Lomiga mo le Polokalame mo le Sauniga o le Faiva ma le Olaga Faa-Kerisiano
FEPUARI 6-12
ʻOA TAUTELE MAI I LE AFIOGA A LE ATUA | ISAIA 47-51
“O le Usitaʻi iā Ieova e Iʻu ai i Faamanuiaga”
(Isaia 48:17) O le fetalaiga lenei a Ieova o Lē e toe faatauina oe, o Lē e Paia o Isaraelu: “O aʻu o Ieova, lou Atua, o Lē o loo aʻoaʻo oe i mea e aogā iā te oe, o Lē e taʻitaʻiina oe i le ala e ao ona e ui ai.
ip-2 131 ¶18
Aʻoaʻoina i Tatou e Ieova mo lo Tatou Lelei
“Faalogo Mai i Aʻu Poloaʻiga!”
18 E ala i le agaga o Ieova, na faapea mai le perofeta: “Ua auina mai aʻu atoa ma lona agaga e le Alii Pule Silisili Ese o Ieova. O le fetalaiga lenei a Ieova o Lē e toe faatauina oe, o Lē e Paia o Isaraelu: “O aʻu o Ieova, lou Atua, o Lē o loo aʻoaʻo oe i mea e aogā iā te oe, o Lē e taʻitaʻiina oe i le ala e ao ona e ui ai.” (Isaia 48:16e, 17) O lenei faailoaga alofa o le manatu mamafa mai o Ieova, na tatau ona faamautinoa atu ai i le nuu o Isaraelu, o le a faasaʻoloto i latou e Ieova mai i Papelonia. O Ieova o le a toe faatauina i latou. (Isaia 54:5) O le faanaunauga moni o Ieova, ina ia toe faaleleia la latou faiā ma tagata Isaraelu ma ia usiusitaʻi i ana faatonuga. O le tapuaʻiga moni e faavae i le usiusitaʻi i faatonuga mai i le Atua. E lē mafai e tagata Isaraelu ona savavali i le ala saʻo, seʻi vaganā ua aʻoaʻoina i latou i le ʻala e ao ona ui ai.’
(Isaia 48:18) E lelei pe a e faalogo mai i aʻu poloaʻiga! Ona pei ai lea o se vaitafe lou filemu, ma lau amiotonu e pei o galu o le sami.
ip-2 131 ¶19
Aʻoaʻoina i Tatou e Ieova mo lo Tatou Lelei
19 Ua faaalia mai ma le matagofie le faanaunauga o Ieova ina ia lē oo ni mala i ona tagata ae ia maua le olioli: “E lelei pe a e faalogo mai i aʻu poloaʻiga! Ona pei ai lea o se vaitafe lou filemu, ma lau amiotonu e pei o galu o le sami.” (Isaia 48:18) Maʻeu se augani alofa mai i le Pule Silisili Ese o Lē na foafoaina mea uma. (Teuteronome 5:29; Salamo 81:13) Nai lo le ave faapagota, na mafai ona maua e tagata Isaraelu le tele o le filemu e pei o le tafe o le vai. (Salamo 119:165) O a latou galuega o le amiotonu e lē mafaitaulia e pei o galu o le sami. (Amosa 5:24) O le manatu mamafa o Ieova i le fanauga a Isaraelu, sa ia augani atu ai iā i latou, ma faailoa i ai ma le alofa le auala e ao ona savavali ai. E lelei pe a latou faalogo iā te ia.
(Isaia 48:19) E pei o le oneone lau fanau ma o ē e tupuga mai i lou manava. E lē soloiesea lou igoa pe aveesea mai i oʻu luma.
ip-2 132 ¶20-21
Aʻoaʻoina i Tatou e Ieova mo lo Tatou Lelei
20 O ā faamanuiaga e maua e Isaraelu pe a latou faaalia le salamō? Ua faapea mai Ieova: “E pei o le oneone lau fanau ma o ē e tupuga mai i lou manava. E lē soloiesea lou igoa pe aveesea mai i oʻu luma.” (Isaia 48:19) Sa faamanatu atu e Ieova i tagata lana folafolaga o le a avea le fanau a Aperaamo ma nuu e tele, “e pei o fetu o le lagi, e pei foʻi o oneone o le matafaga.” (Kenese 22:17; 32:12) Ae na fouvale lenei fanau a Aperaamo, ma lē maua ai le aiā e faataunuu ai lenei folafolaga iā i latou. O le mea moni, sa matuā leaga lo latou talaaga, ma e tusa ai o le tulafono a Ieova, sa tatau ona tafiesea i latou o se nuu. (Teuteronome 28:45) Peitaʻi, e leʻi finagalo Ieova e tafiesea aʻiaʻi ona tagata pe lafoaʻia i latou.
21 O mataupu silisili o loo i lenei fuaiupu e mafai foʻi ona faatatau i auauna a Ieova i aso nei. O Ieova o le Puna o le ola, ma e sili atu lona silafia i lo o se isi lava i le auala e ao ona faaaogā ai o tatou olaga. (Salamo 36:9) E na te aumaia taʻiala, e lē ina ia faasāsā naʻuā, ae ia tatou maua ai ni aogā. E tali mai Kerisiano moni e ala i le saʻilia o le taʻitaʻiga a Ieova. (Mika 4:2) O ana faatonuga e puipuia ai lo tatou itu faaleagaga, la tatou faiā ma ia, ma e puipuia ai foʻi i tatou mai i taaʻiga leaga a Satani. Pe a tatou talisapaia mataupu silisili o loo faavae ai tulafono a Ieova, o le a tatou iloa ai o loo aʻoaʻoina i tatou e Ieova mo lo tatou lelei. E tatou te mautinoa ai foʻi “e lē mamafa ana poloaʻiga,” ma o le a lē faaumatiaina i tatou.—1 Ioane 2:17; 5:3.
Saʻiliʻiliga Loloto mo ʻOa Faaleagaga
(Isaia 49:6) Ua fetalai mai foʻi o ia: “E lē o se mataupu māmā le avea o oe ma aʻu auauna, ina ia faaeaina mai ituaiga o Iakopo ma ia faafoʻisia ē o malupuipuia o Isaraelu; ua ou tuuina atu foʻi oe e fai ma malamalama o nuu, ina ia oo laʻu faaolataga i tuluʻiga uma o le lalolagi.”
Manatu Tāua Mai le Tusi o Isaia—II
49:6—Ua faapefea ona avea le Mesia “ma malamalama o nuu ese,” e ui o lana talaʻiga i le lalolagi, na gata i tagata Isaraelu? E māfua lea tulaga ona o mea na tutupu ina ua mavae le maliu o Iesu. O loo faasino atu e le Tusi Paia le Isaia e 49:6 i soo o Iesu. (Galuega 13:46, 47) I aso nei, o Kerisiano faauuina faatasi ma le fesoasoani a le motu o tagata e toʻatele, ua fai “ma malamalama o nuu ese,” e faamalamalama ai tagata “e oo i tuluʻiga o le lalolagi.”—Mataio 24:14; 28:19, 20.
(Isaia 50:1) Ua faapea ona fetalai mai o Ieova: “O fea le pepa faamaonia a lo outou tinā o le teteʻaga, o lē na ou tuliesea? O ai le tagata na ou aitalafu ai o lē na ou faatau atu i ai outou? Faauta! Ona o a outou mea sesē ua faatauina atu ai outou, ua tuliesea foʻi lo outou tinā ona o a outou solitulafono.
it-1 643 ¶4-5
Teteʻa po o le Tatala o Faaipoipoga
Teteʻa Faafaatusa. O loo faaaogāina i le Tusi Paia le faiā faalefaaipoipoga i se auala faafaatusa. (Isa 54:1, 5, 6; 62:1-6) O loo taʻua foʻi i Tusitusiga Paia le teteʻa, po o le faateʻa ese o le avā i se auala faafaatusa.—Ie 3:8.
Na faatoʻilaloina le malo o Iuta ma faaumatia Ierusalema i le 607 T.L.M., ma sa ave faapagota tagata o le nuu i Papelonia. Ae i tausaga muamua atu, sa fai atu faavaloaga Ieova i tagata Iutaia o le a ave faapagota: “O fea le pepa faamaonia a lo outou tinā o le teteʻaga, o lē na ou tuliesea?” (Isa 50:1) Sa tuliesea lo latou “tinā” po o le nuu atoa ona o se māfuaaga tatau, e lē faapea ua solia e Ieova la latou feagaiga, ae ona ua latou solia le feagaiga o le Tulafono. Ae o nisi o vaega totoe o tagata sa faaalia le salamō ma tatalo mo le toe faafouina o la latou faiā ma Ieova lea e pei o se tane, pe a toe foʻi i lo latou laueleele. Ona o le suafa o Ieova lava ia, na ia faasaʻoloto ai ona tagata e pei ona ia folafola mai. Na tupu lenā mea i le 537 T.L.M., ma o le iʻuga lea o le 70 tausaga o le faatafunaga.—Sl 137:1-9; tagaʻi i le MARRIAGE.
Faitau Tusi Paia
(Isaia 51:12-23) “O aʻu, o aʻu lava o Lē e faamāfanafana iā te outou. “O ai ea oe e te fefe ai i le tagata e oti, ma le atalii o le tagata o lē o le a iʻu ina avea ma vao muʻa? 13 O ai ea foʻi oe e te faagaloina ai Ieova o Lē na faia oe, o Lē na folasia le lagi ma tuuina le faavae o le lalolagi, ma e fefe ai pea i le aso atoa ona o le lotoa o lē na taofiofia oe, e pei ua sauni o ia e faaumatia oe? O fea le lotoa o lē o loo taofiofia oe? 14 “O lē o loo faanoʻunoʻu i filifili uʻamea o le a vave lava ona tatalaina o ia, ina neʻi oti o ia ma alu atu i le lua ma o le a lē matelāina foʻi o ia i le fia ʻai. 15 “A o aʻu, o Ieova o lou Atua, o Lē e faagaepu le sami ina ia ū mai ona galu. O lona igoa o Ieova o ʻau. 16 O le a ou tuu aʻu upu i lou gutu, ma ou ufiufia oe i le paolo o loʻu lima, ina ia faavaeina le lagi ma tuuina atu le faavae o le lalolagi ma fai atu iā Siona, ʻO loʻu nuu lava oe.’ 17 “Ierusalema e, inā ala mai ia oe, inā ala ia oe, inā tulaʻi ia, o oe o lē na inu mai i le lima o Ieova i le ipu o lona toʻasā. Na e inuina uma le ipu uaina, o le ipu lea e tautevateva ai. 18 Ua leai se isi o lana fanau tama uma na ia fanaua na te taʻitaʻiina o ia, ua leai foʻi se isi o lana fanau tama uma na ia tausia e tago atu i lona lima. 19 O mea ia e lua ua oo iā te oe. O ai o le a tigā alofa iā te oe? O le faatafunaina, o le lepetia, o le fia ʻai, ma le pelu! O ai o le a faamāfanafana iā te oe? 20 Ua matapogia lau fanau tama. Ua latou taooto i le fetaulaʻiga o auala uma e pei o mamoe taaloa i le upega, o i latou ua oo i ai le toʻasā tele o Ieova, o le aʻoaʻiga malosi mai i lou Atua.” 21 O le mea lea, faamolemole inā faalogo mai ia i lenei mea, o oe le fafine e, o lē ua puapuagatia ma onā, ae e lē i le uaina. 22 O loo faapea ona fetalai mai lou Alii o Ieova, o lou Atua foʻi o lē o loo tau mo lona nuu: “Faauta! O le a ou aveesea mai i lou lima le ipu e tautevateva ai. E te lē toe inu lava i le ipu uaina, o le ipu o loʻu ita tele. 23 O le a ou tuu atu lea mea i lima o ē ua faatigā mai iā te oe, o ē na faapea mai iā te oe, ʻInā punou ia i lalo ina ia matou sopoʻia atu ai,’ auā na masani ona fai lou papatua e pei o le eleele, e pei foʻi o le ala mo ē e savavali ai.”
FEPUARI 13-19
ʻOA TAUTELE MAI I LE AFIOGA A LE ATUA | ISAIA 52-57
“Na Puapuagatia le Keriso mo i Tatou”
(Isaia 53:3-5) Ua inosia o ia ma tuulafoaʻiina e tagata, o le tagata ua iloa tigā ma masani i maʻi. Ua liliuese o tatou mata ina neʻi vāai atu i ona fofoga. Ua inosia o ia ma faalēaogāina o ia e i tatou. 4 E moni ua ia tauave o tatou maʻi; ua ia tauave foʻi o tatou tigā. A o i tatou, ua manatu ua faamalaiaina o ia, ua taia, ma faapuapuagatia e le Atua. 5 Ae ua tuʻia o ia ona o a tatou solitulafono; ua nutililiia o ia ona o a tatou mea sesē. Ua oo iā te ia le aʻoaʻiga lea e filemu ai i tatou, ma o ona manuʻa ua faamālōlōina ai i tatou.
Le Auauna a Ieova—ʻUa Manuʻa Ona o a Tatou Solitulafono’
Ua “Inosia” ma ua “Lē Manatua”
3 Faitau le Isaia 53:3. Seʻi tau ina manatu i le mea atonu sa uiga i ai lenei mea mo le Alo pele e toʻatasi o le Atua, o le tuua lea o lana auaunaga olioli faatasi ma lona Tamā, ae afio mai i le lalolagi ina ia foaʻi mai lona soifua e fai ma taulaga e laveaʻi ai tagata mai le agasala ma le oti! (Fili. 2:5-8) O lana taulaga e mo le faamagaloina moni o agasala, lea sa faaāta mai e taulaga na ofoina atu i manu i lalo o le Tulafono a Mose. (Epe. 10:1-4) Pe lē o le māfuaaga ea lea sa tatau ai ona talia ma faamamaluina o ia e tagata Iutaia, o ē sa faatalitali i le Mesia na folafolaina mai? (Ioa. 6:14) Nai lo lea, sa “inosia” Keriso e tagata Iutaia, ma na latou “lē manatua lava o ia” e pei ona sa valoia e Isaia. Na tusi le aposetolo o Ioane e faapea: “Na afio mai o ia i lona lava nuu, ae latou te leʻi taliaina o ia.” (Ioa. 1:11) Na taʻu atu e le aposetolo o Peteru i tagata Iutaia e faapea: “O le Atua o o tatou augātamā, ua ia faamamaluina lana Auauna o Iesu, o lē na outou tuuina atu ma faafitia o ia i luma o Pilato, a o loto e faasaʻoloto iā te ia. Ioe, na outou faafitia lē e paia ma amiotonu.”—Galu. 3:13, 14.
4 Sa valoia foʻi e Isaia faapea o Iesu o le tagata ua “masani foʻi ma le tigā.” I le taimi o le talaʻiga a Iesu, e mautinoa sa iai taimi na vaivai ai o ia, peitaʻi e leai se faamaoniga e iloa ai na maʻi o ia. (Ioa. 4:6) Peitaʻi, sa masani o ia i tigā o tagata na ia talaʻi i ai. Sa mutimutivale lona alofa iā i latou ma e toʻatele tagata na ia faamālōlōina. (Mare. 1:32-34) O lea na faataunuu ai e Iesu le valoaga lea e faapea mai: “E moni, ua na tauave o tatou tigā, ma na tauave o tatou faanoanoa.”—Isa. 53:4a; Mata. 8:16, 17.
E Pei “ua Fasia e le Atua”
5 Faitau le Isaia 53:4e. O le toʻatele o tagata na soifua i le vaitaimi o Iesu e leʻi malamalama i le māfuaaga o lona mafatia ma lona maliu. Sa latou manatu ua faasalaina o ia e le Atua, e pei ua taia o ia i se maʻi leaga. (Mata. 27:38-44) Sa molia e tagata Iutaia Iesu i lona upu leaga i le Atua. (Mare. 14:61-64; Ioa. 10:33) O le mea moni, e leʻi agasala Iesu pe upu leaga i le Atua. Ae pe a manatu i le anoanoaʻi o lona alofa mo lona Tamā, o le manatu la e faapea sa tatau ona oti o ia ona o le upu leaga i le Atua, sa mafai ona faaopoopo atu i ona mafatiaga i le avea ai ma Auauna a Ieova. Ae ui i lea, sa ia lotomalie e gauaʻi i le finagalo o Ieova.—Mata. 26:39.
(Isaia 53:7, 8) Na sauāina o ia, na ia tuu atu foʻi o ia lava ia faapuapuagatia; ae e lē tautala o ia. Ua taʻitaʻiina o ia e pei o le mamoe o le a fasia; ma e pei o le mamoe fafine e gūgū i luma o ē e sele i ona fulufulu, e lē tautala mai foʻi o ia. 8 Na sauāina o ia ma aveesea e aunoa ma le faamasinoina ma le tonu; ma o ai foʻi e manatunatu i faamatalaga uma e uiga i lona tupuaga? Auā ua vavaeese o ia mai i ē o loo soifua. Na tāina o ia ona o le solitulafono a loʻu nuu.
Le Auauna a Ieova—ʻUa Manuʻa Ona o a Tatou Solitulafono’
“E Pei o le Tamaʻi Mamoe ua Taʻitaʻiina ia Fasia”
10 Faitau le Isaia 53:7, 8. Ina ua vaai atu Ioane le Papatiso ua latalata ane Iesu, na ia alaga e faapea: “Vaai! O le Tamaʻi Mamoe a le Atua, o lē e na te aveeseina le agasala a le lalolagi!” (Ioa. 1:29) I le faasino atu iā Iesu o se Tamaʻi Mamoe, atonu sa manatua e Ioane upu a Isaia, e faapea: “E pei o le tamaʻi mamoe ua taʻitaʻiina ia fasia.” (Isa. 53:7) Na valoia e Isaia e faapea, “Ua ia sasaa atu o lona ola ia oti.” (Isa. 53:12) O le itu e mataʻina ai, i le pō ina ua faatulaga e Iesu le Faamanatuga o lona maliu, na ia tuuina atu ai se ipu uaina i aposetolo faamaoni e toʻa 11 ma faapea atu: “O le faatusa lenei o loʻu ʻtoto o le feagaiga,’ e faamaligiina mo tagata e toʻatele e faamagalo ai.”—Mata. 26:28.
(Isaia 53:11, 12) Ona o ona mafatiaga o le a vaai ai o ia i mea lelei, o le a faamalieina foʻi o ia. O mea ua ia silafia, o le a taʻuamiotonuina ai le toʻatele o tagata e lē ua amiotonu, o laʻu auauna; ma o le a tauaveina lava e ia a latou mea sesē. 12 O le mea lea, ou te vavae atu ai iā te ia se vaega faatasi ma le toʻatele, o le a vaevae foʻi e ia mea na vetea faatasi ma ē e malolosi, talu ai na ia sasaaina lona ola i le oti, na faitauina foʻi o ia faatasi ma tagata solitulafono; na tauave foʻi e ia agasala a le toʻatele o tagata, ma ua fautua atu o ia ona o tagata solitulafono.
Le Auauna a Ieova—ʻUa Manuʻa Ona o a Tatou Solitulafono’
O le Auauna ua “Taʻuamiotonuina ai Tagata e Toʻatele”
13 Faitau le Isaia 53:11, 12. Na fetalai Ieova e faatatau i lana Auauna ua filifilia e faapea: “E taʻuamiotonuina ai tagata e toʻatele e laʻu auauna ua amiotonu.” I le ā le auala? Ua aumaia i le faaiʻuga o le fuaiupu e 12 iā i tatou le tali. “Ua fautua foʻi o ia [le Auauna] mo ē solitulafono.” O tagata uma e tupuga mai iā Atamu ua fananau mai ma le agasala, o “ē solitulafono,” ma o lea ua latou maua ai “le totogi o le agasala,” o le oti. (Roma 5:12; 6:23) Ua talafeagai ai la ona faia se leleiga i le va o Ieova ma tagata agasala. O loo matagofie ona faamatalaina i le mataupu e 53 o le valoaga a Isaia, le auala na “fautua” ai Iesu mo tagata agasala, i le faapea mai: “O le aʻoaʻiga e filemu ai tatou sa i ona luga lea, o ona faalavalava foʻi ua mālōlō ai tatou.”—Isa. 53:5.
Saʻiliʻiliga Loloto mo ʻOa Faaleagaga
(Isaia 54:1) “Inā alaga fiafia ia oe le fafine pā sa lē fanau! Inā olioli ia ma alaga fiafia ma ia alaga leotele, o oe le fafine e leʻi tigā i le tigā a fanau, auā e toʻatele atu le fanau a lē ua tuulafoaʻiina nai lo o le fanau a le fafine ua iai lana tane,” ua fetalai mai ai Ieova.
O se Tala “Faatusa” e Aogā iā i Tatou
Ae o ai na faaata e le “fafine saʻoloto” o Sara ma lana tama o Isaako? Sa faaalia e Paulo o Sara, “le fafine e pa sa lē fanau,” na faaataina le avā a le Atua, le vaega faalelagi o lana faalapotopotoga. Sa pa lenei fafine faalelagi i se uiga faapea, sa leai sana “fanau” faauuina e le agaga o le Atua i le lalolagi, a o leʻi afio mai Iesu. (Kalatia 4:27; Isaia 54:1-6) Peitaʻi i le Penetekoso 33 T.A., na liligi ifo ai le agaga paia i luga o se vaega o tane ma fafine, o ē na toe fanaufouina e avea o ni fanau a lenei fafine faalelagi. O fanau na maua mai lenei faalapotopotoga, na vaetamaina o ni tamafai a le Atua, ma avea ma suli faatasi ma Iesu i lalo o se feagaiga fou. (Roma 8:15-17) Na tusi Paulo, o se tasi o lenei fanau: “O Ierusalema i lugā o lē saʻoloto ia, o le tinā o i tatou uma lava ia.”—Kalatia 4:26.
(Isaia 57:15) Auā o le fetalaiga lenei a Lē ua Silisili ma Maualuga, o lē e afio e faavavau ma o lē e paia lona suafa: “Ou te nofo i le mea maualuga ma le mea paia, e ma te mau foʻi ma lē ua nutimomoia ma faamaulalo, ina ia faafouina loto o ē ua faatauvaa ma faafouina loto o ē ua nutimomoia.
Ia Loto Maulalo
Faaaʻoaʻoga Sili o le Faamaulalo
3 E lē masuʻesuʻeina le silisili ese ma le maualuga o Ieova, ae ui i lea o ona fofoga “e fetaufetuliaʻi i le lalolagi uma, na te fesoasoani iā te i latou o ē ua sao o latou loto iā te ia.” (2 Nofoaiga a Tupu 16:9) O le ā le mea e faia e Ieova pe a ia silafia tagata tapuaʻi ua tigāina ona o tofotofoga eseese? E mafai ona faapea atu, o loo “nonofo” o ia faatasi ma i latou na e ala i lona agaga paia, e “faamāfanafana i ē ua loto maulalo, ma faamāfanafanaina loto o ē ua loto momomo.” (Isaia 57:15) O lea la, ua faamāfanafanaina ona tagata tapuaʻi ma ua sili atu ai ona faaauupegaina e auauna iā te Ia ma le olioli. E mataʻina le faamaulalo o le Atua!
Faitau Tusi Paia
(Isaia 57:1-11) Ua fano lē ua amiotonu, ae e leai se isi e manatu i ai. Ua feoti tagata faamaoni a ua lē mātauina e se isi, ua oti le tagata amiotonu ma sao ai mai i mala. 2 Ua ulu atu o ia i le filemu; ua mālōlō i latou i o latou moega, ua taʻitoʻatasi i latou ma savavali ma le tonu. 3 “A o outou, ia outou faalatalata mai i inei, o outou o fanau tama a le fafine vavalo, o fanau a lē e mulilua ma le fafine talitane: 4 O ai ua fai i ai a outou faafiafiaga? O ai tou te faamaga i ai o outou gutu, ma faaeto i ai o outou laulaufaiva? Pe e lē o outou ea o fanau o le solitulafono, o fanau foʻi o le pepelo, 5 o ē e faatupu le manaʻo i atua sesē i mea ua iai laau tetele, i lalo o laau lauolaola uma, o loo fasiotia ai fanau i vanu i lalo o maluapapa? 6 “Na avea maa lamolemole mai le vanu ma au vaega. O ia mea, o ia mea ua fai ma ou tofi. E lē gata i lea, ua e liligi le taulaga i meainu i ia mea, ua e ofo atu foʻi i ai se meaalofa. Pe e faamāfanafanaina ea aʻu i ia mea? 7 Ua e tuu lou moega i le tumutumu o le mauga maualuga. O i inā foʻi ua e alu aʻe i ai ina ia faia ai taulaga. 8 O tua foʻi o le faitotoʻa ma pou o le faitotoʻa, ua e tuu ai se mea e faamanatu ai. Ua e tuulafoaʻi aʻu ma faaalialia oe ma ua e alu aʻe; ua e faalautele atu lou moega. O lou lava lelei ua e osia ai le feagaiga ma i latou. Ua e manaʻo i lo latou moega. Ua e vaai i le totogasā o le tane. 9 Ua e alu ifo ma le suāuu iā Meleke, ma le tele o au uu manogi. Ua e auina atu pea au avefeʻau i mea mamao, ma ua e tuuina ifo au mataupu i le Tuugamau. 10 O le tele o ou ala ua e matuā galue mamafa ai. Ua e lē fai mai, ʻ Ua siliga se faamoemoe!’ Ua e toe maua lou lava malosi. O le mea lea ua e lē maʻi ai. 11 “O ai na e fefe ma mataʻu i ai ua e pepelo ai? Ae e lē o aʻu na e manatuaina. Ua e lē teua se mea i lou loto. Pe na ou lē gagana ea ma natia mataupu? O lea, e te leʻi fefe ai lava iā te aʻu.
FEPUARI 20-26
ʻOA TAUTELE MAI I LE AFIOGA A LE ATUA | ISAIA 58-62
“Folafola Atu le Tausaga e Faaalia Mai ai e Ieova Lona Agalelei”
(Isaia 61:1, 2) Ua i oʻu luga le agaga o le Alii Pule Silisili Ese o Ieova, auā ua faauuina aʻu e Ieova e folafola atu le tala lelei i ē e agamalu. Ua ia auina atu aʻu e fusifusi i ē ua loto momomo, e folafola atu le saʻolotoga i ē ua ave faapagota ma le matuā faapupulaina o mata o pagota; 2 ina ia folafola atu le tausaga e faaalia mai ai e Ieova lona agalelei ma le aso e tauimasui ai e lo tatou Atua; e faamāfanafana ai i ē uma o loo faavauvau;
ip-2 322 ¶4
E Tupu le Amiotonu Mai i Siona
“Folafola Atu le Tausaga e Faaalia Mai ai e Ieova Lona Agalelei”
4 Na tusi Isaia: “Ua i oʻu luga le agaga o le Alii Pule Silisili Ese o Ieova, auā ua faauuina aʻu e Ieova e folafola atu le tala lelei i ē e agamalu. Ua ia auina atu aʻu e fusifusi i ē ua loto momomo, e folafola atu le saʻolotoga i ē ua ave faapagota ma le matuā faapupulaina o mata o pagota.” (Isaia 61:1) O ai na filifilia e faailoa atu le tala lelei? E foliga mai na faasino muamua atu iā Isaia, lea na faagaeeina e le Atua e faamauina le tala lelei mo ē na faaaunuua i Papelonia. Peitaʻi na faasino atu Iesu i le faataunuuga sili, ina ua ia faatatauina upu a Isaia iā te ia lava. (Luka 4:16-21) Ioe, na auina mai Iesu e talaʻi le tala lelei i ē agamalu, o lea na faauuina ai o ia i le agaga paia ina ua papatiso.—Mataio 3:16, 17.
(Isaia 61:3, 4) ina ia avatu se ufiulu i ē o faavauvau ona o Siona e sui ai le lefulefu, o le suāuu o le olioli e sui ai le faavauvau, o le ofu tele o viiga e sui ai le agaga nutimomoia; e ao ona taʻua i latou o laau tetele o le amiotonu, o mea totō a Ieova ina ia faamatagofieina ai o ia. 4 E latou te toe fausia mea ua leva ona faatafunaina; e latou te toe atiaʻe mea na gaogao mai i aso ua mavae, e latou te toe faafouina aai ua faatafunaina, o mea na gaogao mai i lea tupulaga ma lea tupulaga.
ip-2 326-327 ¶13-15
E Tupu le Amiotonu Mai i Siona
13 Talu mai le Penetekoso e 33 T.A. na totō ai e le Atua “laau tetele o le amiotonu” po o Kerisiano faauuina lototetele, i le laueleele faaleagaga o lona nuu fou, “le Isaraelu a le Atua.” (Kalatia 6:16) A o faagasolo senituri, na faasolo ina manino mai ai e 144,000 nei “laau,” ma o loo latou fuaina mai fua o le amiotonu e faamatagofie pe faamamaluina ai Ieova le Atua. (Faaaliga 14:3) Na tupu lauolaola le vaega mulimuli o nei laau matagofie talu mai le 1919, ina ua toe faafoʻisia e Ieova le vaega totoe le Isaraelu a le Atua mai lo latou tulaga lē toe gaoioi faaleagaga sa iai mo se taimi e lē tumau. O le faasūsūina e Ieova o i latou i le tele o vai faaleagaga, na ia maua ai ni laau tetele o le amiotonu e fuaina mai ai ni fua.—Isaia 27:6.
14 Na faamatilatila e Isaia le galuega a nei laau ina ua ia faapea atili mai: “E latou te toe fausia mea ua leva ona faatafunaina; e latou te toe atiaʻe mea na gaogao mai i aso ua mavae, e latou te toe faafouina aai ua faatafunaina, o mea na gaogao mai i lea tupulaga ma lea tupulaga.” (Isaia 61:4) O le faatonuga a Kuresa le tupu o Peresia, na toe foʻi ai mai Papelonia tagata Iutaia faamaoni e toe fausia Ierusalema ma lona malumalu, lea na tuua i se tulaga pagatia mo se taimi umi. O lenei galuega o le toe faafoʻisiaga, e iai foʻi lona fesootaʻiga i tausaga ina ua mavae le 33 T.A. ma le 1919.
15 I le 33 T.A., na matuā faanoanoa ai soo o Iesu ina ua puʻea, faamasinoina, ma fasiotia o ia. (Mataio 26:31) Peitaʻi, na suia lenā tulaga ina ua toe faaali atu Iesu iā i latou ina ua mavae lona toetū. I le taimi na liligi ifo ai le agaga paia iā i latou, na latou pisi e talaʻi atu le tala lelei, “i Ierusalema, i Iutaia uma ma Samaria, ma tuluʻiga uma o le lalolagi.” (Galuega 1:8) O lea na amata ai ona latou faafoʻisia le tapuaʻiga mamā. I se tulaga talitutusa, talu mai le 1919 na uunaʻia ai e Iesu Keriso le vaega totoe o ona uso faauuina e toe fausia “mea na gaogao mai i lea tupulaga ma lea tupulaga.” I le tele o senituri na lē taulau taʻitaʻi o lotu ua faapea mai o Kerisiano i le aʻoaʻoina o le poto mai iā Ieova, ae na latou suia i tū a tagata ma talitonuga e lē faavaea i le Tusi Paia. Na aveesea e Kerisiano faauuina mai i le faapotopotoga tū na pisipisia i lotu sesē, ina ia mafai ai ona agaʻigaʻi i luma le toe faafoʻisiaga o le tapuaʻiga moni. Na latou amataina le galuega talaʻi lea ua sili atu ona telē i aso nei.—Mareko 13:10.
(Isaia 61:5, 6) “E ō mai foʻi tagata ese ma leoleo i a outou lafu, e fai foʻi tagata mai i isi atunuu ma a outou faifaatoʻaga ma ē e galulue i ou togāvine. 6 A o outou o le a taʻua outou o ositaulaga a Ieova; e taʻua foʻi outou o auauna a lo tatou Atua. O le a aai outou i punaʻoa o atunuu, ma e tou te tautatala ma le fiafia ona o ʻoa mamalu tou te maua mai iā i latou.
Autasia ʻĒ Aumau’ i le Tapuaʻiga Moni
5 Atonu e mafaufau nisi i le valoaga o loo faamauina i le Isaia mataupu e 61, lea e faatatau i le faapotopotoga Kerisiano. I le fuaiupu e 6, o loo taʻua ai nisi e auauna o ni “ositaulaga a Ieova.” Peitaʻi, i le fuaiupu e 5, o loo taʻua ai “tagata mai i isi atunuu” o loo galulue e fesoasoani i ositaulaga. O le ā le uiga o lenei valoaga?
6 E faasino atu “ositaulaga a Ieova” i Kerisiano faauuina. O i latou ia e mauaina le ʻuluaʻi toetū ma e fai i latou ma ositaulaga a le Atua ma le Keriso, e pule i latou o ni tupu faatasi ma ia mo le afe tausaga.’ (Faaa. 20:6) O loo galulue faatasi isi Kerisiano faamaoni o le a ola i le Parataiso i le lalolagi, po o “isi mamoe,” faatasi ma le ʻaufaauuina. Peitaʻi, ona e lē o i latou o se vaega o le “Isaraelu a le Atua,” o le māfuaaga lea e taʻua ai i latou o tagata mai i isi atunuu. E latou te galulue faatasi ma “ositaulaga a le Atua,” i le avea ai o i latou o ni ʻfaifaatoʻaga ma ē e galulue i togāvine.’ E latou te fesoasoani i le ʻaufaauuina i le galuega talaʻi, faapea le aʻoaʻoina o isi i le upu moni.—Ioa. 10:16.
Saʻiliʻiliga Loloto mo ʻOa Faaleagaga
(Isaia 60:17) Ou te aumaia le auro e sui aʻi le ʻapamemea, ou te aumaia foʻi le siliva e sui aʻi le uʻamea, o le ʻapamemea e sui aʻi le laupapa, o le uʻamea e sui aʻi maa; ou te tofia le filemu e fai ma ou ovasia ma le amiotonu e fai ma lē e tofia atu galuega.
Galulue e Faamatagofie Atili le Parataiso Faaleagaga
14 A o faagasolo tausaga, na mātauina ai e nisi ua matutua i le taimi lenei nisi o suiga i le faalapotopotoga, lea ua atili ai ona matagofie le vaega faalelalolagi o le faalapotopotoga a Ieova. E latou te manatua le taimi sa iai le auauna o le faapotopotoga, nai lo o le ʻautoeaina, le auauna o le lālā nai lo o le Komiti o le Lālā, faapea le taimi na aumai ai taʻiala mai i le peresitene o le Sosaiete o le Olomatamata, nai lo o le Vaega Pule o Molimau a Ieova. E ui e iai ē faamaoni sa fesoasoani i nei uso tuutoina atu, ae e toʻatasi lava le tagata sa gafa ma le faia o faaiʻuga i faapotopotoga, ofisa o lālā, ma le ofisa ulu. A o faagasolo vaitausaga o le 1970, na faia ai le suiga i le tuuina atu o le tiute tauave o ovasia i se vaega o toeaina nai lo o se tagata se toʻatasi.
15 Pe na aogā nei suiga? O le tulaga moni lenā. Aiseā? Talu ai o nei suiga na faavae mai i le faatuputeleina o lo tatou malamalama i faatulagaga o loo i le Tusi Paia. Nai lo o le faia e se tagata se toʻatasi o faaiʻuga uma, ae ua mafai ona maua e le faalapotopotoga aogā mai i uiga lelei uma o toeaina, po o “meaalofa i tagata.”—Efe. 4:8; Faata. 24:6.
16 Seʻi mafaufau foʻi i nisi o suiga talu ai nei, e pei o le suia o foliga, o mataupu ma le auala e tufatufa ai a tatou lomiga. O se fiafiaga le ofoina atu i le faiva i le fanua o nei lomiga matagofie, e aogā ma faaosonaunau. Pe a tatou faaaogāina tomai faaonapōnei e pei o le upega tafaʻilagi o le jw.org e faasalalau atu ai le upu moni, e tatou te faaatagia atu ai le naunau o Ieova e maua e tagata o loo matuā manaʻomia le taʻitaʻiga i so o se vaipanoa.
17 E lē tatau ona tatou faagaloina foʻi le atamai o le suiga ua maua ai le afiafi e faia ai le Tapuaʻiga a le Aiga ma tele le taimi e faia suʻesuʻega a le tagata lava ia. E tatou te talisapaia foʻi suiga lelei i a tatou fonotaga ma tauaofiaga. E masani ona tatou faapea atu ua siitia lava le tulaga o nei faatasiga i tausaga taʻitasi. Ua tatou fiafia foʻi i le tele o toleniga ua tatou maua mai i aʻoga faatiokarate. O nei suiga uma, ua tatou mautinoa ai i le fesoasoani a Ieova. O loo faasolosolo pea ona ia faamatagofieina lana faalapotopotoga ma le parataiso faaleagaga lea o loo tatou olioli ai i le taimi lenei.
(Isaia 61:8, 9) Auā o aʻu o Ieova ou te fiafia i le faamasinotonu, ae ou te ʻinoʻino i le gaoi ma le amiolētonu. O le a ou avatu lo latou totogi i le faamaoni, ma o le a ou osia ma i latou se feagaiga e tumau. 9 E iloga foʻi a latou fanau i totonu o atunuu, ma a latou tupuaga i totonu o nuu. O i latou uma e vāai iā i latou o le a iloaina o i latou o fanau ua faamanuiaina e Ieova.”
Manatu Tāua Mai le Tusi o Isaia—II
Taliina o Fesili Faale-Tusi Paia:
61:8, 9—O le ā le “feagaiga e faavavau,” ma o ai le “fanau”? O le feagaiga fou lenei na osia e Ieova ma Kerisiano faauuina. O le “fanau” o “isi mamoe”—le faitau miliona o tagata ua taliaina le latou feʻau.—Ioane 10:16.
Faitau Tusi Paia
(Isaia 62:1-12) Ou te lē filemu pea ona o Siona, ou te lē nofo filemu foʻi ona o Ierusalema seʻia alu atu lana amiotonu e pei o le malamalama, ma lona faaolataga e pei o se sulu e mumū. 2 “Le fafine e, o le a vāai atunuu i lau amiotonu, e vāai foʻi tupu i lou mamalu. E faaigoa foʻi oe i se igoa fou, e taʻu atu e Ieova lava ia. 3 E fai oe ma pale matagofie i le aao o Ieova, ma le pulou ʻie o le tupu i le alofilima o lou Atua. 4 E lē toe taʻua oe o le fafine ua matuā tuulafoaʻiina; e lē toe taʻua foʻi lou lava laueleele ua faatafunaina; ae e taʻua oe o Lē ua Ou Fiafia i ai, e taʻua foʻi lou laueleele o Lē ua Iai se Tane. Auā ua fiafia Ieova iā te oe, ma o le a maua lou laueleele e pei o lē ua iai se tane. 5 Auā e pei ona maua e le tauleʻaleʻa o se teine muli e fai ma ana avā, e faapea ona maua e lau fanau tama oe e pei o se avā. O le a olioli lou Atua iā te oe e pei ona olioli o le alii faaipoipo i le tamaʻitaʻi faaipoipo. 6 Ierusalema e, ou te tofia tagata vāai i luga o ou pā. Ia aua neʻi fifilemu pea i latou i le ao atoa ma le pō. “O outou o ē o taʻutaʻu atu Ieova, aua tou te fifilemu, 7 aua tou te tuu iā te ia ia filemu seʻia faamausalīina e ia, ioe, seʻia faia e ia Ierusalema ma viiga i le lalolagi.” 8 Ua tautō Ieova i lona aao taumatau ma lona aao malosi: “Ou te lē toe avatua lau fatu e fai ma meaʻai a ou fili, pe feinu foʻi tagata mai i isi atunuu i lau uaina fou, o mea ia sa e galue mamafa ai. 9 Ae o le a aai ai i latou e aoaoina, ma o le a latou vivii atu iā Ieova; e feinu ai foʻi o ē e faaputuina i oʻu lotoā paia.” 10 Inā ui atu ia, ia outou ui atu i faitotoʻa o le aai. Ia teu le ala mo le nuu. Inā atiaʻe ia, ia atiaʻe le ala tele. Ia aveese maa. Ia faatū se faailoilo mo le nuu. 11 Faauta! Ua faailoa atu e Ieova ina ia lagona mai i tuluʻiga o le lalolagi: “Ia outou fai atu i le tama fafine a Siona, ʻTagaʻi foʻi! O loo faaloloʻi mai lou faaolataga. O loo iā te ia lana taui, ma o loo i ona luma le totogi e na te tuuina atu.’ “ 12 E taʻua lava i latou e tagata, o le nuu paia, o ē na toe faatauina e Ieova; e taʻua foʻi oe, O le Aai ua Saʻilia, O se Aai e Leʻi Matuā Tuulafoaʻiina.
FEPUARI 27–MATI 5
ʻOA TAUTELE MAI I LE AFIOGA A LE ATUA | ISAIA 63-66
“O le Lagi Fou ma le Lalolagi Fou o le a Avea o se Mea e Olioli Ai”
(Isaia 65:17) “Auā foʻi o loo oʻu faia le lagi fou ma le lalolagi fou; e lē toe manatua mea sa iai muamua, e lē toe alu aʻe foʻi i le loto.
ip-2 383 ¶23
“Fiafia e Faavavau i Mea o Loo Oʻu Faia”
23 O loo faamatalaina i le tusi o Faaaliga, se vaaiga na iloa e le aposetolo o Ioane e faatatau i le aso o Ieova o loo faaloloʻi mai, pe a faaumatia lenei faiga o mea. Pe a māeʻa lenā, ona lafoina lea o Satani i le tō. (Faaaliga 19:11–20:3) Ina ua māeʻa lenā faamatalaga, ona faaleo mai lea e Ioane upu faavaloaga a le perofeta o Isaia ina ua ia tusi: “Ona ou iloa lea o le lagi fou ma le lalolagi fou.” O loo faasolosolo ona faamatala i fuaiupu o le mau, lenei vaaiga matagofie i le taimi o le a matuā suia ai e Ieova lenei lalolagi i se tulaga e sili ona lelei. (Faaaliga 21:1, 3-5) E manino mai o le folafolaga lea na taʻua e Isaia e faatatau i le “lagi fou ma le lalolagi fou,” o le a iai sona faataunuuga matagofie i le lalolagi fou a le Atua. I lalo o le pulega fou faalelagi, o le a maua ai e le sosaiete o tagata i le lalolagi se parataiso faaleagaga ma le faaletino. O se faamāfanafanaga le folafolaga e faapea “e lē toe manatua mea sa iai muamua, [maʻi, mafatiaga, ma puapuaga o loo fesagaʻia e tagata] e lē toe alu aʻe foʻi i le loto.” O mea uma o le a tatou manatua i lenā taimi, e lē mafai ona faapogaia ai ni tigā lea o loo mafatia ai le toʻatele i aso nei.
(Isaia 65:18, 19) Ae ia outou olioli ma fiafia e faavavau i mea o loo oʻu faia. Auā o loo oʻu faia Ierusalema ma mea e fiafia ai, e fai foʻi ona tagata ma mea e olioli ai. 19 O le a ou olioli iā Ierusalema ma ou fiafia i loʻu nuu; e lē toe lagonaina foʻi iā te ia le leo o le tagiauē po o le leo o le tagi faanoanoa.”
ip-2 384 ¶25
“Fiafia e Faavavau i Mea o Loo Oʻu Faia”
25 I aso foʻi nei, o loo faia e Ieova Ierusalema ma “mea e olioli ai.” E faapefea? E pei ona tatou iloiloina, o le lagi fou lea na amata i le 1914, o le a aofia ai pule lagolago e 144,000 lea o le a faia so latou vaega i le pulega faalelagi. Ua faamatalaina faavaloaga i latou o le “Ierusalema Fou.” (Faaaliga 21:2) Na fetalai le Atua e faatatau i le Ierusalema Fou: “O loo oʻu faia Ierusalema ma mea e fiafia ai, e fai foʻi ona tagata ma mea e olioli ai.” O le a faaaogā e le Atua le Ierusalema Fou e saunia mai le anoanoaʻi o faamanuiaga i tagata usiusitaʻi. O le a lē toe lagonaina se leo o le tagiauē ona o le tigā, auā o le a faamalieina e Ieova ʻmea e manaʻo ai o tatou loto.’—Salamo 37:3, 4.
(Isaia 65:21-23) O le a latou fausia fale ma nonofo ai; e latou te totō foʻi togāvine ma latou aai i ona fua. 22 O le a latou lē fausia ae e nonofo ai isi; o le a latou lē totō ae e aai ai isi. Auā e pei o le umi o aso o le laau o aso o loʻu nuu; ma o le a matuā fiafia uma oʻu tagata ua filifilia i galuega a o latou lima. 23 O le a lē galulue fua i latou, pe fananau mai ma tupu ai ni mala; ona o i latou o le fanau ua faia aʻe i ē ua faamanuiaina e Ieova, faatasi ma o latou tupuaga.
Filemu i le Afe Tausaga E oo i le Faavavau
ʻFAUSIA FALE MA TOTŌ TOGĀVINE’
4 E mananaʻo tagata uma e maua ni fale lelei, peitaʻi, o se faafitauli taatele i aso nei le lē lelei o fale e nonofo ai. O le toʻatele ua nonofo i aai tumutumu, a o nisi ua nonofo i nofoaga faataufusi ma fale ua pala ma lē toe saogalemu. E moomoo le toʻatele o tagata i ni fale lelei e maua ai le fiafia ma le saogalemu.
5 Ua faailoa mai i le valoaga a Isaia, le faataunuuina e le Pulega o le Malo, o moomooga o tagata ina ia maua ni o latou lava fale. E pei ona valoia e Isaia: “O le a latou fausia fale ma nonofo ai, e latou te totō foʻi togāvine ma latou aai i ona fua.” (Isa. 65:21) E lē na o le mauaina o le fale o le tagata lava ia le vala mataʻina o le a faataunuuina, auā o loo nonofo le toʻatele i aso nei i o latou lava fale. Peitaʻi, e latou te lagona le atuatuvale, ona o le taatele o le talepe fale, pe lē gafatia foʻi le tausiaina o a latou fale i le lumanaʻi. Ae maʻeu se suiga mataʻina o le a aumaia e le Malo o le Atua. E pei ona valoia e le perofeta o Mika: “E taʻitoʻatasi ma nofo i lalo o lona vine ma lalo o lona mati, e leai foʻi se tasi e faamataʻu iā i latou.”—Mika 4:4.
Saʻiliʻiliga Loloto mo ʻOa Faaleagaga
(Isaia 63:5) Ua ou vaavaai pea, a ua leai se fesoasoani; ua ou ofo foʻi, a ua leai se isi e fia lagolago mai. Ona faia lea e loʻu lima o le faaolataga mo aʻu, o loʻu lotoa foʻi na lagolagoina aʻu.
Manatu Tāua Mai le Tusi o Isaia—II
63:5—Na faapefea i le ita o le Atua ona lagomia pe lagolagoina o ia? O le ita o le Atua o se lagona e mafai ona ia pulea—o lona toʻasā amiotonu. O lona ita la po o lona toʻasā e lagolagoina ma uunaʻia ai o ia e faataunuu ana faasalaga faafaamasinoga amiotonu.
(Isaia 64:8) O lenei Ieova e, o oe o lo matou Tamā. O i matou o omea, a o oe o lo matou Fai Ipu Omea; o le galuega a ou aao i matou uma.
Ia Faatonutonuina Oe i Aʻoaʻiga a Ieova
LE AUALA UA FAAAOGĀ AI E LE FAI IPU OMEA LANA PULE
3 E iā Ieova le aiā e pule ai i tagata ma atunuu e pei o se fai ipu omea. Ua faapea mai le Isaia 64:8: “Ieova e, o oe o lo matou Tamā. O i matou o omea, a o oe o lo matou Fai Ipu Omea; o le galuega a ou aao i matou uma.” E faia e le fai ipu o mea so o se ipu e manaʻo ai i le paluga. E faapena le auala e feutagaʻi ai Ieova ma tagata. E lē pule le paluga po o le ā le ituaiga ipu e fausia. I se tulaga talitutusa, e lē o iā i tatou le aiā e faatonu ai Ieova i le auala e faatonutonu ai i tatou.—Faitau le Ieremia 18:1-6.
4 Na faatonutonu e Ieova Isaraelu e pei o le galuega a se fai ipu omea. Peitaʻi, e lē tutusa Ieova ma se fai ipu omea faale-tagata. I le ā le itu? Na tuuina e Ieova i tagata ma atunuu le meaalofa o le filifiliga saʻoloto e fai ai a latou lava filifiliga. E leʻi faia e Ieova nisi tagata e lelei a o nisi e leaga, pe faaaogā foʻi lana pule e faamalosia ai tagata e usiusitaʻi iā te ia. Nai lo o lea, e tatau ona filifili le tagata lava ia pe manaʻo e faasaʻo ma faatonutonuina o ia e Ieova.—Faitau le Ieremia 18:7-10.
5 Ae faapefea pe a teena e se tasi le taʻitaʻiga a Ieova? E faapefea ona faaaogā e Ieova lana pule e pei o se fai ipu omea? Pe a faigatā ona faia e le fai ipu omea se ituaiga o ipu o loo manaʻo i ai, e filifili o ia pe fai se isi ipu fou, pe tiaʻi foʻi lenā ipu. O le gaoioiga lenā e fai e se fai ipu omea, pe a sesē le auala e fausia ai se ipu. Peitaʻi, e lelei atoatoa le auala e faatonutonu ai e Ieova tagata. (Teu. 32:4) E lē tuuaʻia Ieova pe a musu se tasi e faasaʻo ma faatonutonuina o ia e Ieova. E fetuunaʻi e Ieova le auala e taʻitaʻia ai tagata e fua i le auala e latou te tali atu ai. E aogā iā Ieova i latou e usiusitaʻi iā te ia. O se faataʻitaʻiga, o le ʻaufaauuina o i latou o “ipu e faaaogā mo mea taʻuleleia.” A o i latou e teena le taʻitaʻiga a Ieova, o “ipu o le toʻasā ua tatau i ai le faaumatiaga.”—Roma 9:19-23.
Faitau Tusi Paia
(Isaia 63:1-10) O ai lea o loo afio mai mai i Etoma, o lē ua ofu i ofu sesega mai i Posara, o lē ua matagofie ona ofu, ua savali i le tele o lona mana? “O aʻu, o Lē e tautala i le amiotonu, o Lē ua tele le mana e faaola ai.” 2 Aiseā ua mūmū ai lou laʻei, ma ua pei ou laʻei o ofu o i latou o ē e solia vine i le mea e soli ai vine? 3 “Ua ou solia toʻatasi lava le mea e soli ai vine, a ua leai se tasi mai i le nuu e faatasi ma aʻu. Ua ou soli pea lava i latou ona o loʻu ita, ma ua ou solia i latou i lalo i loʻu lotoa. Ua pisipisi mai o latou toto i oʻu ofu ma ua leaga uma ai oʻu ofu. 4 Auā ua i loʻu loto le aso o le tauimasui, ma ua oo mai le tausaga o ē ua ou toe faatauina mai. 5 Ua ou vaavaai pea, a ua leai se fesoasoani; ua ou ofo foʻi, a ua leai se isi e fia lagolago mai. Ona faia lea e loʻu lima o le faaolataga mo aʻu, o loʻu lotoa foʻi na lagolagoina aʻu. 6 Ona ou solia pea lea o tagata i loʻu ita, ma ou faaonanā i latou i loʻu lotoa, ma sasaa i le eleele o latou toto ua pisipisi solo.” 7 Ou te taʻutaʻu atu gaoioiga o le alofa faamaoni o Ieova, o viiga o Ieova e tusa ma mea uma na faia e Ieova iā i tatou, e tusa ma le anoanoaʻi o mea lelei ua ia faia i le aiga o Isaraelu, e tusa ma lona alofa mutimutivale, e tusa foʻi ma le faulaʻi o lona alofa faamaoni. 8 Ua ia toe fetalai mai: “E moni o loʻu nuu i latou, o atalii e lē pepelo.” Na fai foʻi o ia ma o latou Faaola. 9 Na mafatia o ia i taimi o o latou mafatiaga. Na faaolaina i latou e lana lava avefeʻau. Na ia toe faatauina i latou ona o lona alofa ma lona alofa mutimutivale iā i latou, na ia siitia ma ave i latou i aso uma i taimi ua mavae. 10 Ae na latou fouvale ma faatigā i lona agaga paia. Ona suia ai lea o ia e fai ma o latou fili; na tau foʻi o ia faasaga iā i latou.