Le Auala e Talaʻi ai i Oganuu o Pisinisi
1. O ā nisi o aogā o le molimau atu i oganuu o pisinisi?
1 Pe e te fiafia e talaʻi i oganuu e masani lava ona talileleia ai tagata e asiasi atu, ma e tele lava ina maua atu tagata i fale? E te ono mafai ona fai faapena i le oganuu a la outou faapotopotoga. E faapefea? E ala i le asiasi atu i faleoloa o loo iai. E masani lava ona maua ni iʻuga lelei e tagata talaʻi e molimau atu mai lea faleoloa i lea faleoloa.
2. E faapefea ona faamaopoopo le galuega o le molimau atu i oganuu o pisinisi?
2 I nisi o faapotopotoga e iai ni oganuu o pisinisi i la latou oganuu tofia. O le uso e vaaia oganuu a le faapotopotoga, e tatau ona saunia ni pepa faapitoa o faafanua mo oganuu nei o loo putuputu ai pisinisi. O so o se faafanua o loo nofoia e tagata ae o loo iai ma se vaega o le oganuu o pisinisi i lenā faafanua, e tatau ona faamanino faapea, e lē tatau ona galueaʻiina le vaega o loo iai pisinisi. I isi oganuu, e mafai lava ona galueaʻiina faatasi oganuu o pisinisi faatasi ma le oganuu masani. Afai e tou te leʻi faia muamua le galuega o le molimau atu i oganuu o pisinisi, ia amata i ni nai tamaʻi faleoloa.
3. O le ā e fesoasoani iā i tatou ina ia uigā ai la tatou molimau atu mai lea faleoloa i lea faleoloa?
3 Faaaogā se Faafeiloaʻiga Faigofie: Pe a molimau atu mai lea faleoloa i lea faleoloa, e tāua tele le laʻei e pei ona e laʻei ai i sauniga i le Maota o le Malo. E lelei foʻi ona filifili lelei se taimi e lē pisi ai le faleoloa. Afai e mafai, ia alu atu i ai i le taimi e lē o iai ni tagata faatau. Fesili mo le pule po o le tagata o loo vaaia le faleoloa. Ia faapuupuu ma tuusaʻo lau mataupu. O le ā e te ono fai atu ai?
4-6. O le ā la tatou tala e fai atu pe a molimau atu i se faatau oloa po o le pule?
4 Pe a talanoa atu i se faatau oloa po o le pule, e te ono fai atu se faamatalaga faapenei: “E matou te malamalama i le pisi tele o le ʻaufaipisinisi, ma e seāseā lava matou maua i latou i o latou fale, o le ala lea ua matou asiasi mai ai i le mea o loo e faigaluega ai. O loo aumaia i a matou mekasini se vaaiga i mea o loo tutupu i le lalolagi i le taimi nei.” Ona faamatilatila lea o se manatu se tasi mai i se mekasini.
5 Ia po o lou faataʻitaʻia foʻi o le faataʻitaʻiga faigofie lenei: “E toʻatele tagata o loo latou fia iloa atili le Tusi Paia ae e lē lava lo latou taimi. O loo faamatalaina i le sāvali lenei se polokalame e suʻesuʻeina ai le Tusi Paia e aunoa ma se totogi, e fesoasoani iā te oe ina ia maua ai ni tali i au fesili faale-Tusi Paia.” Ona faasino lea i ai o le itulau e 4-5 o le sāvali Pe E te Manaʻo e Fia Iloa Atili e Faatatau i le Tusi Paia?
6 Afai e foliga mai o loo pisi le pule, e mafai ona e ofo na o le sāvali ma faapea atu: “Ou te toe afe mai i se taimi e te lē o pisi tele ai. Ou te fia iloa po o le ā sou manatu i lenei sāvali.”
7. E faapefea ona tatou atiina aʻe le fiafia o tagata ua maua i oganuu o pisinisi?
7 Atiina Aʻe le Fiafia ua Faaalia: E te ono mafai ona fai se suʻesuʻega faale-Tusi Paia i se oganuu o pisinisi. Sa auina atu e lē aunoa e se paeonia faapito ni mekasini i se tamāloa faipisinisi. Ina ua faaalia e le tamāloa le fiafia i mea na ia faitauina, ona faataʻitaʻi lea i ai e le paeonia o le faatulagaga o le suʻesuʻeina o le Tusi Paia, i le faaaogāina o le polosiua o le Manaomia. Sa amataina ai i inā le suʻesuʻega i le mea lava o loo faigaluega ai le tamāloa. O le amanaʻiaina e le paeonia o tulaga o loo iai le tamāloa, na ia faapuupuu ai le talanoaga i le 10 i le 15 minute i taimi uma e asiasi atu ai. Tau ina ia tatou faia foʻi faapena i le faaauau ona saʻilia o i latou ua tatau i ai, e ala i le molimau atu i oganuu o pisinisi.