Tutulai Atu i le Tauamatamataga o se Galuega Tele

“SA LEI iai se agaga faatavā. Sa mananao tagata uma ina ia taufai taulau uma faatasi,” o le faamatalaga lena a Richard ma Lusia e faamatala ai a la aumea aooga o le vasega lona 105 o le Aʻoga Faale-Tusi Paia a le Olomatamata o Kiliata. “E matuā eseese lava i matou uma, peitai e tāua tele tagata aʻoga taitoatasi.” Sa ioe i ai se tasi tagata aʻoga, o Lowell, i lona faaopoopo mai: “O o matou eseesega, ua tosina vavalalata ai le tasi i le isi.”

O le vasega lea na faauu ia Setema 12, 1998, e matuā eseese uma lava. O nisi o nei tagata aʻoga sa avea o ni paeonia i oganuu o loo matuā manaomia ai lava ni tagata talaʻi o le Malo; o isi sa auauna ma le faamaoni lava i nofoaga tau lalata i o latou aiga. O se vaega itiiti e pei o Mats ma Rose-Marie, na matuā tauivi ma le filigā mo se taimi umi ina ia faaleleia le la gagana Peretania a o lei ō mai i le aʻoga. O le toatele o le au aooga sa mafaufau i le faiva faamisionare mai lava a o laiti. Na tusi talosaga faasefululua se tasi o ulugalii; maeu lo la fiafia ina ua maua lo la valaaulia i le vasega lona 105!

O le 20 vaiaso o toleniga maeʻaeʻa, sa vave lava ona mavae atu. Ona o le vave tele o le taimi, na faatoʻā toe iloa ane lava e le au aooga ua uma le vasega ina ua faafoi a latou galuega tusitusi mulimuli, fai atu a latou lauga pupuu faaiu, ma ua oo mai foi le aso o le faauuga.

Sa faamanatu atu e le taitaifono o le polokalame, o Albert Schroeder, o se sui o le Vaega Pule o Molimau a Ieova i le vasega faapea, o lea ua latou “tutulai atu i le tauamatamataga o se galuega tele o aʻoaʻoga faale-Tusi Paia,” o loo mulimuli atu i le silia i le 7,000 o ē na muamua atu ia i latou i Kiliata. Na ia taʻua faapitoa le olioli o le au aooga i se avanoa tutasi na auaumea faatasi ai ma misionare o ē ua loa i le galuega, ina ua asia e nei misionare le ofisa ulu a o auai atu i tauaofiaga faava-o-atunuu.

Na sosoo ai ma le faailoa mai e le uso o Schroeder o Max Larson mai le Komiti o Galuega i Peteli. Na ia faamatala auiliili mai le matua, “Aʻoaʻoga e Taitaia ai i le Ola e Faavavau.” Sa sii mai e le uso o Larson le Faataoto 1:5, lea o loo faapea mai: “E faalogo mai le tagata poto, e tupu ai pea lona poto; o le ua mafaufau foi e maua e ia le [“tomai,” NW] e pule ai.” E manaomia le tomai ina ia avea ai ma misionare e uigā. O tagata tomai e tutū i luma o tupu. (Faataoto 22:29) Ina ua maeʻa ona aʻoaʻoina mo le lima masina, ua matuā lava tapena le au aooga ina ia fai ma sui o Tupu silisili, o Ieova le Atua ma Keriso Iesu.

Na sosoo ai ma le lauga a David Olson o le Matagaluega o le Auaunaga i le mataupu “Fesoasoani e Faafiafia le Finagalo o Ieova.” Na ia fesili: “O le ā e mafai e tagata lē lelei atoatoa ona fai e faafiafia ai le finagalo o le Atua?” O le tali? E mafai ona latou auauna ia te ia ma le faamaoni ma le olioli. E finagalo Ieova ina ia olioli ona tagata i la latou auaunaga ia te ia. Afai tatou te faia le finagalo o le Atua ma le olioli, ua tatou faafiafia lona finagalo. (Faataoto 27:11) Sa faitauina mai e le uso o Olson se tusi mai se ulugalii misionare na faauuina i le vasega lona 104 a Kiliata. Po o la olioli ea i lo la tofiga fou? “Pe ā ma le 140 la matou au talaʻi,” o le la tusi lea e faatatau i la latou faapotopotoga, “ma se fua faatatau o le aofai i sauniga e 250 i le 300. O le vaega e sili atu ona lelei o le auaunaga lea i le fanua. E tofu i maʻua ma suesuega taifa, ma o nisi ua ō mai i sauniga.”

Sa talanoa Lyman Swingle o le Vaega Pule, i le mataupu, “O se Taimi e Toe Mafaufau ai i Ou Faamanuiaga.” Ua aumaia e toleniga i Kiliata ni faamanuiaga se tele. Ua fesoasoani i tagata aʻoga e faateleina le poto, ma faateleina le talisapaia o le faalapotopotoga a Ieova, ma ati ae uiga tāua e pei o le agamalu. Fai mai le uso o Swingle: “O le faaalu o se taimi e sau ai iinei e faalogo i faatonuga o se gaoioiga o le lotomaulalo.” Na ia faaopoopo mai: “Tou te ō ese atu mai iinei ua matuā lava saunia e faamamaluina Ieova.”

“Maeu le Tele o lo Outou Olioli—Aisea la e Popole Ai?” o le matua lena o le lauga a Daniel Sydlik, o se sui foi o le Vaega Pule. Na ia timai mai, pe a mapuna aʻe ni faafitauli, ia saili atu mo taiala mai le Tusi Paia. Na faataʻitaʻi mai e le uso o Sydlik le auala e faia ai faapea, i le faaaogaina o ni fuaiupu filifilia mai le mataupu e 6 o le Mataio. O le leai o se faatuatua e mafai ona faatupuina ai lo tatou popole i mea masani o lenei olaga, e pei o meaʻai ma lavalava. Ae peitai, o loo silafia e Ieova o tatou manaoga. (Mataio 6:25, 30) O le popole o le a toe faaopoopo atu ai i faafitauli o loo iai i aso taitasi. (Mataio 6:34) I le isi itu, e manaomia foi le faia o ni fuafuaga. (Faatusatusa i le Luka 14:28.) Na faamatala mai e le uso o Sydlik e faapea: “E lē o teena e Iesu le iai o ni mafaufauga lelei mo le lumanai, ae o loo ia teena le soona popolevale i ai. O le faia o ni gaoioiga o se tasi o vaifofo sili mo popolega. Pe a oo mai le popole ia i tatou, e lelei mo i tatou le amata loa ona talanoa e faatatau i le upu moni.”

Fautuaga Faamavae Mai Faiaʻoga

O lauga na tauaaoina atu e faiaʻoga e toatolu o Kiliata o loo mulimuli mai. O Karl Adams, na muamua talanoa i le mataupu faapea, “O le ā se Mea o le a E Taui Atu ai ia Ieova?” Sa faavae mai lana lauga i le Salamo 116, lea atonu sa usuina e Iesu i le po a o lei maliu. (Mataio 26:30, faaopoopoga i le pito i lalo o le mau i le NW) O le ā sa mafaufau i ai Iesu a o ia usuina nei upu: “Se a se mea ou te taui aʻi atu ia Ieova ona o lona agalelei mai uma lava ia te au”? (Salamo 116:12) Atonu na ia toe tomānatu i le tino lelei atoatoa na saunia e Ieova mo ia. (Eperu 10:5) O le aso e sosoo ai o le a faamaonia ai le loloto o lona alofa, i le ofoina atu o lena tino e fai ma taulaga. Ua tofo le au aooga o le vasega lona 105 i le agalelei o Ieova i masina e lima ua tuanai. E ala i le galulue mamafa i lo latou tofiga faa-misionare o le a faaalia atu ai lo latou alolofa mo le Atua.

O Mark Noumair, o le faiaʻoga lona lua lea o Kiliata na lauga mai, i lona faalaeiauina o le au aooga ina ia “Faaauau i le Faia o le Mea ua Saʻo.” Ina ua faatauina atu Iosefa e fai ma pologa i Aikupito, sa tumau o ia i lalo o faiga lē tonu mo le 13 tausaga. Pe na ia faatagaina ea sese o isi e taofia ai o ia mai le auauna atu i le Atua? Leai, sa ia faaauau pea ona faia le mea tonu. O lea, ina ua oo mai i le taimi tuupoina a le Atua, sa toe faasaoloto ai Iosefa mai sauaga. Na faafuasei ona liua le nofo i le falepuipui i le nofo i le maota o le tupu. (Kenese, mataupu 37-50) Na fesili atu le faiaʻoga i ana tagata aʻoga: “Afai o le a lē taulau mea sa e faatalitalia e tusa ma lou tofiga faamisionare, pe o le a e faamaamulu ai loa? Pe o le a faamuta ea ona ua matuā leai sou faamoemoe? Pe o le a e tumau ea e pei ona sa faia e Iosefa?”

Na taaofai manatu i le lauga a le lesitala o le Aʻoga o Kiliata, o Wallace Liverance i se talanoaga aasa ma sui o le vasega i le matua, “Faalauiloa le Tupu ma le Malo.” Sa faamatala mai e nisi o le au aooga mea na tutupu a o talaʻi atu mai lea fale i lea fale, ma lea faleoloa i lea faleoloa, ma i magaala. Na faamatala mai e nisi le auala na latou molimau atu ai i tagata e ese a latou gagana. O isi na latou faailoa mai pe faapefea ona talaʻi atu i tagata e eseese o latou talaaga faalelotu. Sa matuā naunau uma le au faauu e faia se sao atoatoa i le faiva i le galuega faamisionare.

Le Fiafia o Misionare ua Leva

O le vaega na sosoo ai na taulimaina e Robert Wallen, sa faamatuaina “O Iuga Fiafia e Maua Mai le Auaunaga Faamisionare.” Sa aofia ai ni faatalatalanoaga o ni uso se toʻafa o loo galulue i le ofisa ulu o ē sa latou maua talu ai nei ni faatasitasiga faalaeiau ma ni misionare tomai. Na vave ona taʻutino mai e na misionare faapea sa lē faigofie mo i latou ona aʻoaʻoina se isi gagana fou, faafetaui atu i se isi aganuu, po o le faamasani i se tau fou. Sa iai foi mafatiaga o le maʻi manatu i aiga sa manaomia ona faafesagaia. Na iai taimi na tulai mai ai faafitauli tau soifua maloloina. Ae i na mea uma, sa tumau pea misionare i se vaaiga mautinoa, ma sa faamanuiaina lo latou finafinau. O nisi na latou faaoo atu i le toatele o tagata le poto e uiga ia Ieova. A o isi ua latou faia se sao i le tele o vala i le faatelega aoao o le galuega o le Malo i o latou atunuu.

O le failauga mulimuli, o Carey Barber, o se sui o le Vaega Pule. Sa ia toe autalu mai manatu tāua o le polokalame o le tauaofiaga “Le Ala a le Atua i le Ola.” Na ia fesili atu i le aofia: “O ā ni aafiaga na aumaia e le polokalame o le tauaofiaga e uiga i la lua faiā ma Ieova?” Na faatusatusa e le failauga le eseesega o faamanuiaga o le mulimuli i ala o le Atua, ma le iuga matautia mo i latou e mulimuli i le ala o le lalolagi. I le faasino atu i le mea sese na faia e Mose i Meripa, na ia lapatai atu ai: “E tusa lava pe na auauna ma le faamaoni se tasi mo le tele o tausaga, e lē faapea o le a lē amanaia ai e Ieova ni nai mea ua ia solia ai Ana tulafono.” (Numera 20:2-13) Tau ina ia pipii mau atu auauna uma a le Atua i lo latou faaeaga tautele o le auaunaga i vaipanoa uma o latou iai!

Ona oo ai lea i le taimi e tufatufa ai tusipasi a le au aooga. Ona faitauina loa lea e se tasi o le vasega se tusi o le talisapaia o toleniga na mauaina e le au aooga. Ina ua uma ona usuina le pese faaiu ma faia se tatalo uigā, ona maeʻa ai loa lea o le polokalame o le faauuga. Ae mo le vasega lona 105, ua na o se amataga lena mo nei misionare fou o ē ua “tutulai atu i le tauamatamataga o se galuega tele.”

[Pusa i le itulau 23]

Faamaumauga o le Vasega

Aofai o atunuu o loo iai o latou sui: 9

Aofai o atunuu ua tofia i ai: 17

Aofai o tagata aʻoga: 48

Aofai o ulugalii: 24

Faatatauga o tausaga: 33

Faatatauga o tausaga i le upu moni: 16

Faatatauga o tausaga i le faiva faataimi atoa: 12

[Pusa i le itulau 24]

Ua Latou Filifilia le Auaunaga Faataimi Atoa

Ua faapea mai Ben, o se tasi o le au faauu o le vasega lona 105: “A o oʻu laitiiti, sa leai saʻu fuafuaga ina ia ou paeonia.” Na ia toe faaopoopo mai: “Sa ou mafaufau faapea na o i latou e iai tomai faapitoa ma tulaga talafeagai e mafai ona paeonia. Ae na ou aʻoaʻoina le naunau mo le auaunaga i le fanua. Ma i se tasi aso, na ou faatoʻā iloa ai, o le avea ma paeonia, o le iai lea o se sao e sili atu ona tele i le faiva. O iina loa na ou iloa ai e mafai ona ou paeonia.”

Ua taʻua e Lusia e faapea: “O i latou o loo auauna faataimi atoa e matuā manatu maualuga i ai lo matou aiga.” Na ia faamatala mai le matuā tele o le olioli o la latou faapotopotoga i taimi uma e asiasi mai ai ni misionare. Na ia faapea mai: “A o oʻu tuputupu aʻe, sa manino mai ai le aofia o le auaunaga faataimi atoa i aʻu fuafuaga.”

Na maliu le tinā o Theodis a o 15 ona tausaga. Ua ia faapea mai: “O le taimi lena na matuā lagolagoina ai lava aʻu e le faapotopotoga, o lea na ou fesili ifo ai ia te au lava, ‘O le ā se mea e mafai ona ou faia e faaalia ai loʻu talisapaia?’” O le mea lena na māfua ai ona ia ulufale atu i le auaunaga faataimi atoa ma i le taimi nei, i le galuega faamisionare.

[Ata i le itulau 25]

Vasega Faauu Lona 105 o le Aʻoga Faale-Tusi Paia a le Olomatamata o Kiliata

I le lisi i lalo, o laina e amata mai luma agaʻi i tua, ma o igoa e lisi mai le itu agavale i le itu taumatau i laina taitasi

(1) Sampson, M.; Brown, I.; Heggli, G.; Abuyen, E.; Desbois, M.; Pourthié, P. (2) Kassam, G.; Lindberg, R.; Dapuzzo, A.; Taylor, C.; LeFevre, K.; Walker, S. (3) Baker, L.; Pellas, M.; Woggon, E.; Böhne, C.; Asplund, J.; Haile, J. (4) Pourthié, T.; Whittaker, J.; Palmer, L.; Norton, S.; Gering, M.; Haile, W. (5) Walker, J.; Böhne, A.; Groenveld, C.; Washington, M.; Whittaker, D.; Abuyen, J. (6) Gering, W.; Washington, K.; Pellas, M.; Desbois, R.; Heggli, T.; Asplund, Å. (7) Woggon, B.; LeFevre, R.; Taylor, L.; Brown, T.; Groenveld, R.; Palmer, R. (8) Norton, P.; Sampson, T.; Baker, C.; Lindberg, M.; Kassam, M.; Dapuzzo, M.