Ia Avea o se Faaaʻoaʻo i Galuega Lelei
1. Aiseā tatou te manaʻomia ai ona mataala lelei i a tatou amio i le tauaofiaga itumalo?
1 Pe a tatou auaufaatasi i se aofaʻiga toʻatele i tauaofiaga itumalo, o le a mātauina ai e i latou o loo vaavaai mai le auala tatou te amioaʻi ma feagai ai ma isi. O lea, e manaʻomia ai e i tatou taʻitoʻatasi ona uaʻi faapitoa atu i le timaʻiga a le Tusi Paia: “Ia faautauta . . . Ia avea oe ma faaaʻoaʻo o galuega lelei i mea uma lava.” (Tito 2:6, 7) Atonu e manaʻomia foʻi ni taumafaiga ina ia ‘aua neʻi vaavaai i a tatou lava mea, a ia taʻitasi ma vaavaai i mea a isi.’ (Fili. 2:4) Seʻi o tatou iloiloina la nisi o auala e mafai ona faatatauina ai lenei faalaeiauga i la tatou Tauaofiaga Itumalo o loo lumanaʻi nei “Ia Avatu i le Atua le Viiga.”
2. O le ā e ao ona tatou manatuaina pe a faia fuafuaga e api i isi tagata?
2 Fuafuaga mo Api: O le avanoa lelei lava mo i tatou e faaalia ai galuega lelei, o le taimi e faia ai fuafuaga mo mea tatou te api ai. Talu ai e mananaʻo nisi e api i uso, ia po o tauaiga foʻi, e tāua tele ai le talosagaina o api a o lava le taimi. Afai e te fia api i ou tauaiga lē talitonu, aiseā e lē valaaulia ai i latou tou te auai faatasi i le tauaofiaga? O le fuafua mamao, e lē gata e fesoasoani iā te oe, aemaise foʻi i latou o le a e api ai.
3. E mafai faapefea ona tatou faaalia le “agalelei . . . i tagata uma lava” pe a tatou api i isi?
3 E tatau ona faaalia lo tatou manatu mamafa mo isi i le auala e tatou te fesoasoani ai iā i latou o loo tatou api ai. Atonu e mafai ona e fesoasoani atu i ē o loo talimālō i le sauniunia o meataumafa ma isi galuega i le fale. Ia ofo atu e fesoasoani i tulaga tau tupe i le taimi o loo e nofo ai i inā. Ia faaalia lou lotofaafetai mo le agalelei ua faaalia. Ia faatulaga lou lava auala e te alu ma toe foʻi ane ai mai le tauaofiaga ina ia lē paʻū uma atu na mea i lē o loo talimālō. O nei auala e tatou te “agalelei . . . ai i tagata uma lava” ma avatu ai foʻi se molimau lelei i isi.—Kala. 6:10.
4, 5. E mafai faapefea e le fanau ona latou avatu le viiga iā Ieova, ma o le ā le matafaioi a mātua e ao ona fai?
4 Mātua ma Fanau: I se lalolagi o loo toʻatele ai talavou ua leai se amio pulea, ua matilatila ese ai a tatou fanau ma ua aumaia e lenei mea le viiga iā Ieova ma lana faalapotopotoga. Peitaʻi e iai taimi na tutupu ai faafitauli ona o le lē vaavaaia lelei o tamaiti. (Faata. 29:15) E lē tatau i mātua ona tuu a latou fanau e lē vaavaaia i le nofoaga o loo faia ai le tauaofiaga.
5 A o lumanaʻi le tauaofiaga, o nisi mātua ua latou iloaina le aogā o le toe talanoaina faatasi ma a latou fanau o amioga o loo manaʻomia ona latou amio aʻi. (Efe. 6:4) E latou te fesoasoani i le fanau ina ia malamalama e faapea o le alofa moni faa-Kerisiano “e lē amio matagā” pe “saʻilia e ia ana lava mea.” (1 Kori. 13:5) O le tauaofiaga itumalo o le taimi lea e aʻoaʻoina ai i tatou e Ieova, ma e mafai e fanau ma tagata matutua ona faaalia le faaaloalo i lenei faatulagaga, e ala i a latou amio e lē gata i le nofoaga o loo faia ai le tauaofiaga ae i so o se mea lava.—Isa. 54:13.
6. O le ā le aafiaga o ā tatou amio lelei i isi?
6 E tele se sao a a tatou amio lelei e faamaonia ai le sesē o manatu e fai e uiga iā i tatou ma tosina mai ai tagata i le tapuaʻiga moni. (Mata. 5:16; 1 Pete. 2:12) Tau ina ia maua e i latou o le a tatou feiloaʻi atu i ai i le tauaofiaga itumalo se molimau lelei i le auala e tatou te amio aʻi ma feagai ai ma i latou. O le faia faapea o le a ‘avea ai i tatou ma faaaʻoaʻo i galuega lelei’ ma viia ai Ieova.—Tito 2:7.
[Pusa i le itulau 5]
Ia Manatu Mamafa i Isi
▪ Ia faia fuafuaga mo api a o lava le taimi
▪ Ia fesoasoani i lē o loo talimālō i galuega i le fale
▪ Ia fesoasoani i lē o loo talimālō i tulaga tau tupe
▪ Ia vaavaai lelei lau fanau