Tatou te Fiafia e Faamalolosi i le Auaunaga iā Ieova!

¹ Sa fiafia le aposetolo o Paulo e “faaumatia” pe faaaogā atoatoa lona ola e faataunuu ai lana faiva faa-Kerisiano. (2 Kori. 12:15) E faapena foʻi i aso nei, e toʻatele Kerisiano o loo galulue maelega o ni paeonia. O isi e ui ina tele o latou tiute tauave i aiga, ae ua faaavanoa pea se taimi e auai i le galuega talaʻi i vaiaso taʻitasi. E iai nisi e matuā faalētonu le malosi faaletino, ae taumafai pea i le mea e mafai e faalauiloa le Malo. Maʻeu se faalaeiau o le vaai atu i tagata o Ieova, po o le ā lava lo latou matutua ma tulaga eseese o iai, ae o loo latou faamalolosi pea i le auaunaga iā te Ia!

² Alofa i Tuaoi: O le faia o mea uma tatou te mafai e auauna ai iā Ieova, le faatinoina o le alofa i le Atua ma tuaoi, e tatou te maua ai se lotofuatiaifo mamā. Talu ai sa foaʻi e Paulo lona ola e talaʻia ai le tala lelei, ua mafai ai ona ia faapea mai: “Ou te taʻutino atu ai iā te outou i lenei lava aso, ou te mamā aʻu i le toto o tagata uma.” (Galu. 20:24, 26; 1 Tesa. 2:8) O le faia o so tatou sao i le faiva i le tele e tusa ai ma o tatou tulaga, o le a mamā ai i tatou mai le nofosala i le toto.—Eseki. 3:18-21.

³ Tatou te fiafia pe a faaaogā o tatou ola atoa e fesoasoani i isi. (Galu. 20:35) Na faapea mai se tasi uso: “Pe a oo i le afiafi ua ou toe foʻi i le fale ua uma se aso i le auaunaga, o le mea moni ou te lagona le lē lavā. Peitaʻi ou te fiafia, ma ou te faafetai iā Ieova i lona foaʻi mai iā te aʻu o se olioli e lē mafai ona aveesea e se tasi.”

⁴ Alofa i le Atua: O le māfuaaga sili ona tāua e faaaogā ai o tatou ola atoa i le auaunaga iā Ieova, auā e faamalieina ai lo tatou Tamā i le lagi. O le alofa i le Atua, e uunaʻia ai i tatou e tausi ana poloaʻiga, e aofia ai le talaʻi ma le faia o isi ma soo. (1 Ioa. 5:3) E tusa pe faalēano pe tetee mai foʻi tagata, ae tatou te olioli pea e galulue mamafa mo Ieova.

⁵ E lē o se taimi lenei e faavaivai ai. Ua tatou ola i le vaitau o le seleselega. (Mata. 9:37) E masani i se faifaatoʻaga, e oo loa i le taimi o le seleselega ona galue umi lea i lona fanua, ona e manaʻomia ona vave le aoaoina o fua o le faatoʻaga a o leʻi amata ona pala. E faapena foʻi ona utiuti le taimi o loo faagasolo ai le seleselega faaleagaga. O lea, seʻi tatou taumafai uma e maelega i la tatou faiva, a o teu i o tatou mafaufau le vaitau lenei ua tatou ola ai.—Luka 13:24; 1 Kori. 7:29-31.