Po ua E Iloa Isi Togafitiga e Sui ai Tuigātoto?
E anoanoaʻi taotoga e lē faaaogāina ai le toto ua faia i le tele o falemaʻi i le lalolagi aoao. Po ua e iloa ma malamalama i taotoga e lē faaaogāina ai le toto e mafai ona e filifili ai? E manaʻomia ona e iloa ina ia mafai ai ona e faia ni filifiliga a ua e malamalama lelei i itu lelei ma itu lē lelei o se togafitiga. Ia matamata le ata vitiō No Blood—Medicine Meets the Challenge. A uma, ia tatalo a o faia au filifiliga e faavae i mea ua e aʻoaʻoina e ala i le fesoasoani a fesili o loo mulimuli mai.—Mātau: Ona o loo aofia ai i le ata vitiō ni vaaiga pupuu o taotoga, o lea la, e ao i mātua ona faaaogā le utaga mamao pe a maimoaina faatasi ma fanau laiti.
(1) O le ā le māfuaaga autū e lē talia ai e Molimau a Ieova tuigātoto? (2) I le tulaga e uiga i togafitiga faafomaʻi, o le ā le faanaunauga o Molimau a Ieova? (3) O le ā le aiā tatau o loo i tagata mamaʻi? (4) Aiseā e talafeagai ai, ma o lau lava matafaioi le filifilia o togafitiga e sui ai tuigātoto? (5) Pe afai ua tele le toto ua alu, o ā gaoioiga faavavevave e lua e muamua lava fai e fomaʻi? (6) O ā togafitiga autū e fā e mafai ona sui ai tuigātoto? (7) O le ā e fai e fomaʻi ina ia (a) faaitiitia ai le alu o le toto, (e) faasaoina ai sela mūmū, (i) faateleina ai le toto, ma le (o) toe mauaina o le toto ua alu? (8) Faamatala le faiga lea e taʻu o le (a) hemodilution ma le (e) cell salvage. (9) O le ā e ao ona e naunau ia e iloa e faatatau i so o se togafitiga e sui aʻi tuigātoto? (10) Pe mafai ona faia ni taotoga faigatā ma lavelave e aunoa ma le tuiina o le toto? (11) O ā aogā o gaoioiga ua faia nei i togafitiga faafomaʻi?
O le taliaina o nisi o togafitiga sa faaalia i le vitiō, o se filifiliga e fitoitonu i le tagata lava ia, e faavae i lona lotofuatiaifo ua aʻoaʻoina i le Tusi Paia. Po ua uma ona e filifilia le ituaiga o togafitiga e sui ai tuigātoto e te taliaina e fai iā te oe ma lau fanau, ma faatumu lau pepa Faatonuga/Tuusaunoaina Faafomaʻi ua Muaʻi Saunia? Mo se talanoaga atoa o lenei mataupu, ia iloilo ma le faaeteete ia “Fesili Mai le ʻAufaitau” i Le Olomatamata o Iuni 15, 2004, ma le Oketopa 15, 2000. Ona faaaogā lea o lisi o loo i le faaopoopoga o La Tatou Faiva o le Malo o Novema 2006, “O le ā Laʻu Filifiliga e Tusa o Vaega Ninii o le Toto ma Togafitiga e Faaaogā ai Loʻu Toto?,” e fai ai au lava filifiliga e faatatau i togafitiga e te talia ma teena foʻi. O le mea mulimuli, ia faamautinoa ua saʻo ona tuu au filifiliga i lau pepa Faatonuga/Tuusaunoaina Faafomaʻi ua Muaʻi Saunia. Ia taʻu i lau fomaʻi po o ou tauaiga e lē o ni Molimau a Ieova e faatatau i au filifiliga.
[Pusa i le itulau 3]
• Po ua uma ona e filifili i le togafitiga faafomaʻi ma taotoga e te talia mo oe ma lau fanau?
• Po o e feaveaʻia lau pepa Faatonuga/Tuusaunoaina Faafomaʻi ua Muaʻi Saunia ua uma ona faatumu neʻi tupu se faalavelave faafuaseʻi?