Faaaʻoaʻo i lo Latou Faatuatua
1. O le ā o le a tatou suʻesuʻeina i le Suʻesuʻega Faale-Tusi Paia a le Faapotopotoga, e amata atu i le vaiaso o Oketopa 19?
1 E amata atu i le vaiaso o Oketopa 19, 2015, o le a suʻesuʻe ai i le Suʻesuʻega Faale-Tusi Paia a le Faapotopotoga le tusi Faaaʻoaʻo i lo Latou Faatuatua. O loo iloiloina i lenei tusi ni tala mai i le Tusi Paia e faatatau i ni tane ma fafine faatuatua e toʻa 14. O loo tusia nei tala i se auala e mafai ai ona faaāta i o tatou mafaufau i latou nei, ma fesoasoani e tatou te iloa ai na soifua moni i latou ma feagai ma luʻi a o auauna iā Ieova. O loo taʻua ai foʻi ni lesona e mafai ona tatou faatatauina i o tatou olaga i aso nei.—Epe. 6:12.
2. Faamatala nisi o vala o le tusi Faaaʻoaʻo i lo Latou Faatuatua.
2 Vala Eseese o le Tusi: O loo aofia i le tusi ni faafanua ma se faasologa o taimi e fesoasoani iā i tatou, e iloa tonu ai po o anafea ma po o fea foʻi na soifua aʻe ai se tagata o loo taʻua i se tala. O loo iai foʻi i mataupu taʻitasi se vaega e faamatuaina “Seʻi Manatu . . . ,” lea e fesoasoani e tatou te manatunatu loloto ai i tala, ma faatatau ni lesona tāua e aʻoaʻoina mai ai. O loo iai foʻi i le tusi le tele o ata mananaia ma felanulanuaʻi, ia sa alu le taimi e suʻesuʻeina ai ma tusia ma le faaeteete, ina ia fesoasoani iā i tatou e faaāta na vaaiga.
3. O le ā e mafai ona tatou faia ina ia maua ai aogā mai i le suʻesuʻeina o lenei tusi?
3 Auala E te Maua ai Aogā: I le tusi mai i le Vaega Pule lea o loo i le amataga, o loo taʻua ai upu faalaeiau nei: “Ia faaāta i lou mafaufau mea na tutupu i auauna a le Atua, e pei o loo e iai i lenā taimi. Faatusatusa le auala na latou fesagaʻia ai mea na tulaʻi mai, ma le auala e te ono tali atu ai.” O le faaāta o mea i le mafaufau, e lē uiga e faapea e tatou te taumatemate i mea na tutupu. Nai i lo lea, e uiga atu i le faaāta o mea o loo taʻua i le tala mai i le Tusi Paia, ma ia lagona faalogona na oo i tagata o loo i le tala. O le faia faapea e manaʻomia ai le faaalu o se taimi ma le manatunatu loloto. (Nee. 8:8) Pe afai e amata le suʻesuʻega i le ogatotonu o se mataupu, e ao i lē o loo faia le suʻesuʻega ona faia sina autaluga e 30 i le 60 sekone o le suʻesuʻega ua mavae. Pe afai e leai le vaega “Seʻi Manatu . . . ” i se suʻesuʻega, e mafai la ona fai atu se fesili se tasi pe lua e autalu ai manatu o le suʻesuʻega.
4. Aiseā e tatau ai ona tatou suʻesuʻeina le tusi Faaaʻoaʻo i lo Latou Faatuatua?
4 O loo tatou ola i se lalolagi o loo taumafai i aso taʻitasi, e saʻili so o se auala e faavaivaia pe gausia ai lo tatou faatuatua. O lea, o lenei tusi faapea le faasologa o mataupu o loo faaauau pea ona iai i Le Olomatamata, lea e faavae mai ai lenei tusi, o ni meaalofa mai iā Ieova e fesoasoani e faamalosia ai lo tatou faatuatua. (Iako. 1:17) Seʻi o tatou faaaogā lelei lenei tusi e ala i le auai e lē aunoa i le Suʻesuʻega Faale-Tusi Paia a le Faapotopotoga, ma faia se sao atoatoa i le faia o ni tali i le tele e mafai ai, a o tatou suʻesuʻe faatasi lenei tusi.