Ia Faaalia le Naunau Moni i Isi—E Ala i le Fetuutuunaʻi

¹ Na faataatia e le aposetolo o Paulo se faataʻitaʻiga lelei i le fetuutuunaʻi pea lava pea o lana taulimaga o le tala lelei e fua i talaaga, ma le auala e mafaufau ai tagata na ia talanoa atu i ai. (1 Kori. 9:19-23) E ao ona tatou taumafai e fai le mea lava lenā e tasi. O le fuafua lelei, e masani lava ona mafai ai ona tatou fetuunaʻia taulimaga faataʻitaʻi ia e i La Tatou Faiva o le Malo ina ia faafetaui atu i manaʻoga o tagata i la tatou oganuu. Pe a tatou oo atu i se fale, e tatou te ono mātauina ni faailoilo po o ni mea e mātaulia ai mea e fiafia i ai le tagata o le aiga, ma faaaofia na mea i la tatou taulimaga. Ae, e iai le isi auala e tatou te fetuutuunaʻi ai i le faiva.

² Fetuunaʻi la Tatou Taulimaga e Fua i Mea o Fai Mai ai le Tagata: Pe a tauaaoina atu le tala lelei, e masani lava ona tatou faatū se fesili ma tuu atu i tagata o aiga e fai mai ni o latou manatu. E faapefea ona e manatu iā latou tali mai? Po o le a na ona e faafetai atu i ona manatu ma faaauau i lau taulimaga lea na sauniuni? Po o atagia atu i lau talanoa o loo e amanaʻiaina manatu o tagata o aiga? Afai e te faaalia le naunau moni i mea o loo fai mai ai isi, e te ono faaaogā la fesili faaopoopo e fai ma le atamai, ina ia iloa po o le ā moni lava le mea o loo i le mafaufau o le tagata. (Faata. 20:5) O le faia faapea, e mafai ai ona e taulaʻi atu i vala o le feʻau o le Malo lea e talanoaina ai mea o loo manatu mamafa i ai le tagata.

³ O lona uiga e manaʻomia ai lo tatou nofosauni e talanoa i isi mataupu na i lo mataupu ia na tatou fuafua e talanoa i ai. Afai e tatou te amata ona talanoa i se faafitauli o loo aumaia i tala fou, ae o loo taʻua e le tagata o le aiga se mea o loo tupu i lona siʻomaga po o se mataupu o loo manatu mamafa i ai, o lo tatou faaalia la o le naunau moni i mea o loo naunau i ai le tagata o le aiga, o le a uunaʻia ai i tatou e taulaʻi atu la tatou talanoaga faale-Tusi Paia i mea o loo tāua tele iā te ia.—Fili. 2:4.

⁴ Ia Fetuutuunaʻi la Tatou Taulimaga: Pe a laga mai se fesili e le tagata o le aiga, atonu la e sili atu ona tuu le talanoaga e faaauau i se taimi mulimuli ane, pe a uma ona e saʻilia manatu faaopoopo e faatatau i le mataupu. E mafai foʻi ona tatou ofoina atu lomiga e maua ai manatu lelei e faatatau i le mataupu. O nei mea uma e atagia mai ai lo tatou naunau moni e fesoasoani atu i isi ina ia iloa Ieova.—2 Kori. 2:17.