Ia “Faia Mea Uma Ona o le Tala Lelei”
1. O le ā le mea e lotomalie se tagata talaʻi e fai mo isi, ma aiseā?
1 Na lagona e le aposetolo o Paulo o lona tiute tauave le faailoa atu o le tala lelei i isi. (1 Kori. 9:16, 19, 23) O lea la, o lo tatou naunau mo le lelei e faavavau o tagata, ua uunaʻia ai i tatou e faia se taumafaiga faapitoa e tufa atu le tala lelei iā i latou.
2. Pe a talaʻi, o ā ni fetuutuunaʻiga ua tatou malilie e fai, ma aiseā?
2 Talaʻi i le Taimi ma le Nofoaga e Mafai Ona Maua ai Tagata: O se tautai lelei, e ta lana ofe pe lafo foʻi lana upega i le ogāsami e ono tele ai ni iʻa e maua ai, nai lo le lafo i se ogāsami po o se taimi e talafeagai mo ia. Ona o i tatou o “faifaiva i tagata,” e ono manaʻomia ai ona faia ni fetuutuunaʻiga, ina ia maua tagata i la tatou oganuu ma faateleina ai lo tatou olioli i lenei faaeaga o le aoaoina o “ituaiga iʻa eseese.” (Mata. 4:19; 13:47) Pe e mafai ona tatou faaaogā afiafi e faafesootaʻi ai tagata i o latou fale pe faaaogā foʻi vaveao e talaʻi ai i ala tetele? O le sini o Paulo ia “molimau atoatoa i le tala lelei,” ma na ia faaaogā lelei so o se avanoa e faia ai faapea.—Galu. 17:17; 20:20, 24.
3, 4. A o tatou auai i le talaʻiga, o ā auala e mafai ai ona tatou fetuutuunaʻi, ma o ā iʻuga e oo i ai?
3 Ia Fetuunaʻi Lau Taulimaga e Tusa ma Manaʻoga: E fai ma fetuutuunaʻi metotia a se tautai ina ia maua ai se ituaiga iʻa patino. E faapefea ona tatou tuuina atu le tala lelei o le Malo i se auala e tosina mai ai tagata o la tatou oganuu? E tatau ona tatou talanoa ma le faautauta i se mataupu o loo popole ai tagata lautele, ma ia faalogologo lelei a o faaleo mai o latou manatu i lenā mataupu. (Iako. 1:19) Tatou te ono fesiligia i latou i se fesili faatupu manatu ina ia amata ai se talanoaga. (Faata. 20:5) O le faia faapea, o le a mafai ai ona fetuunaʻi a tatou taulimaga o le tala lelei i se auala e pāʻia ai o latou olaga. Na avea Paulo “ma mea uma i tagata o ituaiga uma.” (1 Kori. 9:22) O le fetuutuunaʻi o se tasi lea o uiga autū e pāʻia ai loto o tagata.
4 O se fiafiaga le tufa atu i tagata o le “tala lelei o mea e sili ona lelei”! (Isa. 52:7) Ia tatou “faia mea uma ona o le tala lelei,” ina ia oo atu ai le tala lelei i le tele o tagata e mafai ai.—1 Kori. 9:23.