Taulimaina o le Tala Lelei—Ma le Faautauta
1 Ua faapea mai se faataoto faagaeeina: “O le ua tausi le faautauta, e maua e ia le mea lelei.” (Faata. 19:8) E masani ona faamaonia le moni o le atamai o ia upu i la tatou galuega talaʻi. Mo se faaaʻoaʻoga, i le faaaogāina o le faautauta ma le tofa mamao, ua toatele ai tagata talaʻi latou te fulisia taofiga aʻiaʻi o talanoaga i avanoa e avatu ai se molimau atili. Pe tau a ina latou faataatia ai se faavae mo le avatuina o se molimau i se taimi mulimuli ane. E mafai faapefea ona faia lenei mea?
FAAFOEINA TAOFIGA O TALANOAGA
2 Ua masani ona tatou feiloai ma tagata o ē faapea mai, “O lea ou te pisi.” O pisi moni ea lē ona le fale, pe ua na ona ia faapena mai ina ia aua ai neʻi aafia o ia i se talanoaga umi? E manaomia ai la le faautauta. Afai e foliga mai e lē o pisi moni o ia, e mafai ona tatou taumafai e foia lenei taofiga o le talanoaga. Tatou te ono faapea atu, “O le a ou faapuupuu atu la.” Mulimuli ane, e mafai ona tatou toe otootoina i ai mea sa tatou fuafua e talanoaina, i le teuina lea i manatu o le ioega e faatapulaa la tatou talanoaga. O se iʻuga o lo tatou magafagafa ma le faia o faamatalaga e faagaee ai le naunau, atonu e oo ai ina faaalia e le tagata se faanaunauga e faaauau le talanoaga i le taimi lava lena.
3 Ae seʻi faapea la o loo pisi moni lava lē ua e feiloai atu i ai. E ui ina tatou te lē mananao e tau ina foi mai, ae afai tatou te faaauau pe uunai atu pea, atonu la o le a tatou tuua ai se uiga lē logoleleia. Afai e sau lē ona le fale i le faitotoa ma ʻuʻu mai i lona lima se ulo fai meaʻai ma ua tatou faalogoina foi le manogi o meaʻai o loo saunia, e foliga mai la o loo pisi moni lava o ia. O lea e manaomia ai le faautauta ma se faaiʻuga lelei. O le a lē o se magafagafa le faaauau pea o se talanoaga i lena taimi. Maeu le sili atu ona lelei o le tuu i lē ona le fale o se sāvali ma fai i ai e te toe asiasi ane i se taimi mulimuli. O le a tuua ai e lenei mea se uiga logoleleia e sili atu, ma atonu o le a avatu ai se molimau lelei i se isi taimi e asiasi atu ai se Molimau.
TALI ATU I LE TULAGA O LE TAGATA
4 I lea taimi i lea taimi tatou te feiloai ai ma tagata o ē osofai faafuaseʻi mai pe a tatou asiasi atu ia i latou i le faiva i lea fale ma lea fale. O le ā e ao ona tatou faia i lenei tulaga? Ua fautua mai le Faataoto 17:27: “O le ua agamalu foi, o le tagata faautauta lea.” Maeu se fautuaga lelei? E masani a ona aogā se leo mālū e faaleoina ai le manatu mamafa e faatoafilemu ai se tagata faapena. E lē gata i lea, afai e mafai ona tatou faasufia o ia e faaleoina mai ia lava i se mataupu o loo ia popole ai, atonu la o le a faaitiitia ai lona faatautee. E tusa lava pe na te faapuupuuina le talanoaga, ae atonu e avea la tatou tali atu ma le agamalu e tuua ai o ia ma se vaaiga faalemafaufau e sili atu agaʻi i le galuega a Molimau a Ieova. O le a avea lena o se taunuuga lelei. O le mea moni, afai e mafatia ma toʻatamaʻi lē ona le fale, o se mea e sili ona lelei le tuua filemu o ia ae taumafai e molimau atu ia te ia i se isi taimi.
5 E iai foi tagata o ē, e ui ina finauvale, ae atonu e loto faamaoni. I ia tulaga, atonu o se tofotofoga moni lea o lo tatou onosai e faaauau ai pea le talanoaga ma i latou. Ae afai tatou te faautauta, o le a tatou lē faaiʻua faaletatau ai la faapea e lē fiafia lē ona le fale i le tau a o lona faaalia malosi o se manatu e ese. Atonu tatou te fia siligia ni fesili faautauta i se taumafaiga ina ia iloa le pogai ua ia talitonu ai i mea e pei ona ia taʻua ma mulimuli ane ai faailoa ia te ia le mea ua fai mai ai le Tusi Paia e uiga i le mataupu. (Faata. 20:5) E faavae i lana tali mai, e mafai ai ona tatou filifili pe alagātatau ona faaauau le talanoaga.
6 O se tagata talaʻi faautauta na te iloa, ona o le taimi ma aiaiga e masani ai ona suia uiga o lē ona le fale agaʻi i le feau o le Malo. I se isi taimi tatou te asiasi atu ai, atonu o le a ese lana tali mai. E tatau la ona tatou faaeteete ia aua neʻi tatou manatu o le a ese le tali mai ia i tatou ona o le auala na tali mai ai lē ona le fale i le taimi mulimuli na tatou asiasi atu ai i lona fale.
7 O le filifilia pe ao ona tatou aveave ai pea se talanoaga e lē faigofie. E ui i lea, i le atiina aʻe o se tomai tau aʻoaʻo atu, o le a atili ai ona tatou uigā i le taulimaina o le tala lelei faatasi ma le faautauta, a o tatou vaavaai atu ia Ieova e faamanuia mai i a tatou taumafaiga.—1 Kori. 3:6; Tito 1:9.