Ia Taʻutaʻu Atu Galuega Lelei a Ieova
1. O le ā se mea e uunaʻia ai i tatou e taʻutaʻu atu galuega lelei a Ieova?
1 “Ieova e, e ou le silisili ese, ma le malosi, ma le matagofie, ma le mamalu, ma le malualii; auā o iā te oe mea uma o i le lagi ma le lalolagi.” (1 No. 29:11) E faapefea i lo tatou alofa ma le talisapaia o Ieova ona aafia ai i tatou? E uunaʻia ai i tatou e ‘taʻutaʻu atu ana galuega lelei—o lē na valaau iā te i tatou nai le pōuliuli e oo i lona lava malamalama e matuā ofo ai.’ (1 Pete. 2:9) E lē mafai ona tatou taofia le taʻu atu i isi e uiga i lo tatou Atua sili! O le a tatou maua avanoa mataʻina e taʻutaʻu atu ai galuega lelei a Ieova i masina o Mati, Aperila, ma Me.
2. O le ā le tauiviga faapitoa lea ua fuafua e faailoa atu ai le Faamanatuga, ma o ai e ono faia ai se sao?
2 Tauiviga Faapitoa e Faailoa Atu le Faamanatuga: I le Aso Gafua, o Aperila 2, o le a tatou faamatilatila ai galuega lelei a Ieova i le faamanatuina o le Talisuaga Afiafi a le Alii. O le a tufaina atu se valaaulia faapitoa o lenei aso tāua i le lalolagi aoao, mai iā Mati 17 iā Aperila 2. E faalaeiauina tagata uma ina ia faia se sao. O se taimi sili ona lelei lenei mo ē fou e amata faalauiloa atu ai le tala lelei pe afai ua agavaa. Pe afai ua ono agavaa au tagata aʻoga o le Tusi Paia po o le fanau, ia talanoa atu i toeaina.
3. O le ā sa tatou tala e fai atu e valaaulia ai tagata i le Faamanatuga?
3 E taitutusa lenei tauiviga i le tauiviga lea na faia e fesootaʻi atu i Tauaofiaga Itumalo, “Ua i Faitotoʻa le Faaolataga!” O le a lava tusi valaaulia e auina atu i faapotopotoga ina ia tofu ai le tagata talaʻi ma tusi e 50, ae mafai ona tofu le paeonia ma tusi e 150. Ia faapuupuu lau taulimaga, atonu i le faapea atu: “O lau tusi valaaulia lea i se mea e sili ona tāua lea e faia i tausaga taʻitasi. E valaaulia ma le māfana lau susuga ina ia auai. O loo iai faamatalaga uma i le tusi valaaulia.” Pe a iai ni fesili a lē ona le fale, ia faaalu se taimi e tali ai. O le a fesoasoani le faaopoopoga i le Talisuaga a le Alii i le itulau e 206 o le tusi o Aʻoaʻoga a le Tusi Paia i lenei tulaga. I faaiʻuga o vaiaso, o le a tatou ofo ai mekasini o loo ofo o le masina faatasi ai ma le tusi valaaulia faapitoa. Ia tulitatao so o se tagata fiafia na maua, ma ia fai se fuafuaga e toe foʻi e asi.
4. O le a faapefea ona tufaina atu le tusi valaaulia faapitoa o le Faamanatuga?
4 E ao ona tauaao patino atu lenei tusi valaaulia faapitoa i tagata taʻitoʻatasi o le aiga po o fea lava e talafeagai ai. O lea la, ia tusi i lalo fale e lē o maua atu i ai nisi, ona fuafua lea e toe asia i se isi taimi. Ae mo faapotopotoga e feoloolo le tele o a latou tusi valaaulia e totoe, e mafai ona latou tuu pea se tusi i fale e lē maua atu i ai nisi. Peitaʻi e lē vave faatinoina lenā fuafuaga, seʻiloga e oo i le vaiaso mulimuli lea e sosoo ma le vaiaso o le Faamanatuga. Ia faamautinoa foʻi ua maua e au toe asiga, tagata aʻoga o le Tusi Paia, tauaiga, o ē e faigaluega faatasi, tuaoi, ma isi e masani ai se tusi valaaulia.
5. Aiseā e ao ai ona tatou amata fuafua nei loa e paeonia lagolago?
5 Paeonia Lagolago: Pe mafai ona e taʻutaʻu atu galuega lelei a Ieova i se tulaga e sili atu, i le paeonia lagolago iā Mati, Aperila, ma Me? O le faia faapea e ono manaʻomia ai ni fetuunaʻiga i lau faasologa i aso taʻitasi. (Efe. 5:15-17) Ia e mautinoa, o le faia o se taumafaiga e faatele mea e fai i le auaunaga iā Ieova, o le a maua ai le olioli ma ana faamanuiaga. (Faata. 10:22) Talu ai o lea ua lalata mai le taimi o le Faamanatuga, o le taimi la lenei e amata fai ai ni fuafuaga.—Faata. 21:5.
6. O le ā se mea e tatou te aʻoaʻoina mai i le tuafafine matua e 90 tausaga, lea na paeonia lagolago i le tausaga ua teʻa?
6 Na olioli se tuafafine matua e 90 tausaga i le faaeaga e paeonia lagolago ai i le tausaga ua teʻa. Na ia taʻua: “E ui e ese loʻu fiafia e fai togalaau ma manaʻo e amata totō laau, ae na ou iloa e manaʻomia ona faatulaga mea e ao ona ou faamuamua. O le iai o se faanaunauga e faamuamua manaʻoga o le Malo, na ou filifili ai e paeonia lagolago iā Mati.” Pe sa faamanuiaina o ia mo ana taumafaiga? O lana tala lenei: “Ua ou lagona le vavalalata i le faapotopotoga, ma ua ou atili tosina ai foʻi iā Ieova.” Pe mafai ona iloilo mea o tatou faamuamua ma faia ni fetuunaʻiga e pei ona manaʻomia?
7. Pe faigatā ona galue o se paeonia lagolago?
7 E lē faigatā le ausia o itula manaʻomia e 50 o le paeonia lagolago e pei ona e ono manatu i ai. Ia tatalo faatauanau ma iloilo au gaoioiga i aso taʻitasi, fai se faasologa, ma faaaofia i au gaoioiga e fesootaʻi i le Malo. E sili atu ona e silafia lelei tulaga uma e faatatau iā te oe lava ia. Afai e lē lelei lou soifua mālōlōina ma lē lava le malosi, atonu e mafai ona e auai i le faiva mo ni nai itula i aso taʻitasi. Afai e te faigaluega pe aʻoga foʻi, e ono mafai ona e paeonia lagolago i le auai i le talaʻiga i afiafi po o faaiʻuga o vaiaso.
8. O le ā sa mafai ai ona paeonia lagolago se ulugalii?
8 E toʻatele ua mafai ona paeonia lagolago o se aiga. I tausaga ua mavae, sa faatalatū se ulugalii e talosaga ona sa la lagona e lē mafai i lo la tulaga ona paeonia lagolago. O le ā se mea na la faia? “Na ma tatalo iā Ieova e fesoasoani mai ina ia taulau le mea ua leva ona ma mananaʻo e fai faatasi.” O le fuafua lelei, na mafai ai ona ausia lo la sini. Na la faaopoopo mai: “E ese le manaia. Na ma olioli faatasi i le tele o faamanuiaga. O la ma fautuaga, ia avea nei oe ma paeonia. Afai sa ma mafaia, e ono mafai foʻi ona e faia faapea.”
9. O le ā se mea e te ono faia i le taimi o la outou suʻesuʻega faaleaiga o sosoo mai, e sauniuni ai mo galuega i masina faapitoa o lumanaʻi nei?
9 E mafai ona faataatia ese se taimi i la outou suʻesuʻega faaleaiga o sosoo mai, ina ia iloilo le auala e mafai ai e tagata uma ona faateleina a latou galuega i masina o lumanaʻi nei. E tusa pe lē mafai e le tou aiga atoa ona paeonia lagolago, e ono mafai ona paeonia se tagata se toʻatasi, faatasi ai ma le fesoasoani ma le galulue soosootauʻau mai a isi sui o le aiga. Afai e lē mafai, e ono mafai e lou aiga ona faatutū ni sini e faatele atu le taimi i le talaʻiga, a o faagasolo galuega o nei masina faapitoa.
10. Aiseā e ao ai ona talanoa i isi e faatatau i lo tatou faanaunauga e paeonia lagolago i lenei vaitau o le Faamanatuga?
10 Ia Fesoasoani le Tasi i le Isi: O le maelega e mafai ona taaʻina ai isi. Ia talanoa atu e faatatau i lou faanaunauga e paeonia lagolago. E ono faalaeiauina ai isi e talosaga e paeonia. E ono avatu ai foʻi iā te oe e i latou sa paeonia i le taimi ua teʻa ni fautuaga, e fesoasoani e faatulaga ai au meafai ma lau faasologa ina ia ausia lou sini. (Faata. 15:22) Afai e mafai ona e paeonia lagolago, aiseā e lē valaaulia ai se isi tagata talaʻi, atonu o se tasi e tutusa lua tulaga e lua te auai faatasi i lenei galuega e faafiafiaina ai?
11. E faapefea ona ati aʻe e toeaina le maelega e paeonia lagolago ai i masina o lumanaʻi nei?
11 Ua faia e le toʻatele o toeaina ni faatulagaga talafeagai ina ia auai i lenei auaunaga faapitoa. (Epe. 13:7) E matuā faalaeiauina ai le faapotopotoga! Ua ati aʻe foʻi e toeaina le maelega e ala i a latou talanoaga ma isi. Atonu e na o ni nai upu faalaeiau po o ni fautuaga aogā, o loo manaʻomia e uunaʻia ai nisi e avea ma paeonia lagolago. E ono faatulaga e le ovasia o le auaunaga nisi faatasiga mo le auaunaga i le fanua, ina ia mafai ai e tagata uma ona auai i le talaʻiga faatasi ma le vaega, e tusa lava pe seʻi mānava mai galuega pe tuua foʻi le aʻoga. E ao ona faasilasila atu e lē aunoa nei fuafuaga. O le a ia faamautinoa foʻi ua lava oganuu ma lomiga mo tagata uma.
12. O le ā se mea e ono mafai ona e faia, pe afai e lē mafai ona paeonia lagolago?
12 E tusa pe lē mafai ona e paeonia lagolago ona o lou tulaga, ae e mafai ona e ofo atu ni faalaeiauga i ē o loo paeonia ma tatalo mo i latou. (Faata. 25:11; Kolo. 4:12) Atonu e mafai ona e faia ni fuafuaga e galulue faatasi ma i latou i le talaʻiga i se isi aso o le vaiaso, pe galue umi foʻi i se aso na i lo le umi lea e te masani ai.
13. O le ā le sini ua faatū mo Samoa ma Amerika Samoa, ma e faapefea ona lagolagosua la outou faapotopotoga i le ausiaina o lenā sini?
13 Le Sini ia 100 ni Paeonia Lagolago iā Aperila: E 67 le tumutumuga o paeonia lagolago mo le ofisa i Samoa i le tausaga faaleauaunaga ua faatoʻā mavae atu. O le sini talafeagai la mo lenei masina o Aperila, ia 100 ni paeonia lagolago. E mafai ona tatou ausia lenei sini pe afai o se faatatauga e na o le tasi mai le ono tagata talaʻi o faapotopotoga taʻitasi, e auai i le paeonia lagolago. Ioe, o isi faapotopotoga o le a iai nisi tagata talaʻi e sili atu, o ē e mafai e o latou tulaga ona paeonia lagolago. E faigofie ona ausia e le tele o faapotopotoga lenei sini. Seʻi tomānatu i le fiafia o le a iai i la outou faapotopotoga, ma le aafiaga lelei o le a iai i le galuega talaʻi i la outou oganuu!
14. Aiseā ua sili ai ona lelei le masina o Aperila e paeonia lagolago ai?
14 Aiseā o se masina sili ona lelei ai Aperila e paeonia lagolago ai? O le a faia le Faamanatuga i le amataga o le masina, lea e tatou te maua ai avanoa e tele e toe foʻi ai e asia ē na auai. O le a tatou ofoina mekasini, faatasi ma le fuafuaga e tuu le tusi o Aʻoaʻoga a le Tusi Paia i toe asiga, ma amata ai ni suʻesuʻega faale-Tusi Paia. O le paeonia lagolago la iā Aperila, o le a maua ai le tele o avanoa e amata ai suʻesuʻega faale-Tusi Paia. E lima Aso Sa o le masina o Aperila ma e iai se aso mālōlō a le lalolagi, lea e faigofie ai mo ē e faigaluega ma aʻoʻoga ona paeonia.
15. Aiseā e ao ai ona iai so tatou manaʻoga ia faanatinati a o taulata mai lenei vaitau o le Faamanatuga?
15 A o mavae atu vaitau taʻitasi o le Faamanatuga, o lo tatou matuā latalata atu foʻi lea i le iʻuga o meafai a lenei lalolagi. Ua utiuti le taimi o totoe e taʻu atu ai i isi mea e uiga i lo tatou Atua sili. (1 Kori. 7:29) Pe a uma atu lenei vaitau o le Faamanatuga, o le a mou atu e faavavau avanoa tāua na maua e vivii ai i lo tatou Tamā i le lagi. Tau ina ia tatou faia ni sauniuniga i le taimi nei e faia le mea e sili tatou te mafaia iā Mati, Aperila, ma Me e taʻutaʻu atu ai galuega lelei a Ieova!
[Pusa i le itulau 4]
Pe Maua ni a Tatou Paeonia Lagolago e 100 iā Aperila?
◼ Iloilo mea o e faamuamua
◼ Talanoa o se aiga i sini
◼ Talanoa i isi e uiga i au fuafuaga