E Fesoasoani le Suʻesuʻega Tautusi a le Faapotopotoga iā i Tatou
1. E faapefea ona fesoasoani a tatou sauniga e lima faalevaiaso iā i tatou?
1 E eseese auala o loo faatulaga ai, atoa foʻi ma fuafuaga o a tatou sauniga e lima faalevaiaso. Ae e tāua na sauniga uma e fesoasoani iā i tatou ina ia “tatou manatunatu foʻi le tasi i le tasi, ina ia taufaatupu ai le alofa ma galuega lelei.” (Epe. 10:24, 25) O ā ni vala e tāua faapitoa ai ma aogā le faatulagaga o le suʻesuʻega tautusi a le faapotopotoga?
2. O ā ni aogā e maua i le faapotopoto o se vaega toʻaitiiti i le suʻesuʻega tautusi?
2 Fesoasoani ia Agaʻigaʻi i Luma Faaleagaga: E masani ona laʻitiiti ifo le aofaʻi o tagata e auai i le suʻesuʻega tautusi na i lo i latou e auai i isi sauniga a le faapotopotoga. O le faia faapea e faafaigofie ai ona ati aʻe ni faauōga lea e mafai ona fesoasoani mai faaleagaga iā i tatou. (Faata. 18:24) Po o e taumafai e iloa uma i latou o loo iai i le suʻesuʻega tautusi a lau vaega, atonu po o le fai iā i latou taʻitoʻatasi tou te galulue i le galuega talaʻi? O le a fesoasoani le faatulagaga o Suʻesuʻega Tautusi i le ovasia o le suʻesuʻega ia iloa tulaga faigatā o loo fesagaʻia e tagata o lana vaega, ma ia saunia ai faalaeiauga mo i latou taʻitoʻatasi.—Faata. 27:23.
3. E faapefea ona fesoasoani le faatulagaga o suʻesuʻega tautusi, i le faia o ni tali ma le auai atu i ai o tagata aʻoga o le Tusi Paia?
3 Po ua e valaaulia au tagata aʻoga o le Tusi Paia tou te auai faatasi i le suʻesuʻega tautusi? O tagata fiafia e faatalatū e auai i a tatou sauniga lea e toʻatele le aofaʻi, o le a ono faaitiitia le popole pe a auai i se faatasiga toʻalaiti e faia i se fale o se aiga. O lenei siʻomaga vavalalata, o le a faigofie ai mo le fanau laiti ma ē fou mai ona faia ni a latou tali. Talu ai e toʻalaiti le vaega, ua tatou maua ai la le tele o avanoa e fai ai ni tali e viia ai Ieova.—Sala. 111:1.
4. Aiseā e talafeagai ai le faatulagaga o le suʻesuʻega tautusi?
4 E masani ona faia suʻesuʻega tautusi i nofoaga e faigofie i le ʻautalaʻi ona ō i ai. E ui lava e lē mafai ona tofiaina tagata uma i se nofoaga e lata ane iā i latou, ae o le auai i le suʻesuʻega tautusi ua tofia tatou i ai, e ono lē manaʻomia ai ona malaga mamao e pei o le auai i isi sauniga. E ono talafeagai foʻi le faaaogā o le nofoaga mo suʻesuʻega tautusi e fai ai faatasiga mo le galuega talaʻi.
5. E faapefea ona tatou maua fesoasoani mo le faiva mai le tatou ovasia o le suʻesuʻega tautusi?
5 Fesoasoani mo le Faiva: E naunau le ovasia o le suʻesuʻega tautusi e fesoasoani i tagata taʻitasi i le faifai pea o sona sao uigā ma faamalieina ai i le faiva. O le mea lea, e taumafai ai le ovasia e galulue faatasi ma tagata uma o le vaega, ma avatu i ai le fesoasoani i vala eseese o le faiva. Afai e iai se vala o lau faiva o loo faigatā e pei o le faia o toe asiga, ia faailoa i le ovasia o la outou suʻesuʻega tautusi. Atonu na te faatulaga se tagata talaʻi e lava le poto masani mai la outou vaega, e lua te galulue. O le a faaleleia lou tomai e aʻoaʻo ai i suʻesuʻega faale-Tusi Paia pe a e uaʻi totoʻa atu i le auala o loo taulima ai e le ovasia le suʻesuʻega tautusi.—1 Kori. 4:17.
6. Aiseā e ao ai ona tatou naunau ia maua aogā mai le faatulagaga o le suʻesuʻega tautusi?
6 O se faatulagaga agalelei le iai o le Suʻesuʻega Tautusi a le Faapotopotoga! E fesoasoani lenei faatulagaga alofa mai iā Ieova iā i tatou ina ia faatumauina lo tatou mausalī faaleagaga a o tatou ola i nei taimi faigatā.—Sala. 26:12.