaʻi. O le fesoasoani atu la i ē e fou ma i latou ua lē o toe talaʻi ina ia sauniuni, o taimi aogā na. O Sauniga o le Auaunaga ma faatasiga mo le auaunaga i le fanua, e mafai ona aumaia ai ni manatu aogā, ae sili ai lava au sauniuniga totino.
19 E mafai faapefea ona e fesoasoani i tagata fou e sauniuni mo le auaunaga? Amata muamua i le ofoina o se mekasini, ma ia faafaigofie ma faapuupuu! Fai atu ia i latou e mafaufau e uiga i mea tutupu mai i tala fou e ono faapopoleina ai i latou i le oganuu, ona saʻili lea o se manatu i se tasi o mekasini fou e fesootaʻi ma lena mea na tupu. Faataʻitaʻi faatasi le taulimaga ma faaaogā vave loa lava i le faiva.
20 Atiina Aʻe o Tatou Avanoa mo se Faatelega i le Lumanaʻi: I le tausaga ua mavae, na silia ai i le 14.8 miliona i latou na auai i le Faamanatuga i le lalolagi aoao. O le aofaʻiga o tagata talaʻi na lipotia mai, na sili laitiiti atu lava i le ono miliona. O lona uiga, e tusa ma le 8.8 miliona tagata na fiafia e auai i lenei polokalame faapitoa lea na latou faalogo ai i le faamatalaina o se tasi o aʻoaʻoga autū o le Tusi Paia. Sa latou iloatino ai nisi o i tatou, ma atonu sa matuā faafiafiaina ai i latou. O le toʻatele lava o i latou e faia ni tala lelei e uiga ia i tatou, ua saosaolaumea ai i la tatou galuega i le lalolagi aoao, ma puipuia ai i tatou mai i tuuaʻiga a isi. O lenei vaega toʻatele ua aliali mai ai le ono iai o se faatelega tele i le lumanaʻi. O le ā e mafai ona tatou faia e fesoasoani ai ia i latou e agaʻigaʻi atili ai i luma?
21 O le toʻatele o ē fou na auai i le Faamanatuga, sa latou faia faapea ona sa valaaulia totino i latou e se tasi o i tatou. O lona uiga la, e tatau ona iai a itiiti mai o se tagata e toʻatasi e te masani totino i ai i le aofia. Afai e auai se tasi ona sa tali mai i la tatou valaaulia, o la tatou tiute tauave la o le talileleia o ia ma fesoasoani atu i a te ia ina ia maua atoatoa aogā mai le polokalame. Talu ai o le a faatumulia le fale, ia fesoasoani atu e saʻilia sona nofoa. Avatu i a te ia se Tusi Paia, ma tuu atu i ai lau pese e te lua pepese faatasi ai. Tali so o se fesili e na te ono fesiligia. O lou uaʻi totino atu ma le māfana e mafai ona avea ma auala sili i le atiina aʻe o lona naunau. O le mea moni, e tofu sao uma lava i tatou i lenei tiute tauave—afai e tatou te vaaia se tagata e te lē masani ai, ia e faafeiloaʻia ma le māfana ma talatalanoa puupuu ina ia lua faamasani.
22 O le auai i le Faamanatuga e mafai ona avea o se taaʻiga moni i mafaufauga o le tagata. Ona o lea ua sau i le sauniga, e faailoa mai ai atonu e na te lē o maua le mea lea o loo ia saʻilia i se isi lava mea, ae o le mea lea e tatou te ofoina atu, ua oo ai i a te ia se lagona e manaʻomia ona ia matuā suʻesuʻe atili i ai. O le faamatalaina o le sauniuniga ofoofogia o le togiola, e ono avea o se faaaliga loloto lea i se tagata e leai sona malamalamaga i le alofa lē faatuaoia o Ieova. Atonu ua uma ona ia iloa e ese i tatou—e faamaoni, faaleuō, alolofa, ma faaaloalo. O lo tatou Maota o le Malo e lē tutusa ma mea atonu o ia vaaia i falesa o loo faaalia ai faatagata ma faia ai faiga faalotu e leai se uiga. E mautinoa lava le vaaia e ē fou e faapea, o tagata o loo i le aofia e mai i tulaga eseese o le olaga ma e lē aoina ai ni tupe. O le vaaia o nei mea, e mafai ona uunaʻia malosi ai i latou ina ia toe ō mai.
23 Pe a uma le Faamanatuga, e tatau i se tasi ona mataalia ina ia toe asia nei tagata fou uma na auai ina ia avatu i ai se fesoasoani. Afai e te valaaulia ni tagata fou, ua iai la sou tiute tauave faapitoa. Ae latou te leʻi ō ese atu, ia faamautinoa ua latou iloa e uiga i isi sauniga ia e faia i le Maota o le Malo. Taʻu i ai le matua o le lauga i le lautele lea e sosoo mai. Faailoa i ai le nofoaga ma le taimi o le Suʻesuʻega Tautusi a le Faapotopotoga e latalata ane i o latou aiga. Mulimuli ane, ona avatu lea i ai o se kopi o le polosiua, Faia o le Finagalo o le Atua, ma faailoa atu ia i latou o le suʻesuʻega mo le vaiaso o Aperila 30, o uluaʻi mataupu e lua. Faamatala i ai le pogai ua fuafua ai le faapotopotoga atoa e auai i se tauaofiaga itumalo e latalata ane lea ua fuafuaina e faia i se taimi i le lumanaʻi lata mai.
24 Fuafua e faia se asiasiga faalaeiau i o latou aiga. Ia faamautinoa ua iai ni a latou kopi o le polosiua o le Manaomia ma le tusi o Le Poto, e faamasani ai i latou i aʻoaʻoga faavae o le Tusi Paia. Afai e leʻi faia lava ni a latou suʻesuʻega, ia ofo i ai se suʻesuʻega faale-Tusi Paia. Fautua i ai ina ia latou faitauina le polosiua, Faia o le Finagalo o le Atua, o loo aumaia ai se ata manino i le auala o loo faagaoioia ai la tatou faalapotopotoga. Valaaulia e matamata i a tatou vitiō, e pei o le Our Whole Association of Brothers. Fuafua e faafeiloaʻi atu i latou i isi i le faapotopotoga. I masina o loo sau, ia fesootaʻi pea ma ē e fou; valaaulia i latou ina ia auai i sauniga pe a asiasi mai le ovasia matagaluega pe a faia foʻi sa outou fonotaga matagaluega po o se fonotaga o aso faapitoa. Ia tuu atu ia i latou avanoa uma e faaalia ai o i latou o ‘e ua saunia mo le ola e faavavau’!—Galu. 13:48.
25 Le Mea e Mafai e Toeaina Ona Fai: O le taulau o taumafaiga faateleina i le faiva i lenei masina o Aperila o le a faalagolago tele atu lava i toeaina. Afai o oe o se faisuʻesuʻega o se suʻesuʻega tautusi, fai se lisi o mea e mafai ona e faia e fesoasoani ai i tagata uma i lau suʻesuʻega tautusi i vaega ina ia faia se sao i le galuega faapitoa. Po o tofia atu i lau vaega ni tagata talavou, o ē e fou, o ē ua seāseā talaʻi, po o ē ua lē o toe talaʻi? Seʻi fesili atu ina ia iloa pe e iai ni mātua, paeonia, po o isi tagata talaʻi na taulamua i le fesoasoani muamua atu i a te i latou. Ia avatu sau lava fesoasoani e te mafaia ona fai. O se tasi tuafafine sa seāseā auai i le auaunaga i le fanua mo le lua tausaga na ia faaaluina le sili atu i le 50 itula i le faiva ia Aperila i le tausaga ua mavae. O le ā le mea na toe faamalosia ai o ia? Na ia faapea mai, o asiasiga faaleoleo mamoe faalaeiau a toeaina.
26 E tatau i toeaina ma auauna o le faiva ona felagolagomaʻi ina ia faamautinoa ua lava ia oganuu, mekasini, ma lomiga mo le masina o sosoo mai. Pe mafai ona fuafuaina nisi faatasiga faaopoopo mo le auaunaga i le fanua? Afai e mafai, ia faailoa atu lea fuafuaga faapitoa. I mea uma lava, i au tatalo totino ma i le lautele, talosaga atu mo le faamanuiaga a Ieova i le masina ua tatou faatāuaina mo le faateleina o le galuega o le Malo.—Roma 15:30, 31; 2 Tesa. 3:1.
27 Ia Aperila ua mavae i se faapotopotoga i North Carolina, na matuā faalaeiauina ai e toeaina le faateleina o le galuega i le faiva. I sauniga i vaiaso taʻitasi, na latou talosagaina ai le ʻautalaʻi ina ia manatunatu faatasi ma le tatalo pe e mafai ona tusia o latou igoa e avea o ni paeonia lagolago. I avanoa uma lava, na talanoaina ai ma le aasa e toeaina ma auauna o le faiva uma e uiga i le avea o Aperila o se masina e sili ona lelei na i lo o muamua. O le iʻuga, e 58 pasene o le ʻautalaʻi, e aofia ai toeaina ma auauna o le faiva uma na paeonia i lena masina!
28 Le Olioli i le Faia o se Sao Atoatoa: O ā faamanuiaga e maua mai i lo “tatou . . . galulue [“malolosi,” NW] ma finafinau” i le faiva? (1 Timo. 4:10, LF) E faatatau i le galuega maelega a la latou faapotopotoga ia Aperila ua mavae, na tusi mai ai toeaina o loo taʻua i luga e faapea: “Sa masani ona talanoa uso ma tuafāfine i le maʻeu o le sili atu o le alofa ma le māfana na lagona e le tasi i le isi talu ona amata faateleina la latou galuega i le faiva i le fanua.”
29 O se uso talavou e faafaigatā ona gaoioi, sa naunau e faia se sao i le galuega faapitoa ia Aperila ua mavae. Ona o fuafuaga lelei ma le fesoasoani a lona tinā, uso ma tuafāfine faaleagaga, na olioli ai o ia i se masina fuatele mai a o avea ma paeonia lagolago. O le ā sona lagona e tusa ai ma le mea na tupu? Na ia faapea mai: “O le uluaʻi taimi lea i loʻu olaga na ou lagona ai e pei lava aʻu o se tagata e atoatoa le malosi.”
30 E lē taumatea le ʻoa o faamanuiaga a Ieova ia i latou o loo matuā faatāuaina o latou faaeaga o le talanoa atu lea e faatatau i lona tulaga tautupu. (Sala. 145:11, 12) A o tatou faamanatuina le maliu o lo tatou Alii, ua tatou malamalama lava e faapea o le a sili atu ona tele faamanuiaga o le tuutoina i le Atua e oo lava i le lumanaʻi. Sa moomoo ma le naunautaʻi le aposetolo o Paulo mo le taui o le ola e faavavau. Peitaʻi, sa ia iloa e lē o se mea lenei sa na ona nofo ma faamoemoe i ai. Na ia tusi mai e faapea: “O le mea lea ou te galue ai ma finafinau e tusa ma lana lava galuega, o loo galue lava i totonu ia te au ma le mana.” (Kolo. 1:29) Na faamalosia e Ieova ia Paulo e ala ia Iesu, ina ia faataunuuina le faiva faasaoola, ma e mafai foʻi ona Ia faia lena mea mo i tatou i aso nei. Po o le a oo totino lena mea i a te oe ia Aperila o lenei tausaga?
[Pusa i le itulau 3]
O Ai e Mafai Ona E Faalaeiauina Ina ia Talaʻi Atu ia Aperila?
O lau tamaitiiti?
Se tagata suʻesuʻe o le Tusi Paia?
Se tasi ua lē o toe talaʻi pea?