Ia Faaalia le Naunau Moni i Isi—E Ala i le Faia o Fesili ma Faalogo Lelei
1 E toʻatele tagata e fiafia e faaali o latou manatu ae e lē mananaʻo e faatonu pe fesiligia i latou. O lea la, i le avea ai o ni faifeʻau Kerisiano, e manaʻomia ona tatou aʻoaʻoina le tomai e faaaogā fesili e faaali mai ai manatu o loo i tagata.—Faata. 20:5.
2 E tatau i a tatou fesili ona uunaʻia ai le tagata e mafaufau, ae lē o le lē mautonu ai o le tagata. Pe a talaʻi mai lea fale i lea fale, e fesili atu se tasi uso faapea, “Pe e te lagona o le a iai se taimi e feutagaʻi ai le tasi tagata i le isi i se auala āva ma faaaloalo?” E faalagolago i le tali mai a le tagata, ae e toe sosoo atu lana faamatalaga e faapea: “O le ā sou taofi, e faapefea ona faataunuuina lenei tulaga?” ia pe faapea atu foʻi “Aiseā ua e manatu ai faapena?” Pe a molimau atu lē fuafuaina ia pe molimau atu foʻi i nofoaga faitele, e fesili atu se isi uso iā i latou e fai fanau: “O le ā le mea e sili ona e fiafia ai i le avea ma mātua?” Ona sosoo lea ma lona toe fesili atu: “O ā mea e sili ona e popole i ai?” Mātau mai o fesili nei e mafai ona faaali mai ai manatu o tagata e aunoa ma le tuuina o i latou i se tulaga e faamāina ai. Ona e eseese lava tulaga, e tatou te ono manaʻomia la ona fetuunaʻi le mataupu ma le auala e fai ai a tatou fesili ina ia fetaui ma i latou i le oganuu.
3 Taumafai e Faatalanoa le Tagata: Afai e mananaʻo tagata e taʻu atu iā te oe o latou manatu, ia faalogo ma le onosai e aunoa ma le faasalavei atu. (Iako. 1:19) Ia faamālō atu ma le agalelei i o latou manatu faaalia. (Kolo. 4:6) Atonu ua lava le faapea atu: “Manaia lou manatu. Faafetai tele lava mo le taʻuina mai o lenā faamatalaga.” Ia faamālō atu iā i latou pe a mafai moni ona e faia faapea. Ia fai atu ma le agalelei fesili faaopoopo ina ia iloa ai mea o latou mafaufau i ai, ma le māfuaaga ua latou manatu ai faapena. Vaai mea e tou te ioe faatasi i ai. Pe afai e te manaʻo e tataʻi le tagata i se mau, e te ono faapea atu: “Pe sa e tomānatu ea o se mea lea e ono tupu?” Ia ʻalofia le maumaututū i ou manatu po o le faia o ni finauga.—2 Timo. 2:24, 25.
4 O le auala e tali mai ai isi i a tatou fesili e ono faalagolago tele lava i le auala e tatou te faalogo atu ai. E iloa lelei lava e tagata po o tatou faalogo moni atu. Na mātauina e se ovasia femalagaaʻi e faapea, “Pe a e faaalia le loto malie e faalogo atu ma le onosai i tagata, e iai se aafiaga malosi e tosina mai ai le tagata, ma o se faailoaga o lou naunau atu ma le māfana i le tagata.” Ia faalogo atu ma le āva i tagata, lea e ono uunaʻia ai i latou e faalogo mai i le tala lelei lea tatou te tufaina atu.—Roma 12:10.