Ia Paia a Outou Amio Uma
1. Aiseā e tāua ai le paia o a tatou amioga uma?
1 O le avea ai ma auauna a le Atua paia, o Ieova, e tatou te taumafai ai ia paia i a tatou amioga uma. (1 Pete. 1:15, 16) O lona uiga e tatou te taumafai e lagolago ma tausia tapulaa a Ieova i vala uma o o tatou olaga. O le a tatou maua se avanoa tāua i le tauaofiaga itumalo i le tausaga nei, e faaalia ai le paia o a tatou amio i mea tatou te fai.
2. E faapefea ona faaalia amioga lelei i nofoaga e āpi ai?
2 I le Nofoaga E te Āpi Ai: Sa faapea mai se pule o se tasi o faletalimālō sa faaaogā e sui usufono i le tausaga na teʻa nei: “O Molimau a Ieova o ni tagata lelei e nonofo i inei. . . . E matou te mananaʻo i ituaiga o tagata e pei o outou.” O le usitaia o faamanatu o loo mulimuli mai o le a fesoasoani iā i tatou e tausia ai lo tatou talaaga lelei: (1) Ia talosaga mo se nofoaga e āpi ai a o leʻi taitai le taimi. (2) Ia fesoasoani i le sauniaina o taumafataga ma feʻau i le fale. (3) Ia ofo atu e te totogia nisi o tupe faaalu a o e nofo i inā. (4) Ia fai au lava fuafuaga i le faimalaga atu ma le toe foʻi mai, mai le nofoaga o le Tauaofiaga. (5) Ia faaali fua o le agaga paia i taimi uma.—Kala. 5:22, 23.
3. E faapefea ona maofa isi i amioga a Molimau talavou?
3 O o tatou uiga lelei e mafai ona avatu ai se molimau lelei. I le tausaga na teʻa nei, sa fesili atu ma le faaaloalo se Molimau talavou i se tagata e faigaluega i le ofisa lea e toʻai taunuu atu i ai mālō, mo mea e pei o se pepa ma se peni, ona ia faafetai atu lea iā te ia. Na matuā talisapaia nei uiga e le tagata ofisa, ma faalogo atu o faapea mai: “E te lē o toe vaaia ni talavou o iai ni uiga faaaloalo faapea.” Peitaʻi, e iai ni taimi e mātauina ai le lē vaaia lelei o tamaiti o loo feʻausi, talanoa leo tetele, ma fetaufetuliaʻi solo i ala i totonu o le fale. E lē tatau ona faasaʻoloto e mātua a latou fanau e feoaʻi solo, ae tatau ona vaai lelei i latou, ina ia mautinoa o loo viia Ieova i a latou amioga.—Faata. 29:15.
4. E faapefea ona tatou faaalia le manatunatu mo isi pe a aai i faleʻaiga?
4 I Faleʻaiga: Na faamatala e se tasi o tagata e faigaluega i se faleʻaiga e i talaane o se mea na fai ai se tauaofiaga e faapea: “E matuā ese lava Molimau. E latou te faaaloalo i isi.” O amioga lelei, e aofia ai ma le taofia o le talanoa ma taliē leo tetele, lea e faalavelave ai i isi o loo taumamafa. Pe aai pe inu ia faia mea uma mo le viiga o le Atua.—1 Kori. 10:31.
5. O le ā e aofia ai i amioga lelei i nofoaga o loo fai ai tauaofiaga?
5 I Tauaofiaga: E faapitoa lava ona tatou faaalia la tatou amio lelei i le mea o loo faia ai le tauaofiaga. Faamolemole ia lagolagoina taʻitaʻiga a le ʻautautua, e lē gata i le mea e paka ai taavale, ae faapea foʻi ma le nofoaga o loo faia ai le tauaofiaga. (Epe. 13:17) E tatau ona nonofo faatasi uma aiga na i lo le faataga o ā latou fanau, e aofia ai ma talavou, e nonofo faatasi ma vaega o isi talavou. E lē tatau ona sulu atu se uaea o so o se mea puʻeleo i vaega tau eletise o le fale po o le vaega o loo fesootaʻi atu i mea faaleotele leo, ma e faatoʻā ono faaaogā pe afai e lē o faalavelave ai i isi. Afai o loo e fuafua e puʻeina ni ata, e lē tatau ona faaaogā ni mea puʻeata emo a o faagasolo le tauaofiaga. E tatau ona seti ia ualesi ma telefoni feaveaʻi ina ia lē faalavelave ai i tagata. Afai e te iloa se faalavelave faafuaseʻi ua tupu i totonu o le mea o loo faia ai le tauaofiaga, faamolemole taʻu atu i se tagata tautua, po o le Matagaluega o Fesoasoani Muamua. O le a saʻilia se fesoasoani faafomaʻi.
6. E faapefea ona viia le Atua i au amio i tauaofiaga?
6 Ua tū ese a tatou amio mai i isi ma ua viia ai lo tatou Atua. (1 Pete. 2:12) I le tauaofiaga, o le a iloaina ai i le lautele gaoioiga a Molimau a Ieova. O lea la, ia maumauaʻi ina ia paia ma lelei au amioga uma.
[Pusa i le itulau 5]
Ia Faaalia Amioga Paia
◼ Pe a āpi i fale o isi
◼ Ia vaavaai lelei tamaiti
◼ Ia manatunatu i isi