Faautauta ae Maumauaʻi

O LE faautauta, o le tomai lea e feagai ai ma isi tagata e aunoa ma se faatigā lē manaʻomia. E aofia ai le iloa o le auala ma le taimi e fai atu ai se faamatalaga. E lē o lona uiga ia faagutugutulua i le mea ua saʻo po o le faasesēina o mea moni. E lē tatau i le faautauta ona fenuminumiaʻi ma le mataʻu i tagata.—Faata. 29:25.

Ua saunia e fua o le agaga le faavae e sili ona lelei mo le faautauta. O lea, o se tagata ua uunaʻia e le alofa, e lē manaʻo e faatigā i isi; e manaʻo e fesoasoani iā i latou. O se tasi e agalelei ma agamalu e faatoʻatoʻa o ia i lona ala. O le tagata e filemu e na te saʻilia auala e maua ai ni faiā lelei ma isi. E tusa lava pe ʻinaʻinā uiga o tagata, ae o se tagata e onosai e toʻafilemu.—Kala. 5:22, 23.

E tusa lava po o le ā le auala e taulima ai le feʻau o le Tusi Paia, peitaʻi o le a tetee i ai nisi o tagata. Ona o le leaga o loto o le toʻatele o tagata Iutaia i le uluaʻi senituri, na avea ai Iesu o se “maa e tausuai ai, ma papa e tautevateva ai” iā i latou. (1 Pete. 2:7, 8) I le fesootaʻi ma lana galuega o le folafolaina o le Malo, na fetalai ai Iesu e faapea: “Ua ou sau e lafo le afi i le lalolagi.” (Luka 12:49) Ma o le feʻau o le Malo o Ieova, lea e aofia ai le manaʻoga mo tagata ina ia amanaʻia le pule silisili ese a Lē na Foafoaina i latou, ua avea pea o se finauga faanatinati o loo feagai ma tagata. E toʻatele tagata e tetee i le feʻau e faapea, ua toeitiiti ona aveesea lea e le Malo o le Atua le faiga amioleaga o mea o loo iai nei. E ui i lea, o le usiusitai i le Atua, ua faaauau ai ona tatou talaʻi. Peitaʻi, a o faia faapea, ua tatou manatua ai le fautuaga a le Tusi Paia: “Afai e mafai ia te outou, ia outou nofo lelei ma tagata uma lava.”—Roma 12:18.

Ia Faautauta Pe a Molimau Atu. E tele tulaga e mafai ona tatou talanoa atu ai i isi e uiga i lo tatou faatuatua. O le mea moni, ua masani ona tatou faia faapena i le faiva i le fanua, ae ua tatou saʻilia foʻi avanoa talafeagai pe a aufaatasi ma tauaiga, aumea faigaluega, ma aumea i aʻoga. I nei tulaga uma, e manaʻomia ai le faautauta.

Afai tatou te taulimaina le feʻau o le Malo i se auala e lagona ai e tagata faapea o loo tatou aʻoaʻia i latou, atonu o le a latou teenaina. Pe afai latou te leʻi talosaga mo se fesoasoani ma e lē o manatu o loo manaʻomia, atonu o le a latou tetee ai i so o se manatu e faapea o loo latou manaʻomia se faasaʻoga. E mafai faapefea ona tatou ʻalofia le avatu o se manatu sesē? O le aʻoaʻoina o le tomai o talanoaga faaleuō e mafai ona fesoasoani.

Ia taumafai e amata le talanoaga i le faatū atu o se mataupu e naunau i ai le isi tagata. Afai o lenā tagata o se tauaiga, o se aumea faigaluega, po o se aumea i le aʻoga, atonu la o lenā ua e iloa mea o loo ia naunau i ai. E tusa foʻi pe e te leʻi feiloaʻi muamua i le tagata, atonu e te faatū atu se mea sa e faalogo i ai i tala fou pe faitau i ai i le nusipepa. O na mataupu e masani ona faaatagia atu ai mea o loo i finagalo o le toʻatele o tagata. Pe afai e te galue mai lea fale i lea fale, ia mātau le tulaga o mea. O mea o teuteu ai se fale, o meataalo o loo taatitia i tafatafa o le fale, o mea e faaaogā i tapuaʻiga faalelotu, ma igoa e faapipii i le pito i tua o se taavale o loo tū i le auala taavale, atonu e faailoa atili mai ai mea o loo naunau i ai le tagata o le aiga. A lua feiloaʻi ma le tagata o le aiga, ia faalogologo a o talanoa mai o ia. O mea o le a ia taʻu mai e mafai ona faamautinoa pe faasaʻo ai au faaiʻuga e uiga i mea o loo ia naunau ma manatu i ai, ma o le a faailoa atili mai ai foʻi mea o loo manaʻomia ona e iloiloina ina ia avatu ai se molimau.

A o faalautele le talanoaga, fetufaaʻi i manatu mai le Tusi Paia ma lomiga e faavae i le Tusi Paia o loo fesootaʻi i le mataupu. Ae aua e te faoina uma le talanoaga. (Fai. 3:7) Ia faaaofia le tagata o le aiga i le talanoaga pe afai e lotomalie ina ia auai. Ia naunau i ona manatu ma taofi. Atonu o le a saunia ai le avanoa o loo e manaʻomia ina ia faautauta.

A o e leʻi taʻuina atu ni mea, ia iloilo pe faapeʻī i le faalogo a le isi tagata. Ua taʻuleleia e le Faataoto 12:8 (NW) se “fofoga e faautauta.” O le faaupuga Eperu sa faaaogā i inei e fesootaʻi atu i manatu e pei o le malamalama ma le faautaga mamao. O lea, o le faautauta e aofia ai le faaeteete i le tautala ona o le manatunatu muamua i se mataupu ina ia gaoioi ai ma le atamai. Ua lapataʻi mai le fuaiupu e 18 o le mataupu lava lenā o le Faataoto, e uiga i le “soona tautala, e pei o tutuʻi i le pelu.” E mafai lava ona tausisi i le upu moni o le Tusi Paia e aunoa ma le faatigā.

O le faaalia o le utaga poto i upu e te filifilia, atonu o le a fesoasoani lea iā te oe ina ia ʻalofia ai le faapogaia o se mea e fai ma papupuni i la oulua va. Afai e lē fiafia se tasi ona ua taʻua o le “Tusi Paia,” atonu e mafai ona e faaaogā se faaupuga e pei o “tusitusiga paia” po o “se tusi ua lomia nei e sili atu i le 2,000 gagana.” Afai e te lē o faasino i le Tusi Paia, e mafai ona e fesili atu i le tagata e uiga i sona taofi e faatatau i ai, ona manatunatu lea i ana faamatalaga i le vaega o totoe o la oulua talanoaga.

O le faautauta, e masani ona aofia ai le filifilia o le taimi saʻo e tautala atu ai. (Faata. 15:23) Atonu e te lē ioe i mea uma o loo fai mai ai le isi tagata, ae e lē manaʻomia ona e finau i manatu uma e lē faale-Tusi Paia ua ia taʻu mai. Aua le taumafai e taʻu atu i le tagata o le aiga mea uma i le taimi e tasi. Na fetalai Iesu i lona ʻausoo e faapea: “Ua totoe ia te au mea e tele e fai atu ai ia te outou, a e tou te le mafaia ona talia i nei ona po.”—Ioa. 16:12.

A mafai, ia faamālō ma le faamaoni iā i latou o ē e te talanoa atu i ai. E tusa lava pe finauvale le tagata o le aiga, e mafai ona e faamālō atu iā te ia ona o se manatu sa faaalia. Na faia e le aposetolo o Paulo lenei mea ina ua tautala atu i le ʻaufaifilosofia i Areopako i Atenai. Sa “finafinau” ane iā te ia le ʻaufaifilosofia. Na mafai faapefea ona faatū atu lona manatu e aunoa ma le faatigā? Muamua atu, sa ia mātauina ai le tele o fata faitaulaga sa latou faia mo o latou atua. Na i lo le taʻusalaina o tagata Atenai ona o a latou tapuaʻiga ifo i tupua, sa ia faamālō atu ma le faautauta iā i latou mo lo latou manatu mamafa i mea tau lotu. Sa ia faapea atu: “Ua ou iloa i mea uma lava ua sili la outou tapuai i atua.” O lenei faiga na ia maua ai le avanoa e taulima ai le feʻau e faatatau i le Atua moni. O le iʻuga, na avea ai nisi ma ē talitonu.—Galu. 17:18, 22, 34.

Aua le soona mateletele pe a tulaʻi mai teteega. Ia toʻafilemu. Ia vaai i na mea o ni avanoa e malamalama ai i mafaufauga o le tagata. E mafai ona e faafetai atu iā te ia mo ona manatu faaalia. Ae ā pe a faafuaseʻi ona ia faapea mai: “E iai laʻu lava lotu”? Atonu e te fesili atu i ai ma le faautauta: “Pe na avea oe ma tagata lotu i lou soifuaga atoa?” Mulimuli ane, pe a māeʻa ona ia tali mai, ia faaopoopo atu: “Pe e te taumanatu ea o le a iai se taimi e autasia ai tagata i se lotu e tasi?” Atonu o le a maua ai i inā se avanoa mo se talanoaga atili.

O le iai o se vaaiga saʻo iā i tatou lava, e mafai ona fesoasoani ai iā i tatou ina ia faautauta. E tatou te talitonu ma le mautinoa i le saʻo o ala o Ieova ma le moni o lana afioga. E tatou te tautala atu ma le maumauaʻi e uiga i nei mea. Ae e leai se māfuaaga e ao ai ona tatou fiaamiotonu naʻuā. (Fai. 7:15, 16) E tatou te lotofaafetai ona ua tatou iloa le upu moni ma olioli i faamanuiaga a Ieova, ae ua tatou iloa lelei o lo tatou mauaina o lana faamaoniga, o le iʻuga lea o lona alofa agalelei ma lo tatou faatuatua iā Keriso, ae lē o se iʻuga o la tatou lava amiotonu. (Efe. 2:8, 9) Ua tatou iloa le manaʻoga ina ia ‘tofotofo pea ia i tatou po ua tatou iai i le faatuatua, ia faamaonia pea po le ā le ituaiga o tagata e iai i tatou.’ (2 Kori. 13:5) O lea pe a tatou talanoa i tagata e uiga i le manaʻoga ina ia gauaʻi i mea manaʻomia a le Atua, tatou te faatatauina foʻi ma le lotomaulalo fautuaga a le Tusi Paia iā i tatou lava. E lē o so tatou tiute le faamasino fua o o tatou uso a tagata. Ua “tuu mai [e Ieova] i le Atalii le faamasinoga uma lava,” ma o luma o lona nofoalii faamasino e tatau ona tatou tali atu ai i mea ua tatou faia.—Ioa. 5:22; 2 Kori. 5:10.

I Aiga ma Uso Kerisiano. O lo tatou faaaogāina o le faautauta e lē tatau ona gata mai i le faiva i le fanua. Talu ai o le faautauta o se faailoaga lea o fua o le agaga o le Atua, e ao ai foʻi ona tatou faaalia le faautauta i le aiga pe a feagai ma sui taʻitoʻatasi. O le alofa o le a uunaʻia ai i tatou ina ia faaalia le manatu mamafa mo faalogona o isi. Sa lē o se tagata tapuaʻi iā Ieova le tane a le tupu tamaʻitaʻi o Eseta, ae na ia faaalia le faaaloalo ma le matuā faautauta mo lana tane ina ua faailoa atu iā te ia le mataupu sa aafia ai auauna a Ieova. (Eseta, mata. 3-8) I nisi taimi, o le faautauta i le feagai ai ma sui o le aiga e lē o ni Molimau, atonu e manaʻomia ai ona tatou faaaogā a tatou amio, na i lo o se faamalamalamaga o o tatou talitonuga, ina ia faailoa atu ai le upu moni iā i latou.—1 Pete. 3:1, 2.

I se tulaga tutusa, o lo tatou iloa lelei o sui o le faapotopotoga, o le a lē faapea ai ua mafai ona tatou faaseā pe agaleaga iā i latou. E lē tatau ona tatou manatu faapea ona ua taʻumatuaina i latou, ua ao ai ona latou lavatia ona tatali. E lē tatau foʻi ona tatou fai se faamolemolega mo i tatou lava i le faapea atu: “Ia ona pau lava o aʻu.” Afai e tatou te iloa, o loo tigā isi ona o le auala o loo tatou talanoa atu ai, e ao ona tatou maumauaʻi e suia. O lo tatou “alofa naunau o le tasi i le tasi” e ao ona uunaʻi ai i tatou ia “agalelei . . . i le aiga o le faatuatua.”—1 Pete. 4:8, 15; Kala. 6:10.

Pe a Talanoa Atu i se Aofia. O i latou o ē e talanoa atu mai luga o le pulelaa e manaʻomia foʻi ona faautauta. Ua iai i se aofia tagata e eseese talaaga ma tulaga. E eseese vaega ua oo i ai lo latou tuputupu aʻe faaleagaga. O nisi atonu o le taimi muamua lea ua iai i se Maota o le Malo. O isi, atonu o loo feagai ma se taimi patino o omiga, lea e lē o iloa e le failauga. O le ā e mafai ona fesoasoani i se failauga e ʻalofia ai le faatigā i lana aofia?

I le ōgatasi ma le fautuaga a le aposetolo o Paulo iā Tito, ia fai ma ou sini le “aua neʻi upu leaga i se tasi, . . . a ia faapalepale, ma ia faaali atu le agamalu uma i tagata uma lava.” (Tito 3:2) ʻAlofia le faataʻitaʻi i le auala o loo faaaogā ai e le lalolagi upu e taʻu faatauvaa ai tagata o le isi ituaiga, gagana, po o le atunuu. (Faaa.7:9, 10) Ia talanoa ma le faamaoni i mea manaʻomia a Ieova, ma faailoa atu le atamai o le faatatauina o na mea; ae ia ʻalofia le faia o faamatalaga e tuu ai i lalo i latou o ē e leʻi oo ina savavali atoatoa i le ala o Ieova. Na i lo lea, ia faalaeiau tagata uma ina ia iloa le finagalo o le Atua ma ia faia mea e faafiafiaina ai o ia. Ia faamālū upu o fautuaga i le faaopoopo i ai o le māfana ma le faamālō moni. I le auala e te tautala ai ma le fesuiaʻiga o lou leo, ia faaoo atu le alofa faaleuso lea e tatau ona tatou faaalia mo le tasi i le isi.—1 Tesa. 4:1-12; 1 Pete. 3:8.