Ia Lelei Foliga Vaaia

E ANOANOAʻI mea e taʻu atu e ou foliga vaaia e uiga iā te oe. O Ieova le Atua e silasila i mea o i le loto, ae o tagata e masani lava ona fai faaiʻuga ona e “vaai tagata i le tino.” (1 Samu. 16:7) Pe afai e te mamā, ma lelei au teuga, o le a faigofie ona manatu isi iā te oe o se tagata e faaaloalogia, ma o le a faigofie lava ona faalogo mai iā te oe. O le talafeagai foʻi o ou laʻei, o le a iai ni āuga lelei i le faalapotopotoga o loo fai ai oe ma sui, atoa ai foʻi ma le manatu o lau ʻaufaalogologo i le Atua o loo e tapuaʻi i ai.

O Taʻiala ia Faatatauina. E lē tele ni tulafono o faatulaga mai e le Tusi Paia e faatatau i foliga vaaia. Peitaʻi o loo saunia maia mataupu silisili paleni lea o le a fesoasoani iā i tatou e faia ai ni filifiliga talafeagai. E laualuga i nei mea uma le mea moni e faapea tatou te “faia mea uma lava ia viia ai le Atua.” (1 Kori. 10:31) O ā la ni mataupu silisili e mafai ona faaaogā e fesootaʻi atu i o tatou foliga vaaia?

Muamua, o loo faalaeiauina i tatou e le Tusi Paia ina ia mamā, e lē gata i o tatou tino ae faapea foʻi i o tatou laʻei. I lana Tulafono iā Isaraelu anamua, sa faatulaga mai ai e Ieova ia mea e manaʻomia mo le tumamā. Mo se faaaʻoaʻoga, pe a galulue faitaulaga i o latou tiute, sa iai taimi faatulagaina e latou te taeele ai ma faamamā o latou ofu. (Levi. 16:4, 24, 26, 28) E lē o iai Kerisiano i le Tulafono faa-Mose, ae o mataupu silisili sa aofia ai o loo tumau pea ona aogā. (Ioa. 13:10; Faaa. 19:8) E faapitoa lava pe a tatou ō i se nofoaga mo le tapuaʻiga po o le auai i le faiva i le fanua, e ao lava ona mamā o tatou tino, a tatou mānava, ma o tatou laʻei ina ia aua ai neʻi faatigā i tagata. O i latou e faia lauga pe auai i faataʻitaʻiga i luma o le faapotopotoga e ao ona latou faataatia se faaaʻoaʻoga lelei i lenei tulaga. O le manatu mamafa i o tatou foliga vaaia e faaalia ai le faaaloalo mo Ieova ma mo lana faalapotopotoga.

Lona Lua, o loo timaʻi mai le Tusi Paia ina ia ati aʻe le fuafua tatau ma le iai o mafaufauga lelei. Sa uunaʻia e le aposetolo o Paulo ia fafine Kerisiano ina ia “latou teuteu ia i latou . . . i le fuafua tatau ma le iai o mafaufauga lelei, aua neʻi teteu ma le lauulu fili, po o auro, po o penina, po o ofu tau tele, a o galuega lelei, o le mea lea e tatau i fafine ua taʻua latou e i latou o e amio Atua.” (1 Timo. 2:9, 10, NW) E tāua tele foʻi le fuafua tatau ma le iai o mafaufauga lelei i laʻei ma teuga a tane.

O le tagata e lotomaulalo e manatu mamafa i le aua neʻi faatigā ma le faalētatau i isi ma e lē faapogaia foʻi se uaʻi mai lē talafeagai iā te ia. O mafaufauga lelei e iʻu ai i le faia o faaiʻuga lelei. O le tagata na te faaalia ia uiga, e iā te ia le paleni lea e māfua mai i le faaaloalo mo tapulaa faale-Atua. O lo tatou faailoaina atu o nei uiga e lē faapea o le a tatou lē oofu ai i ni ofu mananaia, peitaʻi e fesoasoani iā i tatou ina ia mafaufau i o tatou foliga atu ma ia ʻalofia ai le soona fai o laʻei ma teuga. (1 Ioa. 2:16) Tatou te mananaʻo e faatatauina nei mataupu silisili e tusa lava pe o tatou iai i se nofoaga o le tapuaʻiga, auai i le faiva i le fanua, po o le auai i isi gaoioiga. E oo lava i o tatou laʻei e masani ai i aso fai soo, e ao ona atagia atu ai le lotomaulalo ma le faautauta o le mafaufau. I le aʻoga pe i le galuega totogi, tatou te maua ai avanoa e molimau atu ai lē fuafuaina. E ui lava la atonu tatou te lē laʻei e pei ona masani ai pe a auai i sauniga, tauaofiaga, ma fonotaga, ae ao lava i o tatou laʻei ona lelei, mamā, ma ia onomea.

E moni, e lē tutusa uma le auala tatou te laʻei ai. E mautinoa foʻi e lē mafai lava ona fai. E eseese mea e mananaʻo ai tagata, ma e talafeagai lenā tulaga. Peitaʻi e ao lava ona faatatauina taʻiala a le Tusi Paia i taimi uma.

Sa faaalia e le aposetolo o Peteru e faapea e sili atu ona tāua i lo teuga o le ulu ma laʻei, ia teuga ia e fesootaʻi atu i le “tagata lilo o le loto.” (1 Pete. 3:3, 4) Pe a faatumulia o tatou loto i le alofa, olioli, filemu, agalelei, ma le faatuatua ua mautū ona faavaeina, e avea nei mea o ni teuga faaleagaga iā i tatou lea e faamamaluina moni ai le Atua.

Lona Tolu, o loo uunaʻia i tatou e le Tusi Paia ina ia iloilo pe o onomea o tatou foliga vaaia. I le 1 Timoteo 2:9, o loo taʻua ai “ofu e onomea.” E ui o loo faasino atu le aposetolo o Paulo i teuga a fafine, e faatatauina foʻi lea mataupu silisili i tane. O se mea e onomea e manaia i le vaai ma e lelei ona faatulaga. E tusa lava pe tele ni a tatou meafaitino pe leai, e mafai ona lelei o tatou foliga vaaia.

O se tasi o vala o o tatou foliga vaaia e muamua lava mātauina e isi o o tatou lauulu. E ao lava ona lelei i le vaai ma ia teu lelei. E mafai ona aafia le auala e teu ai lauulu o tagata i a latou aganuu atoa ma o latou tupuaga mai. I le 1 Korinito 11:14, 15, tatou te mauaina ai le fautuaga mai le aposetolo o Paulo e uiga i le teuina o lauulu, lea e foliga mai o loo iloiloina ai manatu e pei ona taʻua i inei. Peitaʻi, a aliali mai loa i le teuina o le lauulu o se tasi, e foliga mai o loo taumafai ina ia faafoliga o ia i se tagata o le isi itupā, ua feteenaʻi loa ma mataupu silisili o le Tusi Paia.—Teu. 22:5.

Mo uso, o foliga vaaia e lelei e ono aofia ai le sele mamā o le soesa po o le ʻava. I vaipanoa e lē āfaina le fai ai o se ʻava a luga, so o se tasi e fai sana tamaʻi ava ia lelei ona teu.

Lona Fā, aua neʻi faailoaina atu i o tatou foliga le alofa i le lalolagi ma ona ala. Na lapataʻi mai le aposetolo o Ioane e faapea: “Aua tou te mananao i le lalolagi, po o mea o i ai i le lalolagi.” (1 Ioa. 2:15-17) E tele faanaunauga agasala o loo mātaulia ai lenei lalolagi. E aofia ai i nei faanaunauga sa taʻua e Ioane, faanaunauga o le tino agasala ma le faalialiavale i mea a le tagata lava ia. O loo faauaʻi atu foʻi e le Tusi Paia ia manatu i le agaga o le fouvale, po o le lē usiusitai i le pule. (Faata. 17:11; Efeso. 2:2) O nei faanaunauga ma uiga faaalia e masani lava ona faaalia mai i le auala e laʻei ma fai ai teuga a tagata. O le iʻuga, e lē onomea o latou foliga vaaia, e fai le mea e manaʻo ai le tagata lava ia, e fia fegi, veʻuveʻua, pe lē teuina faalelei. I le avea ai ma auauna a Ieova, tatou te ʻalofia teuga e atagia atu ai na auala e lē faa-Kerisiano.

Na i lo le faaaʻoaʻo i le lalolagi, e sili atu ona lelei pe a faataga faaaʻoaʻoga lelei a tane ma fafine matutua faaleagaga i le faapotopotoga Kerisiano, e taaʻina ai le auala e fai ai ou laʻei ma au teuga! O tane talavou o ē o loo faamoemoe e avea ma failauga i le lautele i se aso, e mafai ona mātauina le auala e fai ai teuga a i latou ua uma ona agavaa e fai lauga i le lautele. E mafai e tagata uma lava ona aʻoaʻoina mai i le faaaʻoaʻoga a i latou ua auai ma le faamaoni i le faiva i le lautele mo le tele o tausaga.—1 Timo. 4:12; 1 Pete. 5:2, 3.

Lona Lima, i le filifilia o le mea e talafeagai, e manaʻomia ona tatou manatua e faapea e oo lava ia “Keriso . . . e lei faafiafia o ia i lona lava finagalo.” (Roma 15:3) O le mea sa sili ona manatu mamafa i ai Iesu o le faia o le finagalo o le Atua. Sa faamuamua foʻi e Iesu le fesoasoani atu i isi na i lo o ona lava manaʻoga. E faatatau atu i nisi o ituaiga sikaili o laʻei ma teuga, afai e ono tulaʻi mai ai se feteenaʻiga i lo tatou va ma tagata i le vaipanoa o loo tatou auauna ai, o le ā e ao ona tatou faia? O le faaaʻoaʻo i le agaga lotomaulalo sa faaalia e Keriso e mafai ona fesoasoani iā i tatou e filifili ai ma le atamai. Na faataatia e le aposetolo o Paulo le mataupu silisili e faapea: “Ua matou le tuuina atu se mea e tasi e tausuai ai.” (2 Kori. 6:3) Ona o lenā māfuaaga tatou te ono lafoaʻia ai ituaiga teuina o le lauulu po o ituaiga teuga lea o le a faapogaia ai le lē fia faalogo mai o i latou o loo tatou mananaʻo e molimau atu i ai.

Tū. O le lelei o foliga vaaia e aofia ai le tū faalelei. E moni e lē tutusa uma auala o a tatou tū, ma tatou te lē taumafai malosi foʻi e faataʻitaʻi i se tū se tasi. Peitaʻi, ua mātauina e faapea e tusa ai ma le auala o loo faaaogā ai e le Tusi Paia, o le tū saʻo e faailoa atu ai le tagata i se tulaga mamalu ma faamoemoe mo iʻuga lelei. (Levi. 26:13; Luka 21:28) Ae ui i lea, ona o le galue mo le tele o tausaga i se tulaga faanoʻunoʻu ia po o le faasolo foʻi ina vaivai ua afu le soifua, e ono lē mafai ai e se uso po o se tuafafine ona tū saʻo po o le manaʻomia ona pipii atu i se mea e faalagolago i ai. Ae mo i latou e mafai ona latou fai, e fautuaina le tū saʻo pe a mafai i le taimi e talanoa ai i isi, ina ia aua ai neʻi faaalia atu se uiga mā po o le faaleogalua. O le mea lava foʻi e tasi, e ui e lē sesē i se failauga ona tuu o ona lima mai i lea taimi i lea taimi i luga o le pulelaa, ae e sili atu ona lelei le tulaga e mafai ona faaali atu i le aofia pe a aua le faalagolago i le pulelaa.

Meafaigaluega Maopoopo. E lē gata e tatau ona mamā ma faatulaga lelei o tatou foliga vaaia, ae e ao foʻi ona mamā ma maopoopo a tatou meafaigaluega e faaaogā i le faiva.

Iloilo lau Tusi Paia. E lē mafai e i tatou uma ona maua se Tusi Paia fou pe a oo ina tuai la tatou Tusi Paia o iai. Peitaʻi, po o le ā lava le umi talu ona iai la tatou Tusi Paia, e ao lava ona faamaonia atu sa tatou taulimaina ma le matuā faaeteete.

E moni e tele auala e faatulaga ai le ato talaʻi, peitaʻi e ao ona maopoopo. Pe ua e vaai ea i ni laupepa o toʻulu mai i se Tusi Paia a o sauni atu se tagata talaʻi e faitau se mau i le tagata e ona le fale, ia pe aʻo fai foʻi se lauga a se uso i le faapotopotoga? Sa faalavelaveina ai oe, a ea? Afai o le tuu o pepa i totonu o le Tusi Paia e fai ma mea e faalavelaveina ai, atonu la o le tuuina i se isi nofoaga o le a fetaui lenā ma le faatulagaina lelei o au meafaigaluega. Aua foʻi neʻi galo, o le tuu o le Tusi Paia po o nisi lomiga faalelotu i luga o le fola e manatu i ai o se matuā lē faaaloalo i nisi aganuu.

E ao ona tāua iā i tatou le lelei o foliga vaaia. E aafia ai foʻi le auala e manatu ai isi iā i tatou. Ae e sili atu i lenā, tatou te manatu iai ma le faaeteete ona tatou te faanaunau “ina ia viia ai i mea uma lava ona o i latou le aʻoaʻoga a le Atua lo tatou Faaola.”—Tito 2:10.