Lomiga mo le Polokalame mo le Sauniga o le Faiva ma le Olaga Faa-Kerisiano
OKETOPA 5-11
ʻOA TAUTELE MAI I LE AFIOGA A LE ATUA | ESOTO 31-32
“Ia Sosola Ese Mai i le Ifo i Tupua”
(Esoto 32:1) I lenā taimi, ua iloa e tagata ua tuai ona alu ifo Mose mai i le mauga. Ona faapotopoto mai lea o le nuu iā Arona ma faapea mai iā te ia: “Inā tulaʻi ia ma e faia se atua mo i tatou ma taʻitaʻia i tatou, auā o lenei tagata o Mose o lē na aumaia i tatou mai i Aikupito, tatou te lē o iloa po o le ā le mea ua tupu iā te ia.”
Ia Finafinau e Avea ma Ē Matutua Faaleagaga—“O Loo Latalata Mai le Aso Tele o Ieova”
11 E ono avea ma luʻi le faatatauina o mea e tatou te aʻoaʻoina mai le Tusi Paia, aemaise lava pe a faigatā tulaga o mea. O se faaaʻoaʻoga, e leʻi umi ona faasaʻolotoina e Ieova tagata Isaraelu mai le nofo pologa i Aikupito, ae ʻfinau le nuu iā Mose’ ma faaauau ai ona latou ʻtofotofoina Ieova.’ Aiseā? Ona o le utiuti o le suāvai taumafa. (Eso. 17:1-4) E leʻi atoa le lua masina talu ona latou osia se feagaiga ma le Atua, lea na latou malilie ai e fai mea uma “ua fetalai mai ai Ieova,” ae latou solia loa le tulafono o le ifo i tupua. (Eso. 24:3, 12-18; 32:1, 2, 7-9) Pe na tupu lenei tulaga ona o lo latou fefefe i le umi ona alu o Mose i le Mauga o Horepa lea na aʻoaʻoina ai o ia? Pe na latou manatu e ono toe osofaʻia i latou e tagata Amaleka, ae leai se mea a tagata Isaraelu e mafai e aunoa ma Mose, o lē na sisii i luga ona lima ma latou manumalo ai? (Eso. 17:8-16) Atonu o le tulaga lenā, ae po o le ā lava le tulaga, ae na “mumusu” tagata Isaraelu e “usiusitai.” (Galu. 7:39-41) Na timaʻi atu Paulo i Kerisiano “ia [latou] taumafai malosi” e ʻalofia le ʻpaʻuʻū atu i lenā faaaʻoaʻoga o le lē usiusitai,’ lea na faaalia e tagata Isaraelu ina ua latou fefefe e ulu atu i le Nuu o le Folafolaga.—Epe. 4:3, 11.
(Esoto 32:4-6) Ona ia ave lea o auro mai i o latou lima, ua ia faaaogāina se tofi e vane ai ma ia faia ai se tamaʻi povi mai i le auro ua faaliu suāvai. Ona faapea mai lea o nisi: “Isaraelu e, o lo outou atua lenei, o lē na taʻitaʻia outou mai i Aikupito.” 5 Ua vaai Arona i lenei mea, ona ia fausia ai lea o se fata faitaulaga i luma o le tamaʻi povi. Mulimuli ane ua valaau atu Arona: “O le a faia se tausamiga iā Ieova a taeao.” 6 Ua latou alapō i le aso e sosoo ai, ma ua latou fai taulaga i taulaga mū ma avatu foʻi taulaga faifaatasi. Ua mavae lea, ona nonofo lea i lalo o le nuu e aai ma inu. Ona latou tutū lea i luga ma fiafia.
Usitaʻi ma Maua Aogā Mai Tautoga a le Atua
12 Na vave ona gaoioi Ieova e faataunuu lana folafolaga e faatatau i le feagaiga sa faia ma tagata Isaraelu. Sa filifilia e Ieova ositaulaga e auauna i le faleʻie paia o le feiloaʻiga, ma na latou fesoasoani i tagata agasala ina ia toe iai se leleiga ma le Atua. Peitaʻi, e ui ua uma ona tuuina atu le nuu iā Ieova, ae e latou te leʻi tausisi i le tautoga sa faia, ma ʻfaatigā ai i Lē e Paia o Isaraelu.’ (Sala. 78:41) O se faaaʻoaʻoga, a o iai Mose i le mauga o Sinai, sa o latou lē onosaʻi ma mou atu lo latou faatuatua, ma manatu ua tuulafoaʻia i latou e Mose. O lea, na latou faia ai le faatusa o se tamaʻi povi poʻa auro, ma faapea ane: “Isaraelu e, o lo outou atua lenei, o lē na taʻitaʻia outou mai i Aikupito.” (Eso. 32:1, 4) Na latou ifo ma faia taulaga i lenā faatusa, ma manatu o loo latou faia se tausamiga iā Ieova. Ina ua silasila Ieova i gaoioiga sa faia e le nuu, ona ia fetalai lea iā Mose: “Ua vave ona latou liliuese mai i le ala lea na ou poloaʻi atu ai iā i latou e savavali ai.” (Eso. 32:5, 6, 8) Na amata mai i lenā taimi ona avea ma masaniga a tagata Isaraelu, le lē tausisi i tautoga e latou te faia iā Ieova.—Nu. 30:2.
(Esoto 32:9, 10) Ua fetalai atili mai Ieova iā Mose: “Ua ou vaai atu i lenei nuu ma ou iloa ai le faauamaaa o lenei nuu. 10 O lea, ia tuu mai aʻu, seʻi faaoo loʻu ita iā i latou ma ou te faaumatia i latou, ae ou te faia oe ma nuu tele.”
“O Ai e ʻAu ma Ieova?”
14 Na iloa lelei e tagata o le ifo i tupua o se agasala matuiā e inosia e Ieova. (Eso. 20:3-5) Peitaʻi, na vave ona latou tapuaʻi atu i se tamaʻi povi auro. E ui i lenei gaoioiga matilatila o le lē usiusitaʻi, ae na faasesēina e tagata Isaraelu i latou lava i le manatu e faapea na faaauau pea ona latou ʻau ma Ieova. E oo lava iā Arona na ia taʻua la latou tapuaʻiga i le tamaʻi povi auro o “se tausamiga iā Ieova.” O ā ni faalogona o Ieova i a latou gaoioiga? Na matuā tigā lona finagalo. Na fetalai atu Ieova iā Mose “ua leaga mea ua latou faia,” ma ʻua latou liliuese mai i le ala lea na poloaʻi atu ai iā i latou e savavali ai.’ O le “ita” tele o Ieova na manatu ai o ia o le a tafiesea atoatoa lenei nuu faatoʻā faavaeina o Isaraelu.—Eso. 32:5-10.
Saʻiliʻiliga Loloto mo ʻOa Faaleagaga
(Esoto 31:17) O le faailoga lenei i le va o aʻu ma le fanauga a Isaraelu mo se taimi umi, auā e ono aso na faia ai e Ieova le lagi ma le lalolagi, a o le aso lona fitu ua uma ai ana galuega, ona mālōlō ai lea o ia.’”
“E Iai le Taimi e Atofaina” mo Galuega ma Mālōlōga
4 Po o faaaʻoaʻoga o le galulue mamafa na faataatia e Ieova ma Iesu, e uiga atu e lē manaʻomia ona tatou mālōlō? E leai. Talu ai e lē vaivai Ieova, e na te lē manaʻomia la se mālōlōga. Peitaʻi, ua faapea mai le Tusi Paia, ina ua māeʻa ona foafoaina e Ieova le lagi ma le lalolagi, “ona mālōlō ai lea o ia.” (Eso. 31:17) O lea la, e uiga atu le mālōlō o Ieova i le taofi o ana galuega o le foafoaga, ae faaalu se taimi e fiafia ai i ana galuega na fai. E ui na galue mamafa foʻi Iesu a o iai i le lalolagi, ae na ia faamautinoa e iai se taimi e mālōlō ma aai faatasi ai ma ana uō.—Mata. 14:13; Luka 7:34.
(Esoto 32:32, 33) Afai e te faamagalo i a latou agasala, e lelei lea ae a leai, faamolemole, ia e soloiesea aʻu mai i lau tusi ua uma ona e tusia.” 33 A ua fetalai mai Ieova iā Mose: “O lē ua agasala mai iā te aʻu, ou te soloiesea o ia mai i laʻu tusi.
w87-E 9/1 29
Fesili Mai le ʻAufaitau
O le manatuaina po o le mauaina e se tasi o le finagalo malie o le Atua (ua tusia lona igoa “i le tusi o le ola”) e lē faapea ai ua mautinoa lona mauaina o le ola e faavavau, e peiseaʻī o se mea ua uma ona tuupōina pe e lē mafai ona toe suia. Na talosaga atu Mose iā Ieova e faatatau i tagata Isaraelu: “Afai e te faamagalo i a latou agasala, e lelei lea ae a leai, faamolemole, ia e soloiesea aʻu mai i lau tusi ua uma ona e tusia.” Na tali mai le Atua: “O lē ua agasala mai iā te aʻu, ou te soloiesea o ia mai i laʻu tusi.” (Esoto 32:32, 33) O lea, e tusa pe ua uma ona tusia e le Atua le igoa o se tasi i lana “tusi,” e mafai lava ona lē usitaʻi lenā tagata ma lafoaʻia lona faatuatua. Pe a tupu lenā mea, o le a “aveesea lona igoa mai i le tusi o le ola” e le Atua.—Faaaliga 3:5.
Faitau Tusi Paia
(Esoto 32:15-35) Ua mavae lea ona alu ifo lea o Mose mai i le mauga ma papamaa e lua o le Feagaiga i ona lima, ua tusia mea i itu uma e lua o papamaa. Ua tusia mea i le tasi itu ma le isi itu. 16 O papamaa o galuega ia a le Atua, ma o tusitusiga o tusitusiga ia a le Atua na vaneina i papamaa. 17 Ua faalogo Iosua i le pisapisaō o tagata ona o lo latou alalaga, ma ua ia faapea ane iā Mose: “O loo iai se pisapisaō o le taua i le togālauapi.” 18 A ua ia faapea atu: “E lē o le leo o pesepesega o le manumalo, E lē o le leo foʻi o pesepesega o le toʻilalo; Ae o le leo o isi pesepesega ia ou te faalogo atu i ai.” 19 Ua latalata atu o ia i le togālauapi, ma ua iloa atu le tamaʻi povi ma siva, ua oso le ita o Mose, ona ia togi loa lea i lalo o papamaa mai i ona lima, ma ua nutililii ai i le auvae mauga. 20 Ona ia tago lea i le tamaʻi povi na latou faia, ua susunu i le afi ma olopalaina seʻia oo ina matuā ninii lava, ona ia sasaa lea i luga o le vai ma faafeinu ai le fanauga o Isaraelu. 21 Ona fai atu lea o Mose iā Arona: “O le ā le mea ua faia e lenei nuu iā te oe, ua e faaoo ai lenei agasala tele iā i latou?” 22 Ua fai mai Arona: “Ia aua neʻi tupu tele le toʻasā o loʻu alii. Ua e silafia le nuu nei, ua leaga lava o latou faanaunauga. 23 Ua latou faapea mai iā te aʻu, ʻIa e faia se atua mo i tatou ma taʻitaʻia i tatou, auā o lenei tagata o Mose o lē na aumaia i tatou mai i Aikupito, e tatou te lē iloa po o le ā le mea ua tupu iā te ia.’ 24 Ona ou fai atu lea iā i latou, ʻO ai e iai ni ana auro? Ia latou aveese mai iā i latou ma aumai iā te aʻu.’ Ona ou togi lea i le afi ma maua mai ai lenei tamaʻi povi.” 25 Ua iloa e Mose ua vaogatā tagata, ona ua tuufau i latou e Arona, ma ua faia ma mea e faalumaina ai i latou i luma o o latou fili. 26 Ona tū lea o Mose i le faitotoʻa o le togālauapi ma faapea atu: “O ai e ʻau ma Ieova? Inā sau ia iā te aʻu!” Ona faapotopoto ane lea o atalii o Levi iā te ia. 27 Ua ia fai atu iā i latou: “O le mea lenei ua fetalai mai ai Ieova le Atua o Isaraelu, ʻ Ia taʻitasi ma sulu lana pelu i lona itu. Ia ui atu i le togālauapi ma feoaʻi mai i lea faitotoʻa i lea faitotoʻa, ia taʻitasi ma fasioti i lona uso, ia taʻitasi foʻi ma fasioti i lona tuaoi, ma taʻitasi foʻi ma fasioti i lana uō mamae.’” 28 Ua faia e atalii o Levi e pei ona fai atu ai Mose, ua fasiotia tane pe e tusa ma le tolu afe i lenā aso. 29 Ua faapea atili atu Mose: “Ia faamalosia outou i le asō mo le auaunaga iā Ieova, auā e taʻitasi outou ma faasagatau i lona lava atalii ma lona lava uso, ina ia aumaia ai e ia le faamanuiaga iā te outou i le asō.” 30 Ua oo i le taeao o le aso e sosoo ai ua faapea atu Mose i le nuu: “O outou, ua outou agasala i le agasala telē lava, o lea o le a ou alu aʻe ai iā Ieova. Atonu e mafai ona ou faia se mea e magalo ai a outou agasala.” 31 Ona toe foʻi atu lea o Mose iā Ieova ma faapea atu: “Auē, ua agasala i le agasala telē lava lenei nuu, ina ua latou faia se atua auro mo i latou lava! 32 Afai e te faamagalo i a latou agasala, e lelei lea ae a leai, faamolemole, ia e soloiesea aʻu mai i lau tusi ua uma ona e tusia.” 33 A ua fetalai mai Ieova iā Mose: “O lē ua agasala mai iā te aʻu, ou te soloiesea o ia mai i laʻu tusi. 34 O lenei, inā sau ia, ia e taʻitaʻi le nuu i le laueleele na ou fai atu ai iā te oe. O lea, e muamua atu laʻu agelu i luma iā te oe, ma o le aso ou te avatu ai le faasalaga, o le a ou faasalaina i latou ona o la latou agasala.” 35 Ona faaoo lea e Ieova o le malaia i le nuu, ona o le tamaʻi povi na latou faia e ala iā Arona.
OKETOPA 12-18
ʻOA TAUTELE MAI I LE AFIOGA A LE ATUA | ESOTO 33-34
“Uiga Matagofie o Ieova”
(Esoto 34:5) Ona afio ifo ai lea o Ieova i le ao ma faatasi ma ia i inā, ma taʻutino atu le suafa o Ieova.
it-2 466-467
Suafa
E faamaonia mai i le foafoaga o loo soifua le Atua, ae e lē o faailoa mai ai lona suafa. (Sl 19:1; Ro 1:20) O le iloa e se tasi o le suafa o le Atua, e tele atu mea e aofia ai nai lo o le tau ina iloa o lona suafa. (2No 6:33) E uiga atu i le matuā iloa lelei o Lē e ona lenā suafa, lea e aofia ai ana fuafuaga, galuega ma ona uiga e pei ona faailoa mai i lana Afioga. (Faatusatusa i le 1Tu 8:41-43; 9:3, 7; Ne 9:10.) O se faataʻitaʻiga o lenā manatu o Mose, o sē na iloa e Ieova lona igoa, pe na matuā iloa lelei e Ieova. (Eso 33:12) Na maua e Mose le faaeaga o le vaai i le faaaliga o le mamalu o Ieova ma faalogo atu i le ʻtaʻutinoina’ o lona suafa. (Eso 34:5) O lenā taʻutinoga e lē na o le toe taʻua o le suafa o Ieova, ae o se faamatalaga e faatatau i uiga ma galuega a le Atua. “O Ieova, o Ieova, o le Atua e alofa mutimutivale ma alofa fua, e telegese lona toʻasā ae e tele lona alofa faamaoni ma fai mea moni, e tausia le alofa faamaoni e oo atu i afe o tupulaga, e faamagalo mea sesē, o solitulafono ma agasala, ae e na te lē faasaoina o ē e agasala mai i faasalaga, e na te faasalaina atalii e oo foʻi i o latou atalii, ona o mea sesē a o latou tamā, e oo lava i le tupulaga e tolu ma le tupulaga e fā.” (Eso 34:6, 7) I se tulaga talitutusa, o le pese a Mose lea e taʻua ai le faaupuga “e ao ona ou folafola atu le suafa o Ieova,” o loo faamatala ai feutagaʻiga a le Atua ma tagata Isaraelu ma ona uiga.—Te 32:3-44.
(Esoto 34:6) Ua afio ane Ieova i ona luma ma taʻutino mai: “O Ieova, o Ieova, o le Atua e alofa mutimutivale ma alofa fua, e telegese lona toʻasā ae e tele lona alofa faamaoni ma fai mea moni,
Faamatalaina e Ieova o Ia Lava
O le mea muamua na faailoa mai e Ieova e faatatau iā te ia, e faapea o ia “o le Atua alofa mutimutivale ma le alofa fua.” (Fuaiupu e 6) E tusa ai o le faamatalaga a se tasi o faitofā o le Tusi Paia, o le upu Eperu ua faaliliuina i le “alofa mutimutivale,” o loo faatatau atu i le Atua i lona “alofa faapelepele, e pei ona alofa faapelepele o se tamā i lana fanau.” O le upu ua faaliliuina i le “alofa fua,” e fesootaʻi atu i se veape lea e “faamatala ai se tagata ua uunaʻia e lona loto, ina ia fesoasoani atu i se tasi o loo manaʻomia se mea.” E manino mai, e finagalo Ieova ia tatou iloa e na te tausia ona tagata tapuaʻi e pei ona tausia e mātua a latou fanau—i le alofa faapelepele ma le manatu mamafa mo o latou manaʻoga.—Salamo 103:8, 13.
Ona sosoo ai lea ma le fetalai mai o Ieova e faapea “e telegese lona toʻasā.” (Fuaiupu e 6) E lē itagofie o ia i ana auauna o i le lalolagi. Nai lo lea, e onosai o ia iā i latou, e onosaia o latou vaivaiga a o tuu atu le taimi iā i latou e suia ai o latou ala agasala.—2 Peteru 3:9.
Ua faaauau ona fetalai mai le Atua e ala i le faapea mai “e tele le alofa ma le faamaoni.” (Fuaiupu e 6) O le alofa o se uiga tāua ua atiina aʻe ai e Ieova se faiā e tumau i le va o ia ma ona tagata. (Teuteronome 7:9) E lē gata i lea, o Ieova o le puna o le faamaoni. E lē mafai ona faasesē atu o ia, pe faasesēina foʻi o ia. Talu ai o ia o le “Atua faamaoni,” e mafai la ona tatou faatuatua atoatoa atu i mea uma e fetalai ai o ia, e aofia ai ma ana folafolaga mo le lumanaʻi.—Salamo 31:5.
(Esoto 34:7) e tausia le alofa faamaoni e oo atu i afe o tupulaga, e faamagalo mea sesē, o solitulafono ma agasala, ae e na te lē faasaoina o ē e agasala mai i faasalaga, e na te faasalaina atalii e oo foʻi i o latou atalii, ona o mea sesē a o latou tamā, e oo lava i le tupulaga e tolu ma le tupulaga e fā.”
Faamatalaina e Ieova o Ia Lava
O le isi mea moni tāua e finagalo Ieova ia tatou iloa e faatatau iā te ia, e na te faamagalo i le “amiolētonu ma le solitulafono ma le agasala.” (Fuaiupu e 7) E na te “faamagalo sala” a tagata agasala ua salamō. (Salamo 86:5) I le taimi e tasi, e lē manatu māmā Ieova i mea leaga. Ua ia faamatala mai e faapea “e lē faasaoina lava e ia o ē agasala.” (Fuaiupu e 7) O le a faasalaina e le Atua e paia ma amiotonu, i latou o ē e agasala ma le loto i ai. E sau se aso o le a tauia ai i latou i a latou amioga sesē.
Saʻiliʻiliga Loloto mo ʻOa Faaleagaga
(Esoto 33:11) Ua fetalai mai foʻi Ieova iā Mose ae o loo fesagaʻi i laʻua e pei ona talanoa atu o se tamāloa i lona tuaoi. Pe a toe foʻi atu o ia i le togālauapi, e nofo pea i totonu o le faleʻie lana auauna o Iosua, le atalii o Nuno, o ia foʻi o le tautua.
(Esoto 33:20) Ua ia toe fetalai mai: “E lē mafai ona e vaai mai i oʻu mata, auā e lē mafai ona vaai mai lava se tasi iā te aʻu ma ola pea o ia.”
Manatu Tāua Mai le Tusi o Esoto
33:11, 20—Na faapefea ona talanoa “fesagaʻi” le Atua ma Mose? O lenei faaupuga o le fesagaʻi, e faaalia ai se talanoaga māfana na faia. Sa talanoa Mose ma le sui o le Atua ma mauaina ai faatonuga tuusaʻo mai iā Ieova e ala mai i lona sui. E leʻi vaai Mose iā Ieova, ona e ʻleai se tasi e vaai i le Atua ma ola pea.’ O le mea moni lava ia, e leʻi fetalai moni mai Ieova iā Mose. Ua taʻua i le Kalatia 3:19 e faatatau i tulafono e faapea: “Sa saunia e agelu na aumaia e le tautuu upu.”
(Esoto 34:23, 24) “O tausaga taʻitasi, e faatolu ona tutū tane uma ua iā te oe i luma o le Alii moni o Ieova, o le Atua o Isaraelu. 24 Auā ou te tuliesea nuu mai i ou luma, ma ou te faalautele lou laueleele; e leai se tasi e manaʻo i lou fanua a o e alu aʻe e vaai i fofoga o Ieova lou Atua e faatolu i le tausaga.
Ia Mautinoa ua Faamuamua Mea e Ao Ona Faamuamua
Sa poloaiina foi ina ia faatolu i le tausaga ona ō atu o tane uma lava o Isaraelu ma tagata liu lotu o le nuu i luma o Ieova. I le iloaina o le a maua ai e le aiga atoa aogā faaleagaga mai na faatasitasiga, na fuafuaina ai e le toatele o ulu o aiga ina ia ō faatasi ma a latou avā ma fanau. Ae o ai o le a puipuia o latou fale ma o latou fanua mai le osofaia e le fili a o toesea le aiga? Na folafola atu e Ieova: “E le manao foi se tagata i lou fanua pe a e alu ae faatolu i tausaga, ina ia iloa ai oe i luma o Ieova lou Atua.” (Esoto 34:24) Sa manaomia e tagata Isaraelu le faatuatua ina ia talitonu ai faapea, afai e latou te faamuamua manaoga faaleagaga, e leai se mea e latou te matitiva ai i le faaletino. Pe sa faamaoni Ieova i lana folafolaga? O le mea moni, sa faapena lava!
Faitau Tusi Paia
(Esoto 33:1-16) Ua toe fetalai mai Ieova iā Mose: “Inā e alu ia ma ō ese mai i inei, o oe ma tagata na e taʻitaʻiina ese mai i Aikupito, ma ō atu i le laueleele lea na ou tautō ai iā Aperaamo, Isaako ma Iakopo e faapea, ʻ Ou te avatua lenei laueleele i lau fanau.’ 2 Ou te auina atu se agelu e muamua atu iā te oe e tuliese tagata Kanana, o tagata Amorī, o tagata Hetī, o tagata Perise, o tagata Hivī ma tagata Iepusē; 3 ma outou ō atu ai i se laueleele e tafe ai le suāsusu ma le meli, ae ou te lē alu faatasi ma outou, ona o outou o tagata faauamaaa, neʻi oʻu faaumatia outou i le ala.” 4 Ua faalogo le nuu i le tala lē fiafia, ona faanoanoa ai lea o tagata; ma e leai se tasi o i latou na teuteu i ana teuga. 5 Ua toe fetalai mai Ieova iā Mose: “Ia fai atu i le fanauga a Isaraelu, ʻO outou o tagata faauamaaa. Ou te ono alu aʻe iā te outou e pei o le emo o le mata ma faaumatia ai outou. O lea, ia tuu ese a outou teuga, seʻia oʻu iloa ai po o le ā se mea ou te faia iā te outou.’” 6 Ona aveese lea e le fanauga a Isaraelu o a latou teuga uma i le Mauga o Horepa ma e leʻi toe faia lava. 7 A o Mose ua ia aveese lona faleʻie ma faatū i se mea e mamao ese mai i le togālauapi; ma ua ia taʻua ai o le faleʻie o le feiloaʻiga. O tagata uma e fia fesili atu iā Ieova, e ō atu i le faleʻie o le feiloaʻiga, o loo i tua o le togālauapi. 8 O so o se taimi e alu ai Mose i le faleʻie, e tutulaʻi uma tagata ma e taʻitasi ma tū i luma o le mea e ulu atu ai i lona faleʻie, ma pulatoʻa atu iā Mose seʻia ulu atu o ia i le faleʻie. 9 O le taimi lava e ulu atu ai Mose i le faleʻie, ona alu ifo lea o le ao faaniutū ma tū i le mea e ulu atu ai i le faleʻie, ma ua fetalai mai le Atua iā Mose. 10 A o vāai atu tagata i le ao faaniutū o tū i le mea e ulu atu ai i le faleʻie, ona tutulaʻi lea o le nuu ma ifo atu i ai, e taʻitoʻatasi i le mea e ulu atu ai i lona faleʻie. 11 Ua fetalai mai foʻi Ieova iā Mose ae o loo fesagaʻi i laʻua e pei ona talanoa atu o se tamāloa i lona tuaoi. Pe a toe foʻi atu o ia i le togālauapi, e nofo pea i totonu o le faleʻie lana auauna o Iosua, le atalii o Nuno, o ia foʻi o le tautua. 12 Ua faapea atu Mose iā Ieova: “Silasila mai, ua e fetalai mai iā te aʻu, ʻ Ia e taʻitaʻi ese lenei nuu,’ a o oe e te leʻi faailoa mai iā te aʻu po o ai e te aumaia ma te ō. Ua e fetalai mai foʻi, ʻOu te iloa oe i lou igoa ma ua fiafia foʻi loʻu loto iā te oe.’ 13 O lea faamolemole, afai ua fiafia lou finagalo iā te aʻu ia e faailoa mai ou ala, ina ia ou iloa ai oe, ma ia fiafia ai lou finagalo iā te aʻu. Ia e manatua foʻi o lenei nuu o ou tagata i latou.” 14 Ua ia fetalai mai: “E ta te ō faatasi ma ou te avatu iā te oe le mapusaga.” 15 A ua ia fai atu iā te ia: “Afai ta te lē ō faatasi, aua e te taʻitaʻi ese i matou mai i inei. 16 Po o le ā se mea e iloa ai ua fiafia lou finagalo iā te aʻu, o aʻu ma lou nuu? Pe e lē o lou faatasi mai ea iā i matou, ua faaesea ai aʻu ma lou nuu, mai i isi tagata uma i luga o le fogāeleele?”
OKETOPA 19-25
ʻOA TAUTELE MAI I LE AFIOGA A LE ATUA | ESOTO 35-36
“Faaauupegaina e Faia le Galuega a Ieova”
(Esoto 35:25, 26) O fafine uma e atamamai ua latou milo filo, ma ua aumaia filo na milo, o le filo lanu moana, o le fulufulu mamoe ua vali lanu violē, o mea ua vali mūmū sesega, ma le ʻie lino lelei. 26 O fafine uma foʻi ua uunaʻia o latou loto i le atamai ua latou milo filo mai i fulufulu ʻoti.
E Matuā Faamanuia e Ieova le Agaga Faataulaga
Sa sili ona fiafia le finagalo o Ieova, e lē ona o mea faaletino na foaʻi atu, ae ona o le agaga faataulaga o ē na lagolagoina le tapuaʻiga moni. Sa uunaʻia foʻi i latou e ofo atu lo latou taimi ma le malosi. Ua taʻua i le tala “o fafine uma e atamamai ua latou milo filo,” ma “o fafine uma foʻi ua uunaʻia o latou loto i le atamai ua latou milo filo mai i fulufulu ʻoti.” Sa avatu foʻi e Ieova iā Pesaleli “le atamai, ma le malamalama ma le poto, ina ia agavaa ai o ia e fai galuega eseese uma.” Sa faatumulia e Ieova Pesaleli ma Oliavu i le tomai na manaʻomia ina ia faia ai galuega uma na poloaʻia e fai.—Eso. 35:25, 26, 30-35.
(Esoto 35:30-35) Ona faapea atu lea o Mose i le fanauga a Isaraelu: “O lea ua tofia e Ieova o Pesaleli le atalii o Auri, le atalii o Huro, mai i le ituaiga o Iuta. 31 Ona ia faatumuina lea o ia i le agaga o le Atua, ina ia maua le atamai, ma le malamalama ma le poto, ina ia agavaa ai o ia e fai galuega eseese uma, 32 i le tusiaina o ata, i le faia o galuega i auro, o siliva ma ʻapamemea, 33 i le vaneina o maa ina ia faamau ai, ma galue i laau ina ia faia ai galuega atamai eseese. 34 Ua ia tuuina i lona loto le tomai e aʻoaʻo atu ai, o ia ma Oliavu le atalii o Aisamako, mai i le ituaiga o Tanu. 35 Ua ia faatumuina i laʻua i le atamai e faia ai galuega a se tufuga, o sē e suʻi teuteu, o sē e lalaga i filo lanu moana, i fulufulu mamoe ua vali lanu violē, i mea ua vali mūmū sesega, i ʻie lino lelei, ma sē e lalagaina mea, o tane ia ua la faia galuega eseese uma ma le tusiaina o ata.
Sa Taʻitaʻia e le Agaga o le Atua Auauna Faatuatua Anamua
6 O le mea na tupu iā Pesaleli, o lē na ola i vaitaimi o Mose, e tatou te aʻoaʻoina mai ai le tele o mea e faatatau i le auala e galue ai le agaga o le Atua. (Faitau le Esoto 35:30-35.) Sa tofia Pesaleli e taʻimua i le faia o meafale na manaʻomia mo le faleʻie paia. Pe sa iai muamua sona tomai i le auala e faia ai nei mea? Atonu, ae e foliga mai o lana galuega mulimuli talu ai nei, o le faia o piliki mo tagata Aikupito. (Eso. 1:13, 14) O le a faapefea la ona faataunuu e Pesaleli lona tofiga faigatā? ʻNa faatumuina o ia i le agaga o le Atua, ina ia maua le atamai, ma le malamalama ma le poto, ina ia agavaa ai o ia e fai galuega eseese uma, i le tusiaina o ata, ina ia faia ai galuega atamai eseese.’ Po o le ā lava le tomai masani atonu sa iai iā Pesaleli, ae na faateleina lenā tomai e ala i le agaga paia. E faapena foʻi Oliavu. Atonu e tele mea na aʻoaʻoina e Pesaleli ma Oliavu, auā e lē gata na la faatinoina o la tiute, ae na la aʻoaʻoina foʻi isi i mea e tatau ona fai. Ioe, sa uunaʻia e le Atua i laʻua ia aʻoaʻoina isi.
(Esoto 36:1, 2) “E galulue Pesaleli, o Oliavu atoa ma tane atamamai uma, o ē ua foaʻi mai i ai e Ieova le atamai ma le malamalama i ia mea, ina ia iloa le auala e faia ai galuega uma e fesootaʻi atu i le auaunaga paia, e tusa ma mea uma na poloaʻi mai ai Ieova.” 2 Ua aami e Mose o Pesaleli, o Oliavu ma tane atamamai uma, o ē ua foaʻi mai i ai e Ieova le atamai i o latou loto, o ē ua taʻitasi ma uunaʻia e lona loto e sau i le galuega ina ia galue ai.
Sa Taʻitaʻia e le Agaga o le Atua Auauna Faatuatua Anamua
7 O se isi faamaoniga e iloa ai na taʻitaʻia Pesaleli ma Oliavu i le agaga o le Atua, ona o le anagatā po o le umi ona faaaogā o mea na la faia. Pe tusa ma le 500 tausaga mulimuli ane ai, ae o loo faaaogā pea mea na la faia. (2 No. 1:2-6) I le lē pei o tagata fau meafale i aso nei, e leʻi mananaʻo Pesaleli ma Oliavu e viiviia i laʻua ona o a la galuega. Sa la mananaʻo ia tuuina atu le viiga uma iā Ieova.—Eso. 36:1, 2.
Saʻiliʻiliga Loloto mo ʻOa Faaleagaga
(Esoto 35:1-3) Mulimuli ane, ua faapotopoto mai e Mose le faapotopotoga atoa o le fanauga a Isaraelu ma faapea atu iā i latou: “O upu nei na poloaʻi mai Ieova ia faia: 2 E ono aso e fai ai galuega, a o le aso lona fitu o le aso paia lea iā te outou, o le sapati e mālōlō ai iā Ieova. E fasiotia se tasi na te faia galuega i lea aso. 3 Aua tou te tutu se afi i le aso sapati i so o se mea e tou te nonofo ai.”
Ia Iloa Ala o Ieova
14 Ia faamuamua mea faaleagaga. Sa lē tatau i le nuu o Isaraelu ona faamuamua manaʻoga faaletino ma lē amanaʻia ai manaʻoga faaleagaga. Sa lē tatau ona alu lo latou taimi atoa i le saʻilia o meafaitino. Sa faatulaga ese e Ieova taimi i vaiaso taʻitasi ua ia filifilia e paia, e faia ai gaoioiga o le tapuaʻiga i le Atua moni. (Esoto 35:1-3; Numera 15:32-36) I tausaga taʻitasi, e faatulaga ese ai se taimi e faapitoa mo faapotopotoga paia. (Levitiko 23:4-44) Na saunia ai avanoa e talanoaina ai gaoioiga mamana a Ieova, faamanatu ai ona ala ma faaalia ai le loto faafetai iā te ia mo lona agalelei. A o tapuaʻi atu le nuu i le Atua, e faatupuina ai lo latou matataʻu ma alolofa iā te ia ma fesoasoani iā i latou e savavali i ona ala. (Teuteronome 10:12, 13) Ua maua e auauna a Ieova i aso nei aogā mai upu moni faavae o loo maua i na faatonuga.—Eperu 10:24, 25.
(Esoto 35:21) Ua latou ō mai, ua taʻitasi ma uunaʻia e lona loto, ua taʻitasi foʻi ma matuā naunau i ai, ua latou aumaia a latou foaʻi e ofo atu iā Ieova mo le galuega o le faleʻie o le feiloaʻiga, mo mea uma e manaʻomia mo le tapuaʻiga ma ofu paia.
O le Tele o le Limafoaʻi e Aumaia ai le Olioli
Seʻi manatu i se lagona sa iai i tagata Isaraelu. E tele tupulaga na pagatia i le faapologaina i le sauā ma le lē tagolima. Nei la ua latou saʻoloto ma ua matuā faateleina a latou meafaitino. O le ā so latou lagona i le foaʻi atu o se vaega o na meafaitino? Sa latou ono manatu faapea sa latou galulue ina ia maua mai na meafaitino ma ua ia i latou le aiā e tausia ai na mea. Peitaʻi, ina ua valaaulia i latou e foaʻi atu ni meaalofa tupe e lagolago ai le tapuaʻiga moni, na latou faia faapea—ma e aunoa ma se faatalatū pe limamau! Sa leʻi galo ia i latou o Ieova na mafai ai ona latou maua na meafaitino. O lea, na latou matuā avatu ai le tele o a latou ario ma auro ma a latou lafu manu. Sa latou ʻlotomalilie.’ Na “uai i ai o latou loto.” Na “manatu i ai o latou loto.” O le mea moni sa o se foaʻi ma le loto ia Ieova.’—Esoto 25:1-9; 35:4-9, 20-29; 36:3-7.
Faitau Tusi Paia
(Esoto 35:1-24) Mulimuli ane, ua faapotopoto mai e Mose le faapotopotoga atoa o le fanauga a Isaraelu ma faapea atu iā i latou: “O upu nei na poloaʻi mai Ieova ia faia: 2 E ono aso e fai ai galuega, a o le aso lona fitu o le aso paia lea iā te outou, o le sapati e mālōlō ai iā Ieova. E fasiotia se tasi na te faia galuega i lea aso. 3 Aua tou te tutu se afi i le aso sapati i so o se mea e tou te nonofo ai.” 4 Ua faapea atili atu Mose i le faapotopotoga atoa o le fanauga a Isaraelu: “O le upu lenei ua poloaʻi mai ai Ieova e faapea, 5 ʻIa outou faia se foaʻi mo Ieova. Ia taʻitasi ma fai lana foaʻi mo Ieova e tusa ma lona lotomalie, e faia i auro, o siliva, o ʻapamemea, 6 o filo lanu moana, o fulufulu mamoe ua vali lanu violē, o mea ua vali mūmū sesega, o ʻie lino lelei, o fulufulu ʻoti, 7 o paʻu o mamoe poʻa ua vali mūmū, o paʻu o takesa, o laau o le setima, 8 o le suāuu mo le molī, o le suāuu pasama e fai ai le suāuu e faauu ai, ma le mea manogi lelei e mū, 9 o maa soama ma maa e teuteu ai le efota ma le ufifatafata. 10 “ʻIa ō mai o ē uma e atamamai ua iā te outou ina ia faia mea uma ua poloaʻi mai ai Ieova, 11 o lona uiga o le faleʻie paia ma ona vaega eseese, o ona ufiufi, o ona faamātau, o ona auivi laupapa, o ona pou faalava, o ona poutū, ma ona lagolago; 12 o le Atolaau ma ona amo, o lona ufiufi ma le ʻie puipui e vaelua ai; 13 o le laulau ma ona amo ma ona mea uma e faaaogā ai ma le falaoa e laulauina; 14 o le tuugāmolī e faamalamalama ai ma mea uma e faaaogā ai, ma ona molī ma le suāuu e faamalamalama ai; 15 o le fata faitaulaga e faamū ai mea manogi ma ona amo; o le suāuu e faauu ai, o le mea manogi lelei e mū, ma le ʻie pupuni i le faitotoʻa, o le mea e ulufale ai i le faleʻie paia; 16 o le fata faitaulaga e fai ai taulaga mū ma le mea valavala ʻapamemea, o ona amo ma mea uma e faaaogā ai; o le faatanoa ma lona tulaga; 17 o ʻie e tautau i le lotoā, o poutū ma ona lagolago; ma le ʻie pupuni o le faitotoʻa o le lotoā; 18 o pine o le faleʻie paia, o pine o le lotoā ma maea; 19 o ofu ua lelei ona lalagaina mo le auaunaga i le mea paia, o ofu paia mo Arona le ositaulaga, ma ofu o ona atalii o ē e auauna o ni ositaulaga.’” 20 Ona ō ese ai lea o le fanauga a Isaraelu mai i luma o Mose. 21 Ua latou ō mai, ua taʻitasi ma uunaʻia e lona loto, ua taʻitasi foʻi ma matuā naunau i ai, ua latou aumaia a latou foaʻi e ofo atu iā Ieova mo le galuega o le faleʻie o le feiloaʻiga, mo mea uma e manaʻomia mo le tapuaʻiga ma ofu paia. 22 Ua latou ō mai pea o tane faatasi ma fafine, o ē ua lotomalilie. Ua latou aumaia o pine teuteu, o tautaliga, o mama, o teuga a fafine, ma mea eseese ua faia i le auro, o lona uiga o i latou ia e taʻitoʻatasi ma faia lana lava taulaga lūlū i mea auro iā Ieova. 23 O i latou uma o ē ua iai o filo lanu moana, o fulufulu mamoe ua vali lanu violē, o mea ua vali mūmū sesega, o ʻie lino lelei, o fulufulu ʻoti, o paʻu mamoe poʻa ua vali mūmū ma paʻu takesa, ua latou aumaia ia mea. 24 O i latou uma ua faia a latou foaʻi i le siliva ma le ʻapamemea, ua latou faia le foaʻi mo Ieova, ma o i latou uma ua iai laau o le setima ua latou aumaia foʻi mo le galuega.
OKETOPA 26–NOVEMA 1
ʻOA TAUTELE MAI I LE AFIOGA A LE ATUA | ESOTO 37-38
“Fata Faitaulaga ma Auala na Faaaogā ai i le Tapuaʻiga Moni”
(Esoto 37:25) Ua ia faia le fata faitaulaga e fai ma mea e faamū ai mea manogi i laau o le setima. E kupita lona umi, e kupita foʻi lona lautele, e fai faatafafā, ma e lua kupita lona maualuga. E lālā mai i tua ona seu.
it-1 82 ¶3
Fata Faitaulaga
Fata faitaulaga e faamū ai mea manogi. Na faia foʻi le fata faitaulaga e faamū ai mea manogi (lea e taʻua foʻi “o le fata faitaulaga auro” [Eso 39:38]) i le laau o le setima, ma na ufitia le pito i luga ma ona itu uma i le auro. Na iai se teuteu auro e faataamilo i le pito i luga. O le telē o le fata faitaulaga e 44.5 senitimita (17.5 in.) faatafafā ma e 89 senitimita (2.9 ft) le maualuga, ma e lālā mai i tua ona “seu” mai i ona tulimanu e fā. Na iai foʻi ni mama auro se fā i lalo ifo o le teuteu auro, e taʻi lua i itu e lua o le fata faitaulaga. O nei mama na sulu ai amo na faia mai i le laau o le setima ma ufitia i le auro, e amo ai le fata faitaulaga. (Eso 30:1-5; 37:25-28) Na iai se mea manogi faapitoa na faamūina i luga o lenei fata faitaulaga e faalua i le aso, i le taeao ma le afiafi. (Eso 30:7-9, 34-38) O loo taʻua foʻi le faaaogāina o le ipu e mū ai mea manogi po o le salefu, ina ia faamū ai mea manogi, ma e foliga mai na faaaogāina nei mea i le fata faitaulaga e faamū ai mea manogi. (Le 16:12, 13; Epe 9:4; Fal 8:5; faatusatusa i le 2No 26:16, 19.) Na faatū le fata faitaulaga e faamū ai mea manogi i totonu o le faleʻie paia i luma o le ʻie puipui o le Mea e Sili Ona Paia, o le mea lea e taʻua ai lenei fata faitaulaga o loo “i luma o le atolaau o le feagaiga.”—Eso 30:1, 6; 40:5, 26, 27.
(Esoto 37:29) Ua ia faia foʻi le uu paia e faauu ai, o le mea manogi lelei e faamū ai, o le galuega a se tagata fai uu manogi.
it-1 1195
Mea Manogi
O le mea manogi paia lea na faatonuina e faaaogā i le faleʻie paia i le toafa, na faia aʻe i mea taugatā na foaʻi atu e le nuu. (Eso 25:1, 2, 6; 35:4, 5, 8, 27-29) Ina ua taʻu atu e Ieova iā Mose le auala e palu faatasi ai nei mea manogi, na ia fetalai atu: “Ia e aoao mai ni mea manogi: o mea sisina o le natafa, o le sekeleta, o le pulu kalipana ua manogi lelei ma le lipano lelei. E ao ona tutusa fua o ia mea. Ia e palu faatasi ia mea ma faia ai se mea manogi, o se paluga faafefiloi o mea manogi, o le galuega a se tagata fai uu manogi, e faamasima, e mamā ma o se mea paia. E te tuʻi i nisi o ia mea e fai ai se pauta lelei ma tuu se vaega i luma o le Atolaau i le faleʻie o le feiloaʻiga, ta te feiloaʻi ai. E ao ona avea ma mea e sili ona paia iā te outou.” Ina ia faamatilatila atu iā i latou le paia o lenei mea manogi ma e lē faaaogāina mo so o se fuafuaga, na fetalai atili atu Ieova: “O se tasi e faia se mea faapea ina ia sogisogi i lona manogi e tatau ona fasiotia o ia.”—Eso 30:34-38; 37:29.
(Esoto 38:1) Ua ia faia le fata faitaulaga e fai ai taulaga mū, i laau o le setima. E lima kupita le umi, ma e lima kupita le lautele, e faatafafā, ma e tolu kupita lona maualuga.
it-1 82 ¶1
Fata Faitaulaga
Fata Faitaulaga o le Faleʻie Paia. Ina ua faia le faleʻie paia, na faia ni fata faitaulaga se lua e tusa ai ma le faatonuga mai i le Atua. Na faia le fata faitaulaga e ofo ai taulaga mū (lea e taʻua foʻi “o le fata faitaulaga ʻapamemea” [Eso 39:39]) i le laau o le setima, ma e foliga i se pusa e pu totonu lea atonu e leai se ufiufi i le pito i luga ma lalo. O lona telē e 2.2 mita (7.3 ft) faatafafā, ma e 1.3 mita (4.4 ft) le maualuga ma e lālā mai i tua ona “seu” mai i ona tulimanu e fā. Na ufitia le fata faitaulaga atoa i le ʻapamemea. Na tuu se lagolago valavala e faia i le ʻapamemea “i le ogatotonu” o le fata faitaulaga i “lalo ifo” o lona augutu. Na iai mama e fā i pito e fā e lata ane i le lagolago valavala, ma e foliga mai o mama lava nei na faaaogā e sulu ai amo, lea na faia i le laau o le setima ma ufitia i le ʻapamemea, ina ia amo ai le fata faitaulaga. Atonu na tipi itu e lua o le fata faitaulaga ina ia iai se avanoa e sulu ai i totonu le lagolago valavala, ma na iai mama i itu e lua. E eseese manatu o tagata atamamai i lenei mataupu, ma e toʻatele e manatu atonu e valu mama na iai. O isi mama e fā na faaaogā e sulu ai amo, na pipii i le tino o le fata faitaulaga. Na iai foʻi isi mea na faia i le ʻapamemea e aofia ai ʻapa ma suō mo le lefulefu, o ipu faaofuofu mo toto o manu, o tui mo aano o manu, ma salefu.—Eso 27:1-8; 38:1-7, 30; Nu 4:14.
Saʻiliʻiliga Loloto mo ʻOa Faaleagaga
(Esoto 37:1) Ua faia e Pesaleli le Atolaau mai i laau o le setima. E lua ma le ʻafa kupita lona umi, e kupita ma le ʻafa lona lautele, ma le kupita ma le ʻafa lona maualuga.
(Esoto 37:10) Ua ia faia se laulau i laau o le setima. E lua kupita lona umi, e kupita lona lautele ma e kupita ma le ʻafa lona maualuga.
(Esoto 37:25) Ua ia faia le fata faitaulaga e fai ma mea e faamū ai mea manogi i laau o le setima. E kupita lona umi, e kupita foʻi lona lautele, e fai faatafafā, ma e lua kupita lona maualuga. E lālā mai i tua ona seu.
it-1 36
Setima
O le laau o le setima, e tele ona tala uumi maamaʻai e iai i ona lālā. E masani ona felavasaʻi nei lālā ma lālā o isi laau o setima o loo i tala ane, ma iʻu ai ina foliga lavelave ma mafiafia. E foliga mai o le māfuaaga lea e tele ai ina faaaogā le upu numera tele o le shit·timʹ i le Tusi Paia, e faasino atu i le laau o le setima. E oo atu le maualuga o le laau o le setima i le 6 i le 8 mita (20 i le 26 ft), ae e masani ona foliga mai e pei o se pupuvao. E vaivai ona lau ma e iai ona fuga sasama manogi manaia, lea e fua mai ai ni fua ninii. E ufitia e lona paʻu talatala uliuli se ogālaau malō ma mamafa lea e faigatā ona ʻati e iniseti. O nei mea e faatatau i le laau o le setima ma le faigofie ona maua i le toafa, na talafeagai lelei ai ona faaaogā e fausia ai le faleʻie paia ma mea na iai. Na faia i le laau o le setima le atolaau o le feagaiga (Eso 25:10; 37:1), le laulau mo falaoa e laulauina i luma (Eso 25:23; 37:10), o fata faitaulaga (Eso 27:1; 37:25; 38:1), o amo mo le amoina o nei mea (Eso 25:13, 28; 27:6; 30:5; 37:4, 15, 28; 38:6), o poutū mo le ʻie pupuni (Eso 26:32, 37; 36:36), o auivi laupapa (Eso 26:15; 36:20) ma o latou pou faalava (Eso 26:26; 36:31).
(Esoto 38:8) Ua ia faia le faatanoa ma lona tulaga i le ʻapamemea, e faaaogā ai faata a auauna fafine o ē na faia le galuega na faatulagaina, i le faitotoʻa o le faleʻie o le feiloaʻiga.
E te Silafia?
E ese mai i faata i aso nei, o faata i vaitaimi o le Tusi Paia sa faia mai i uʻamea ua uma ona faaiila, e pei o le apamemea, atonu foʻi o le kopa, siliva, auro, po o uʻamea e fefiloi ma le auro ma le siliva. O le taimi muamua na taʻua ai faata i le Tusi Paia, o le taimi na fausia ai le faleʻie paia, o le uluaʻi nofoaga mo tapuaʻiga a Isaraelu. Sa foaʻi atu e fafine faata ina ia fai ai le faatanoa paia ma lona tulaga. (Esoto 38:8) Atonu sa faaliu suāvai faata mo lenā fuafuaga.
Faitau Tusi Paia
(Esoto 37:1-24) Ua faia e Pesaleli le Atolaau mai i laau o le setima. E lua ma le ʻafa kupita lona umi, e kupita ma le ʻafa lona lautele, ma le kupita ma le ʻafa lona maualuga. 2 Ona ia ufiufi ai lea o totonu ma fafo i le auro māoʻi, ma ua ia faia se teuteu auro e faataamilomilo ai. 3 Ua ia tunu le auro ona fai ai lea o ni mama se fā mo le Atolaau ma tuu i luga aʻe o ona vae e fā, e lua mama i le tasi itu ma mama e lua i le isi itu. 4 Ua ia faia amo i laau o le setima ma ufiufi i le auro. 5 Ona ia sulu lea o amo i totonu o mama o loo i itu o le Atolaau, ina ia mafai ona amo ai le Atolaau. 6 Ona ia faia lea o le ufiufi i le auro māoʻi. E lua ma le ʻafa kupita lona umi ma le kupita ma le ʻafa lona lautele. 7 Ua ia faia foʻi o kerupi auro e lua. Ua ia fausia i auro e ala i le faaaogāina o le samala ma tuu i pito e lua o le ufiufi o le Atolaau. 8 Ua faia le tasi kerupi i le tasi pito, ma le isi kerupi i le isi pito. Ua ia faia kerupi i luga o le ufiufi i ona pito e lua. 9 Ua iai kerupi ma ua fālō i luga o la apaʻau e lua, ma faamalumalu i le ufiufi o le Atolaau i o la apaʻau, ma e faafesagaʻi o la mata. Ua faasaga i lalo mata o kerupi i le ufiufi. 10 Ua ia faia se laulau i laau o le setima. E lua kupita lona umi, e kupita lona lautele ma e kupita ma le ʻafa lona maualuga. 11 Ona ia ufiufi ai lea i le auro māoʻi ma faia ni ona teuteu auro e faataamilomilo ai. 12 Ua ia faia foʻi se augutu e tusa ma le lautele o le alofilima lona lautele e faataamilomilo ai, ma ia faia foʻi se teuteu auro e faataamilomilo i le augutu. 13 Ua ia tunu foʻi le auro ma fai ai ni mama se fā ma tuu mama i tulimanu e fā, o vae ia e fā o le laulau. 14 E felataʻi mama ma le augutu e fai ma lagolago i amo e amo ai le laulau. 15 Ua ia faia amo mai i laau o le setima ma ufiufi ai i le auro, ina ia amo ai le laulau. 16 Mulimuli ane, ua ia faia i le auro māoʻi o mea e faaaogā ua i luga o le laulau, o ipu mafolafola, o ipu, o ipu faaofuofu ma fagu ia e faaaogā e liligi ai taulaga o meainu. 17 Ua ia faia le tuugāmolī i le auro māoʻi. Ua ia faia foʻi le tuugāmolī e ala i le faaaogāina o le samala. Ua iai lona ʻau, o lālā, o ipu, o pona ma fuga, ma e fesootaʻi uma ona vaega uma. 18 E ono lālā e falala mai i le ʻau, e tolu lālā o le tuugāmolī i le tasi itu, a o le isi tolu lālā o le tuugāmolī e oso aʻe mai i le isi itu. 19 E tolu ipu e foliga e pei o ni fua o le sekati o loo i le lālā e tasi, e sosoo pona ma fuga; ma o le isi lālā e iai ipu e tolu e foliga e pei o le fua o le sekati, e sosoo pona ma fuga. O le auala lenei e falala mai ai lālā e ono mai i le tuugāmolī. 20 O luga o ʻau o le tuugāmolī ua iai ipu e fā e foliga e pei o fua o le sekati, ua sosoo pona ma fuga. 21 E falala mai lālā e lua mai i le pona i lalo ifo o ia lālā, e falala mai foʻi isi lālā e lua mai i le pona i lalo o ia lālā, e falala mai foʻi isi lālā e lua mai i le pona i lalo o ia lālā, auā o ia lālā e ono, e falala mai i le tuugāmolī. 22 O pona ma lālā ua falala mai i le ʻau o le tuugāmolī. Ua faia uma i le auro māoʻi e tasi e ala i le faaaogāina o le samala. 23 Ua ia faia i le auro māoʻi ona molī e fitu ma ona iofi ma ona salefu. 24 Ua ia faia i le taleni o le auro māoʻi le tuugāmolī ma mea uma e faaaogā ai.